Mata 8
8
Zonna ge ndu ge kṵṵ swàm ne
Mrk 1.40-45; Luk 5.12-14
1Sok ge Zeso ndee ge njal digi ya se, ɓase mbe ge nɔnɔg ma ɗege kàre ne pe. 2Ndi! Ndu ge kṵṵ swàm a̰me zuɗ ge suwa̰me ya, mbo ya guu na ko ge ne ndwa se, jan ne go: Bagezok, kaɗɗa mo vinna, mo ge pool zon mbi, mbi wa haɗ kɔn̰al. 3Zeso ee na tok ge ne ta, jan ne go: «Mbi vinna go, see zonna.» Ge sok mbe go gaw, ndu ge kṵṵ swàm mbe haɗ kɔn̰al, ne bol haɗ somndol mbambala me. 4Guwa̰, Zeso jan ne go: Za̰a̰ mbi kwaɗa, ne kaa ge ndu a̰me za̰a̰ fare mbe to, gaa go mo mbo ngay tene ge ba ge kee tuwaleya ta, mo hon bobo ge Moyiz ho na wa ge ne pe ndwa go, ne kaa sayda ge nda ta peɗ go, mo zon-na go.
Hoɗ fareba ge asagar ge kis ma ga̰a̰l ne
Luk 7.1-10
5Sok ge Zeso ɗege waɗ mbo ge suwal Kapernawom diŋ, ga̰a̰l ge asagar ge kis ma way mbo ya ge ne ta, 6kaɗe ne go: Bagezok, mbi ndu ge tèmel fii diŋ yà looɗeya, njoɗ yal ya gḛḛ. 7Zeso jan ne go: Mbi mbo mbo, mbi mà zon ne. 8Ga̰a̰l ge asagar ge kis ma way gwan ge ne janna go: Bagezok, mbi be mbyaɗ ge go mo waɗ mbi zok wa to, ago ho mo wa gagag, mbi ndu ge tèmel mà seɗ zonna. 9Ago, mbi sḛ waɗme, mbi ge ga̰a̰l ma ge mbi ndwa zḛḛ, mbi kaɗ ge asagar ma ge mbi pe se me. Mbi jan a̰me ya go: Mbo sok gene yà go! Ne sḛ mbo ɓal. Ndu gegene: Mbo ya go go! Mbo yà me. Mbi jan mbi ndu ge tèmel ya go: Ke mbi kaŋ gegene mbe no! Kee ne ɓal. 10Sok ge Zeso za̰a̰ ne fare mbe ma go, kee ajab gḛḛ, jan num ge ka kàre na pe ma go: Fareba mbi jan ḛ ne no: Mbi be seɗ ndu ge hoɗ fareba ge na dul wa zì ya ge go mbe pe ɗu to koo ge Izrayel suwa pagal mɔɗwag. 11Fareba mbi jan ḛ ne no, rusu ge ɗogle ma mbo mbo ge lee mbii mage lee kuu ya, àa mbo ɓan kàɗɗa dagre ge ḛ baŋ ma, Abraham, Isak mage Jakob ge taabul ge ɗu wa go, ge muluk ge Dok ne zì yà. 12Ɗaŋɗe, rusu ge muluk mbe ee ge num pe ma, àa mbo kan num zum yà, ge sok ge tṵṵ ge ɗeɗeg ge nda oy fiyaso mage sul kin̰a no ne go. 13Guwa̰, Zeso jan ga̰a̰l ge asagar ge kis ma way mbe go: Guwa̰ mo yà, ge hoɗ fareba ge mo pagal, kaŋ ge mo ele, mà kee mbe go tem. Sok ge Zeso jin̰a ne fare mbe go gaw, ne ndu ge tèmel mbe seɗ zonna.
Zonna ma pe hini-hini
Mrk 1.29-34; Luk 4.38-41
14Guwa̰, Zeso hee vin̰a mbo ge Piyer yà. Sok ge dee yà, seɗ ne tisi ge gwale, mbɔgwam dol ne ya se. 15Wan ne tok, ne duul kan ne, guwa̰, ɗege digi ndwa kee kaŋ zam hon ne.
16Guwa̰ ge gyala dḭḭ se go, àa gene ne nda ge no ge on̰om ge sone ma ya gḛḛ-gḛḛ. Ge ne fare janna ma ta gagag, ee on̰om ge sone mbe ma waɗ zum ge num mbe ma zì, zon nda ge tuguɗi ge ɗogle ma peɗ waɗme. 17Kê ano mbe ndwa huy fare ge ndu ge zwagre Dok wa Ezay dee jin̰a ne go: «He i yal ma ge na pagal go, zo̰o̰ i ge i tuguɗi ma zì no me.»#Eza 53.4.
A seŋe ndu ge ame hateya ge Zeso ne pe gyana de
Luk 9.57-62
18Sok ge Zeso kuwa ɓase ma vee maa se, hoɗ na nda ge ame hateya ma na wa go, maa ha mbo mangaɗam ga̰a̰l wa lee gene yà. 19Ndu ge hate eeya ge Moyiz ne a̰me ɗu, gwan tene ya ge ne ta zì guwa, jan ne go: Ba ge hateya, mbi mbo kàre mo pe, ge sok ge mo mbo mbo ya num go ma peɗ. 20Zeso gwan ge ne janna go: Bole ma ge maa tàal ma, njoole ge pḭḭ zige ma ge maa zok ma me. Ɗaŋɗe, mbi, Van ge Ndu ne be sok a̰me ge paa na pagal zì.
21Ndu a̰me ɗu, ge ne nda ge ame hateya ge ɓase ma buwal zì, jan ne go: Bagezok, n̰a, mbi gale mbuu mbi ba ɓiya. 22Ɗaŋɗe, Zeso gwan ge ne janna go: N̰a nda ge suu suu paŋ ma mbul maa swày ma, mo sḛ, kare mbi pe ya.
Mḛḛya ge sa̰a̰m labreya ne
Mrk 4.35-41; Luk 8.22-25
23Guwa̰, Zeso ndee ge faa ga̰a̰l go, ne nda ge ame hateya ma ndee ge ne pe go waɗme. 24Ndii! Sa̰a̰m labreya dol-la ge mangaɗam ga̰a̰l pul go gaw. Sḭ̀ḭl ɗege kan mam ya faa go. Ano puy, Zeso dwam se. 25Ne nda ge ame hateya ma mbo ya kore ne digi, àa jan ne go: Bagezok mo̰o̰ i, i mbo go swày. 26Ne sḛ gwan ge num janna go: Ge dape, ḛ wa ka ndaɗ voo go de, ge hoɗ fareba hoɗege ma? Ge sok mbe go, ɗege digi, ngwabe sa̰a̰m mage sḭ̀ḭl, sok mbo ya mḛḛya cub. 27Nda peɗ ka ke ajab, àa ka ele ta, ta buwal zì go: Hii! A huɗi ne go ɗoo, sa̰a̰m mage mangaɗam ga̰a̰l ma wa ka za̰a̰ ne go de?
Zonna ge seger ge zi ma way
Mrk 5.1-20; Luk 8.26-39
28Sok ge Zeso mage na nda ge ame hateya ma dee ge mangaɗam ga̰a̰l wa lee gene yà, ge suwa ge nda ge Gadara ma way go, nda a̰me ma zi ge no ge on̰om ge sone ma ge maa zì ma waɗ ge tugul ge sok mbul ta ne zì ya, àa ka mbo ya ge ne ndwa zì. Num laa kaa ol ge go ndu a̰me tal tene kale ge vin̰a mbe go to. 29Ndi! Àa ɗege oy digi ge ka̰a̰l ndaal go: Dok Van ndo! Mo ɓyare da i ta de? Mo mbo ya go go iigi i be ge go i sok gale mbyaɗ to peɗ de? 30Zane no, vwag kosoŋ ma wa ya ɓyare kaŋ zam, ge ziya yà kaal nde ge num. 31On̰om ge sone ma ka gwarge ta Zeso ta, àa ka jan ne go: Kaɗɗa mo yan i, vḭḭ go i wuwa ge vwag ge kosoŋ ma way mbe no zì. 32Vin num, jan num go: Ḛ mbo! Àa ndage ya zum ge seger ge zi mbe ma zì mbo waɗ ge kosoŋ ma zì. Ge sok mbe go gaw, vwag ge kosoŋ ma way ge na ɓul mɔɗwag njeɗ soo ge wa kal digi ya mbo mangaɗam ga̰a̰l se yà, àa puu gezi mɔɗwag. 33Nda ge ka koy kosoŋ ma sok kuwa ano mbe go, àa chiya mbo suwal ga̰a̰l diŋ yà wan nda fare pe ge kaŋ ge maa kuwa num ma peɗ, ge zonna ge nda mbe ge zi ge kaa ge on̰om ge sone maa zì ma way me. 34Sok mbe go gaw, nda kan ge suwal ga̰a̰l diŋ ya mɔɗwag mbo ya ge Zeso ndwa zì. Sok ge àa kuwa ne, àa jan ne go: I kaɗe mo kaɗe, n̰a i suwa, mo mbo sok ge ɗogle.
वर्तमान में चयनित:
Mata 8: kiaGRB
हाइलाइट
शेयर
कॉपी
Want to have your highlights saved across all your devices? Sign up or sign in
© 2017 Wycliffe Bible Translations, Inc. All rights reserved.