युहन्ना 12
12
बेथानीया नम्सरी येसु
(मत्ती २६:६-१३; मर्कुस् १४:३-९)
1नीस्तार पङ्बे पर्ब म्हन्दीब बीम डुःरेत् ङोन्ग्यम्नो येसु बेथानीया नम्सरी ब्योन्खज्यी। हुजु नम्सरी येसुचे स्यीब ग्यम्से सोन लजेत्पे लाजरस टीबल मुबल। 2थेङ्यीमाचे हुजुरी येसुइ लागीरी ङ्येसेकी स्येब स्य्हेङ्ज्यी। ओसेम् मार्थचे स्य्हेब क्योङ्बे लक् स्य्हेङ्टीब मुबल, ओसेम् लाजरसमी येसुतेङ् स्य्हेब सोल्बरी टीटीबे म्हीमातेङ् मुबल। 3ओसेम् मरीयम्चेम् य्हक्को ज्यबे थङ् खबे म्हङ्गो छ्युकु बज्यीम् येसुइ स्य्हब्री युज्यीम् थेइ क्र बाचे फ्यापीन्ज्यी। ओसेम् हुजु छ्युगुइ थङ्चे दीम् प्लीङ्ज्यी। 4तर थेङ्की डबमा न्हङ्की डब गी, लीक्यम् येसुत चुङ्न लपीन्स्येकी डब यहुदा स्करीयोतचे पङ्ज्यी, 5“चु य्हक्को ज्यबे थङ् खबे म्हङ्गो छ्युगु मन सोम् म्हुइकी डबल्री#१२:५ मन सोम् म्हुइकी डबल् मन सोम् म्हुइकी डबल् म्ही गीःल तीत्तीङ्की म्हेल मुबल। चुङ्ज्यीम् प्रङ्नमात पीन्सम् तस्येल, अय्हीनो स्यीम्?” 6थेचे प्रङ्नमात म्होइबल तज्यीम् चोले पङ्बल अय्हीन्, तर थे य्हो तज्यीम् चोले पङ्बल मुबल। टङइ गल्द थेचे नाब मुबल, ओसेम् थेचे हुजु गल्द ग्यम्से टङ य्हो लब मुबल। 7ओसेम् येसुचे सुङ्ज्यी, “थेत तएनो थपङो! ङइ ल्ही बुब्बे लागीरी थेचे चु ज्यबे थङ् खबे म्हङ्गो छ्युगु फोर्बल य्हीन्ब। 8प्रङ्नमाम् एङ्यीमातेङ् खेमा पङ्लेनो तब, तर ङ एङ्यीमातेङ् खेम पङ्लेनो तस्ये अरे।”
9येसु बेथानीया नम्सरी मुब पङ्बे तम् स्येब बीसेम् य्हक्को यहुदी म्हीमा हुजुरी खज्यी। थेङ्यीमा हुजुरी येसुत च्याबरीकीनो अय्हीन्, तर थेङ्चे स्यीब ग्यम्से सोन लजेत्पे लाजरसतएनो च्याबरी खबल मुबल। 10होत्तज्यीम् ङ्हच्छ्यङ् लम्बुमाचे लाजरसतएनो सेत्पे तम् डीःज्यी। 11तलेपङ्सम् लाजरस स्यीब ग्यम्से सोबल तज्यीम् य्हक्को यहुदीमाचे थेङ्यीमात ख्लेथेन्ज्यीम् येसुत बीस्वास् स्य्हेङ्टीबल मुबल।
यरुसलेम्री येसु वङजेत्पल
(मत्ती २१:१-११; मर्कुस् ११:१-११; लुका १९:२८-४०)
12न्हम्स्य्होर्हङ् नीस्तार् पर्बइ लागीरी खबे य्हक्को म्हीमाचे येसु यरुसलेम्री ब्योन्खटीब पङ्बे तम् थ्येःज्यी। 13ओसेम् थेङ्यीमाचे खजुर् पङ्बे दोङ्बोइ य्हर्ङमा थोज्यीम् थेङ्त स्वागत् स्य्हेङ्बरी लीङ्स ग्यम्से डोङ्ज्यी। ओसेम् क्रीङ्ज्यीम्, “पर्मेस्वर्त तोप्प तखइ! परमप्रभुइ छेन्री ब्योन्खबे इस्राएलकी ग्यल्बो मोलम् यङ्बे म्ही य्हीन्ब” बी पङ्टीबल मुबल।
14ओसेम् येसुचे य्हरु बुङ्गु गीः यङ्ज्यीम् हुजुइ जोरी स्य्हुजेत्ज्यी। धर्म छ्येःरी चोले ब्रीबल मुब-
15“यरुसलेम्की म्हीमा एङ्यीमा थलोङो!
च्याको एइ ग्यल्बो य्हरु बुङ्गुइ जोरी स्य्हुजेत्ज्यीम् ब्योन्खटीब।”#जकरीया ९:९
16हुजु बेलोरी येसुइ डबमाचे चु तम् अगो, तर येसु स्यीब ग्यम्से सोजेत्ज्यीम् महीमारी स्येजेत्प बीसेम्कीनो धर्म छ्येःरी ब्रीबे चु तम्, ओसेम् म्हीमाचे स्य्हेङ्बे हुजु लक्मा थेङ्की लागीरी टीम् बी गोज्यी।
17येसुचे लाजरसत दुर्स ग्यम्से ङ्होत्जेत्ज्यीम् स्यीब ग्यम्से सोन लजेत्पल म्रङ्बे म्हीमाचे ल्हो-ल्हो म्हीमात हुजु तम् स्येत्स्यीनो टीबल मुबल। 18येसुचे स्य्हेङ्जेत्पे हुजु अचम्मइ लक्की बारेरी थ्येःबल तज्यीम् य्हक्को म्हीमा थेङ्त खतु लबरी खबल मुबल। 19फरीसीमा न्हङ्री गीःचे गीःत पङ्ज्यी, “ङ्य्हङ्माचेम् तएनो स्य्हेङ् अखम्। च्यागो जम्बुलीङ्की जम्मनो म्हीमा येसुइ लीप्चे ब्रटीबल मुब।”
ल्हो-ल्हो य्हुल्की म्हीमाचे येसुत म्हइबल
20ग्रीस पङ्बे य्हुल्की डेत् डेत् म्हीमा पर्बइ बेलोरी यरुसलेम्री पर्मेस्वर्त तेन्बरी खबल मुबल। 21ओसेम् थेङ्यीमा गालील् प्रदेस्की बेथसेदाकी फीलीपज ङ्यीज्यीम् पङ्ज्यी, “लोप्पोन्, ङ्यीमात येसुतेङ् खतु लबे सेम् मुब।” 22फीलीप्चे चु तम् अन्द्रीयासत स्येत्पीन्ज्यी, ओसेम् थेङ्यी ङ्य्हीनो येसुइज ङ्यीज्यीम् चु तम् थेङ्त स्येत्पीन्ज्यी। 23ओसेम् येसुचे थेङ्यीमात सुङ्ज्यी, “देरेम् म्हीइ ज महीमारी वङ्बे बेलो खबल मुब। 24ङ एङ्यीमात देमेन्नो पङ्ब, व्हइ फुम् सरी दोज्यीम् अक्रम्ज्यी पङ्सम् हुजुचे तएनो अरो, तर हुजु सरी दोज्यीम् क्रम्ज्यी पङ्सम् हुजुचे य्हक्को अन्न रोब। 25होलेनो खल्चे र्हङ्की जीवन्त म्होइब थेचे थेइ जीवन म्हन लस्ये मुब, तर खल्चे र्हङ्की जीवन्त जम्बुलीङ्री अम्होइ थेचे खेमेएनो अबेबे जीवन् यङ्स्ये मुब। 26ङइ लक् स्य्हेङ्ब म्हेन्बलमा ङइ लीप्-लीप् ब्रथोब। ङ खन तज्यी, ङइ लक् स्य्हेङ्बलएनो हुजुरी तस्ये मुब। ङइ लक् स्य्हेङ्बलत ङइ अपचे स्य्हेस स्य्हेङ्जेत्स्ये मुब।
येसुचे र्हङ् स्यीस्येकी बारेरी ङोन्नो सुङ्बल
27“देरेम् ङइ सेम् य्हक्को दुखचे प्लेबल मुब, ता ङचे अपत ‘हुजु दुखइ बेलो ङइ जोरी थखपुङ्जेतो’ बी पङ्ल? ङचे होले अपङ्, तलेपङ्सम् हुजु दुख नाबे लागीरीनो ङ चु जम्बुलीङ्री युबल य्हीन्ब। 28अप, थेङ्की छेन्की महीमा तनलजेतो।” ओसेम् स्वर्ग ग्यम्से चोतेबे केत् थ्येःज्यी, “ङचे हुजु महीमा कीन्बल मुब, ओसेम् देबेएनो कीन्स्ये मुब।”
29हुजुरी र्हुब् तबे य्हक्को म्हीमाचे हुजु केत् थ्येःज्यी, ओसेम् डेत् डेत्चे पङ्ज्यी, “मु गुरुङ्पल य्हीन्ब।” ल्हो-ल्हो डेत् डेत्चेम्, “स्वर्गदुत्चे थेङ्तेङ् तम् लज्यी” बी पङ्ज्यी। 30ओसेम् येसुचे सुङ्ज्यी, “स्वर्ग ग्यम्से युबे चु केत् ङइ लागीरी अय्हीन्, तर एङ्यीमाकी लागीरी य्हीन्ब। 31देरेम् चु जम्बुलीङ्की न्याय स्य्हेङ्बे बेलो खबल मुब, देरेम् जम्बुलीङ्की सासक्त तेत्लास्ये मुब। 32ओसेम् ङ जम्बुलीङ् ग्यम्से तोर् कोत्प बीसेम् जम्मनो म्हीमात ङइज खन लस्ये मुब।” 33चु फ्रोइ येसुचे र्हङ् खले स्यीस्ये पङ्बे तम् ङोन्बरी सुङ्बल मुबल।
34म्हीमाचे येसुत पङ्ज्यी, “धर्म छ्येःचे मुक्ती न्हङ्बे ख्रीस्ट्मी खेमेएनो स्यीस्ये अरे पङ्बल ङ्यीमात था मुब। म्हीइ ज तोर् कोत्थोब बी थेङ्चे खले सुङ्ब खम्ब? थेङ्चे सुङ्बे म्हीइ ज खल स्यीम्?” 35येसुचे थेङ्यीमात जोहाप् न्हङ्ज्यी, “य्हम्बगीकीनो य्हल् एङ्यीमातेङ् बक्च्य तस्ये मुब। य्हल् एङ्यीमातेङ् बक्च्य मुबे बेलोरीनो र्हङ्की ग्यम्से ब्रउ, एङ्यीमात म्हुन्दुङ्चे अउप्खइ। म्हुन्दुङ्न्हङ् ब्रबलचे र्हङ् खन ङ्यीटीब बी अस्ये। 36य्हल् मुगते एङ्यीमाचे य्हल्त बीस्वास् स्य्हेङो, ओसेम् एङ्यीमा य्हल्की ज जमे तस्ये मुब।”
चोते सुङ्ब बीसेम् येसु हुजु ग्ला ग्यम्से स्येजेत्ज्यीम् थेङ्यीमा ग्यम्से लाजेत्ज्यी।
यहुदीमाचे बीस्वास् अस्य्हेङ्बल
37येसुचे म्हीमाकी ङ्होन्सङ्नो अचम्मइ लक्मा य्हक्कोनो स्य्हेङ्जेत्पल मुबल, तर थेङ्यीमाचे थेङ्त बीस्वास् अस्य्हेङ्। 38अगम्बक्त यसैयाचे पङ्बे चु तम् टोप् तखज्यी,
“परमप्रभु, खल्चे ङ्यीमाकी सम्तर्त पतइतीज्यी?
ओसेम् परमप्रभुइ ङ्हच्छ्यङ् सक्ती खलत ङोन्ज्यी?”#यसैया ५३:१
39होत्तज्यीम् थेङ्यीमाचे बीस्वास् स्य्हेङ्अखम्, तलेपङ्सम् यसैयाचेएनो पङ्बल मुब-
40“पर्मेस्वर्चे थेङ्यीमाकी मीः कन स्य्हेङ्पीन्जेत्पल मुब,
ओसेम् थेङ्यीमाकी सेम्त कोङ्न लपीन्जेत्पल मुब,
होत्तज्यीम् थेङ्यीमाकी मीःचे अम्रङ् ओसेम् सेम्चे गोअखम्,
अय्हीन् पङ्सम् थेङ्यीमा ङ पट्टी दोस्येल,
ओसेम् ङ थेङ्यीमात फेन्न लस्ये मुबल।”#यसैया ६:१०
41यसैयाचे येसुइ ङ्हच्छ्यङ् महीमा म्रङ्ज्यीम् पङ्ज्यी।
42होलेतलेनो य्हक्को र्हङ्ब यहुदी अगुवामाचे थेङ्त बीस्वास् स्य्हेङ्ज्यी, तर फरीसीमाचे थेङ्यीमात यहुदीमा र्हुब् तबे दीम्चे तेत्लाल बी लोङ्बल तज्यीम् चु तम् खलतएनो अस्येत्। 43तलेपङ्सम् थेङ्यीमाचे पर्मेस्वर् ग्यम्से यङ्बे तोप्प बीम म्हीमा ग्यम्से यङ्बे तोप्प यङ्खइ म्हेन्ब मुबल।
बीस्वास् अस्य्हेङ्बलमा दोसी तब
44येसुचे केत् ङ्हच्छ्यङ् तेत्जेत्ज्यीम् सुङ्ज्यी, “ङत बीस्वास् स्य्हेङ्बलचे ङतकीनो अय्हीन्, तर ङत पीत्युजेत्पलतएनो बीस्वास् स्य्हेङ्ब। 45ओसेम् ङत म्रङ्बलचे ङत पीत्युजेत्पलतएनो म्रङ्ब। 46ङ जम्बुलीङ्की लागीरी य्हल् तज्यीम् खबल य्हीन्ब। ङत बीस्वास् स्य्हेङ्बलमा खलएनो म्हुन्दुङ्री अतखइ पङ्ज्यीम् युबल य्हीन्ब। 47ङइ तम् थ्येःज्यीम् अङ्येन्बलमाकी न्याय ङचे अस्य्हेङ्, तलेपङ्सम् ङ जम्बुलीङ्की न्याय स्य्हेङ्बरी युबल अय्हीन्, तर थर्न लबरी युबल य्हीन्ब। 48ङत स्वीकार अस्य्हेङ्बलमातेङ् ङइ तम् अङ्येन्बलमाकी न्याय स्य्हेङ्स्ये मुब। ङचे पङ्बे तम्सेनो ज्युःकी दीन्री थेङ्यीमाकी न्याय स्य्हेङ्स्ये मुब। 49तलेपङ्सम् ङचे ङइ तम् पङ्बल अय्हीन्, तर ङत पीत्युजेत्पे अपचेनो ङचे पङबे जम्मनो तम्मा पङो बी कुल्जेत्पल य्हीन्ब। 50ङत था मुब, थेङ्चे कुल्जेत्पे अर्तीचेनो खेमेएनो अबेबे जीवन पीन्ब। होत्तज्यीम् अपचे ङत सुङ्जेत्प र्हङ्लेकीनो ङचे पङ्ब।”
वर्तमान में चयनित:
युहन्ना 12: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
