युहन्ना 19
19
1हुजु लीप्चे येसुत कोर्रचे ग्यङो पङ्ज्यीम् पीलातस्चे स्यीपइमात कुल्ज्यी। 2कोर्रचे ग्यङ्ब बीसेम् स्यीपइमाचे येसुत पुजुकी क्रेःकी स्य्हेङ्ज्यीम् कुःपीन्ज्यी, ओसेम् ग्यल्बोचे येन्ब र्हङ्बे खवल खपीङ् येन् येन्पीन्ज्यी। 3ओसेम् थेङ्यीमाचे थेङ्की रेइरी खज्यीम्, “लस्सो, यहुदीमाकी ग्यल्बो!” पङ्ज्यीम् ङोःज्यी, ओसेम् थेङ्त पातल्चे ग्यङ्ज्यी।
4पीलातस देबेएनो दोरी डोङ्ज्यीम् थेङ्यीमात पङ्ज्यी, “चु म्हीचे सजय यङ्थोबे लक् तएनो स्य्हेङ्बल ङचे अय्हङ्, हुजु तम् एङ्यीमाचे स्येखइ पङ्ज्यीम् ङचे थेत एङ्यीमाज बब छ्येटीब।” 5हुजुलीप्चे पुजुकी क्रेःकीतेङ् खवल खपीङ् येन् येन्बे येसु दोरी डोङ्युजेत्ज्यी। ओसेम् पीलातसचे थेङ्यीमात, “चु म्हीत च्यागो!” बी पङ्ज्यी।
6ङ्हच्छ्यङ् लम्बुमातेङ् पर्मेस्वर्की दीम् रुङ्बे स्यीपइमाचे येसुत म्रङ्ब बीसेम् क्रीङ्ज्यीम्, “थेत क्रुस्री च्योलागो, थेत क्रुस्री च्योलागो!” बी पङ्ज्यी।
ओसेम् पीलातसचे थेङ्यीमात पङ्ज्यी, “एङ्यीमाचेनो थेत बोर्ज्यीम् क्रुस्री च्योलागो, तलेपङ्सम् ङचेम् थेतेङ् तइ दोस्एनो यङ्बल अरे।”
7ओसेम् यहुदी अगुवामाचे जोहप् पीन्ज्यी, “ङ्यीमाकी नीयम् मुब, हुजु नीयम् अनुसार थेचे स्यीबे सजाय यङ्नो थोब, तलेपङ्सम् थेचे र्हङ्चे र्हङ्तनो पर्मेस्वर्की ज य्हीन्ब बी पङ्ब।”
8चु तम् थ्येःब बीसेम् पीलातस झेन् लोङ्ज्यी। 9ओसेम् पीलातस देबेएनो दर्बारन्हङ् वङ्ज्यीम् येसुत, “ए खनल?” बी ङ्योत्ज्यी, तर येसुचे तइ जोहबएनो अन्हङ्। 10पीलातसचे थेङ्त पङ्ज्यी, “एचे ङत तले तएनो अपङ्बल? एचे स्येबल अरे? एत पीत्लाबे हक् ङइ यारी मुब, ओसेम् एत क्रुस्री च्योबे हक्एनो ङइ यारी मुब।”
11ओसेम् येसुचे सुङ्जेत्ज्यी, “पर्मेस्वर्चे अन्हङ्बल य्हीन्सम् थेङ्ल ङइ जोरी तइ हकएनो अतस्येल। होत्तज्यीम् ङत थेङ्की यारी सोप्तीपीन्बलचे य्हक्को ङ्हच्छ्यङ् पाप स्य्हेङ्बल मुब।”
12चु थ्येःज्यीम् पीलातस्चे देबेएनो येसुत पीत्लाब म्हइज्यी, तर यहुदीमाचे क्रीङ्ज्यीम् पङ्ज्यी, “हुजुत पीत्लाज्यी पङ्सम् थेङ् रोमी ग्यल्बो कैसर्की र्हो अय्हीन्। खल्चे पङ्लेनो र्हङ्चे र्हङ्त ग्यल्बो पङ्सम् थेचे कैसर्की बीरोद् स्य्हेङ्ब।”
13चु तम्मा थ्येःब बीसेम् पीलातस्चे येसुत युङ्बचे स्य्हेङ्बे दोरी (हुजुत हीब्रु ग्योत्री गब्बथा पङ्ब) बोर्ज्यी, ओसेम् पीलातस न्याय स्य्हेङ्बे ठीरी टीज्यी। 14हुजु बेलो नीस्तार पर्बइ ङोन्ग्यम्की दीन्की दीन्गुङ् मुबल। पीलातसचे यहुदीमात, “च्यागो, एङ्यीमाकी ग्यल्बो!” बी पङ्ज्यी।
15थेङ्यीमा चोले पङ्ज्यीम् क्रीङ्ज्यी, “थेत सेत्नो थोःब! क्रुस्री च्योथोःब!”
पीलातसचे थेङ्यीमात ङ्योत्ज्यी, “एङ्यीमाकी ग्यल्बोत ङ देमेन्नो क्रुस्री च्योलास्येउ स्यीम्?”
ङ्हच्छ्यङ् लम्बुमाचे पङ्ज्यी, “रोमी राजा बीम ल्हो-ल्हो ङ्यीमाल खलएनो ग्यल्बो अरे।”
16चु थ्येःब बीसेम् पीलातसचे येसुत क्रुस्री च्योलाबरी थेङ्यीमाकी यारी सोप्तीपीन्ज्यी।
येसु क्रुस्री
(मत्ती २७:३२-४४; मर्कुस् १५:२१-३२; लुका २३:२६-४३)
होत्तज्यीम् स्यीपइमाचे येसुइ जीम्म कीन्ज्यी। 17ओसेम् येसुचे र्हङ्की क्रुस् र्हङ्चेनो नाजेत्ज्यीम् खप्पर् पङ्बे ग्लारी स्येजेत्ज्यी। (हुजुत हीब्रु ग्योत्री गलगथा पङ्ब।) 18हुजु ग्लारी दोःब बीसेम् स्यीपइमाचे थेङ्त क्रुस्री खील् ठोक्ज्यीम् च्योलाज्यी, ओसेम् ल्हो-ल्होमाएनो ङ्य्हीत थेङ्की केत्तेङ् ल्होम् पट्टीचे च्योलाज्यी, थेङ्तमी ङ्य्हीकी गुङ्री च्योलाज्यी। 19पीलातस्चे, “नासरत्की येसु यहुदीमाकी ग्यल्बो” पङ्बे दोस्की तम् ब्रीज्यीम् क्रुस्की जोरी ठोक्ज्यी।
20हुजु ब्रीबे तम् य्हक्को म्हीमाचे खेत्ज्यी, तलेपङ्सम् येसुत क्रुस्री च्योबे ग्ला हुजु लीङ्सइ ज्यदङ् मुबल। हुजु तम् हीब्रुतेङ् ल्याटीन् ओसेम् ग्रीक ग्योत्री ब्रीबल मुबल। 21यहुदीमाकी ङ्हच्छ्यङ् लम्बुमाचे पीलातस्त पङ्ज्यी, “यहुदीमाकी ग्यल्बो बी थब्रीजेतो, तर थेचे ‘ङ यहुदीमाकी ग्यल्बो य्हीन्ब’ पङ्ज्यी बी ब्रीपीन्जेतो” 22ओसेम् पीलातस्चे, “तज्यी देरेम् ङचे ता ब्रीले ब्रीज्यीन्ज्यी” बी पङ्ज्यी।
23स्यीपइमाचे येसुत क्रुस्री च्योलाब बीसेम् थेङ्की न्हम्जमा बो ब्ली लज्यीम् का-कर् जुज्यी। थेङ्चे येन्जेत्पे र्हीङ्बे न्हम्ज तोर् य्हङ्से मोर् सम्मनो अडुब्नले राबल मुबल। 24होत्तज्यीम् थेङ्यीमान्हङ् चोले पङ्ज्यी, “चुमी अडेः, तर चीठ्ठा यु:ज्यीम् खलइ मीन्री दोःमु च्यागे।”
धर्म छ्येःरी पङ्बे फ्रोइ टोप् तबरी चोले तज्यी।
“थेङ्यीमाचे ङइ येन् र्हङ्न्हङ्री जुज्यी, ओसेम् ङइ र्हीङ्बे येन्की लागीरीम् चीठ्ठ यु:ज्यी।”#भजनसंग्रह २२:१८
होत्तज्यीम् स्यीपइमाचे चु लक् स्य्हेङ्ज्यी। 25ओसेम् थेङ्त च्योबे क्रुस्की रेइरी थेङ्की अम, थेङ्की अमइ अङ, क्लोपास्की म्रीङ् मरीयम्, ओसेम् मरीयम् मग्दलीनी रप्टीबल मुबल। 26येसुचे थेङ्की अमतेङ् थेङ्चे म्होइजेत्पे डब रेइरी रप्टीबल म्रङ्ज्यीम् र्हङ्की अमत, “स्हीगो, चु म्ही थेङ्की ज” बी सुङ्ज्यी। 27ओसेम् थेङ्चे हुजु डबत सुङ्ज्यी, “च्याको, एइ अम” हुजु बेलो य्हङ्से हुजु डबचे येसुइ अमत र्हङ्की दीम्री बोर्ज्यी।
येसुइ बुः य्हर्बल
(मत्ती २७:४५-५६; मर्कुस् १५:३३-४१; लुका २३:४४-४९)
28ओसेम् येसुचे देरेम् जम्मनो लक्मा बुत्ज्यी बी खेम्ज्यी, ओसेम् धर्म छ्येःरी ब्रीबे तम् टोप् तखइ पङ्ज्यीम्, “ङत यी फीःज्यी”#भजनसंग्रह ६९:२१; २२:१५ बी सुङ्जेत्ज्यी। 29हुजुरी थेङ्यीमातेङ् अङ्गुर्की क्युङ्बे नीङ्गुइ तङ्लो मुबल। स्यीपाइ गीःचे हीसप् पङ्बे दोङ्बोइ बेर्करी येन्खेन् येइज्यीम् हुजुरी ब्लुम्ज्यी, ओसेम् येसुचे सोल्खइ पङ्ज्यीम् थेङ्की स्य्हल्री बोर्पीन्ज्यी। 30थेङ्चे हुजु चेक्पजाकी म्य्हङ्जेत्ज्यीम्, “देरेम् बुत्ज्यी” बी सुङ्ज्यी। हुजुलीप्चे थेङ्चे क्र र्हलले तइज्यीम् बुः पीत्जेत्ज्यी।
येसुइ रइरी बर्चचे ब्लोबल
31ओसेम् हुजु दीन् दुःब न्हबे दीन्की ङोन्ग्यम्कुनो मुबल, होत्तज्यीम् यहुदी अगुवामाचे स्यीपइमात क्रुस्री च्योलाबे म्हीमाकी कङ् क्युत्लापुङ्ज्यीम् थेङ्यीमाइ ल्हीत दुङ्री फप्पुङो बी पीलातसत फ्या लज्यी। तलेपङ्सम् खस्येकी ङ्हच्छ्यङ् दुःब न्हबे दीन्री स्यीबे म्हीइ ल्ही क्रुस्री थेन्ब अतब मुबल। 32होत्तज्यीम् स्यीपइमाचे येसुतेङ् बक्च्य च्योलाबे म्ही ङ्य्हीकी कङ् ङोन्ग्यम् क्युत्लाज्यी। 33तर थेङ्यीमाचे येसुइ स्य्हब्एनो क्युत्लाब छ्येमम् थेङ्की बुः य्हर्ज्यीन्बल म्रङ्ज्यी, ओसेम् थेङ्यीमाचे थेङ्की स्य्हब् अक्युत्। 34होले तलेनो स्यीपइमा न्हङ्री गीःचे थेङ्की रइरी बर्चचे ब्लोज्यी, ब्लोब साच्चेनो काःतेङ् यी डोङ्ज्यी।
35ओसेम् एङ्यीमाचेएनो बीस्वास् स्य्हेङ्खइ पङ्ज्यीम् चु जम्मनो लक्मा म्रङ्बलचे एङ्यीमात स्येत्टीब, ओसेम् चु जम्मनो तम्मा देमेन् य्हीन्ब। 36ओसेम् धर्म छ्येःरी, “थेङ्की नख्रुत् गीएनो क्युत्स्ये अरे”#प्रस्थान १२:४६; गन्ती ९:१२; भजनसंग्रह ३४:२० पङ्बे फ्रोइ टोप् तबरी चोले तज्यी। 37ओसेम् धर्म छ्येःरी ल्होल्होएनो चोले ब्रीबल मुब, “थेङ्त बर्चचे ब्लोबलमाचेनो थेङ्त च्यास्ये मुब।”#जकरीया १२:१०
येसुत दुर्सरी थेन्बल
(मत्ती २७:५७-६१; मर्कुस् १५:४२-४७; लुका २३:५०-५६)
38हुजु लीप्चे अरीमाथीया लीङ्सइ योसेफ पङ्बे डब गीः मुबल, यहुदी अगुवामातेङ् लोङ्बल तज्यीम् थेचे ल्हो-ल्होचे अस्येनले येसुत बीस्वास् स्य्हेङ्बल मुबल। थेचे येसुइ ल्हीत बोर्म्यङो पङ्ज्यीम् पीलातसत र्हीत्ज्यी। ओसेम् पीलातस्चे बोर्पुङ्ज्यीम् योसेफचे येसुइ ल्हीत क्रुस ग्यम्से प्लोक्ज्यीम् बोर्ज्यी। 39ओसेम् ङोन्ग्यम् म्हुना गीः येसुत खतु लबरी ङ्यीबे नीकोदेमसएनो योसेफतेङ् बक्च्य मुबल। थेचेम् तेत्तीस् कीलो गदे मुर्रतेङ् एलबा पङ्बे दोङ्बो ग्यम्से स्य्हेङ्बे य्हक्को ज्यबे थङ् खबे अत्तर बज्यीम् खज्यी। 40हुजु म्ही ङ्य्हीचे यहुदीमाकी पे अनुसार येसुइ स्यीबे ल्हीरी अत्तर फोर्ज्यीम् क्रीयेन्चे तुन्ज्यीम् दुर्सरी थेन्बे लागीरी टोप् लज्यी। 41येसुत क्रुस्री च्योलाबे ग्लाकी रेइरी म्रङ् गीः मुबल, ओसेम् हुजुरी खेमेएनो स्यीबे म्ही अथेन्बे छार् दुर्स गीः मुबल। 42दुःब न्हबे दीन् सुरु तबनो म्हइबल तज्यीम् थेङ्यीमाचे येसुइ ल्हीत हुजु ज्यदङ्की दुर्सरी थेन्ज्यी।
वर्तमान में चयनित:
युहन्ना 19: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
