ILOOWALI 19
19
Dusa lo Sodom
1Lapatao̒ lodumango to olei Abraham, malai̒kati duulota boito lonao̒ ode Sodom wau ledungga mola odito tou̒ hui. Tei Lot donggo hulo-huloa̒a to huhebu hulubangi lo kota, wau lapatao̒ loo̒onto mao̒ olimongolio, tio maa tilimihulao̒ wau lolutulai olimongolio. Lapatao̒ tio losujudulo mola totalu limongolio, 2wau loloi̒ya mao̒, “Mongo tuani, toduwolo mohepitopo ode bele lowatia. Mongo tuani mowali mongulo oa̒ato wau motuluhu pomao̒ tobele lo watia. Loombulio mola wonu yinao, mongo tuani mowali mobongu didimodupo wau mopo tolonga mola lononao̒.”
Bo timongolio lolametao̒, “Oduo̒olo, huliyalo mai ami motitihui teewe wambai̒o, to tanalapa lokota.”
3Tei Lot lomolohone mao̒ tio̒otutua, wau pulitio timongolio tilumuwoto mota pee̒-pee̒enta wolio ode delomo belelio. Tei Lot lopo dapato mao̒ ua̒alo mopiohe wau lomanggangi loti tutuuu̒delo mao̒, tulusi malo lamelo timongolio.
4Bo tou̒ diipo tataa-muwaalo boito mota lotuluhu, tau-tauwalo Sodom malomala bele boito. Ngoa̒amila mongo lolai̒ tokota boito, mopio taa panggola, meaalo taa muda, woluo teto. 5Timongolio helo ngiibode olei Lot, wau lohintu mao̒, “Tou̒toonu tau-tauwalo talonao̒ mai helo titihui to belemu? Wudua mai timongolio, alihu ami mowali mou̒lambohe woli mongolio?”
6Tei Lot yilumualai lonto belelio, wau lapatio mao̒ loheu̒tao̒ huhebu, 7tio loloi̒ya mao̒ totau-tauwalo Sodom boito, “Mongo wutato, pohile lowatia tio̒otutua, diila mao̒ pohutu sua̒li u moleeto debo odelo uito! 8Nte dungohe mai, watia owalao̒ tadulahu duulota. Huliyalo mao̒ mawuduo mai lowatia timongolio ode limongoli wau timongoli mowali mopohutu mao̒ boli wolo wambai̒o woli mongolio. Bo diila mao̒ pongolawa tamu lowatia botie; sababu watia wajibu moduo̒la olimongolio.”
9Bo loi̒ya lotau-tauwalo Sodom boito odelei Lot, “Ponao̒olo! Yio̒ tau deli ohilaa mongatulu olami? Ntali ponao̒olo! Wonu diila, yio̒ matotao̒ lami lebe mobuhetao̒ wolo taduulota boito.” Lapatao̒ timongolio lohuntulaa olei Lot wau loluhu ohilaa mongantulu huhebu. 10Bo tamu duulota boito malohudu mao̒ uluu̒ limongolio wau lomantanga olei Lot tilumuwotao̒ ode delomo bele, tulusi loheu̒tai huhebu. 11Timongolio lopopitoa̒ao̒ ngoa̒amila taa woluo to bulemengo bele boito tilinggula tau-tauwala boito diilalo loo̒tapu huhebu boito.
Tei Lot lololaa mao̒ Sodom
12Tamu duulota boito loloi̒ya mao̒ odelei Lot, “Wonu yio̒ owalao̒ talolai̒, walao̒ taabua, moluhenga meaalo mongo ilaato wewolio tabilu-biluloa̒ todelomo kota botie, delowalo mao̒ timongolio lumuala monteea, 13sababu kota botie mapomaahu mai lami. Eeya maloo̒ dungohe popoo-tuluduwalo u mobuheeto duo̒lo tuango lipu botie, wau ami mailao-Lio mai mamo pomaahu kota lo Sodom botie.”
14Lapatao̒ malonao̒ tei Lot mota lodunggaya wolo tilantahu lo walai̒o duulota, wau loloi̒ya mao̒, “Hua̒a lualao̒ monto tambati botie, sababu Eeya mamo pomaahu mai tambati botie.” Bo timongoli hemo lantobu tei Lot bo hemoitohe wambao̒.
15Tou̒ subu mai, malai̒kati duulota boito malo huntula olei Lot alihu hua̒a momonggato. “Aliheo̒olo,” uali mongolio. “Ponao̒lo woli dilemu wau wolo walau̒mu mongo dulahu duulota monteea, alihu timongoli diila mao̒ mate wonu kota botie pobinasaalo mai.” 16Tei Lot malolingu. Bo Eeya lodehu hilao olio; sababu uito tamulio duulota boito malodelo olei Lot wolo dilelio wau walai̒o duulota ode bulemengo kota. 17Lapatao̒ uito ngotaalio lo malai̒kati boito lotahuda mao̒, “Teteo̒olo, poa̒ahuwalo nyawamu! Diila mao̒ poili ode wulea wau diila mao̒ pohuheli to lumbaya. Teteo̒lo mola ode hihui̒-hui̒dee, alihu timongoli diila mao̒ mate!”
18Bo tei Lot lolametao̒, “Aduu, ambunguolo Tuani diila mao̒ ahuli amiaatia tumetea̒a mola ode hihui̒-hui̒dee. 19Memangi ti Tuani maloo̒ tulungi daa̒ olaatia wau helo poa̒ahu nyawa laatia. Bo hihui̒-hui̒dee boito odito lamingio; dahaalo watia bolo otunuhe lobaala boito tulusi watotia mate tou̒ diipo meidungga mola odito. 20Bilohi mota, totalu boito woluo kota mooyoto udiila boti molamingo. Luasia mai watia tumetea̒a mola odito alihu moa̒ahu.”
21Malai̒kati boito lotahuda mao̒, “Ooo̒, kota mooyoto boito diila tapobinasaa-U̒. 22Aliheo̒, teteo̒olo! Sababu wau̒ diila mowali mohutu mao̒ wolo-wolo tou̒ yio̒ diipo meidungga mola odito.”
Kalana tei Lot longunte mao̒ kota boito mooyoto, yi kota boito iluntelio Joar.
Oa̒antulu lo Sodom wau Gomora
23Dulahee donggo butubutu mai tou̒ tei Lot leidungga mola ode Joar. 24Debolo Eeya lopo tuhutai didi walirangi u otulu to Sodom wau Gomora. 25Duuduluo kota boito ilantululio, wau olo ngoilanggubu lumbaya wau ngoa̒amila pilomulo boli ngoa̒amila ulipu teto. 26Bo dile lei Lot loili mota ode wulea, tulusi tio lobolio̒ lowali wolihu lo watingo.
27Loloombulio mola, didimodupo, tei Abraham hua̒a lonao̒ mota ode tambati u pilo tihulalio totalu lo Eeya ngohui tou̒ dipolulio mai. 28Tio lomilohe mola ode mantahu Sodom wau Gomora wau ode ngoilanggubu lumbaya, wau loo̒onto mola poloo̒ tihu-tihubulai lonto huta boito, odelo poloo̒ lonto tihengo damango daa̒. 29Odi-odieelo mola, tou̒ Allahu Taa̒ala lopobinasa kokoo-tawaalo boito to lumbaya tou̒toonu tei Lot bilu-biluloa̒. Lapatao̒ Allahu Taa̒ala loe̒ela mola olei Abraham wau lotulungi mao̒ olei Lot lopolahi batanga.
Asali mai taulo Moab wau taulo Amon
30Sababu tei Lot moohe motitatapu to Joar, yi malonao̒ mola tio ode huludu pee̒-pee̒enta wolo walai̒o taabua duulota, tulusi lotibiluloa̒ todelomo gowa tuwau. 31Walao̒ taabua tamohuhula loloi̒ya mao̒ ode tawali-yaliilio, “Ti Paapa mapanggola, wau to ngoilanggubu lipu botie diaaluo mongo lolai̒ tamowali monika olanto alihu ito moo̒tapu mai walao̒. 32Dulo, pohutunto ti paapa huwoa̒alo, tulusi ito motuluhe wolio alihu ito moo̒tapu mai walao̒.” 33Tou̒ hui boito timongolio longohi mao̒ angguru odeli paapa limongolio, tulusi walao̒ tamohuhula malo tuluhe woli paapalio; bo ti paapalio malo odito huwoi̒o tunggula diila ilotaawalio wolo uilowali mai.
34Loloombulio mola, walao̒ tamohuhula loloi̒ya mao̒ ode tawali-yaliilio, “O hui wau̒ malo tuluhe woli paapa! De mahui mai pohutuwonto ti paapa muli huwoa̒alo. Tulusi potuluhulo yio̒ woli paapa. De ito ngota-ngota mamoo̒tapu mai walao̒.” 35Odi-odieelo mola tou̒ hui boito timongolio helohutu mao̒ olei Lot hiluwoa̒a, wau walai̒o oluolio malo tuluhe wolio. Wau tei Lot mailaba huwoi̒o poli tilinggula diila ilotaawalio wolo uilowali mai. 36Lapatao̒ maa ilombodaa̒ walae̒e Lot duduulota boito sababu ti paapa limongolio lohihilao. 37Walao̒ tamohuhula lopotutu mai walao̒ talolai̒ tai̒luntelio Moab. Tio lowali loluuhuru taulo Moab u masaatia. 38Walao̒ oluolio lopotutu mai walao̒ talolai̒ olo tai̒luntelio Ben-Ami. Tio lowali loluuhuru bangusa lo Amon u masaatia.
वर्तमान में चयनित:
ILOOWALI 19: LAIGOR
हाइलाइट
शेयर
कॉपी
Want to have your highlights saved across all your devices? Sign up or sign in