Jean 13
13
Cecoc e kisisipatcisitenatc owitcewakana
1Aci kekatc aiamihe makocaniwonikopan, Pâque ka icinikatek. Aci kiskeritamokopan Cecoc e otcitciparinik kitci nakatak askiriw, kitci ki natawapamatc Otawiwa. Mocak ki sakihepan otirinima ota askik, kaie ki wapatahew e sakihatc nac mamitcitc kicikarike.
2Kaskina tapickotc nipekwewakopan Cecoc acitc owitcewakana. Aci ki ickwa cikimikokopan Matci Manitowa anahwe Judas, Simo Iscariote anihi okosa, kitci wecimatc Cecoca. 3Kiskeritamopan Cecoc Kice Manitowa e ki pe iciticohikotc, minawatc nikotin kitci kiwe natawapamatc, kaie kaskina e ki mirikotc Otawiwa kitci tiperitak.
4Mekwata e taci apitcik e mitcisotcik, pasiko Cecoc. Ki maninam otakop okitc ka apatcitaspan. Pakiwaniciapiriw ki opokotehoniw.#13.4 Pakiwaniciapiriw ki opokotehoniw: Aniheriw ka itotisketc e icihotc, tarasak mia arotakan kitci ki icihotc. 5Minawatc ki sikinam nipiriw kasitcitce orakanik. Ekoni e ici kisisipatcisitenatc owitcewakana kaskina, minawatc e ki pekositenatc, aniheriw e ki apatcitatc pakiwaniciapiriw ka ki pokotehowaketc. 6Nac iti takociniw neta Simo Pien ka ici apiritci. Aci itiko: “Teperitcikein, kir ia ni, ki ka kisisipatcisitenin?”
7Aci itew Cecoc: “Nama anotc ki nisitoten ohwe ka totaman. Kecko aric nanake ki ka nisitoten.”
8“Nama! Nama wiskat ki ka kisisipatcisitenin!” itew anahwe Pien.
Itew Cecoc: “Kecpin aka kisisipataiane kisit, nama awocamec ki ka ki witcewin.”
9Itiko: “Aka tca tepirak nisit kisisipata, Teperitcikein! Nitcitci kaie nictikwan kisisipata!”
10Aci itew Cecoc: “Awik aci e ki kisisipasotc kaskina e itikititc, nama arimatc minawatc kata kisisipaso, tepirak ositik. Nama meka aci ometciwiw. Aci anotc nama ki ometciwinawaw, nama aric kaskina e taciekw.” 11Kiskerimekopan meka Cecoc awiriw ani mia ke wecimikotc. Ekoni wetci ki itetc: “Awik neta e taciekw ometciwiw.”
12Ka ickwa kisisipatcisiteniwetc Cecoc, ki piskam otakop. Kiapatc ki orapiw. Itew tca minawatc: “Ki nisitotenawaw ia anihe ka ki totaman kirawaw otci? 13‘Kiskinohamake iriniw’ acitc ‘Teperitcikein’ kit icinikacinawaw. Ki tapwanawaw e icinikaciekw. Ekoni meka e iteritakosian. 14Aci tca nin Ka Tiperimitakok kaie Kikiskinohamake irinimiwaw e ki kisisipatcisitenitakok, peikon kaie kirawaw ki ta kisisipatcisitenitonawaw.#13.14 ki ta kisisipatcisitenitonawaw: Ani apitc tepirak arotakan mawotci aka ka kicteritakositc kisisipatcisitenekopan ko iriniwa kirawe e kicteritakosiritci. Wapatahiwepan tekaci e tipaterimitisotc e kisisipatcisiteniwetc. Ekoni wetci ki mamiskateritakonikopanen aniheriw e itotiskespan Cecoc, kirika e kiskinohamawaspan owitcewakana kaie wirawaw kitci ici tipaterimitisoritci e atoskectakeritci. 15Ki ki wapatahitinawaw ke totamekw, kaie kirawaw miro totatoekw! 16Ohwe ka witamatakok, tapwe ni icinakon: nama kirawe kicteritakosiw atoskectake iriniw patok anihi ka atoskectawatc. Peikon awik ka pe iciticohwakaniwitc kitci tipatcimotc nama kirawe kaie wir kicteritakosiw patok anihi ka pe iciticohikotc. 17Aci anotc ki kiskeritenawaw anihe. Ki ka caweritakosinawaw kecpin itotiskeiekwe.”
18“Nama kaskina e taciekw kit arimomitinawaw. Ni kiskerimawok aniki ka ki orapamakik. Actew aric kitci pe icinakok anihe ka itasinatek Kice Manito Omasinahikanik: ‘Anahwe ka ki witci mitcisomitc ni ki atimikapowictakw.’ 19Aci ki witamatinawaw anihe anotc epwamoci isparik. Isparike tca, ekoni ke ki otci tapwetowiekw Nin ni tan e iteritakosian. 20Ohwe ka witamatakok, tapwe ni icinakon: kecpin awik tapwetowate aniheriw ke iciticohwimaki, kaie nin ni tapwetakw. Kecpin tca tapwetowite, tapwetawew kaie aniheriw ka ki pe iciticohwimitc.”
Witam Cecoc kitci wecimikotc Judawa
(Natawapata kaie Matio 26.20-25; Mark 14.17-21; Luc 22.21-23)
21Ka ickwa itetc aniheriw Cecoc, ki micta arimeritam. Aci itew: “Tapwe ohwe ka witamatakok: peikw neta e taciekw ni ka pakiterimikw.”
22Kanawapamitowok aniki Cecoc owitcewakana, tekaci aka e kiskeritakik awiriw mia ka arimomakaniwiritci. 23Peikw neta owitcewakana, anihi ka sakihaspan Cecoc,#13.23 Peikw neta owitcewakana, anihi ka sakihaspan Cecoc: Enko natake Jean e arimomitisotc, anahwe mia ka ki masinahak ohweriw tipatcimowiniw. ekota neta opimera e ici apiritci ka ici apitc. 24Aci nitcictako Simo Piena, kitci kokwetcimaritci awiriw ani ka wi arimomatc.
25Anahwe owitcewakana nowectaw e kokwetcimatc Cecoca: “Teperitcikein, awin na?”
26Itew Cecoc: “Ni ka akotcimaw memantcic pakwecikan ota orakanik. Anahwe ke mirak, enko na ke wecimitc.” Aci memantcic pakwepitew pakwecikana Cecoc. Akotcimew orakanik. Ekoni e ici miratc Judawa, Simo Iscariote okosa. 27Kotc ka otapinatc Judas anihi pakwecikana, aci Matci Manitowa#13.27 Matci Manitowa: Satan icinikatakaniwiw Matci Manito ota. pitciteheckako. Aci Cecoc itew: “Anihe ka actek kitci totaman, wewepitwa.”
28Neta owitcewakana ka tacikeritci nama otci peikw neta e taciritci nisitotamiriw wetci itetc aniheriw Cecoc. 29Wir Judas kanaweritamokopan coriawociriw. Ekoni wetci atita iteritamwakopanen: “Wi witamawetake kitci nta otapinamiritci kekociciriw, aci e natciparinik kitci makocaniwonik, kekotc kitci nta cawerimakaniwiritci ka kitimakisiritci.”
30 Judas ki otapinew anihi pakwecikana, tecikotc e iti orowitc neta mikiwamik, aci e tipiskarikopanen.
Ocki irakonikewin: kitci sakihitonaniwok
31Ka ickwa orowiritci anihi Judawa, aci itew Cecoc: “Aci anotc nokoniw oticperitakosiwin anahwe Ka ki pe iriniwihitisotc, kaie Kice Manito oticperitakosiwin nokoniw, anihi otci Ka ki pe iriniwihitisoritci. 32Kecpin kaie nokonike e icperitakositc Kice Manito anihi Ka ki pe iriniwihitisoritci opimatisiwinik, wir tipirawe Kice Manito kata nokotaw e icperitakosiritci. Tecikotc kaie kata totam. 33Ninitcanicak, memacic tepirak kiapatc ki ka witci tacikemitinawaw. Ki ka nantowapaminawaw, nama aric ki ka ki pe icanawaw nte ke icaian. Enkweriw aci ka ki itakik kaie wirawaw kotakihik cota iriniwok.”#13.33 kotakihik cota iriniwok: Peikon kata ki ici nisitotakon: cota okimawok.
34“Ocki irakonikewin ki miritinawaw: sakihitokw. Mia nin ka ki ici sakihitakok, ekoni kaie kirawaw ke ici sakihitoekw. 35Kecpin tca sakihitoekwe, ekoni aci kaskina awik kitci kiskerimitakw kirawaw niwitcewakanak, tapwe e witcewiekw.”
E nikan witak Cecoc kitci itikotc Piena aka e kiskerimikotc
(Natawapata kaie Matio 26.31-35; Mark 14.27-31; Luc 22.31-34)
36Simo Pien itew: “Teperitcikein, tante e icain?”
Cecoc itew: “Nama anotc ki ka ki pe nosanehwin nte e icaian. Aric nanake ki ka nosanehwin.”
37Pien itew: “Teperitcikein, kekwan aka tecikotc ke otci nosanehitan? Aci nit ickwa aikan kitci pakiteritaman nipimatisiwin kir otci!”
38Cecoc naskamawew, e itatc: “Aci ia tapwe kit ickwa aikan kitci ki pakiteritaman kipimatisiwin nin otci? Tapwe icinakon ohwe ka witamatan: epwamoci kitotc nape pakahakwan, aci nictowaw ki ka ickwa itwan aka e kiskerimiin.”
वर्तमान में चयनित:
Jean 13: ATMK
हाइलाइट
शेयर
कॉपी
Want to have your highlights saved across all your devices? Sign up or sign in
Canadian Bible Society, 2014
