Jã Sɛbɛ 7
7
A JEEJU YƐƐR SU-KPƐN A Ʋ ƖNƐ
1A ala na tɔl baar, a *Jeeju yʋɔrɔ na a Galile wɩɛr, ɩ̃ golo a Jude wɩɛr bara, a-na-ɩ a Jufisɩ nɩ-bɛrɛ bʋɔrɔ na ba kú ʋ. 2Ɩ̃-cɛ a Jufisɩ *Sɛɛr fɛtɩ daar pɩɛlʼã, 3a Jeeju yɛɛr yel ʋ:
“Yi a ka ɩ̃ cen a Jude a mɩnɛ a fʋ *par-tuurbe na mɩ tʋɔ nyɛ a tʋmɔ ala fʋ na maala. 4A-na-ɩ a nɩrɛ ɩ̃ bʋɔrɔ ba bɔ̃w ʋ a jiir a jaa, ʋ maa sɔɔlɔ tʋnɔ a ʋ tʋmɔ wa. A mɩnɛ fʋ na maala a yele ala, miilʼɩ̃ a fʋ mɩ̃ɛ a nɩbɛ ba jaa nyɛ fʋ.” 5A-na-ɩ a ʋ yɛɛr mɩ̃ɛ ma dãa sɔw a ʋ ben wa. 6Ala-ɩ̃-sɔ a Jeeju yel ba:
“A ɩ̃ daar ma ta sɛr wa, ɩ̃ a nyɩmɩ, a daar a jaa sɛw na a nyɩ jie. 7A nɩbɛ ma tʋɔrɔ ꞌlaara nyɩ wa, ɩ̃-cɛ a maa, ba ꞌlaar ma na a-na-ɩ ɩ̃ miil ba na áa ba tʋmɔ ɩ na tʋ̃-faar. 8A nyɩmɩ, nyɩ́ cen a fɛtɩ jie. Maa cere a ʋna fɛtɩ jie wa, a-na-ɩ a ɩ̃ daar ma ta sɛr wa.” 9A lɛ ʋ yel ba ɩ̃ cãa jɛ a Galile.
A JEEJU NA BE A SƐƐR FƐTƖ JIE
10Ɩ̃-cɛ a mɩnɛ a *Jeeju yɛɛr na cen a fɛtɩ jie baar, ʋ mɩ tu na sɔɔlɩ̃ cen, a nɩrɛ ma nyɛ ʋ wa. 11A Jufisɩ nɩ-bɛrɛ bʋɔrɔ ʋ na a fɛtɩ jie sooro nɩ:
“Nyɩnɛ ʋ be?”
12A nɩ-yaw búrɔ na taa a ʋ ɩnɛ. A ŋmɛɛ yele na a ʋ ɩ na nɩ-son, a ŋmɛɛ ma sɔw wa ɩ̃ yele a ʋ bɛlɛ na a nɩbɛ. 13Ɩ̃-cɛ nɩrɛ ma dãa ꞌlara ƴɛrɛ a ʋ ƴɛrɩ̃ a yire cãa pʋɔ wa, a-na-ɩ a ba jaa jɔrɔ na a Jufisɩ nɩ-bɛrɛ dãbɩ̃ɛ.
14A fɛtɩ bibie po na jɛ̃ taa, a Jeeju kpɛ a Naaŋmɩn puor-yir kpɛ̃ɛ pʋɔ nyɔw ɩ̃ jaana a nɩbɛ. 15A nʋɔr ko na a Jufisɩ a ba sooro taa:
“Mɩnɛ a daba na ɩ ɩ̃ bɔ̃w a sɛbɛ a lɛ, a ʋlɔ na ma mɩ dãa pɔw a jaanfʋ wa?” 16A Jeeju yel ba:
“A ala ɩ̃ na jaana a nɩbɛ ma yi a ɩ̃ jie wa, ɩ̃-cɛ a yi na a ʋlɔ na tʋ̃ ma jie. 17A ala ɩ̃ ɩ a nɩrɛ sɔw na maala a Naaŋmɩn pʋ-tɩɛrʋ̃, ʋ na bɔ̃w na a ɩ̃ jaanfʋ yifʋ jie, a ala ɩ̃ ɩ a Naaŋmɩn jie a yi mɩɩ maa ɩ̃ ƴɛrɛ a ɩ̃ mɩ̃ɛ ƴɛrɩ̃sɩ. 18A ʋlɔ na ƴɛrɛ a ʋ mɩ̃ɛ ƴɛrɩ̃sɩ, a ʋ mɩ̃ɛ yuor ʋ bʋɔrɔ, ɩ̃-cɛ a ʋlɔ na bʋɔrɔ a ʋlɔ na tʋ̃ ʋ yuor ʋ yire, ʋlɔ ɩ̃ ɩ a yel-mɩ̃ɛ sʋbɔ; bɛlɩ̃fʋ ma be a ʋ jie wa. 19A Mowisi ma dãa kʋ nyɩ a *Naaŋmɩn ƴɛr-kpɛn wa mɩɩ? Ɩ̃-cɛ nɩrɛ kãw a nyɩ pʋɔ ma jɔrɔ a ana ƴɛr-kpɛn wa. Bõ ɩnɛ nyɩ bʋɔrɔ nyɩ kú ma?” 20A nɩbɛ yel ʋ:
“Kɔ̃tɔn tɛrɛ fʋ na! Ala ɩ̃ bʋɔrɔ ʋ kú fʋ?” 21A Jeeju yel ba:
“Tʋn bõ-ƴen tɛw ɩ̃ maal ɩ̃ a nʋɔr ko nyɩ nyɩ jaa. 22A Mowisi kʋ nyɩ na a yʋɔr ŋmaafʋ jɩbaa (ɩ̃ aa bɔ̃w yi a Mowisi jie wa, a nyɩ sãa-kʋnbɔ jie a yi). Ala-ɩ̃-sɔ nyɩ ma sɔw na ɩ̃ maal, a ala ɩ̃ saarɩ̃ ɩ a *bibi-ciiraa dayen ʋ. 23A ala ɩ̃ ɩ nyɩ ma ŋmaa na a bibile a yʋɔr a bibi-ciiraa dayen a mɩnɛ nyɩ kɔ̃ wa sãw a Mowisi ƴɛr-kpɛn wa, bõ ɩnɛ nyɩ nyɛ a suur ƴɔ̃w ma a-na-ɩ ɩ̃ kpɛmɛ na nɩrɛ a daadaa a bibi-ciiraa dayen? 24Nyɩ taa guoro a nɩrɛ ben tuure nɩ a ala a mimir na nyɛ wa, ɩ̃-cɛ nyɩ́ ɩ a nyɩ guorfʋ a tor dẽdẽ.”
A JEEJU Ɩ NA A KIRISI MƖƖ?
25A Jerujalɛm nɩbɛ ŋmɛɛ sooro na taa:
“Aa ɩ a daba na ba bʋɔrɔ ba kú wa? 26Ɩ̃ nyɛ, ʋ barʼã nyãa ɩ̃ ƴɛrɛ, ɩ̃ a nɩrɛ ma yel ʋ bom wa. Á ɩ a sɩ ni-dierbe bɔ̃w na bɔ̃w ka ʋlɔ ɩ̃ sɩrɩ̃ ɩ a *Kirisi mɩɩ? 27Ɩ̃-cɛ a daba na, sɩ bɔ̃w na a ʋ yifʋ jie, ɩ̃ a Kirisi ɩ̃ wa wa, nɩrɛ kɔ̃ bɔ̃w a jie ʋ na yi wa.” 28A mɩnɛ a *Jeeju na jaana a nɩbɛ a Naaŋmɩn puor-yir kpɛ̃ɛ pʋɔ, ʋ ƴɛrʼã nɩ kpɛ̃w yel:
“Nyɩ bɔ̃w ma na ɩ̃ mɩ bɔ̃w a jie ɩ̃ na yi, ɩ̃-cɛ maa wa nɩ a ɩ̃ mɩ̃ɛ yuor wa. A ʋlɔ na tʋ̃ ma ɩ na Yel-mɩ̃ɛ Sʋbɔ, ɩ̃ a nyɩmɩ, nyaa bɔ̃w ʋ wa. 29A maa, ɩ̃ bɔ̃w ʋ na, a-na-ɩ a ʋ jie ɩ̃ yi ɩ̃ wa, ɩ̃ a ʋlɔ ɩ̃ tʋ̃ ma.”
30A be jie, ba dãa na bʋɔrɔ ba nyɔw ʋ, ɩ̃-cɛ nɩrɛ ma ir nuu sɩɩrʼɩ̃ ʋ wa, a-na-ɩ a ʋ daar ma dãa ta sɛr wa. 31Ɩ̃-cɛ a nɩbɛ pʋɔ, yaw jie sɔw na de ʋ ɩ̃ yele:
“A Kirisi ɩ̃ wa wa, ʋ na maalʼã a nɔ-kofʋ tʋmɔ a gãw a ala a daba na na maal mɩɩ?”
A JEEJU MANA NA ÁA Ʋ CENFƲ DAAR TARA NA
32A *Farɩsɩ nɩbɛ wõ na a ala a nɩbɛ na búrɔ taa a *Jeeju ɩnɛ, ala-ɩ̃-sɔ a bala nɩ a *baar-lo-nɩ-bɛrɛ tʋ̃ a parsãdiele a ba nyɔw a Jeeju. 33A Jeeju yel:
“Fɩ̃ɩ tɛw ɩ̃ na cãa be nɩ nyɩ, ɩ̃ naa ɩ̃ lɩɛb cen a ʋlɔ na tʋ̃ ma sɛ̃. 34Nyɩ nɔɔ bʋɔrɔ ma na ɩ̃-cɛ nyɩ kɔ̃ nyɛ ma wa, a-na-ɩ nyaa tʋɔrɔ wɩɛrɛ a jie ʋlɔ ɩ̃ nɔɔ beree wa.” 35A Jufisɩ sooro taa:
“Nyɩnɛ ʋ na cen a sɩ kɔ̃ nyɛ ʋ wa? Ʋ na cenʼã a Gɩrɛkɩ ten ala pʋɔ a Jufisɩ na be na ʋ jaana a Gɩrɛkɩ nɩbɛ a be mɩɩ? 36A ƴɛrɩ̃ na par ɩ na bõ ʋ na yel: Nyɩ nɔɔ bʋɔrɔ ma na, ɩ̃-cɛ nyɩ kɔ̃ nyɛ ma wa, a-na-ɩ nyaa tʋɔrɔ wɩɛrɛ a jie ʋlɔ ɩ̃ nɔɔ beree wa?”
A BAAFƲ KƲ̃Ɔ-BUNISƖ ƳƐRƖ̃
37A fɛtɩ bibi-baaraa dayen na ɩ a bibir kpɛ̃ɛ, a *Jeeju irʼã ɩraa ɩ̃ ƴɛrʼɩ̃ kpɛ̃w yel:
“A ala ɩ̃ ɩ kʋ̃ɔ-nyuur nyɔw na nɩrɛ, ú wa a ɩ̃ sɛ̃ na nyu. 38A mɩnɛ a Naaŋmɩn Sɛbɛ na yel, a ʋlɔ na sɔw de ma, a baafʋ kʋ̃ɔ wɩlwɩl na jɔrɔ na yire a ʋ pʋɔ a kʋ̃ɔ bunaa kaarɩ̃.” 39Ʋ yelʼã a lɛ a Naaŋmɩn Sɩɛ ɩnɛ a bala na sɔw de ʋ nɔɔ pɔwrɔ. A ʋna daarʼãa pʋɔ, a Naaŋmɩn Sɩɛ ma dãa wa sɛr wa, a-na-ɩ a Naaŋmɩn ma dãa miilʼɩ̃ a Jeeju yo-yifʋ sɛr wa.
A NƖBƐ NA ŊMA KPEE KPEE A JEEJU ƖNƐ
40A lɛ a nɩbɛ na wõ a ana ƴɛrɩ̃sɩ baar, a nɩŋmɛɛ a ba pʋɔ yelʼã:
“A daba na sɩrɩ̃ na ɩ a Naaŋmɩn ƴɛr-hiere ʋlɔ ʋ na pʋlɩ̃ nɩ sɩ.” 41A nɩŋmɛɛ yel:
“A ʋlɔ ɩ̃ ɩ a *Kirisi.” Ɩ̃-cɛ a nɩŋmɛɛ yelʼã:
“A Kirisi na tʋɔ na yi a Galile mɩɩ? 42Aa yel a Naaŋmɩn Sɛbɛ pʋɔ áa Kirisi na ɩ na a jamana Davɩtɩ bal par nɩrɛ wa? Á ʋ na yi na a Bɛtɩlɛm, na ɩ a jie ʋlɔ a Davɩtɩ na dãa be wa?” 43A lɛ, a nɩbɛ ŋma na kpee kpee a ʋ ɩnɛ. 44A nɩŋmɛɛ dãa bʋɔrɔ ba nyɔw ʋ, ɩ̃-cɛ nɩrɛ ma ir nuu sɩɩrʼɩ̃ ʋ wa.
A JUFISƖ NI-DIERBE SU-KPƐN A JEEJU ƖNƐ
45A parsãdiele lɛ lɩɛbʼã cen a *baar-lo-nɩ-bɛrɛ nɩ a *Farɩsɩ nɩbɛ sɛ̃, a ba soor ba:
“Bõ ɩnɛ nyaa nyɔw ʋ wa nɩ wa?” 46A parsãdiele yel:
“Nɩrɛ ma dãa ƴɛr ƴɛrɩ̃ a mɩnɛ a daba na na ƴɛrɛ wa.” 47A Farɩsɩ nɩbɛ soor ba:
“A nyɩmɩ mɩ, nyɩ mɩ sɔw na ʋ bɛlɩ̃ nyɩ pɔw mɩɩ? 48Nyɩ nyɛ na nɩrɛ kãw a ni-dierbe sɔ̃w mɩɩ a Farɩsɩ nɩbɛ sɔ̃w na sɔw a ʋ ben mɩɩ? 49Ɩ̃-cɛ a nɩbɛ na, baa bɔ̃w a Mowisi ƴɛr-kpɛn wa, ba ɩ na a nɩbɛ bala ba na pɔ ƴɔ̃w.”
50A Farɩsɩ nɩbɛ ƴen sʋbɔ na dɩ a Nikodɛ̃ na dãa cen na nyɛ a *Jeeju yel ba na:
51“A sɩ ƴɛr-kpɛn kʋ sɩ na sɔr a sɩ na tʋɔ ƴɔ̃w nɩrɛ ƴɛrɩ̃, ɩ̃ a ala ma ɩ sɩ de na nĩe cɛl wõ a ʋ ƴɛrɩ̃ bɔ̃w nɩ a ala ʋ na maala wa mɩɩ?” 52A ba yel ʋ:
“A fʋ̃ʋ mɩ, a Galile nɩrɛ fʋ mɩ ɩ mɩɩ? Bɔ̃w ꞌlo nyɛ! Fʋ na bɔ̃w ka a Naaŋmɩn ƴɛr-hierbe pʋɔ, bõ-ƴen kãw ma dãa yi a Galile wa.”
A PƆW NA GÃ NƖ A DABA
[ 53Ɩ̃ a lɛ, ba jaa wɛlʼã kule a ba yie.
वर्तमान में चयनित:
Jã Sɛbɛ 7: BNT93
हाइलाइट
शेयर
कॉपी
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
