युहन्ना 21
21
येसु डब ङ्यीस्ज म्रङ्खजेत्पल
1हुजु लीप्चे येसु देबेएनो तीबेरीयस ग्येइ रेइरी डबमाज म्रङ्खजेत्ज्यी। ओसेम् थेङ्चे र्हङ्त चोले ङोन्जेत्ज्यी। 2हुजुरी सीमोन पत्रुस, जउले पङ्बे थोमा, गालील प्रदेस्की काना पङ्बे ग्लारी टीबे नथानेल ओसेम् जब्दीयाकी ज ङ्य्हीतेङ् ल्होल्होएनो डबमा ङ्य्ही बक्च्य मुबल। 3ओसेम् सीमोन पत्रुसचे र्होमात, “ङम् तर्ङ सेत्परी ङ्यीब” बी पङ्ज्यी। ओसेम् ल्हो-ल्होमाचे थेत, “ङ्यीमाएनो एतेङ् बक्च्य ङ्यीब” बी पङ्ज्यी। ओसेम् थेङ्यीमा ङ्यीज्यीम् दोङ्गरी क्रेत्ज्यी, तर हुजु म्हुन थेङ्यीमाचे तएनो अस्यप्।
4स्य्होरी स्य्हो म्हुन्चेनो येसु ग्येइ यरी रप्खजेत्ज्यी। तर डबमाचे थेङ् येसुनो बी स्येअखम्। 5ओसेम् येसुचे थेङ्यीमात ङ्योत्जेत्ज्यी, “ओ र्होमा, एङ्यीमाचे तर्ङ गीएनो स्यप्पल अरे?” ओसेम् थेङ्यीमाचे, “अरे” बी पङ्ज्यी। 6थेङ्चे थेङ्यीमात, “ग्यङ् दोङ्गइ केत्पट्टीचे ल्हीगो, ओसेम् स्यप्स्ये मुब” बी सुङ्ज्यी। ओसेम् थेङ्चे सुङ्ब र्हङ्लेनो ल्हीब बीसेम् ग्यङ् छेङ् अखम्ब सम्मनो तर्ङ स्यप्ज्यी। 7हुजु लीप्चे येसुचे य्हक्को म्होइजेत्पे डबचे पत्रुसत, “थेङ्मी प्रभु य्हीन्ब टीम्” बी पङ्ज्यी। चु थ्येःब बीसेम् पत्रुसचे र्हङ्चे येन्बे येन् केप्परी खीःज्यी, (तलेपङ्सम् थेचे लक् स्य्हेङ्बरी येन् प्लोक्पल मुबल) ओसेम् ग्येइ यरी ङ्यीबरी ग्येन्हङ् छ्योङ्ज्यी। 8ल्हो-ल्हो डबमा दोङ्गरी खज्यीम् तर्ङचे प्लीङ्बे ग्यङ् छेङ्ज्यीम् यरी खज्यी। थेङ्यीमा स ग्यम्से य्हक्को थारीङ्मी अरेबल, सय मीटर गदेकीनो थारीङ् मुबल।
9ग्येइ यरी दोखमम् थेङ्यीमाचे मेग्रोरी तर्ङतेङ् ग्येङ् थेन्बल म्रङ्ज्यी। 10ओसेम् येसुचे थेङ्यीमात, “एङ्यीमाचे चुङ्बे तर्ङमा न्हङ्चे चेक् बोउ” बी सुङ्ज्यी। 11सीमोन् पत्रुसचे दोङ्गरी क्रेत्ज्यीम् ङ्हच्छ्यङ् ङ्हच्छ्यङ् खल् ङ्यीस्स्यी चुःसोम् तर्ङमाचे प्लीङ्बे ग्यङ् ग्येइ यरी बज्यी। होले तलेनो ग्यङ् अडेः। 12येसुचे थेङ्यीमात, “खज्यीम् चउ” बी सुङ्ज्यी। डबमा न्हङ्री खल्चेएनो, “थेङ् खल?” बी ङ्योत्पे आर् अल, तलेपङ्सम् थेङ्यीमाचे थेङ् प्रभुनो य्हीन्ब बी स्येबल मुबल। 13येसुचे ग्येङ् कीन्जेत्ज्यीम् डबमात न्हङ्जेत्ज्यी। होलेनो तर्ङमाएनो न्हङ्जेत्ज्यी।
14स्यीब ग्यम्से सोजेत्ज्यीम् थेङ् डबमाज म्रङ्खबल चु सोम्ख्यप्कुनो मुबल।
येसुतेङ् पत्रुस
15थेङ्यीमाचे चब बीसेम् येसुचे सीमोन् पत्रुसत सुङ्ज्यी, “युहन्नाइ ज सीमोन्, ता एचे ङत ल्हो-ल्हो डबमाचे म्होइब बीम य्हक्को म्होइब?”
थेचे पङ्ज्यी, “य्हीन्ब प्रभु, थेङ्चे खेम्जेत्प, ङ थेङ्त य्हक्को म्होइब।”
येसुचे थेत सुङ्ज्यी, “होलेपङ्सम् ङइ ग्यु कोलमात ख्वाको।”
16ओसेम् येसुचे पत्रुसत ङ्य्हीप्ख्यप्कुनो, “ओ युहन्नाइ ज, एचे ङत देमेन्नो म्होइब?” बी ङ्योत्जेत्ज्यी।
ओसेम् पत्रुसचे, “प्रभु, थेङ्चे खेम्जेत्प, ङ थेङ्त म्होइब” बी पङ्ज्यी।
ओसेम् येसुचे थेत, “होलेपङ्सम् ङइ ग्युमाकी स्य्हप्तो स्य्हेङो” बी सुङ्ज्यी।
17ओसेम् येसुचे पत्रुसत सोम्ख्यप्कुनो ङ्योत्जेत्ज्यी, “युहन्नाइ ज सीमोन, एचे ङत म्होइब?” येसुचे थेत सोम्ख्यप्कुनो “ता एचे ङत म्होइब?” बी ङ्योत्जेत्पल तज्यीम् पत्रुस दुखी तज्यी। ओसेम् थेचे येसुत पङ्ज्यी, “य्हीन्ब प्रभु, थेङ्चे जम्मनो तम्मा खेम्जेत्प, ओसेम् ङचे थेङ्त म्होइब पङ्बे तमएनो थेङ्चे खेम्जेत्प।”
ओसेम् येसुचे पत्रुसत सुङ्ज्यी, “होले पङ्सम् ङइ ग्युमात ख्वाको। 18ङ एत देमेन्नो पङ्ब, ए ब्योन्की बेलोरी र्हङ्की गोइल र्हङ्नो येन्ब, ओसेम् खन ङ्यीइ म्हेन्ज्यी हुजुरी ङ्यीब मुबल। तर ए ख्येक्प तब बीसेम् एचे र्हङ्की या स्यल् लस्ये मुब, ओसेम् ल्हो-ल्होचे गोइल येन्पीन्ज्यीम् ए खन ङ्यीइ अम्हेन्ज्यी हुजुरी बोर्स्ये मुब।” 19येसुचे चु तम् ग्यम्से पर्मेस्वर्की महीमाकी लागीरी पत्रुस खले स्यीस्ये मुब पङ्बे तम् स्येत्जेत्पल मुबल। हुजुलीप्चे येसुचे पत्रुसत, “ङइ लीप्चे ब्रउ” बी सुङ्ज्यी।
येसुचे म्होइजेत्पे डब
20पत्रुसचे दोःज्यीम् च्यामम् येसुचे म्होइजेत्पे डब लीप्-लीप् खटीबल म्रङ्ज्यी। (ङ्येस्येइ स्य्हेब सोल्बे बेलोरी थेचे येसुइ कुत्तोरी य्होर्ले टीज्यीम्, “प्रभु थेङ्त चुङ्न लपीन्स्येकी म्ही खल?” बी ङ्योत्पल मुबल।) 21थेत म्रङ्ब बीसेम् पत्रुसचे येसुत, “प्रभु, थेतम् ता तस्ये मुब?” बी ङ्योत्ज्यी। 22येसुचे पत्रुसत सुङ्ज्यी, “ङ अयु गदेसम्म थे सोटीखइ पङ्बे सेम् ङल मुलेएनो एत ता तोज्यी स्यीम्? एमी ङइ लीप्चे ब्रउ।”
23येसुचे सुङ्बे चु फ्रोइचे लज्यीम् हुजु डब स्यीस्ये अरे बी येसुइ ल्हो-ल्हो डबमाकी गुङ्री तम् ठम्ज्यी। येसुचे थे स्यीस्ये अरे बी सुङ्बलम् अय्हीन्बल मुबल। तर, “ङ अयु गदेसम्म थे सोटीखइ पङ्बे सेम् ङल मुलेएनो एत ता तोज्यी स्यीम्?” बी सुङ्बल मुबल।
24हुजु जम्मनो तम्मा म्रङ्बतेङ् थ्येःबे डब चुनो य्हीन्ब, थेचेनो चु तम्मा ब्रीबल मुब। ओसेम् थेचे स्येत्पे जम्मनो तम्मा देमेन् य्हीन्ब बी ङ्य्हङ्माचे स्येःब।
बुत्पल
25येसुचे ल्होल्होएनो य्हक्को लक्मा स्य्हेङ्जेत्पल मुब। हुजु जम्मनो लक्मा गीःगीःले ब्रीज्यी पङ्सम् हुजु ब्रीबे छ्येःमा चु जम्बुलीङ्रीनो अवङ्ल।
वर्तमान में चयनित:
युहन्ना 21: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
