NINGPAWT NINGHPANG 2
2
1Shaloi ninggawn tawa ting a amu gaw ngut kre nna hkum tsup nga sai. 2Karai Kasang gaw sanit ya nhtoi hta e, shi galaw nu ai amu magam hpe shangut shakre nna bungli galaw ai hpe jahkring da nga ai.#Pru 20:11. 3Shi gaw sanit ya nhtoi hpe shaman ya nhtawm dai nhtoi hpe laksan shani hku masat da nga ai, hpa majaw nga yang, shi a hpan da ai amu hpe dai shani e shangut nna bungli galaw ai hpe jahkring da nga ai. 4Ndai hte gaw ninggawn tawa amu hpe kaning rai hpan da nga ai lam rai nga ai.
Eden Sun
Dai Madu #2:4: Dai Madu: Ndai hpe Hebre chyum ga hta Yawe ngu da nga ai; ga nsen tsun hkrat wa ai hku nna Yehowa ngu nna shamying ai ga hpe English Chyum Laika gale ai hta dai Madu ngu nna laika kanu ni hpe kaba ai hku ka nna lang ai ga re. Karai Kasang gaw ninggawn tawa hpe hpan hpajang da yang, 5nawnam mung, nsi naisi hpa mung ginding aga ntsa e maku ku nga ai n rai, hpa majaw nga yang, shi gaw marang hpe mung garai n jahtu ai hte aga hpe yu lajang na masha kadai mung n nga nga ai; 6rai ti mung ga kata na hka rawt lung wa nhtawm ga ntsa ting hpe madit ya nga ai.
7Dai hpang dai Madu Karai Kasang gaw aga kaw nna ga loi mi hpe la nhtawm dai hte shinggyim hkrang shachyaw wu ai; shi a ladi hta hkrung ai nsoi nsa hpe shi kawut bang ya wu ai hte dai shinggyim masha gaw hkrung hpang wa nga ai. #1Ko 15:45.
8Dai hpang dai Madu Karai Kasang gaw sinpraw maga na Eden ngu ai shara hta sun langai hkai sharam tawn nhtawm dai shara hta shi shachyaw da sai shinggyim masha hpe tawn da wu ai. 9Dai sun hta tsit lali tsawm ai hpun amyu myu hpe shi tu shangun ai hte dai hta ja kat ai asi ni hpe mung si shangun nga ai. Dai sun a ka-ang e, asak jahkrung ya ai hpun hte kaja ai hte n kaja ai lam mahkra hpe chye ginhka shangun ai hpun mung tu nga ai. #Shr 2:7; 22:2,14.
10Dai sun hpe madit ya na matu Eden hta hka shi langai lwi pru nga ai; dai gaw Eden a shinggan maga de hka nu mali garan pru mat wa nga ai. 11Langai ngu na hka nu gaw Pishun rai nna dai gaw Hawila mung grup lwi kawan mat wa ai. 12(Dai shara hta jet ai aja, grai taw nna manam hawm ai baw hpun naw hte manu dan ai lungseng ni rawng nga ai.) 13Lahkawng ngu na hka nu gaw Gihon rai nga ai; dai gaw Hkusha #2:13: Hkusha: Ndai mung hpe Mesopotamia shing n rai Ehtiopi mung hpe shading nna tsun ai re. mung grup yin hku lwi mat nga ai. 14Masum ngu na hka nu gaw Asuri mung a sinpraw maga de lwi mat wa ai Tigri hka nu rai nga ai; mali ngu na hka nu gaw Uhprat hka nu rai nga ai.
15Dai hpang Madu Karai Kasang gaw dai hpe yu lajang na hte sin nga na matu dai masha hpe Eden hta tawn da wu ai. 16Shi gaw dai masha wa hpe, “Dai sun hta tu ai kaning re ai hpun hta na asi hpe rai tim sha mai nga ndai; 17rai ti mung kaja ai hte n kaja ai hpe chye ginhka shangun ai hpun hta na asi hpe chyawm gaw nang n sha lu na ndai. Dai hpun kaw na nang sha ai rai yang, dai shani jang nang si na rin dai,” ngu nna tsun wu ai.
18Shaloi dai Madu Karai Kasang gaw, “Dai shinggyim lasha gaw shi hkrai nga na n mai nga ai. Shi hpe karum shingtau na matu ram ging ai nrum ntau langai galaw na we ai,” nga nna tsun ai. 19Dai rai nna aga kaw na ga loi mi shi la nhtawm ashu ashan ni yawng hte ntsa malen u ni yawng hpe shachyaw wu ai. Dai hpang, dai ni hpe shi mying shingteng jaw ai hpe chye lu hkra nga, dai masha wa hpang de woi wa wu ai. Dai ni yawng mung mying shingteng hkam la nga ma ai. 20Dai rai nna dai masha wa gaw ntsa malen u ni yawng hte dusat ni yawng hpe mying shamying wu ai; rai ti mung shi hpe karum na htap htuk ai manang shanhte hta na langai mi mung n nga nga ai.
21Dai hpang dai Madu Karai Kasang gaw dai masha wa hpe yup kaba hte yup shangun nna, shi yup nga yang, dai masha wa a garep nra langai mi hpe shi shaw la nhtawm, ashan hte bai shatup ya wu ai. 22Shi shaw la ai garep nra hte numsha langai mi hpe shachyaw wu ai rai nna dai masha wa kaw woi wa ya wu ai. 23Shaloi dai masha gaw,
“Ya, ndai gaw nye a hkum hte nan bung ai;
Nye a nra hta na nra, nye a ashan hta na ashan rai nga ai.
Shi a amying ‘Numsha’ rai nga ai; hpa majaw nga yang shi gaw lasha hta na shaw la ai rai nga ai,” nga nna tsun ai.
24Dai re ai majaw, lasha gaw shi a kanu yan kawa hpe kau da nhtawm shi a madu jan hte manoi nga na rai nna, shan lahkawng gaw hkum shan langai sha tai lu na mara ai. #Mat 19:5; Mrk 10:7-8; 1Ko 6:16; Ehp 5:31.
25Dai lasha hte numsha yan singgu krin rai nga ma ti mung, shan shada n kaya ma ai.
वर्तमान में चयनित:
NINGPAWT NINGHPANG 2: JCLB
हाइलाइट
शेयर
कॉपी
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.