Mata 7
7
Sariya kunna ge nda pagal
Luk 6.37, 38, 41, 42; 11.5-13
1Ḛ kṵṵ sariya ge ndu a̰me pagal to, ndwa go Dok sḛ kṵṵ ḛ sariya to me. 2Ago Dok mbo kun sariya ge ḛ pagal ge mojo̰o̰ ḛ kun sariya no ge nda pagal go me. Àa mbo kee ḛ kaŋ ge ḛ kee nda gegene ma ne me. 3Kee pe gyana, mo wa ka kuwa sugu ge no mo na̰ van ndwa zì ɗag ɗoo, mo wa kuwa ɔwara murguli ge no mo ndwa zì to me de? 4Koo kee pe gyana mo wa jan mo na̰ van go: N̰a mbi hee sugu van ge lerbeŋ ge no mo ndwa zì gezi, zane no, mo ge ɔwara murguli ge mo ndwa zì me de? 5Ge mbuɗi nda ndwa, ee pe ndage ɔwara murguli ge mo ndwa zige gale ɓiya, guwa̰ go mo wa kuwa gyana ge mbo ndage sugu ge mo na̰ van ndwa zige me. 6Kaŋ ge go na harcal, ḛ doo juu ma ne to, ne kaa ge num seŋe ta ya ḛ pagal gàn ḛ to. Ḛ ka̰a̰ kaŋ ge yee gḛḛ ma gezi to, a dinna ge ḛ mà kan yìn̰a ma ya ge kosoŋ ma ko pul se go, ne kaa ge num ndaa num ge maa ko se to.
Pool ge kaɗeya ne
7Ḛ kaɗe kaŋ ge ḛ ɓyare, àa mbo hon ḛ ne, ḛ yin̰a kaŋ ge ḛ ɓyare pe, ḛ mbo seɗ ne, ḛ dabe zok wa, àa mbo hage ḛ ne. 8Ago ndu ge diige ge ele a̰me, àa hon ne ne hon, ndu ge ɓyare a̰me seɗ ne seɗ, ndu ge dabe zok wa, àa mbo hage ne ne. 9A huɗi ne ḛ buwal zì, sok ge ne van ele ne katugum go ɗoo, wa hee njal hon ne de? 10Koo sok ele ne sini go ɗoo, wa ɔwabe bwam hon ne de? 11Go mbe no, ḛ ge sone ma zoo me, kaɗɗa ḛ kuwa kaŋ ge kwaɗa ma hon ḛ van ma kuwa, ḛ Ba ge no pḭḭ ma zì yà mbo hon num ge ele na kaŋ ge kwaɗa ma gyana ga de?
Fare pagal kwateya digi ge eeya ma way
Luk 6.31, 43-49
12Kaŋ ge ḛ ɓyare go nda ke ḛ num ma peɗ, ḛ sḛ ma waɗme, ḛ ke nda num mbe go me. Ago, a eeya ge Moyiz ne mage fare ge nda ge zwagre Dok wa ma njaŋe num ma ne, ndwa go nda mbo ge num pagal.
Zok wa ge zi ma
13Ḛ wuwa zok wa ge gwarse, ago zok wa ge a̰a̰l gene nda mbo banna, vin̰a ge gene nda mbo ne yà fiyal. Nda ge hee vin̰a mbe ma gḛḛ. 14Ɗaŋɗe, zok wa ge gwarse gene nda mbo ndwa ge fareba zì, vin̰a ge gene nda mbo ne yà ɓermem. Nda ge hee vin̰a mbe ma hoɗege guwa.
Nda ge kee ta nda ge zwagre Dok wa ma
15Ḛ koy ta kwaɗa ge nda ge kee ta nda ge zwagre Dok wa ma ta. Àa mbo ya ge ḛ ta ge diir ge tame ma way, zane no, àa bagomso ge kacage ḛ ma ne. 16Ḛ mbo kuwa num ge num kaŋ keeya ma ta. Àa hel on̰or ndwa tolla ma ge ɔwara kore ma ta hel de? Koo fere ndwa tolla ma ge ɔwara kilbiŋ ma ta hel me de? 17Ɔwara ge kwaɗa ge diige tol ndwa ge kwaɗa ma, ɗaŋɗe, ɔwara ge buusul ge diige tol ndwa ge buusul ma me. 18Ɔwara ge kwaɗa mbyaɗ tol ndwa ge buusul ma to, koo ɔwara ge buusul tol ndwa ge kwaɗa ma to me. 19Ɔwara ge diige ge tol ndwa ge kwaɗa to, àa chal ne, àa dol ne ol zì. 20Go mbe no, ḛ mbo kuwa nda ge kee ta nda ge zwagre Dok wa ma ge num kaŋ keeya ma ta.
Nda ge ame hateya ge fareba ma
21A be num peɗ ge tol mbi go: Bagezok, Bagezok ma mbo waɗ ne ge muluk ge Dok ne zì to. Ɗaŋɗe, àa num ge kee laa ɓyareya ge mbi Ba ge no pḭḭ ma zì yà ne ma ɗeŋew. 22Ge dwam kun sariya go, nda gḛḛ mbo ka tol mbi go: Bagezok, Bagezok! Àa ka jan mbi go: I dee be ka jan ka̰a̰l ge nda ge zwagre Dok wa ma way ge mo dḭḭl to de? I dee be ka yan on̰om ge sone ma zum ge mo dḭḭl to de? A be ge mo dḭḭl ta ɗoo, i ka kee kaŋ ajab ma no gḛḛ-gḛḛ me to de? 23Sok mbe go, mbi mbo jan num zum waŋ go: Mbi be kuwa ḛ to baɗ, ḛ wa̰a̰ ta ge ziya yà kaal ge mbi, ḛ nda ge kee n̰aal ma!
Fare sḭḭ ge zok pe dolla ge zi ma way
24Ago, fare mbe ge mbi hate ḛ num ya ma no, ndu ge diige ge ame num ya, ka kee tèmel ge num pagal, mbo kaɗ dinna ge ndu ge zwam ge sḭḭ na zok ge gon̰ pagal go. 25Sok ge mam suwa njanjal, mam muni soor ya ge zok mbe ta, sa̰a̰m ka poɗ ne, ɗaŋɗe, zok mbe be gul se to, ge dape, ne pe doo ge gon̰ pagal. 26Ɗaŋɗe, ndu ge diige ge za̰a̰ num za̰a̰ cuɗ, kee tèmel ge num pagal to, mbo kaɗ dinna ge ndu ge dàle ge sḭḭ na zok ge kafeɗem pul go go. 27Sok ge mam suwa njanjal, mam muni soor ya ge zok mbe ta, sa̰a̰m ka poɗ ne, zok mbe gul se ge ɓul mɔɗwag.
28Sok ge Zeso aa na fare hateya mbe ma go, ɓase mbe ge nɔnɔg ma ka kee ajab ge ne fare hateya mbe ma pe. 29Ago, ka hate num ge pool ge Dok hon na ne, be ge mojo̰o̰ num nda ge hate eeya ge Moyiz ne ma hate go to.
वर्तमान में चयनित:
Mata 7: kiaGRB
हाइलाइट
शेयर
कॉपी
Want to have your highlights saved across all your devices? Sign up or sign in
© 2017 Wycliffe Bible Translations, Inc. All rights reserved.