Roka 13
13
1Yeso hiyari hawa toheya, Karireya‑ya mai wi‑wina mai one tamine‑ya mai kamina, fara Deoso‑ka yobe‑ya Deoso‑ka bani‑bona‑ya mai daaniya, Birato ati ene mai‑ya mai nanahaba, mai tamine‑ya mai kaminameteni, Yeso‑ya. Yeso ati yanane,
2“‘Hini mai ihi mai abineni. Oda‑ta, oda ene amosabisani.’ Dai ati na awineni.
3 # 13:3 “Dai abahareboneni.” Yeso ati ne, wara hirini‑ya mai sawiya, mai kome fawaterabone tamine amani. Owati dai mitahi.
‘Oda ene‑maro‑nima oda ene namaraboneni.’ Dai atibodi ati ni awiriya,
dai abahareboneni.” Yeso ati nematane.
4“Sirowe widi‑ke yobe nemehe kote bakatone, sone, 18 mai kana mai abameteni.
‘Hini mai ihi mai abameteni.’ Dai ati na awineni.
‘Yerosare‑ya mai wi‑wina mai one hasina, mai ihi amosabisameteni.’ Dai ati na awineni.
5Owati dai mitahi.
‘Oda ene‑maro‑nima oda ene namaraboneni.’ Dai atibodi ati ni awiriya,
dai abahareboneni.” Yeso ati nematane.
6Mai‑ya kanawatobona, mai‑ya hiyare,
“Maki‑ka awa‑ya fiko waa, faha fowe‑nima fiko‑ya kiine, fiko boni wadarani.
7Hika yo‑yose‑ya hiyare,
‘Faha fowe 3 kani‑ya fiko kii·ona, bonora, kaatinahi, awa bono one kamamakeboneni.’ Hidi ati nane.
8‘Hibareya, fiko mate wii·okaniya, wami okateheboneni.
9 # 13:6-9 Hiyara yokana timitahi. Yodeo mai‑ya Deoso nimanamatamonane, mai ihi amosawamabonehe. Mai ihi amosawama kanibote ra, mai‑ya Deoso weeni kitebonane. Faha fowe oharimaki‑ya bonoya, sibaraboneni. Bonoriya, kaa·onaboneni.’ Hika yo‑yose ati nane.” Yeso ati nematane.
Sabado‑ya fana‑ya Yeso nakitame
10Sabado‑ya Deoso‑ya mai hi‑hiyara‑ke yobe‑ya Yeso mai‑ya kanawatoya,
11fana sawemeteni. Madi towe ene faha fowe 18 kani‑ya wai moinama, wai amosarameteni.
12Fana‑ya Yeso awe, fana‑ya haanematane. Fana kake,
“Tikitamani.” Yeso ati nematane.
13Fana‑ya Yeso boyone, fana waamisama, wai amosawama, Deoso‑ya kahiyarameteni.
14Deoso‑ya mai hi‑hiyara‑ke yobe hidi i‑di Yeso ene‑ya awe, yawe, ati yanane,
“Mahi 6 kane‑ya yama ai aniteni. Sabado‑ya yama ai aniterani. Dai kiyana mahi owa‑ya dai kamabisahi, dai‑ya nakitamebonaha. Sabado‑ya dai kamariyahi.” Yobe hidi ati nematane.
15Yeso ati yanane,
“Towe dai amani. Sabado‑ya yama dai aninahariteni. Dai‑ka bani mai dai seekana, mai dai towakifawateni, faha‑ya mai fawabonehe.
16Abaraho‑ka nodi amani. Faha fowe 18 kani‑ya Satanasi yadihinamete sabado‑ya okasomarabone dai ati na, okasomawahani.” Yeso ati nematane.
17Yeso‑ya mai weena mai ati fawanameteni. Yeso ene‑ya mai dama mai awa, mai ya‑yainameteni.
Deoso ai nafi‑ka hidi kitabote tohawahebona
18Yeso mai‑ya hiyare,
“Deoso ai nafi‑ka hidi kitabote tohawahebona tamine ohiyaraboneni.
19Maki hika fadara‑ya mositada noki‑ya korotona, mositada yana, tonafe, webote tohawaha, bani mai kake, mositada ini‑ya mai bori‑ya mai wamaneni.” Yeso ati nematane.
20Mai‑ya hiyaramatase,
“Deoso ai nafi‑ka hidi kitabote tohawahebona tamine dai mitamatasahi.
21 # 13:18-21 Mositada noki toha, femeto toha na, tamine fara kafamineni. Hibayata Yeso‑ya mai da‑daba mai damara, faha fowe damamaki‑ya ai nafi‑ka hidi kitabote tohawahebonane. Femeto‑ya fana kemabone farina tiriko kiro 7 kana bodi‑ya femeto bide‑ya fana ibe, femeto dodama ihi farina tiriko nafi‑ya femeto sawineni.” Yeso ati nematane.
22Yeso Yerosare‑ya tokebona, tabora dama‑ka mai‑ya kanawatone.
23Mai‑ka owa ati yanane,
“Ayo, Deoso ai nafi‑ka hidi kitabote tohawahebona‑ya mai sawebone mai fa‑famaraba naba awineni.” Ati nematane.
24“Nokobi bide dai nokotonibisahi. Nokobi one‑ya mai dama mai tokiyoma, Deoso‑ya mai tokiyomaraboneni.
25Yobe hidi nokobi‑ya barikawameya, nokobi‑ya dai one nahomake, mai haanaboneni.
‘Ayo, nokobi seetikanahi.’ Mai ati naboneni.
‘Dai owatora, nokobi see·okaraboneni.’ Yobe hidi ati nebonane.
26‘Oda eyehe titafa, oda tabaro‑ya oda‑ya tikanawato tinamaroni.’ Mai ati naboneni.
27‘Owati dai mitahi. Dai owato awirini. Dai tokomahi. Dai ene amosarani.’ Hidi ati nebonane.
28Deoso ati‑ya mai mi‑mita‑mete mai toha, i‑di Abaraho toha, i‑di Isaki toha, i‑di Yako toha ne, Deoso ai nafi‑ka hidi kitabote tohawahe‑ya mai sawe, mai dai awiya, dai tokomakira ihi dai ohinabone, dai komene kitaboneni.
29Oda‑ya Bara mai sawibisa, mahi ka‑kaki beheri‑ka mai toha, mahi to‑toka beheri‑ka mai toha, mahi ka‑kaki‑ka mai toha, mahi to‑toka‑ka mai toha, mai na, Deoso ai nafi‑ka hidi kitabote tohawahe‑ya mai one sawe, oda marinaboneni.” Yeso ati nematane.
30 # 13:24-30 Yobe hidi i‑di Yeso tamine amane. Yeso‑ka mai tohi awira mai tokiyomaraboneni. “Owati dai mitahi. Deoso‑ya mai sawebone dai ati na, mai one sawiraboneni. Deoso‑ya mai sawirabone dai ati na, mai one sawibisaboneni.” Yeso ati nematane.
31Yeso hiyari hawa toheya, fariseo mai kamake,
“Yeso, tikamahi. Tiwa‑ya i‑di Erodi ati nanahabene.” Fariseo mai ati nameteni.
32“I‑di Erodi ati hini tohaya. I‑di Erodi‑ya dai tokiya, dai hiyarahi.
‘Yeso ati tamine timitahi. Owa amoni famiya, madi towe mai kana·onihebone, mai kiyana mai onakitamaboneni. Owa amoni oharimaki‑ya yama noko·onihe, hawa·oniheboneni. Yeso ati nene.’ Dai ati nahi.
33Owa amoni 3 kani‑ya yaka·onabone, makobote Deoso ati‑ya mai mi‑mita‑mete mai‑nima onaboneni. Yerosare‑ya Deoso ati‑ya mai mi‑mita‑mete mai nafi abameteni.” Yeso ati nematane.
34“Yerosare, tika mai ihi ohi·oneni. Tiwa‑kaya mai wi‑wina Deoso ati‑ya mai mi‑mita mai‑ya mai nanahabateni. Tika mai okasomabone ona, owati‑ya mai nofarani. Arakawa afe bodi‑ya bidi mai mookana, madi mai hikayawateni. Fara‑nima tika mai okayawabone ona, owa‑ya mai nofarani.
35Tika mai fawaniya, tika yobe honita tohawamebonane. Owati timitahi. Eya dai‑ka mai ati naboneni, owa‑ya mai hiyararo.
‘Deoso tiwa‑ya yose, tiwa‑ya kasomayaho, oda ati nineni.’ Mai ati nabone,
mai ati ni awisari‑ya osawimatasaraboneni.” Yeso ati nematane.
वर्तमान में चयनित:
Roka 13: jaaNT
हाइलाइट
शेयर
कॉपी
Want to have your highlights saved across all your devices? Sign up or sign in
