Jɔ̀ɔŋ 17
17
Wo Jisɛ̀ naŋ zoolò wèè anyùùŋ màŋjɛ̀wɛ̀uŋ nyàŋ
1Nààŋ wo Jisɛ̀ naŋ kpɛ̀ɛ̀yɛ̀ gbòà koɓɛ̀ anyùùŋ màŋjɛ̀wɛ̀uŋ nyàŋ, wò naŋ gè fɛ̀ɛ̀ dìì yèè wò naŋ yɛ̀mɛ̀ e tèèngà ko àìjɛnɛ̀ŋ wò naŋ zoolò wààŋ, “Dèda, e teengaà è haì wèè maŋ kìɛ̀ŋ miàim wo Jɔ̀àfelaa mɔɔ̀ŋ e jòòwo, wèè kɛ̀ miàŋ pɛɛ mìŋ naum ɓɛ̀nɛ̀ŋ jòòwo. 2Mùŋ naim kìɛ̀ŋ e gààŋ anyuùŋ kpùuŋ nyàŋ gbiŋ diɛŋ, wèè ka kìɛ̀ŋ wɔŋ nyiiŋ gèe gò jùà koɓɛ̀ anyùùŋ nyaŋ gbiŋ mùŋ naim kiɛ̀ŋ nyaŋ. 3Yèè wɔŋ nyiiŋ gèe gò jùàa nàŋ yaà, wèè aum nyìmàŋ kɛ̀ muàŋ nàŋ yaà wo Dàyà tɔ̀ɔ̀nyaàaŋ, yèè aŋ nyìmàŋ miàim wo Jisɛ̀ Kulaì, wo yèɔ mùŋ naŋ tùɔ̀ŋ wɔ. 4Kàum joowò anyùùŋ nyaŋ tɛɛ e ɗuunyaŋ lɛɛ̀, nààŋ mìŋ naŋ nyɛ̀nɛ̀ŋ e tòmoɛ̀ gbiŋ mùŋ naim kiɛ̀ŋ wèè ka nyɛ̀nɛ̀ŋ lɛ. 5Weètii Dèda, kìɛ̀im ɓɛìŋ e dɛ̀ɛ̀kɛɛ̀ mùŋ naim wa kiɛ̀ŋ lɛ ko tɔɔtuì paŋgàà e ɗuunyaàŋ naŋ wa nɔ̀ŋ bàne niŋ nɛ̀.
6“Mùŋ naim wa kìɛ̀ŋ anyùùŋ wèè aim nɔ̀ŋ maŋjɛ̀wɛ e ɗuunyaŋ lɛɛ̀, yèè mìŋ naŋ tɔɔ̀ kɛ̀ ɓòò nàŋ yààùm muàum Dayà koɓɛ̀ anyùùŋ nyaŋ e ɗuunyaàŋ. Muàŋ nàŋ kanaŋ wa anyùùŋ nyɛɛ̀ŋ, kɛɛ mùŋ naim nyiŋ wa kiɛ̀ŋ, yèè àŋ naum jɔ̀ɔ̀lɔ̀ dìì. 7Àŋ nyìmàŋ kɛ̀ muàŋ naim kìɛ̀ŋ e nɛ̀ɛŋ gbiŋ mìŋ kuwa lɛ̀. 8Mìŋ naŋ wòò anyùùŋ màŋjɛ̀wɛ̀im nyàŋ e yèɛ mùŋ naim woò lɛ, yèè àŋ naŋ niŋ jàà kùàŋ dìì. Àŋ nyìmàŋ kɛ̀ tɔɔɓaa ko nɛ̀ɛ̀ŋ muìŋ mìŋ yewe, e kìlà àŋ naŋ haawè kɛ̀ muàŋ naim tùɔ̀ŋ.
9“Mìŋ yààùm zoolo Dèda weè nyiŋ. Miŋ fè zoolo wèè ànyùùŋ nyaŋ è ɗuunyaàŋ. Muàŋ nàŋ kanaŋ anyùùŋ màŋjɛ̀wɛ̀im nyàŋ, weètii mìŋ yaà zoolo weè nyiŋ. 10Muàŋ nàŋ kanaŋ e yèɛ gbiŋ mìŋ kuwa lɛ̀, yèè miàŋ nàŋ kanaŋ e yèɛ gbiŋ mùŋ kuwa lɛ̀, e kìlà àŋ doim nàŋ hìɛ̀ŋ e jòòwo e deè mɔ̀ɛ̀ diɛŋ. 11Dèdà Nɛɛmaàŋ, miŋ fè ɓɛìŋ ànyùùŋ nyaŋ tɛɛ e ɗuunyaàŋ. Mìŋ yaà naàŋ hìnìè ko nɛ̀ɛ̀ŋ muìŋ. Kɛɛ anyùùŋ màŋjɛ̀wɛ̀im nyàŋ kòò àŋ yaà nɔŋ e ɗuunyaàŋ. Yɛ̀mɛ̀ nyiŋ diɛŋ e yìwìà e dèè e gaàŋ gbee mɔ̀ɛ̀ mùŋ naim kiɛ̀ŋ lɛ, wèè kɛ̀ aŋ gbiŋ aŋ nɔ̀ŋ anyùùŋ guùŋ, màànààŋ yàwium tìyèe è yaà anyùùŋ guùŋ lɛ. 12E teengaà yàwi nyiŋ yààìŋ wa koɓɛ̀ guùŋ lɛ, mìŋ naŋ nyiŋ wa yɛ̀mɛ̀ diɛŋ e yìwìà e gààaŋ mùŋ naim wa kiɛ̀ŋ lɛ sùà. Mìŋ naŋ nyiŋ wa gbònò koɓɛ̀ guùŋ, yèè wo bà gbiŋ gò wa go, sɔɔ̀ wò guùŋ, wo jɔ̀àfèlàà wo nyùùŋ maŋ kpèè naanààŋ bà wo yèɔ naŋ wa sɔ̀ dèè wèè wo go wɔ̀. Tɛɛ̀ zà naŋ wa kaaìŋ wèè kɛ̀ e nyɛ̀nɛ̀ŋ e yèɛ wɔŋ fɛ̀ì Dayàa naŋ wa woò lɛ e hɛɛnɛ̀ŋ. 13Mìŋ yaà naàŋ ko dòmaŋ mìŋ yaà hìnìè ko nɛ̀ɛ̀ŋ muìŋ. Kɛɛ mìŋ yaà wòò maŋ keì mɛɛ̀ŋ e teengaà mìŋ yaà weè nɔŋ e ɗuunyaàŋ lɛ, wèè e nyɛ̀nɛ̀ŋ anyùùŋ màŋjɛ̀wɛ̀im nyàŋ aŋ kɛɛnɛ̀ŋ e zɔlɔ̀ maŋ jii nyiŋ màŋ sùà màànààŋ nɔŋ miàŋ bi mìŋ kuwa e zɔlɔ̀ lɛ. 14Mìŋ naŋ nyiŋ wòò e yèɛ mùŋ naim wa woò wèè ka nyiŋ woò lɛ. Kɛɛ anyùùŋ nyaŋ e ɗuunyaŋ lɛɛ̀ naŋ nyiŋ wùɔ̀ŋ, esaɓù kɛ̀ aŋ fè àŋ bà nyiŋ bà wèè è ɗuunyaŋ lɛɛ̀, màànààŋ nɔŋ miàŋ pɛɛ miŋ fè wò bà lɛ. 15Dèda, miŋ gòum dawè wèè maŋ gè anyùùŋ màŋjɛ̀wɛ̀im nyàŋ è ɗuunyaŋ lɛɛ̀ sùà, kɛɛ muŋ yɛmɛ̀ nyiŋ diɛŋ e yìwìà wo Sɛ̀tanàaŋ sìwè. 16Aŋ fè àŋ bà nyiŋ bà wèè è ɗuunyaŋ lɛɛ̀, màànààŋ nɔŋ miàŋ pɛɛ miŋ fè wò bà lɛ. 17Jaà nyiŋ e ɓula wèè muàŋ bi esàɓù e tɔ̀ɔ̀nyaàŋ mɔ̀ɛ̀. Ke miè mɔɛ̀ŋ kè yaà e tɔ̀ɔ̀nyaàŋ. 18Mìŋ yaà nyiìŋ tùàŋ sùà koɓɛ̀ anyùùŋ nyaŋ e ɗuunyaàŋ, màànààŋ nɔŋ mùŋ naim wa tùɔ̀ŋ lɛ. 19Wèè esaɓù nyiŋ nɛ̀ kà jàà miàŋ bi e ɓula ko nɛ̀ɛ̀ŋ muìŋ, wèè kɛ̀ nyiŋ pɛɛ, àŋ naŋ ɓɛ̀nɛ̀ŋ nɔ̀ŋ e ɓula jàa nyiŋ ko nɛ̀ɛ̀ŋ muìŋ wèè e tɔ̀ɔ̀nyaàaŋ.
20“Miŋ fè nɔŋ zoolo wèè ànyùùŋ màŋjɛ̀wɛ̀im nyɛɛ̀ŋ nyiŋ guùŋ. Mìŋ yaà pɛɛ zoolo wèè anyùùŋ nyaŋ gbiŋ do nàŋ kɛ̀ɛ̀nɛ̀ŋ e hààwe esàɓù e yèɛ anyùùŋ màŋjɛ̀wɛ̀im nyàŋ naŋ nyiŋ woò lɛ e nyaàiŋ eim dè. 21Dèda, mìŋ zoolà wèè aŋ gbiŋ aŋ nɔ̀ŋ anyùùŋ guùŋ koɓɛ̀ aŋ dàwi nyiŋ nyàŋ, màànààŋ nɔŋ mìŋ yaà wò guùŋ mìŋ yààùm ko sùà lɛ, yèè mùŋ yaà wò guùŋ mùŋ yààìm ko sùà. Kpeiŋ kɛ̀ anyùùŋ nyaŋ e ɗuunyaŋ lɛɛ̀ do nàŋ haawè kɛ̀ muàŋ naim tùɔ̀ŋ. 22Kà dɛ̀ɛ̀kɛ̀ anyùùŋ màŋjɛ̀wɛ̀im nyàŋ e ɗèwè guùŋ nɛ mùŋ naim dɛɛkɛ̀ lɛ, wèè kɛ̀ aŋ nɔ̀ŋ anyùùŋ guùŋ aŋ dàwi nyiŋ nyàŋ sùà, màànààŋ nɔŋ yàwium è yaà guùŋ aŋ dàwi sùà lɛ. 23Mìŋ yaà nyiìŋ ko sùà, yèè mùŋ yààìm ko sùà, wèè kɛ̀ aŋ gbiŋ aŋ nɔ̀ŋ anyùùŋ guùŋ aŋ dàwi nyiŋ nyàŋ sùà, wèè kɛ̀ anyùùŋ nyaŋ e ɗuunyaàŋ aŋ nyìmàŋ kɛ̀ muàŋ naim tùɔ̀ŋ yèè kɛ̀ mùŋ mànàŋ nyiìŋ màànààŋ nɔŋ mùŋ mànàìm lɛ.
24“Dèda, mìŋ zoolà wèè anyùùŋ nyaŋ gbiŋ mùŋ naim kiɛ̀ŋ nyaŋ aŋ nɔ̀ŋ koɓɛ̀i mìŋ do nàŋ nɔ̀ŋ lɛ. Kpeiŋ kɛ̀ àŋ do nàŋ yɛ̀mɛ̀ e dɛ̀ɛ̀kɛɛ̀ mùŋ naim kiɛ̀ŋ lɛ, esaɓù kɛ̀ mùŋ naim wa mɔ̀nɔ̀ŋ paŋgàà e ɗuunyaàŋ naŋ wa nɔ̀ŋ bàne niŋ. 25Dèdà tɔ̀ɔ̀nyaàaŋ, anyùùŋ nyaŋ e ɗuunyaŋ lɛɛ̀ aŋ nyiŋ mààùm. Kɛɛ miàŋ kàum nyìmàŋ, yèè anyùùŋ màŋjɛ̀wɛ̀im nyàŋ àŋ nyìmàŋ kɛ̀ muàŋ naim tùɔ̀ŋ. 26Kà nyiŋ woò kɛ̀ ɓòò nàŋ yààùm, yèè mìŋ do nyiŋ niŋ ɓɛìŋ nàŋ woò. Kpeiŋ kɛ̀ e mànaàŋ mùŋ kuwa weèim lɛ̀ è do nàŋ nɔ̀ŋ e je nyiŋ, wèè nyiiŋ pɛɛ aŋ kɛɛnɛ̀ŋ e mànaŋ bi wèè aŋ dàwi nyiŋ nyàŋ, yèè yàwi nyiŋ do nàŋ nɔ̀ŋ anyùùŋ guùŋ aŋ dàwio sùà.”
वर्तमान में चयनित:
Jɔ̀ɔŋ 17: WFESD
हाइलाइट
शेयर
कॉपी
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.
