LUKA 23
23
Zisu Pilâ hmiakô liata
(Mat 27.1-2,11-14; Mka 15.1-5; Zhn 18.28-38)
1Zawpi zydua cha thyu ei ta, Zisu cha Pilâ lâ a chhi ei ta. 2“He chyhsa heta eima phopi pasiesa chheipa ta, Kaisarâ lâ chhie pie awpa miah pakhâ ta, anosasyh ta Mesia â tahpa nata abeipa â tahpa eima thei,” tahpa ta leih ei ta. 3Pilâ ta, “Zuzy Beipa na châ ma?” tah ta. Zisu ta, “Na reipa hawhta ei châ,” tah ta. 4Pilâ ta theihthai beizy nata zawpizy hnohta, “He chyhsa chô liana heta thailei pachâsa nawpa khâpa hmah hmô va na,” tah ta. 5Châhrasala âmo ta, “Kâlili râh tawhta pathaopa ta, he su taihta, Zudia râh su to liata pachupa ta chyhsazy a patypamâ lymâ,” tahpa ta leih via rili ei ta.
Zisu Herawda hmiakô liata
6Pilâ ta cha cha a thei nahta, Zisu cha Kâlili chyhsa a châ nata châ lei hiahri ta. 7Herawda avaona râh chyhsa a châpa a pahno nahta, Herawda lâ hlâ ha ta. Cha nota Herawda cha Zerusale liata a y no châ ta. 8Herawda cha Zisu a hmô nahta, a ly ngaita ta. Zisu thâtih vaw thei ha ta, hmonoâhpa a taopa kheihawhpa chhâ ma hmô awpa hnabeiseih tyh ta, hmô awpa a byuh kaw tyhpa a châ. 9Chavâta bie hluhpi hiahri ta, châhrasala a chhy tlâ leipa ta. 10Theihthai beizy nata ryhpa pachutuhpazy a duah ei ta, thata leih ei ta. 11Herawda nata a pheisaihzy ta Zisu cha mohnao kawpa ta pasipasawh ei ta. Poh rônahpa pabupa ta, Pilâ lâ hlâ pakhua ha ta. 12Cha noh tawhta Herawda nata Pilâ cha a viasa kaw ei ta. Cha hlâ zydua cha a dyh thai leipa ama châ.
Zisu thi awpa ta pathluna
(Mat 27.15-26; Mka 15.6-15; Zhn 18.39—19.16)
13Pilâ ta theihthai beizy, ryureituhpazy nata zawpizy awpakhy ta, 14ama hnohta, “He chyhsa he, chyhsazy a siekheichhei tahpa ta kei lâ namâ vaw chhipa kha châ ta. Nama hmiakô lia tlai ta a padai na ta, pachâ teh u, nama leihna kyh liana khata, he chyhsa chô liata a thaileichâna khâpa hmah hmô va na. 15Herawda chhao ta hmô hra vei. Keimo lâ miah a vaw hlâ pakhua haw. Hmeiseih ta la, thina tlâh a châpa khâpa hmo hmah tao vei. 16Chavâta chhei aw na ta, ei pathlie ha aw,” tah ta. 17Zawpakhô kyhchhi maihta Pilâ ta atâhpa pakha zawpi lâ papua tyh ta.#23.17 Châh 17-na he hlâno kuropa Biehrai thokha liata y vei. 18Châhrasala â raoh ngaitapa ta awh ei ta. “Kha chyhsa kha pahleipadia la, Bârabâ kha miah papuapa teh,” tah ei ta. 19Cha chyhsa cha sawhkhâ a dyuhpa ta khihpi liata tymâna a taopa vâta nata liany a cheipa vâta patâhna o liata khôpa a châ. 20Pilâ ta Zisu a papua khohpa vâta, ama hnohta bie reih heih ta. 21Châhrasala, “Khaipâ teh, khaipâ teh!” tahpa ta awh via rili ei ta. 22A ei thôhna ta ama hnohta, “Khazia maw, he chyhsa heta khâpa hmo ma a parao? Thina tlâh a châpa thaileichâna ano liata khâpa hmah hmô va na. Chavâta chhei aw na ta, ei pathlie aw,” tah ta. 23Châhrasala khaipâ awpa ta ao paro ngaitapa ta khâchâ a haw ei ta. Ama ao ta Pilâ cha pahnie ha ta. 24Amâ hawpa hawhta pie awpa ta biechhâna a tao haw. 25Papua awpa ta amâ hawpa, sawhkhâ â dyuhpa vâta nata lianycheina vâta patâhna o liata ama khôpa cha papua ta, Zisu deikua cha, ama khozie hawhta tao awpa ta âmo lâ hlâ ta.
Khaipâna
(Mat 27.32-41; Mka 15.21-32; Zhn 19.17-27)
26Zisu cha siekhei ei ta, Kurini khihpa Saimaw, a yna râh lâ tawhta a vaw tlôpa cha patu ei ta, kraws papiasapa ta, Zisu hnôh lâta pasiesa ei ta. 27Zawpi hluhpi nata ano châta mâchhiesapa ta a chakheipa chanôzy ta zi ei ta. 28Zisu cha âmo lâ a heih ta ama hnohta, “Zerusale sawchanôzy saih u, na chakhei khah u, nâmo nata nama sawzy châta tlao cha teh u. 29Moh teh u, nohzy a vaw tlô hai. Cha nohzy liata, ‘Chanô chohpa nata nawh â choh beih leipa chhi nata nawh ta a pazy beih leipa sâhpi zy cha ama nohlao na!’ ama tah aw. 30#Hôs 10.8; Biep 6.16Cha tina chata chyhsazy ta tlâhpizy hnohta, ‘Miah vi teh,’ tah aw ei ta; tlâhthlôhzy hnohta, ‘Miah khu teh,’ ama tah aw. 31Tho hrohpa chô lia hmahta cha hawhta ama tao khiahta cha, tho raohpa chô liata chhochhi cha, khatlu ta ma ama tao aw tly?” tah ta.
32A hnohta mohropa pano, moleipa thie awpazy a chhi hra ei ta. 33Luh Ru Su ama tahpa Kalvari tlâh ama tlô nahta, kraws liata khaipâ ei ta. Moleipazy chhao, a chachâh lâta pakha, a chavei lâta pakha khaipâ hra ei ta. 34#Hla 22.18Zisu ta, “Ei Paw y, âmo he a ngiahthai mah y, ama hmotaopa he ama pahno vei na,” tah ta. A chysiazy a rai awpa ta nuby a dao ei ta. 35#Hla 22.7Zawpizy a kiapâh liata a duah ei ta, sai thlâh ha ei ta. Ryureituhpazy deikua ta pasipasawh ei ta, “Mohropazy a pachha tyh mâh tâh. Khazohpa Atlyhpa Mesia a châ tlai khiahta cha, anosasyh a pachha bao sa!” tah ei ta. 36#Hla 69.21Pheisaihzy chhao ta Zisu cha pasipasawh ei ta, ano lâ a vy ei ta, kresawhti thaopa pie ei ta. 37“Zuzy Beipa na châ tlai khiahta cha, nâmasasyh ta a pachha châh chi!” tah ei ta. 38A luh chô liata Krikâh reih, Rawma reih nata Hebrai reihzy ta,#23.38 “Krikâh reih, Rawma reih nata Hebrai reih ta” tahpa he hlâno kuropa Biehrai thokha liata y vei. “He he Zuzy Beipa a châ,” tahpa ta tawh ei ta.
39Moleipa ama khaipâpa pakha ta Zisu cha reipachhie ta, “Mesia châ va chi mâ? Nâmasasyh ta a pachha la, keimo chhao miah pachha châh chi!” tah ta. 40Pakhapa ta ano cha ra ta, “Khazohpa tlai chhao chi va chi ma? Thaileichâna miakha ta hriepa nama châpa he. 41Keimo la hrie tlâh rai eima châ. Eima hmotaopa ty eima hmôpa a châ hih. He chyhsa deikua he cha, khâpa hmah parao vei,” tah ta. 42Chatawhcha Zisu hnohta, “Zisu, na khinarâh na tlô tita nâ thei mah y,” tah ta. 43Zisu ta a hnohta, “Hmeiseihta ta ei cha chho, tanoh he ei hnohta Pârâdi liata na y aw,” tah ta.
Zisu thina
(Mat 27.45-56; Mka 15.33-41; Zhn 19.28-30)
44 #
Pua 26.31-33
Nohchhô dawh hrawh hleino rachhôh tawhta zâlâ dawh thôh taih, alei chô zydua vaw zoh kaluh ha ta. 45Noh khaih khao leipa ta, Achhyna o pohraipa cha â khophie ta a hrie ta. 46#Hla 31.5Zisu cha ao paro ngaitapa ta awh ta, “Ei Paw, na ku liata ei thlahpa ei cha pavaosa!” tah ta. Cha bie cha a rei khai nahta, a thlahpa pathlie ha ta. 47Pheisaih za kha hyutuhpa ta hmo a tlôpa cha a hmô nahta, “He chyhsa he chyhsa siapa tlai na a châ!” tah ta, Khazohpa reithai ta. 48Cha hmo cha sai awpa ta Zawpi a vypakhypa zydua ta, hmo a tlôpa cha ama hmô nahta, ama chachôhnazy a chôpa ta o lâ a di ha ei ta. 49#Lka 8.2,3Zisu hmiapahnopa zydua nata Kâlili tawhta a vaw zipa chanôzy cha, lâhlapi ta a duah ei ta, cha hmozy cha sai ei ta.
Zisu pabuna
(Mat 27.57-61; Mka 15.42-47; Zhn 19.38-42)
50Chyhsa pakha, a moh Zawsi ama tahpa, ryureituh phapa nata siapa y ta. 51Ano cha Zisu thâtih ama pachiana nata ama hmotaopa a paryhsa leipa kha a châ. Arimathai khihpa Zu chyhsa châ ta, Khazohpa khinarâh vaw tlô awpa a hâpa a châ. 52Cha chyhsa chata Pilâ lâ vawh ta, Zisu ri kei hiah ta. 53Zisu ri cha la ta, poh rih dipa ta pahly ta, lôkhaoh khiepa thlâ, ahy hmahta pabu mâh leina liata pazia ta. 54Cha noh cha Pachynoh châ ta, Pahânoh vaw châ daihmâ ha ta. 55Kâlili tawhta Zisu a vaw zipa chanôzy chhao khata Zawsi cha zi ei ta, thlâ nata a ri pabunazie zy cha hmô ei ta. 56#Pua 20.10; Ryhpa 5.14O lâ a di ei ta, ropahâhpa nata sathawzy a chhuanoh ei ta.
Pahânoh cha biepiepa hawhta a pahâ ei ta.
वर्तमान में चयनित:
LUKA 23: MARVBSI
हाइलाइट
शेयर
कॉपी
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
