Jean 17
17
Cecoc e aiamihectamowatc owitcewakana
1Ka ickwa ni aitetc Cecoc, ki icpapiw wakwek e aiamihatc, e tca itetc: “Notawi, aci takociparin anihe ka itactaipan kitci pe iciwepak. Wapatahiwe oticperitakosiwin Kikosis, kitci ki tca wapatahiwetc kir kiticperitakosiwiniw. 2Ki ki meka miraw kitci tiperimatc kaskina iriniwa ota askik, kitci ki miratc kakike pimatisiwiniw kaskina ka ki acotamawotc kitci nosanehikotc. 3Ekoni e icinakok e kakike pimatisinaniwok: e kiskerimikoin kir e Kice Manitowiin e peikociin, acitc e kiskerimakaniwitc Cecoc Krist, anahwe ka ki pe iciticohwotc. 4Ni ki wapatahiwan kiticperitakosiwin ota askik, aci e ki kictaian anihe otamirowin ka ki miriin kitci itotiskeian. 5Aci tca anotc ki nataweritamatin, Notawi, kitci pe acotamawiin kiapatc anihe icperitakosiwin e nta witci tacikemitan, peikon e ici icperitakosiapan ka witci tacikemitapan epwamoci takok ohwe aski.”
6“Ni ki witcihawok iriniwok kitci ki kiskerimiskik wewerita, aniki ota askik ka ki acotamawiin kitci mihakik. Kir tipirawe kitirinimak iteritakosipanak. Minawatc ki ki pe acotamawin kitci mihakik, kaie ki sapitamok kititewiniw. 7Aci kiskeritamok kir e otciparik kaskina ka ki pe ici miriin. 8Ni ki mirawok meka aniheriw itewiniw ka ki pe miriin kitci witamawakik kirika ki tapwetamok. Ki nisitowinamok kir kititawinik tapwe e ki pe otcian kaie ki tapwetamok kir e ki pe iciticohwiin ota askik.”
9“Nit aiamihectamowawok aniki nitirinimak. Nama nit aiamihectamowawok iriniwok ka nosanetatcik matci meskanariw ota askik; tepirak aric aniki wirawaw ka ki pe acotamawiin nit aiamihectamowawok. Enko meka aniki kir kitirinimak. 10Kaskina ka tiperimakik kaie kir ki tiperimawok.#17.10 Kaskina ka tiperimakik kaie kir ki tiperimawok: Mia itemakan: Kaskina e ici tataman nin, kaie kir anihe; peikon kaskina kir e ici tataman, kaie nin anihe. Ekoni ka otci kiskeritakok niticperitakosiwin, wirawaw opimatisiwiniwak. 11Nama awocamec ni ka tacikan ota askik, aric wirawaw kiapatc ota kata tacikewok. Nin ki ka natawapamitin, Notawi, kir ka kitcitwawisiin. Nanakatcihik nitirinimak, kimackawisiwin kitci totaman, anihe peikon mackawisiwin ka ki pe acotamawiin, kitci tca iteritakositcik mia peikw awik, mitowi kaie kirano peikw e iteritakosiikw. 12Mekwata ka witci tacikemakik ni nanakatcihataik, mocak e apatcitaiapan kimackawisiwin, anihe mackawisiwin ka ki miriin. Ni ki nakatawerimawok. Nama kaie otci peikw e tacitcik ki otci onicin, patoc anahwe tepirak ka acterikipan kitci onicik, kitci ki tca otcitciparik anihe e itactekipan Kice Manito Omasinahikanik kitci iciwepak.”
13“Aci ki ka natawapamitin. Wetci aiteian kiapatc anotc mekwata e witci tacikemakik ota askik, nimireritamowiniw kitci ki takonik otehiwak, tekaci kitci mireritakik. 14Ni ki mirawok kititewiniw, kaie ki cikerimikowok iriniwa ka nosanetaritci matci meskanariw, osam aka e tiperitakositcik ota askik, mitowi nin aka e tiperitakosian. 15Nama ki pakoserimitin kitci orowitiratcik ota askik, aric ma kitci nanakatcihatcik aka kitci matci totakotcik Ka Matcatikosiritci.#17.15 Ka Matcatikosiritci: Enko na Matci Manito. 16Nama tiperitakosiwok ota askik, mitowi nin aka e tiperitakosian ota askik.”
17“Mirik kaskina kitci tiperitamowotc opimatisiwiniwaw, tekaci kitirinimak kitci iteritakositcik,#17.17 Mirik kaskina kitci tiperitamowotc opimatisiwiniwaw, tekaci kitirinimak kitci iteritakositcik: Peikon kata ki ici nisitotakon: tipan arik tekaci kitci tiperitaman opimatisiwiniwaw. kitapwewin kitci totaman. Enko meka ohwe kitapwewin: kititewin. 18Ni ki iciticohwawok ota askik, mitowi kir e ki pe iciticohwiin ota askik. 19Ki pakitinamatin kaskina nipimatisiwin, wirawaw otci, kitci ki tca pakiticowatakik opimatisiwiniwaw, kir misiwe kitci tiperitaman.”
20“Namaiew tepirak wirawaw anotc nitirinimak ka aiamihectamowakik, aniki aric kirika ke tapwerimitcik ickwa petamowate Mirwatcimowiniw ke witamawakotcik anahweriw anotc ka tapwerimitcik, kaie wirawaw nit aiamihectamowawok. 21Ni pakoserimon kaskina peikw kitci iteritakositcik. Notawi, mocak kitci witcewitakok, mitowi kir e witcewiin, kaie nin e witcewitan; enko tca ni peikw kaskina kitci iteritakositcik, kitci ki otci tapweritakik iriniwok e ki pe iciticohwiin ota askik. 22Ni ki mirawok icperitakosiwiniw, aniheriw peikon kir ka ki pe miriin, kitci ki tekaci peikw iteritakositcik, mitowi kirano peikw e iteritakosiikw. 23Nin ni witci tacikemawok otehiwak kirika kir ki witci tacikemin nitehik.#17.23 Nin ni witci tacikemawok otehiwak kirika kir ki witci tacikemin nitehik: Peikon kata ki ici nisitotakon: Nin e witcewakik kirika kir e witcewiin. Ekoni aci tekaci peikw ke ki iteritakositcik. Ekota ni ke otci kiskeritakik iriniwok tapwe e ki pe iciticohwiin kirika kir e sakihatcik, kotc e asitci sakihiin.”
24“Notawi, ki ki mirin nitirinimak, kirika ni nataweriten kitci witci tacikemitcik nte ke ici tacikeian kitci ki wapatakik niticperitakosiwiniw, anihe icperitakosiwin ka ki miriin, osam meka e ki sakihiin epwamoci kiceritcikatek ohwe aski. 25Notawi, kir mocak icikowisk ka totaman kekocic, nama ki kiskerimikok iriniwok ka nosanetatcik matci meskanariw ota askik. Aric nin ki kiskerimitin. Kiskeritamok nitirinimak kir e ki pe iciticohwiin. 26Ni ki witcihawok kitci kiskerimiskik e iteritakosiwotc. Awocamec kaie ni ka aitotiskan kitci kiskerimiskik, kitci ki mockineckakotcik kisakihiwewiniw, mia e ici sakihiin, kaie nin kitci tacikeian otehiwak.”
वर्तमान में चयनित:
Jean 17: ATMK
हाइलाइट
शेयर
कॉपी
Want to have your highlights saved across all your devices? Sign up or sign in
Canadian Bible Society, 2014
