GÉNESIS 9
9
Diosqa Noewan uj tratota ruwan
1Dios bendicerqa Noeta wawasnintawan, nispa: Miraychej ashkhayaychejtaj, mundomantaj junt'aychej. 2Qankuna manchachinkichej kharkatichinkichejtaj, tukuy laya mundopi kaj chhika animalesta. Jinallataj tukuy phawaykachajkunata, jallp'a patapi kajkunata, mar qochapi kajkunatapis manchachinkichej, qankunaj atiyniykichejpi kanqanku. 3Atinkichej mikhuyta tukuynin animalesta, jinallataj q'omer qhorastapis atisqaykichejman jina. Noqa qoykichej chay tukuyninta. 4Uj imallata mana mikhunaykichejchu tiyan: Yawarniyoj aychata, imaraykuchus chay yawarpi kausayqa kashan. 5Noqaqa cuentata mañasaj sapa uj runamanta, animalesmantapis qankunaj yawarniykichejta jich'ajtinku. Sapa uj runamanta cuentata mañasaj runa masimpa kausayninmanta. 6Sichus mayqen uj runata wañuchenqa chayqa, payta waj runa wañuchillanqataj, imaraykuchus runaqa Diosman rijch'ayninman jina ruwasqa. 7Qankunaqa ashkhayaychej, miraychej, mundomantaj junt'aychej.
8Dios nillarqataj Noeman, wawasninmanwan: 9Qhawariychej, noqa qankunawan uj tratota ruwasaj, jinallataj qhepaman mirayniykichejwampis. 10Qankunawan kaj animaleswampis jinallataj kanqa; mayqenkunachus arcamanta llojsinku: P'isqos, uywas, monte animales, tukuy animales mundopi kaj chhika. 11Qankunawan ruwasqay tratoyqa manapuni jayk'ajpis uj jinayanqachu: Manaña runasta, nitaj animalestapis ujtawan yakuwan chinkachisajchu. Manaña jatun musphay para kanqachu jallp'ata p'ampaykunampaj. 12Kaymin chay señalqa tratota ruwasqaymanta qankunawan wiñaypaj, jinallataj qankunawan kajkuna tukuy animaleswampis. 13K'uychiyta churani phuyuspi, chaytaj kanqa señal tratota mundowan ruwasqaymanta. 14Maypachachus noqa phuyusta kachamusaj jallp'a pataman chayqa, k'uychiy phuyuspi rikhurenqapacha. 15Chaypacha yuyarikusaj uj tratota qankunawan ruwasqayta, jinallataj animaleswampis, manaña jayk'ajpis ni ima yaku jamuspa kausajkunata chinkachenqachu. 16Maypachachus k'uychi phuyuspi rikhurenqa chayqa, qhawarisaj, yuyarikusajtaj uj tratota wiñaypaj ruwasqayta tukuy runawan, tukuy animaleswan jallp'a patapi kajkunawan. 17Kay ari, uj señal, tratota ruwasqaymanta runawan, jinallataj jallp'a patapi tukuy animaleswampis. Ajinata Diosqa parlarikorqa Noewan.
Noé machaykun
18Noepa wawasnin arcamanta llojsejkunaqa kaykuna kanku: Sem, Cam, Jafet ima. Camqa Canaampa tatan karqa. 19Kay kinsa karqanku Noepa wawasnin; paykunaj mirayninkutaj mundoman junt'arqa.
20Noeqa jallp'ata llank'ayta qallarerqa, chaypi uvasta poqocherqa. 21Uj kuti uvamanta vinota ujyaykorqa, machaykorqataj. Jinamanta payqa machasqa q'alapacha toldon ukhupi wijch'urpayakorqa. 22Canaampa tatan wawan kajtaj, tatanta q'alallata rikuytawan rispa wauqesninman willamorqa. 23Semwan Jafetwantaj usqhay usqhayta rispa tatankoj p'enqayninta uj p'achawan qhataykorqanku lijranmantapacha, sumajta mayt'uykorqanku tukuy q'ala kayninta. Tatankoj q'ala kayninta ama rikunankupajtaj, qhepaman rerqanku wajnejta qhawaspa.
24Noetaj rijch'ariytawan, machasqamanta ch'aki sonqoman kutiriytawan, yacharqa sullk'a kaj wawa imatachus ruwasqanta. 25Nerqataj: Canaanqa maldicisqa kachun; wauqesnimpa kamachisnimpa kamachin kachun.
26Noeqa nillarqataj: Señor Diosniy bendicichun Semta, Canaantaj kachun kamachin. 27Dios astawan Jafetta jatunchachun, Sempa toldosnimpi tiyachuchun, Canaantaj kamachin kachun.
28Jatun musphay paraj qhepanta Noeqa kausarqa kinsa pachaj phishqa chunkayoj watasta. 29Chaymanta Noé wañuporqa isq'on pachaj phishqa chunka watasniyoj.
वर्तमान में चयनित:
GÉNESIS 9: QCHSB
हाइलाइट
शेयर
कॉपी
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.