LUKA 24
24
Jesuh Tholehhnak
(Mat 28:1-10; Mar 16:1-8; Joh 20:1-10)
1Nipui nia zingniu in nupangte tu bawnciahnak rimhmuite keng in hlan ah feh tlang i. 2Hlan khamhnak lungtleppui a thawn zo khiah hmu i; 3ciamanin lut tlang i, ikhalselai Bawipa Jesuh ai luang tu hmu lo i. 4Ngaihsunur roh ai ding i; ciata ai ding teng ah rin lopui in hnikpon tleu ngai a siltu mi pahnih amahte hiangah ding kawm i. 5Lau tlang roh ai laipua ah bok tlang i; ciafangin mite pahnih in, “Zaimanin a thimi lakah a nungmi si i si? 6Heta ah um nawn lo i; tho leh zo i. Galilee ah a um laiah ning hnenah a relhnak khiah hih nawn lo i sim?#Mat 16:21; 17:22-23; 20:18-19; Mar 8:31; 9:31; 10:33-34; Luk 9:22; 18:31-33 7‘Mi Fapa tu misualte kut songah pe in um tuh i; Thinglamteh vumah khen tuhai nithumhnak nia ah tho leh tuh i,’ a tihnak khiah!” tiin ti kawm i.
8Cen nupangte in a ponghnak khiah hih tlang leh ai, 9Hlan in lel leh hnuaah hnuahlunte hlaikhat le midangte hnenah rel i. 10Nupangte tu Mary Magdalene, Joana le James ai nu Mary i. Anite le nupang dang amahte hnenah a teltute in hnuahlunte khiah rel tlang i. 11Ikhalselai a hnuahlunte in nupangte ai relhnak heh thulovang ah ruat ai sang tlang lo i. 12Ikhalselai Peter tu tho ai hlan ah dawp i. Ut in a kian fangin luang tuamhnak pon nemniu ian hmu i; a dang zaikhai hmu lo i. Cen ciatihin a canghnak heh ngaihsunur kongin inn ah tlung i.
Emmaus Ah Feh I
(Mar 16:12-13)
13Cia nia thotho ah Jesuh a hlun awngtu mite pahnih tu Jerusalem an peng sarih dung a hlahnak Emmaus tihnak khua ah feh kawm i. 14Cen tunbai niu ai thil canghnakte rel kawm hnelhno i. 15Ciatihin pong ai a rel kawm laitak ah Jesuh amah rori in man ai vak tlang i. 16Ani tu hmu napui lingthiam kawm lo i. 17Jesuh in anite hnenah, “Ning vak kongin ziang thu rel kawm hnelhno i si?” tiin zawt i.
Cen lungsia mithmai thawn ding kawm i. 18Pakhat sawn, Cleopas tihnak pa in, “Jerusalem khua a tlawngtu mi zongzong lakah nangmah ian heh tun ni thum songah Jerusalem khua songai thil canghnakte a ling lotu isi?” tiin ti i.
19Ani in, “Ziang thil maw?” tiin zawt i.
Anite in, “Nazareth Jesuh vumai thil a canghnakte!” tiin sawn kawm i. “Hemi pa tu Pathian hmai le misenpui hmaiah aisusu inkhai prophet i ai a ponghnak ituseh, a bawnhnak ituseh, huham nai roh i, tiin amahte in ruat sio i. 20Kin suangbawi upate le kin hotute in a thihhnak rel tuhin mi kut ah pe ai ciatihin thinglamteh vumah rek tlang i. 21Cen ani tu Israel mi tlantu tuh i, tiin umlamhnak a nai awng ngai mi i. Ciahlaiah ciabang thil a cang hnua tunnia heh a nithumhnak nia i. 22Kin lakai nupang hrekkhat in ngaihsun kin urruai fawn i; tun ninghla zingniu in hlan ah feh tlang i; 23ikhalselai a luang hmu tlang lo i. Let tlang ai ‘Kinmah in vancungmi hmu ai Ani tu nung leh zo i, tiin kin rel i,’ tiin ti kawm i. 24“Kinmah lakai mi hrekkhat hlanah feh tlang ai nupangte relhnak bang rori in hmu tlang ve i; ikhalselai ani tu hmu tlang thotho lo i,” tiin ti kawm i.
25Cen Jesuh in anite hnenah, “Ning tu ning voi ze i! Prophette ai relciahnak sang ning har ze i! 26Messiah ca he thilte hmuahhmuah heh a tuar ta sio hnuaah a songlawihnak songah lut kul tuh lo im?” tiin ti i. 27Cen Jesuh in Lai Thianghlim song Moses laibute ai panin prophette ai nganhnak tian, amah ai thu a nganhnak hmuahhmuah khiah anite hnenah relfiang i.
28Amahte feh tumhnak khua hleng dawn fangin Jesuh tu a feh tuhlai bangin um khel i. 29Ikhalselai anite in, “Kin hnenah zancam tu ve! Khuahnua zo ai khua thim ihang,” tiin sawm kawm i. Ciamanin a hnenah cam tuhin hlun i. 30A hnenah to ai rong ai tlang i. Sang khiah lang ai saw a ngen hnuaah khan ai anite khai zem i. 31Ciafangin a mit var sungso ai Amah i, ti khiah ling kawm i; ikhalselai anite mithmuh ah pai leh lio i. 32Amahte veve tu, “Lampui ah kin vak tlang lakah kin hnenai a ponghnak le Lai Thianghlim a relfiang hnelhno laiah kin songah maikang bangin kin um tho lo im maw?” tiin ti dun i.
33Cammalak in Jerusalem ah let kawm ai hnuahluntu hlaikhat le a dangte taikhawm tlang khiah hmu kawm ai, 34“Bawipa tu tho leh taktak i! Simon hnenah lar i!” ti ai a rel tlang hnelhno khiah za kawm i.
35Anite pahnih inkhai lam lakai thil a canghnak thu le sang a khan sawng fangin Bawipa i, ti khiah a lingthiamhnak thute rel kawm ve i.
Hnuahlunte Hnenah Jesuh Lar I
(Mat 28:16-20; Mar 16:14-18; Joh 20:19-23; Nal 1:6-8)
36Anite pahnih in lampui ai thil a canghnak thute khiah hnuahlunte hnenah a rel kawm laitak ah cammalak in anite lakah Bawipa heh ding ai, “Ning hnenah daphnak um tuseh,” tiin ti i.
37Mirauhla hmu ising tiin ruat ai lau tlang roh i. 38Ikhalselai ani in, “Zaimanin thin ning lau i? Zaimanin ning thinlung songah sangsamhnak um dekdo i? 39I kut le i kete heh sik tu ih! Kaimah ing! I dai tu ilai ling tuh i si; zaimantifangin mirauhla in ruh le taksa nai lo i, kai tu nai ing ti i hmu i si!” tiin ti i.
40Ciatihin rel ai a kut le a kete hmuh i. 41Anite in sang thil thotho lo i; ang roh ai mangbang tlang roh fawn i. Ciamanin anite tu, “Heta ah ai pha zaital nai aw i sim? tiin zawt i. 42Anite in nga pakhat suang cia pe ai, 43lang ai amahte mithmuh ah ai i.
44Cen anite hnenah, “Ning hnenah i um laiah i relhnak awng hnelhno khiah he thilte nakhaw: Moses ai dan laibu song, prophette ai nganhnak laibu song le Saam labu songai kaimah ai thu nganciahnak tepawl tu khim kul sio i,” tiin ti i.
45Cen a thinlung mit varruai ai Lai Thianghlim ai nganhnak khiah lingthiam tlang i. 46Anite hnenah, “A nganciahnak tu hetihin i: Messiah tu tuar tuhai a thi hnua nithumhnak ah tho leh tuh i. 47Cen Jerusalem khua ai panin miphun hmuahhmuah hnenah amah hming in sualsirhnak le sualngaithiamhnak thuthang heh phuang in um tuh i. 48Ning tu he thil canghnakte ai thulingtute i si. 49Cen Pa ai ning thukhamhnak khiah kaimah rori in ning vumah hlat tuh ing. Ikhalselai vum lamin huham ning hnenah a hleng hlanlo khuapui songin iang tu ih,” tiin ti i.#Nal 1:4
Jesuh Vancung Ah Kai I
(Mar 16:19-20; Nal 1:9-11)
50Cen khuapui songin suakpui ai Bethany khua tian feh tlang i; Ciata ah a ban pharh ai hmuifu pe i.#Nal 1:9-11 51Ciatihin hmuifu a pe laitak ah amahte hnenin suak ai vancung ah kai i.#24:51 Luk 24:51 ‘Vancung ah kai i,’ tihnak tu kutngan laibu hrekkhat ah tel lo i 52Ani tu bia tlang ai Jerusalem ah lungawi ngai in let tlang i. 53A can hmuahhmuah Biakinn songah Pathian thangphathnak ah hmang tlang i.
वर्तमान में चयनित:
LUKA 24: RZB
हाइलाइट
शेयर
कॉपी
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
