Pianciilna 4
4
Cain le Abel
1Tuaciang Adam in a zi ompui a, a zi naupaai hi. Ama in tapa khat nei a, “Topa huna taw tapa khat ka nei hi,” ci hi. Tua ahikom ama in a min Cain phuak hi. 2Nungsang ciang tapa khat nei kik a, Abel ahi hi. Abel sia tuucingpa khat suak a, ahizong Cain sia lothopa khat ahi hi. 3Hun khat zawkciang Cain in a lo sung pan a piang ante hong paipui a, Topa tungah biakpiakna pia hi. 4Tuaciang Abel in a tuute khat pan a suak a taciil sia ngoin a sa limci belna teng taw biakpiakna pia hi. Abel biakpiakna tungah Topa lungkim hi, #Heb 11:4 5ahizong ama in Cain le a biakpiakna nial hi. Cain sia a thin uuk mama a, lungkim ngawlin a mainguum hi. 6Tuaciang Topa in Cain tungah, “Banghang thin uuk ni ziam? Banghang na mai nguumsak ni ziam? 7A maan seam na hile na maitai tu a, ahizong a sia na vawt hu in, mawna in na innkha ah bok nginge hi. Tua in nang hong uk nuam a, ahizong nangma in tuasia na zaw kul tu hi,” ci hi.
8Tuaciang Cain in a suapuipa Abel tungah, “Dui sungah pai tawng,” ci hi. Amate dui sung a thet ciang Cain in a suapuipa ngalvawtin thatlum hi. #Mt 23:35; Lk 11:51; 1 Jn 3:12
9 Topa in Cain tungah, “Na suapuipa Abel koi sungah om ziam?” ci in dongh hi.
Cain in, “He ngawl khi hi. Ka suapuipa a cingpa hi na khi ziam?” ci in zo hi.
10Tuasia ciang Topa in, “Banghangin hi bang a, a sia mama na seam thong ni ziam? Phula nuam a, a au aw khat bangin na suapuipa chisan in lei pan kei hong biakpui hi. #Heb 12:24 11Nang sia haamsiat thuakpa na hi a, leitangh tho thei nawn ngawl tu ni hi. Na thalup lai in na naupa chisan dong tu in a kamkaa sa bang keakin tua lei in na naupa chisan huup zo hi. 12An ciin tu na hanciam zong lei pan bangma piang ngawl tu a, inn nei ngawlin leitung ah na vakthap tu hi,” ci hi.
13Tuaciang Cain in Topa tungah, “Hi daanpiakna sia kei thuak tu in haksa leih hi. 14Ka omna ngam pan nong hawlkhia a, nong ompuina pan a khualana ah nong notkeak hi. Inn nei ngawlin leitung ah a vakthap ka hi tu a, hong mu po in kei hong that tu hi,” ci hi.
15Ahizong Topa in, “Hi ngawl hi. Khat po in nang hong that le phu kilamna in nuntakna sali kila tu hi,” ci in zo hi. Tua ahikom a kisik pui khat po in a thalup ngawl natu in, Cain tungah Topa in tepteena khat koi hi. 16Tuaciang Topa omna panin Cain paikhia a, Eden ii nisuana sang “Vakkot” a kicina ngam le lei ah teang hi.
Cain ii Suan le Paalte
17Cain le a zi in tapa khat nei a, a min Enoch phuak hi. Tuasia ciang Cain in khuapi khat saat a, a min tu in a tapa min vaw in Enoch ci hi. 18Enoch in tapa khat nei a, a min Irad ci hi, Irad sia Mehujael ii pa hi a, Mehujael in tapa Methushael nei a, ama sia Lamech ii pa ahi hi. 19Lamech in zi nii nei a, Adah le Zillah ahi hi. 20Adah in ta Jabal nei a, ama sia puanbuk sungah a teang ngankhoaite ii taanghpupi ahi hi. 21A suapuipa sia Jubal hi a, ama sia tengtongh le tamngai a tum thei, music thiamte theampo ii taanghpupi ahi hi. 22Zillah in Tubal Cain nei a, ama in thik le taau panin nazak namcin vawt hi. Tubal Cain ii suapuinu sia Naamah ahi hi.
23Lamech in a zite tungah,
“Adah le Zillah awng,
hong ngai tavun:
tangvalno khat thatlum zo khi hi,
banghang ziam cile
ama in kei hong vua hi.
24Cain kithalup manin
a nuntakna sali taw kithuk kik ahile,
kei hong thatlum a om le
a sawmsali le salivei in kithuk kik tu hi,” ci hi.
Seth le Enosh
25Adam le a zi in tapa dang khat nei hi. A zi in, “Cain ii a thalup Abel taang tu in, Pathian in tapa khat hong pia hi,” ci hi. Tua ahikom a min Seth phuak hi. 26Seth in Enosh kici tapa khat nei hi. Tua hun panin mihingte in biakpiakna ah Topa ii min thiangtho law kipan uh hi.
वर्तमान में चयनित:
Pianciilna 4: SCB2
हाइलाइट
शेयर
कॉपी
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016