Matayo 10
10
YEZU NASORA ENTUMWA IKUMI N’EBILI. — NAZITUMA.
1Nayeta Entumwa ze ikumi n’ebili, nabaha obuhicha bwo kwiruch’amasitani n’obwo kukiza buli busasi. 2Mbe amazina g’Entumwa ikumi n’ebili nigo ganu: owo kutandika ni Simoni, owe bayeta Petro, na Andrea, omutabani wabo; 3Yakobo, mwende Zebedeyo, na Yohana, omutabani wabo, Filipo na Bartolomayo, Toma na Matayo omusoroza, Yakobo wa Alfe na Tadeyo, 4Simoni omunakananayo, na Yuda Iskaryota, niwe alimutunda.
5Yezu natuma Entumwa ezo ikumi n’ebili, nabakomereza, nagira ati: Mutaraba mu muhanda gw’abasenzi, kai mutagenda mu byaro by’Abanasamariya, 6nawe mukane kugenda ha nabalega ezabuzire z’enzu ya Israeli#10, 6 Enabalega z’enzu ya Israeli nibo Abayahudi; Yakobo, ise bonene, niwe barukire izina ly’echesongoro, bati: Israeli. Yezu akugambira Entumwa ze kwolekerera Abayahudi bonka, kuba omwanya gw’abasenzi gwaliga gutakahikire. Alibalagira kwolekerera amahanga gona k’alamara kuhanama mw’igulu.. 7Mbe mugende, mwolekerere nimugambe okw’obukama bwo mw’igulu bwahikire hehi. 8Mukize abarwere, muzokore abafu, mukize ab’omubili, mwiruche amasitani: mukahabwa busa, mugabe busa. 9Mutaba n’ezahabu, n’efweza n’empilya mu miko zanu; 10mutagir’ensaho mu lugendo, n’enkanzu ibili zona pai, enketo pai, enkoni pai: kuba omukozi ahikire kubona ebilyo bye. 11Buli charo n’oluguyo ebyo mulazamoga, mwabuza omuntu ahikire muli chonene; mbe okwo niyo mwaba bo kwikara kuhika kurugayo. 12Mwatahaga mu nzu, mwagibwacha nimugira muti: Omulebo gube mu nzu munu. 13Mbe enzu egyo k’ekuba eguhikire, omulebo gwanu gukugizaho; nawe k’ekuba etahikire, aho omulebo gwanu gukubasubira. 14Buli eyo balyanga kubanankura no kuhulira ebigambo byanu, muruge mu nzu egyo hamo mu charo echo, mwesisibanye enkungu ha bigere byanu. 15Koto nkubagambira nti: Ensi y’Abanasodoma n’Abanagomora elitemamo ha lunaku lwo kulamurwa kukira echaro echo.
YEZU NABAGAMBIRA OKWO BALINARANAZIBWA, KAI NABAHIGAHAZA.
16Lora, nabatuma nk’enabalega hagati y’emisege. Mbe mube bakeruke nk’enzoka, kai banantasoba nk’ameba. 17Mwekenge ha bantu, kuba balibasagara mu malamuliro, kai balibasanzulira mu masomero gabo; 18kandi balibasagara ha batware n’abakama, niho mummanyisye muli bonene na mu mahanga. 19Ka balibasagara, muleke kutekateka okwo mulagamba n’ebyo mulatenga: kuba mulihabwa ebyo kugamba mu katungu ako. 20Abalifumora t’imwe, nawe ni Mwoyo gwa So wanu, nigwo gulifumora mul’imwe. 21Omuntu alisagara mutabani wabo mu lufu, kai ise muntu, omwana we; kai abana baligomera abazere babo, babaite. 22Bona balibahatira izina lyange; mbe aliguma kuhika ha muhero, niwe alichunguka. 23Ka balibanaranaliza mu charo kimo, mwiruke mu kindi. Koto nkubagambira nti: Timulimara ebyaro bya Israeli kuhika Omwana w’omuntu aize#10, 23 Omukama wetu akumanyisya Entumwa ze amazongoko n’obunale obulibezira kubera Wenene. Emiyingiro mingi zilizira abahemba ba Yezu, nawe wenene aliyoleka obuhicha bwe, nk’olwo alituma Abanaroma kusingaricha Yeruzalemu..
24Tihaliho omwolekererwa akukira omwolekerezi we, n’omwiru akukira isebugeni. 25Ekihikire omwolekererwa, kwenda yaba nk’omwolekerezi we, n’omwiru nk’esebugeni. Bakayeta nineka bati: Belizebubu#10, 25 Ekigambo “Belizebubu” nilyo izina ly’omukuru w’amasitani. Abahate ba Yezu bamwetaga izina elyo kumusekerera. Mbe ebigambo ebyo Yezu yagambire abahemba be bili n’ensonga zinu: ine bakankolera kubi, kai n’emwe, bahemba bange, mutalikuma ka balibakolera kubi., kai kuta abo mu ka ye! 26Mbe mutabatina kuba tihaliho ekiserekire ekitalisururuka, n’ekitamize ekitalimanywa. 27Ebyo nkubagambira mu mwirima, imwe mubigambe ha musana, n’ebyo mukuhulira mu matwi, mubyolekererere ha luswi. 28Kai mutatina abakwita engingo, nawe omwoyo batakuhicha kugwita; nawe mutine muno akuhicha kunaga omwoyo n’engingo mu muliro ogutahwaho. 29Si masyantale abili tigagurwa hel’emo? Nawe limo muli gonene tilikugwa ha nsi, Iso wanu atayenzire. 30Nawe isoke lyanu lya ha mutwe libazirwe lyona. 31Mbe nimuleke kutina: imwe mukizire masyantale mengi. 32Omuntu akunikiriza mu meso g’abantu, ine nena ndimwikiriza mu meso ga Tata wo mw’igulu. 33Nawe akuneyoga mu bantu, ine nena ndimweyoga hali Tata ali mw’igulu. 34Mutachwa muti: Nkeza kuleta omulebo mu nsi; tinezire kuleta omulebo, nawe nkaleta embanda. 35Kuba nkeza kutaganisya omuntu n’ese, omwana w’obuhara na nina, omukamwana na ninazara; 36abahate b’omuntu baliba abo mu ka yabo. 37Omuntu akayenda ise hamo nina kukira ine, ogwo tampikire; kai omuntu akayenda omutabani hamo omuhara we kukira ine, ogwo tampikire. 38Kai atategula omusalaba gwe, akanduba, wena tampikire. 39Akusasira omwoyo gwe, aligunaga, nawe alinaga omwoyo gwe ha bwange, aligubona.
40Akubanankula, akwanankula ine; kai akwanankula ine, akwanankula ayantumire. 41Akwanankula omulagi obw’ali mulagi, alihabwa empera y’omulagi; kai akwanankula omutakatifu ha bw’obutakatifu bwe, alibona omuhero gw’omutakatifu. 42Aliha omo wo mu bana bato banu akataho kamo k’amenzi ganilire, kuba ali muhemba wange, koto nkubagambira nti: ogwo taliburwa empera ye#10, 42 Omukristu muzima talibura kubona amazongoko, kuba kengi alilagirwa kwanga ababo abaliyenda kumuhabisya. Omuhemba wa Yezu ali no kwenda Mungu kukira ababo bona no kwemera obunale bwona, niho abone obulame obutahwaho..
वर्तमान में चयनित:
Matayo 10: KED1946
हाइलाइट
शेयर
कॉपी
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.