मत्ती 20
20
नङ्बोमाकी अर्त
1येसुचे सुङ्स्यीनो टीज्यी, “पर्मेस्वर्की य्हुल् चु र्हङ्ब य्हीन्ब, म्रङ्की न्याबो गीः स्य्होम्हुन्चेनो म्रङ्री लक् स्य्हेङ्बे नङ्बोमा म्हइबरी डोङ्ज्यी। 2थेचे नङ्बोमात, ‘दीन् गीःकी म्हेल म्हुइकी टङ डबल् गीः पीन्ल’ पङ्ज्यीम् अङ्गुरकी म्रङ्री लक् स्य्हेङ्बरी पीत्ज्यी। 3नौ बजेक्योर् थे देबेएनो बजार्री ङ्यीमम् डेत्-डेत् म्हीमा तेएनो अस्य्हेङ्नले रप्टीबल म्रङ्ज्यी। 4ओसेम् थेचे म्हीमात पङ्ज्यी, ‘एङ्यीमाएनो ङइ अङ्गुर्की म्रङ्री ङ्यीज्यीम् लक् स्य्हेङो, ओसेम् ङचे एङ्यीमाकी यङ्थोबे म्हेल पीन्स्ये मुब।’ 5होत्तज्यीम् थेङ्यीमा अङ्गुर्की म्रङ्री लक् स्य्हेङ्बरी ङ्यीज्यी। हुजु लीप्चे देबेएनो बारा बजेतेङ् तीन् बजेक्योर् होलेनो ल्हो-ल्हो म्हीमात लक्री जङ्ज्यी। 6देबेएनो ङ्येस्येकी पाच बजेक्योर् बजार्री ङ्यीमम् ल्होल्होएनो डेत्-डेत् म्हीमा रप्टीबल म्रङ्ज्यी, थेचे थेङ्यीमात, ‘एङ्यीमा तले दीन् गीःनो तेएनो अस्य्हेङ्नले रप्टीब?’ बी ङ्योत्ज्यी। 7थेङ्यीमाचे थेत जोहाप् पीन्ज्यी, ‘तलेपङ्सम् ङ्यीमात खल्चेएनो म्हेलरी अकुल्।’ हुजु लीप्चे थेचे थेङ्यीमात, ‘एङ्यीमाएनो ङइ अङ्गुर्की म्रङ्री लक् स्य्हेङ्बरी ङ्यीउ’ बी पङ्ज्यी।
8“ङ्येस्ये तब बीसेम् अङ्गुर्की म्रङ्की न्याबोचे थेइ लक् स्य्हेङ्बलमाकी नाइकेत पङ्ज्यी, ‘नङ्बोमात ङ्होत्ज्यीम् थेङ्यीमाकी म्हेल पीनो, म्हेल ज्युःरी खबलमा य्हङ्स्ये पीन्ब तीब्ज्यीम् गोदोब्न्हङ् ङोन्ग्यम् खबलमात ज्युःरी पीनो।’ 9ओसेम् नाइकेचे पाच बजेक्योर् लक् सुरु स्य्हेङ्बलमात ङोन्ग्यम् ङ्होत्ज्यीम् दीन्गीकी म्हेल म्हुइकी डबल् काकर् पीन्ज्यी। 10ओसेम् ङोन्ग्यम् लक् स्य्हेङ्बरी ङ्यीबलमाचेम् झेन् य्हक्को यङ्ल बी म्हेन्ज्यी। तर थेङ्यीमाचेएनो दीन् गीकी म्हेल म्हुइकी डबल् काकर् यङ्ज्यी। 11थेङ्यीमाचे म्हेल यङ्ब बीसेम् अङ्गुर्की म्रङ्की न्याबोइ बीरोद्री ङ्येङ्-ङ्येङ् लब तीप्ज्यी। 12थेङ्यीमाचे पङ्ज्यी, ‘चु ज्युःरी खबे म्हीमाचेम् घन्ट गीकीनो लक् स्य्हेङ्बल मुब। ङ्यीमाचेम् क्रोबे दीनीरी दीन्गीःनो लक् स्य्हेङ्ज्यी। होलेतलेनो थेङ्चे थेङ्यीमात ङ्यीमात गदेनो म्हेल न्हङ्ज्यी।’ 13तर हुजु न्याबोचे थेङ्यीमा न्हङ्री गीःत जोहाप् पीन्ज्यी, ‘ङइ र्हो, ङचे एत तइ अन्यायएनो स्य्हेङ्बल अरे। एचे ङइ लक् म्हुइकी टङ डबल् गीः म्हेलरी दीन् गीनो लक् स्य्हेङ्ब पङ्बल अय्हीनो स्यीम्? 14एचे यङ्बे म्हेल बोर्ज्यीम् य्हरो। ज्युःरी लक्री खबलमातएनो एत गदेनो म्हेल पीन्बे सेम् ङल मुब। 15ङतेङ् मुबे ङइ टङ ङचे खले पीन्गे म्हेन्ज्यी होले पीन्बे हक् ङत अरेउ स्यीम्? ङचे ल्हो-ल्होत दय स्य्हेङ्बल म्रङ्ज्यीम् ए तले स्हेर्बल?’”
16ओसेम् येसुचे सुङ्ज्यी, “चोलेनो लीप्चे मुबलमा ङोन्ग्यम् तस्ये मुब, ओसेम् ङोन्चे मुबलमा लीप्चे तस्ये मुब।”
सोम् ख्यप्कुनो येसुचे र्हङ् स्यीस्येकी बारेरी सुङ्बल
(मर्कुस् १०:३२-३४; लुका १८:३१-३४)
17यरुसलेमरी स्येजेत्टीबे बेलोरी येसुचे चुङ् ङ्य्ही डबमातकीनो खोसोक्ले बोर्ज्यीम् ग्यम्री थेङ्यीमात चोले सुङ्ज्यी, 18“ङ्य्हङ्मा यरुसलेम्क्योर् ङ्यीटीब मुब। हुजुरी म्हीइ ज ङ्हच्छ्यङ् लम्बुमातेङ् धर्म लोप्पोन्माकी यारी सोप्तीस्ये मुब, ओसेम् थेङ्यीमाचे थेत स्यीथोबे सजाय पीन्स्ये मुब। 19थेत यहुदी अय्हीन्बे म्हीमाकी यारी सोप्तीस्ये मुब। थेङ्यीमाचे थेत पेत्नलस्ये मुब, कोर्रचे ग्यङ्स्ये मुब, ओसेम् क्रुस्री च्योज्यीम् सेत्स्ये मुब। तर सोम्रेत् कुनो थे सोज्यीम् रेःस्ये मुब।”
अमचे फ्या स्य्हु लबल
(मर्कुस् १०:३५-४५; लुका २२:२४-२७)
20हुजु लीप्चे जब्दीयाकी म्रीङ् थेइ जमा याकुबतेङ् युहन्नात बज्यीम् येसुइज खज्यी, ओसेम् थेचे येसुइ ङोन्री पुइ जुःज्यीम् दय स्य्हेङ्जेतो बी थेङ्त फ्या लज्यी। 21येसुचे थेत, “एचे ता म्हइबल?” बी ङ्योत्जेत्ज्यी। थेचे जोहाप् पीन्ज्यी, “थेङ्की य्हुल्री ङइ चु ज ङ्य्हीत गीःत थेङ्की केत् पट्टीचे गीःत थेङ्की ल्होम् पट्टीचे टीबुङ्जेतो।” 22ओसेम् येसुचे थेङ्यीमात सुङ्ज्यी, “एङ्यीमाचे ता र्हीत्टीब बी स्येःबल अरे। ङचे थुङ्ब म्हइटीबे दुखइ खोरे ग्यम्से एङ्यीमाचे थुङ्ब खम्ब?” ओसेम् थेङ्यीमाचे, “ङ्यीमाचे खम्ब” बी पङ्ज्यी। 23ओसेम् येसुचे थेङ्यीमात सुङ्ज्यी, “ङइ खोरे ग्यम्से एङ्यीमाचेएनो थुङ्स्ये मुब। तर एङ्यीमात ङइ केत् पट्टीतेङ् ल्होम् पट्टीचे टीबुङ्बे अधीकार् ङतेङ् अरे। ङइ अपचे खल्त दम्जेत्ज्यी हुजुतनो पीन्बरी थेङ्चे टोप् लजेत्पल मुब।”
24चु तम् थ्येःज्यीम् ल्हो-ल्हो डबमा च्यीत थेङ्य्हीतेङ् बोमो खज्यी। 25तर येसुचे थेङ्यीमा जम्मतनो र्हङ्ज ङ्होत्जेत्ज्यीम् सुङ्ज्यी, “एङ्यीमाचे स्येःबलनो मुब, यहुदी अय्हीन्बे म्हीमाइ जोरी सासन् स्य्हेङ्बे सासक्माचे र्हङ्की सेम्चे म्हेन्ब र्हङ्लेनो म्हीमाइ जोरी सासन् स्य्हेङ्ब। ओसेम् ङ्हच्छ्यङ् पद्री मुबलमाचे म्हीमाइ जोरी अधीकार् स्य्हेङ्ब। 26तर एङ्यीमा होतेब तब अत। एङ्यीमान्हङ्री खल्चे ङ्हच्छ्यङ् तबे सेम् लज्यी थे ल्हो-ल्हो जम्मइ योक्पो तथोब। 27ओसेम् एङ्यीमान्हङ्री खल्चेम् जम्मन्हङ्री ङोन्ग्यम् तबे सेम् लज्यी थे ल्हो-ल्हो जम्मइ बान तथोब। 28होलेनो म्हीइ जएनो स्य्हप्तो यङ्बरी अय्हीन् तर ल्हो-ल्होत स्य्हप्तो स्य्हेङ्बरी, ओसेम् य्हक्को म्हीमात थर्ब पीन्बरी र्हङ्की जीवन् पीन्बरी युज्यी।”
कन म्ही ङ्य्हीचे मीः म्रङ्बल
(मर्कुस् १०:४६-५२; लुका १८:३५-४३)
29येसुतेङ् थेङ्की डबमा यरीहो सहर् ग्यम्से स्येमम् य्हक्को-य्हक्को म्हीमा थेङ्की लीप्चे खज्यी। 30ग्यम्की रेइरी कन म्ही ङ्य्ही टीटीब मुबल। येसु हुजु ग्यम्से तज्यीम् स्येटीब मुब पङ्बे तम् थ्येःज्यीम् थेङ्य्हीचे क्रीङ्ज्यीम्, “ओ प्रभु, दाऊदकी ज, ङ्यीमात दय स्य्हेङ्जेतो!” बी पङ्ज्यी। 31य्हक्को म्हीमाचे थेङ्य्हीत, “कुटी टीउ” पङ्ज्यीम् बराज्यी। तर थेङ्य्हीचे झेन् य्हक्को क्रीङ्ज्यीम् पङ्ज्यी, “ओ प्रभु, दाऊदकी ज, ङ्यी ङ्य्हीत दय स्य्हेङ्जेतो!” 32हुजु थ्येःब बीसेम् येसु थोम्ले रप्जेत्ज्यीम् थेङ्य्हीत ङ्योत्जेत्ज्यी, “ङचे एङ्य्हीइ लागीरी ता स्य्हेङ्पीन्खइ म्हेन्ब?” 33थेङ्य्हीचे थेङ्त पङ्ज्यी, “प्रभु, ङ्यी ङ्य्हीइ मीःचे म्रङ्ब खम्नलपीन्जेतो।” 34येसुचे थेङ्य्हीत दय स्य्हेङ्जेत्ज्यीम् थेङ्य्हीइ मीः छुपीन्जेत्ज्यी। छुपीन्जेत्प साच्चेनो थेङ्य्हीकी मीः म्रङ्ब खम्ज्यीम् येसुइ लीप्चे ब्रज्यी।
वर्तमान में चयनित:
मत्ती 20: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.