Roka 24
24
Yeso kitame
1Domiko yama wahabisari‑ya yati hodi‑ya mai fanawi tokomatasa, yama mahi amosa‑ya mai damakanameteni.
2Mai koboniya, yati webote hibati‑ya karotowiti hawa toha,
3mai tokiyoma, Yeso abo‑ya mai awarameteni.
4Mai atibodi yama‑ya kadikiya, mai yowi‑ya maki mai fama fodoke, mai demena, mai‑ka bora wahi kitameteni.
5Mai habi siitoni kita, mai yobati‑kaya mai nahorisa, mai moikanisameteni.
“Hini yamata ihi abo dai siba? Ai owa hasine abo ai sibaterani.” Mai ati nameteni.
6“Haa‑ya Yeso awimare, kitamene. Karireya‑ya sawiya, ati dai mitemari, ati dai atibodi watinawamahi.
7‘Dai‑ka Ayo neme‑ke‑ya mai watabone, Deoso ati‑ya mai tokadabara mai‑ya owa‑ya mai daanabone, awa‑ya owa‑ya mai baakanabone, dai amoni 3 tohi‑ya okitamaboneni.’ Yeso ati nemarine.” Mai ati nameteni.
8Yeso ati‑ya mai watowamameteni.
9Mai winitonama, Yeso‑ka mai 11 kana mai toha, Yeso‑ya mai sa‑sawi mai one toha, mai na, mai‑ya Yeso tamine‑ya mai kaminamameteni.
10I‑di Mariya Madarena ati toha, i‑di Yo·ana ati toha, Tiyako madi i‑di Mariya ati toha, mai fanawi one mai‑ya mai daba mai ati toha nameteni.
11“Mai fanawi ati tosawarineni.” Mai atibodi ati na,
mai ati‑ya mai nofarameteni.
12Bedoro waamise, yati hodi‑ya kanani tokome, moinise, hodi‑ya kiine, bora wefe wamani honita fore‑ya awe,
“Ka! Hini yamata ihi tohiti, Yeso awireri?” Bedoro atibodi ati ne, hini hika yobe‑ya tokomematane.
Emaosi‑ya mai one towakama
13Yeso‑ya mai da‑daba mai fama Emaosi‑ya mai towakamameteni. Yerosare toki‑ya ora fame‑ya Emaosi tohameteni.
14Mai yakakana, Yeso kitamemona tamine‑ya mai ibi hiyara,
15mai ibi hiyariya, Yeso mai‑ya kobone, mai‑ya sawimatane.
16Deoso ene Yeso‑ya mai watora, bare tohe awane mai atibodi ati nameteni.
17“Hini yamata tamine dai hiyara, dai yakakanaro?” Yeso ati nematane.
Mai maakanama, mai noki yawameteni.
18“Tiwa ohari‑ta yama tamine tiwatora awini? Yerosare‑ya ai sawe yama tamine‑ya ai nafi mitani.” Kirobasi ati ne,
19“Hini yamata tamine tohiti?” Yeso ati nematane.
“Yeso Nasare‑ke tamine amane. Deoso ati‑ya mi‑mita amane. Ene kite, ati Deoso himite, ati oda nafi hinofemarine.
20Deoso‑ka yama‑bone‑ya mai da‑daa mai‑ka hidi mai toha, ai‑ka hidi mai toha, mai na, Yeso‑ya mai daana, mai baahikanebonaha. Awa‑ya mai baahikane, abe, fare tamine‑ya oda hiyarineni.
21Yeso ene oda‑ka hidi yara mai tohamarabone oda ati nani. Oda amoni 3 kani neni, Yeso‑ya mai baanikaro.
22Mai fanawi ati oda mita, oda atibodi yama‑ya kadikani. Yama wahabisari‑ya yati hodi‑ya mai toka,
23abo mai hiawarenone. Mai kama,
‘Deoso‑ka yo‑yose mai oda awani. —Yeso kitamene.— Deoso‑ka yo‑yose mai ati nani.’ Mai fanawi ati nani.
24Yati hodi‑ya oda‑ka mai one toka, mai fanawi ati‑nima yama na‑ya mai awani. Abo mai hiawaremonane.” Kirobasi mai ati nameteni.
25Yeso mai‑ya hiyare,
“Yama‑ya dai watora, Deoso ati‑ya mai mi‑mita‑mete mai ati kote‑ya dai nofa kanibote terani.
26Deoso‑ka yama hani ati‑nima Deoso‑ka Ka‑kadika abe, kitame, amosabote tohawahane.” Yeso ati nematane.
27Mose‑ka yama hani ati‑ya Yeso mai‑ya kanawato, Deoso ati‑ya mai mi‑mita‑mete mai‑ka yama hani ati‑ya mai‑ya kanawatomaki, Deoso‑ka yama hani nafi‑ya hini tamine‑ya kanawato nematane.
28Emaosi‑ya mai kobona, Yeso fiyatonamebona,
29“Mahi toke, amotimatahi.” Mai ati nameteni.
Yeso‑ya mai ati barina, mai eyehe tokiyomematane.
30Mai tafabone, mesa‑ya mai nahorisa, baho‑ya Yeso damakane, Deoso‑ya hiyare, baho‑ya ebekane, mai‑ya baho‑ya daanematane.
31Deoso ati ene Yeso‑ya mai watowaha, makobote Yeso fawanematane.
32Mai ibi hiyara,
“Hawi‑ya oda‑ya hiyare, ati ene oda atibodi ya‑yainani. Yama hani ati‑ya oda‑ya kanawato, oda atibodi ya‑yainani.” Mai ati nameteni.
33Mai yoronimisama, Yerosare‑ya mai towakamatasa, Yeso‑ka mai 11 kana mai yorotokana, mai‑ya mai kobotokanama, mai one sawemeteni.
34“Ai‑ka hidi i‑di Yeso kitame, i‑di Simaho‑ya kobonene.” Mai yorotokana mai ati nameteni.
35Emaosi‑ya mai towaka, hawi‑ya Yeso mai‑ya hiyare tamine mai hikamina,
“Baho‑ya Yeso kebiya, Yeso oda watowamani.” Mai ati nameteni.
Hika mai da‑daba mai‑ya hiyaramatase
36Mai ibi hiyariya, mai teberi‑ya Yeso fodoki,
“‘Deoso dai‑ya kasomayaho.’ Oneni.” Ati nemarine.
37Mai sotatona,
“Ai korimari amani.” Mai atibodi ati na,
mai habi siitona,
38“Hini yamata ihi dai habo siitona? Hini yamata ihi dai atibodi yama‑ya dika?
39Fara ama·oni. Owa yehe, owa teme na, dai awahi. Owa yehe dai boyonahi. Ai korimari eme wadarihi, tone wadarihi teni. Owa‑ta owa eme toha, owa tone toha nibisineni. Fara owa abano amani.” Yeso ati nematane.
40Hiyari hawa tohe, yehe‑ya yofikana, teme‑ya yofikana nematane.
41Mai ya‑yaini nafe ihi mai ati yanara, Yeso‑ta ati yananamatase,
“Dai tefe tohini?” Yeso ati nematane.
42Aba tabasine kote‑ya mai daanameteni.
43Mai noki‑ya aba‑ya Yeso kabematane.
44“Hibati‑ya dai‑ya osawe, dai‑ya ohiyara,
‘Owa tamine‑ya Mose kanahano, owa tamine‑ya Deoso ati‑ya mai mi‑mita‑mete mai kanahano, Deoso‑ka wayoma hani‑ya owa tamine‑ya mai one kanahano nameteni. Mai ati‑nima yama naboneni.’ Onamaroni.
Fara yama hani mai hikanahanamete ati‑nima yama nineni.” Yeso ati nematane.
45Yeso ati ene Deoso‑ka yama hani ati‑ya mai watowahameteni.
46“Yama hani ati dai mitahi.
‘Deoso‑ka Ka‑kadika‑ya mai nanahababone, dai amoni 3 kani‑ya kitamebonane.
47Mai ihi towe‑maro‑ya mai nofamariya, mai ihi manakone wadamaraboneni. Fare Deoso‑ka Ka‑kadika ene amane. Fare tamine‑ya mai kaminaboneni, Yerosare‑ya. Makobote mai tabori dami‑ya tamine mai hikaminamakibonane.’ Yama hani ati nineni.
48Yama‑ya dai awamaro tamine dai kaminahi.
49 # 24:49 Deoso‑ka Doni tamine Yeso hiyarematamonane. Okobi yama‑ya daanebona ati ne, yama‑ya dai‑ya daa·onaboneni. Yerosare‑ya yama dai nimanahi. Yama koboniya, dai kitawahiya, dai tokawahaboneni.” Yeso ati nematane.
Neme‑ya Yeso tokome
50Betaniya tohi‑kaya mai eyehe tokome, Yeso yehe daatokamise, mai‑ya hiyare,
“Deoso dai‑ya kasomebonane.” Ati nematane.
51Mai‑ya hiyareya, neme‑ya tokomematane.
52Yeso‑ya mai kahiyara, Yerosare‑ya mai tokomatasameteni, mai ya‑yainaro.
53Deoso‑ka yobe‑ya Deoso‑ya mai kahiyaranademeteni. Feye amani.
वर्तमान में चयनित:
Roka 24: jaaNT
हाइलाइट
शेयर
कॉपी
Want to have your highlights saved across all your devices? Sign up or sign in
