Akisy. 6
6
Aronis a ŋituŋa
1Kisyakis ŋituŋa apitun anakwap, touruut ŋidwe ŋulupesur, 2kiŋolikis ŋidwe a Set ŋulusapa ŋidwe ŋulupesur ŋul ibusak, yaasi ŋuna daadaŋ apotu ikes toseut, kituruwosi ŋaberu kec. 3Tema Ekapolon, “Nyerubakini etau kaŋ iboi aneni a ŋituŋa ŋikaru ka ŋikaru, anerae etwaneneete ikes. Nyedeparete ŋikaru kec amiat ka ŋatomoniarei.”
4Ayakasi nakwap apaki ŋin ŋituŋa ŋulu aris kejamuwasi Akuj, ŋulu anyaritae Ŋinepilim. #6:4 Ŋinepilim Iŋes atemar ŋituŋa ŋulu aoyak toburok. Ayakasi ikes tari apaki ŋina eturuworyata ŋidwe a Set ŋulusapa ŋidwe a ŋituŋa ŋulupesur ŋaberu kec, ŋuna apotu touruut ŋidwe aŋuna kec. Arae Ŋinepilim ŋarwonita ŋuna koloŋ ayakasi nakwap, ŋikilyok ŋulu ayenen.
5Kiŋolik Ekapolon aronis a ŋituŋa kelalaar anakwap, ka daadaŋ ŋuna atamete ŋituŋa apaki daadaŋ, arae aronis bon. 6Aŋun, kitilil Ekapolon neni koloŋ kesubunia iŋes ituŋanan, toŋo nooi, tonomosi ŋakiro ŋun iŋes. 7Tema Ekapolon, “Etoŋopiyari ayoŋ anakwap ŋituŋa ŋulu abu osub, akisyakin aneni a ituŋanan tari lotyaŋ ka aneni a ŋinibore elyat tari lokyeny; anerae eketililyata ayoŋ ŋakiro ŋuna koloŋ abunio osubunia ikes.” 8Nai abu Ekapolon toryamu Noa iyookino alokiŋaren keŋ.
Tolakari Akuj neni a Noa
(Ŋibur. 11:7; 1 Pet. 3:20)
9Erae lu ŋirorwa a ŋiletok a Noa a ekile a ŋolo eyookino, a ŋolo amam ŋuna etoronitotor ŋituŋa keŋ ka etopoloorit Noa Akuj anakiyar keŋ. 10Touru Noa ŋidwe ŋiuni lu: Sem, Am ka Yapes.
11Toroketa ŋituŋa daadaŋ alokiŋaren Akuj, toryenyaakyata ikes nooi. 12Toanyu Akuj atemar aroketa ŋituŋa, anerae etiya ŋinituŋanan anakwap aronis. 13Tolimok Akuj Noa tema, “Adau ayoŋ atubun amunyar ŋituŋa daadaŋ anakwap, anerae eelakis ŋituŋa aryenyeo nakwap; nai tokona, amunyari ayoŋ ŋituŋa kaapei ka akwap. 14Kitiyau aŋuna kon ataker a ŋakito a ŋikito a ŋulu enyaritae Cipres. Todukonok ŋagulei tooma keŋ; kidelesik tooma ka kiŋa keŋ eminae. 15Kitiyau iŋes alopite a lo: Itemokino aoyau a ŋisepyon keŋ erae ŋimitae amiat ka ŋatomoniuni ka ŋiuni, aoyau alowae a ŋolo ka akou ka neni iteotor, erae ŋimitae ŋatomoniarei ka ŋaarei, ka aoyau alokwap tari kidiama erae ŋimitae ŋatomon ka ŋauni. 16Kiwuak nataker ŋidirisae ŋulu eyapiyarito neni erapit ataker ŋulu erae aoyau kec ŋasentimitae ŋatomoniomwon ka ŋiomwon. Kiwuak epuke nawae ataker; kitiyau ataker erae egoropa ŋolo eyakar ŋakais kwap, kidiŋ ka kidiama. 17Kiira! Eyakuuni ayoŋ akalele nakwap, ikotere emunyari ŋituŋa ŋulu eriŋa eyarete daadaŋ, etwani ibore daadaŋ ŋini eyari anakwap. 18Nai ewuakini ayoŋ acamunet kaŋ ka iyoŋ; ilomarete iyoŋ nataker ka aberu kon ka ŋidwe kon ŋulusapa ta ŋaberu kec. 19Yau nataker ŋikabilae daadaŋ a ŋinibore eyari; a ŋolokabila ŋinikile ka ŋiniberu; ikotere toyara ikes kaapei ka iyoŋ. 20Emaikina iyau nataker ŋikyeny ŋulu enaikina ka ŋituŋa ka ŋityaŋ ŋulu ka ariet, ŋibaren, ŋityaŋ ŋuluce daŋ ka ŋityaŋ ŋulu elyato, a ŋolokabila ŋityaŋ ŋiarei, toyara ikes kaapei ka iyoŋ. 21Yau ŋamuja daadaŋ kiŋadak nataker aŋuna kon ka a aŋuna a ŋinibore daadaŋ eyai nataker.” 22Kitiya Noa ŋun daadaŋ lopite ŋolo ecikitor Akuj iŋes.
वर्तमान में चयनित:
Akisy. 6: NIB2008
हाइलाइट
शेयर
कॉपी
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.