Luk 7
7
Jézu sunyayɔsoru ’lɛzan wuozan béli
(Mt 8:5–13; 15:21–28)
1Jézu we ’konu faa fele lɛ sɔɔ aan wo, munu lé wo ke ’wo tɔné dɔna a lɛ, wo lɛ, yé é go Kapɛnaum.
2Sunyayɔsoru ’lɛzan wuozan do lé é sɔ ézan lɛ é baba, gyɛ a a ma, yé é vo sɛ yé é ga. 3É Jézu tawe ’ma aan wo, é Juifi mi segele kenu nwunvɔ a va, ’wa fe a lɛ léé, ’é da é wuozan béli. 4Wo bɔ Jézu va yé wa tunu a fele nya léé: 5Ko bɛn sɔ a lɛ yé yee ɛ kolé bazorokɔn dɔ, amalé ilé wezin ’ko kɛlɛle a lɛ yara lé. 6Yé Jézu go wo zuo. Dé é bɔ é pu, sunyayɔsoru ’lɛzan é béénu nwunvɔ yé é léé: ’Ka go, ’ka fe Mizan lɛ léé, té ébo wɔlɛi nyaa é ma lo; a yara ’ka an yara léé, é wɔra anlé kɔn gi lo. 7Bɛwemalé é ziin é ’ka dɔ lɛ an gi léé, a yara a an yara léé, maabozen é go a va lo. Naa, ’é dére do fe é pla yé an wuozan é dan béli lɛ. 8Maa a é plale an nwiinzannu wuo, yé anzé sunyanu a an wuo é ziin. Dé maa fe a do lɛ léé: ’I go, éé goo, dé maa fe a koɛ lɛ léé, ’i da, ’bɛ é dan; dé maa fe an wuozan lɛ léé, ’i we ’ko kɛlɛ, éé a kɛla. 9Wo we ’ko fe Jézu lɛ aan wo, é sunyayɔsoru ’lɛzan ze vɔ, yé munu lé wo ke a zuo é yara nɔla wo ta yé é léma: Maa lé ka lɛ léé, maa ’ka a ye lɛ léé, Izraɛl mi do kpen bli a é pale tegele mi ’ko zo lo. 10Munu lé sunyayɔsoru ’lɛzan wo nwunvɔ, wo bɔ kɔn ’léé aan wo, a wuozan lé gyɛ ke a ma kɔɔn, wa ye é bélile.
Jézu gyɛzarale be nwa gale va Nain
(1 MNw 17:17–24; Lk 8:49–56; Jn 11)
11’Bɛ é tu kini Jézu a gona fla do lé wa laama Nain, a ta; a zuomunu valé mi gu kiɛre a a va. 12Dé Jézu bɔ flagɔrɔ ’léé sɔnɔ, bé ye, ’té wa dana minyaa nya; yee ɛ ke é bu lé négɔné do kpen nya, yé a bu a gyɛzarale nya; ’té flamunu kiɛre a a va. 13Mizan lezan ye aan wo, a nyanai zén a ta yé é lé a lɛ léé: Té i wuvɔ lo. 14É bié yé é bɛ mane minyaa yili ma, yé a simunu dɔ. É léé: Pɛniɛ, maa lé i lɛ léé, ’i nwa. 15Yé gazan nyana, yé é kun wefele ma. Jézu a nɔ é bu lɛ. 16Kana zén munu faa gi yé wo Kazambale tɔ bɔ a fele nya léé: Balelayezan blɛn bɔra ko méléna, yé Kazambale da élé munu va. 17Jézu tawe fele ’ko nwɛɛn Judé tɛrɛ faa valé é zi tɛrɛnu faa la.
Mi batizéwozan Jan munu nwunvɔ Jézu va
(Mt 11:2–19)
18Jan zuomunu we ’konu faa glewo Jan lɛ. 19É wo va mi fié laa yé é wo nwunvɔ Mizan va a fele a lɛ we gi léé: Mi lé é dan da lɛ, yee ɛ ke i nya laa, taa, é a lé ko mi bɛ lɛbɛɛn? 20Wo da Jézu va yé wo léé: Mi batizéwozan Jan ɛ ko nwunvɔ i va, a laale i lee we gi léé, mi lé é dan da lɛ, yee lé ke i nya laa, taa, é a lé ko mi bɛ lɛbɛɛn? 21’Bɛ bléyi va Jézu gyɛgyɛmunu kiɛre béli yé é migyɛgyɛnu si munu ma yé é yonu si munu gi, yé é yuɛwiizannu yuɛnu fuo. 22Yé é lé wo lɛ léé: ’Ka go yé wenu lé ka wo ye yé wenu lé ka wo ’ma, ’ka wo zuo fe Jan lɛ, léé: Yuɛwiizannu a yɛrɛ yena, tunbozannu a tawona, pantɛn a sina pantɛngyɛzannu ma, tɔnéwiizannu a we ’mana, gazannu a nwana gale va, yé wa wenéné fena nyanégyɛzannu lɛ. 23Mi lé maa ’ka kɛla a saanzan nya lo, ’bɛzan zé a néné.
24Munu lé Jan wo nwunvɔ, wo go aan wo, Jézu kun Jan ma we fele ma mi gu lɛ, yé é léé: Mɛ fɛ lé ka go a nagini lɛ bwi gi yi laa? Gyan lé fu ke a ma nyɔɔnna, yee léé? 25Naa, ka go mɛ fɛ ɛ nagini lɛɛ? Mi lé sɔ zinzin ke a ta, yee léé? Ka ye, munu lé woo sɔ nɔnɔminu zén‐é ’wo ta yé woo fua kiɛre blé, wa fuakɔn ’léé. 26Taa, ka go mɛ fɛ nagini lɛ yi laa? Balelayezan léé? lin, é mini balelayezan ta, maa fe ka lɛ. 27Mi lé wa tawe gyɛ sɛbɛ gi léé:
Bé ye, maa anlé nwunvɔzan pa i ’lɛzia,
Ilé zi ma’lɛrɛle i ’lɛ we gi,
yee lé. 28Maa lé ka lɛ léé: Munu lé lomu wo yaa, wo va mi do kpen blɛn ’ka mini lɛ Jan ta lo; dɔlé ’té munu lé Kazambale ke é plale wo nwiin wo va mi kiiéné a blɛn é mini Jan ta. 29Munu faa lé wa dére ’ma, wo faa Kazambale lé mi kɛlɛle tegele nagɔɔn Jan lé ’wo batizéwole nya; wo va mi kenu a vagɔɔlisimunu nya. 30Naa, zi lé Kazambale léé, mi ’é tawo a ta, Farizimunu valé bélidɔwedɔɔmunu a kɛlɛ boazi nya ’wo vazia sɔn vɔle nya Jan lé ’wo batizéwole ma.
31Bléyi ’ko vamunu ’ko, maa dan wo dan lɛ denu ɛ maa? Wa bélé de zoo? 32Wa bélé nénu lé wo ke é nyanale vuun la, wo zo; ’té wa fé ’wo ke lɛ léé: Ko séén fɛn ka lɛ yé ka ’ka nɛnɛ bo lɛ lo; yé ko wu dɛrɛ vɔ ka lɛ yé ka ’ka wu bo lɛ lo. 33Naa, mibatizéwozan Jan da, ’té é ’ka fɛ blé lo, ’té é ’ka fɛ minian lo yé ka léé, yo ɛ ke a gi. 34Maa blami Be, an da ’té an fɛ blé, ’té an fɛ minian yé ka léé, bun‐anzan valé nwɛminizan lé maa nya; vagɔɔlisimunu valé wenyanékɛlɛmunu béé lé maa nya. 35Naa, wedɔɔle ma wenu faa ɛ wedɔɔle nagɔɔn‐an we tegele nya.
Jézu fɛ ble Farizimi Simɔn va
(Jn 12:1–8)
36Farizimi do Jézu laa léé, ’é go fɛ ble ’é va. Jézu wɔra Farizimi lé kɔn gi yé é nyana fɛblele zi. 37Yé fla ’ko la wenyané kɛlɛ le a ’ma aan wo léé, é a fɛblele zi Farizimi lé kɔn gi, é da gɔlɛfukuo nya é fanle lasikɔrɔ nya. 38É dɔ Jézu zuo a gane sɔnɔ. É kun wuvɔle ma; yé é a gane ma zuru é yuɛyi nya yé é a ma boo é nwun nya, yé é pwɛpwɛ vɔ a gane ma yé é lasikɔrɔ zén a gane ma. 39Farizimi lé é Jézu laa, é ana ye aan wo, é lé é bli gi léé: Dé é vo léé, mi ’ko a balelayezan nya, ’té le ’ko lé ’bɛ é bɛ mane a ma bɛ, ’té dé le kaa léé? ’té é ’bɛ dɔɔ yé ’é a gi dɔɔ léé, é a wenyané kɛlɛ le nya. 40Jézu we fe a lɛ yé é léé: Simɔn, é sɔ an lɛ léé, an we do fe i lɛ. É lé a lɛ léé: Anzan, ’bé fe. 41Jézu léma: Gɔɔlizan do lé vɛɛn a mi fié ma, a do zé a dénié wuru fié yɔ soru yé a do zé a dénié yɔ fié wɔlɛ vu. 42A banwofɛ ’ka ye lɛ wo lee lo yé é a vo wo ma é pla. A kyɛn lɛ lé é sɔa é babaa? 43Simɔn a zi pa a lɛ léé: É dɔ an gi léé, mi lé azé ke blɛn, yee lé. Jézu lé a lɛ léé: I we fe é fena. 44A zuo, é yara nɔla lezan va yé é lé Simɔn lɛ léé: I le ’ko yee? An wɔra ilé kɔn gi yé i ’ka gane ma zuru ’yi nɔ lɛ an lɛ lo; naa, le ’ko an gane ma zuru é yuɛyi nya yé é wo ma boo é nwun nya. 45I ’ka an tuu gyɛ lɛ lo, naa, aan wɔra aan wo kɔn gi, lezan ’ko ’ka daan lɛ pwɛpwɛ vɔle ma an gane ma lo. 46I ’ka nyɔnɔ zén lɛ an nwiin monomono lo; naa, é lasikɔrɔ zén an gane ma. 47Bɛwemalé maa lé i lɛ léé, alé wenyané kiɛre lé ke bɛ, maa a ma we vo wo ma, amalé an sɔ a lɛ é baba. Naa, mi lé alé wenyané ke kiéné, yé maa a ma we vo a ma, an sɔa a lɛ sɛ. 48Yé é lé lezan lɛ léé: Maa i ma we vo ilé wenyanénu ma. 49Munu lé wo ke fɛblele zi a va, wo kun wefele ma wo bli gi léé: De ɛ ke mi ’ko nya yé é mi ma we voo? 50Naa, Jézu lé lezan lɛ léé: Ilé blipale ma lé i si we gi. ’I go drɔɔ ma.
वर्तमान में चयनित:
Luk 7: GOURU
हाइलाइट
शेयर
कॉपी
Want to have your highlights saved across all your devices? Sign up or sign in
Alliance Biblique de Cote d'Ivoire 1979
