युहान्ना 5
5
येसुङा लाङ्गाडा याप्मि नुमानिङ् चोगुना
1आम्टेप्मा लेम्बा एङ्स्वा, येसुम्बाक् याहुदिचिगा चाडा मानाँ चोक्ङा यरुसलेम खाडे॥ 2यरुसलेम खालाङ्गाङि लिग्माना ठुँबा ढुवारिक् ओलोडुना युङ्ग्वा, हिट्नुङ् हिट्ना सोरि डोक् टेम्बोक् गोटा मोखा लिसाना ठिक् पोखारि युङ्ग्वा॥ ना पोखारि हिब्रु रिङ्ङि बेथस्दा ओलोडुना॥ 3हिट्नि याङ्कानिनिबा, लाङ्गाडा, लाङ्मुक् चालाँ उलिनिगा जोम् उटुगागा याप्मिचि ओहेन्सायाक्टागा डागा॥ [हिट्नागाँ चुवा खोना बेला वान्युङ् छिन्युक्ना नुङ् ओहाङ्सुगा डागा॥ 4पोङ्भोने टाङ्बाङाना ठिक् माङ्हाङ् रिङ् काउग्बा कोइ-कोइ बेला पोखारिङि उङ्युङ् चुवा वान्डुबिडुचिगा डागा, हिट्नुङ् चुवा वान्युङ् खोना पाइले चुवाङि लिग्युक् जुन्सुके रोगा लिचा हिट्ना नुमानिङ् लिसाएट्टाना डाना॥]#५:४ आम्टेप्मा बाइबलङि ना रिङ् पोद ३ लोक् ४ ङि थापाँ ओचोगुएसुए॥
5हिट्नि आठतिस बारखालाम्मा टुगाना ठिबाङ् याप्मि वासेट्टाना॥ 6येसुङा हिट्ना टुगाना याप्मि हिट्नि हेन्साइसाना निसुए, हिट्नुङ् याप्मा बेलालाम्मा हिट्ना टुगाना ठाहा टोगुङ् येसुङा हिट्ना लोडुए, “पाक् खान् नुमानिङ् लिमा निङ्ग्वा आचोगुटुनि?”
7हिट्ना टुगाना याप्मिङा लोडुए, “काहिसिक्बा, चुवा वान्ना बेला पोखारिङि आङा काठेन्बा आङाना साक्चा ओवाइगा॥ आङा खाट्नागेट्नालोक् आङा नुङ्ना पाइले आरको याप्मि चुवाङि ठायुएट्ना॥”
8येसुङा हिट्ना लोडुए, “कोबा हिट्नुङ् काडोलेन्चा फोगुङ् लाम्टिया॥” 9हिट्ना बेला डोक् हिट्ना याप्मि नुए, हिट्नुङ् ओडोलेन्चा याङुङ् उन् लाम्टियाएट्टे॥
टरो हिट्ना लेम्बाम्बाक् युङ्माना लेम्बा#५:९ युङ्माना लेम्बाम्बाक् याहुदिचिगा युङ्माना लेम्बा नुङ् बुजा लियुक्॥ डाना॥ 10हिड्डेउङ् याहुदि याप्मिचिङा हिट्ना नुमानिङ् लिसाना याप्मि ओलोडुए, “हाट्ले युङ्माना लेम्बा, खान्ङा डोलेन्चा खुमा आनि धारमाबिधिङा आपिनिना॥”#नाहेम्याह १३:१९; यारमिया १७:२१
11हिट्नाङा हिट्नागा लोडुचे, “जुन्ङा आङा नुमानिङ् याङ्चोगे, उन्ङा डोक् आङा ‘काडोलेन्चा खुयुङ् लाम्टिया’ पिक्सा याङ्लोडाना॥”
12हिट्नागाँ हिट्ना उसिलाप्टुए, “खान् डोलेन्चा खुयुङ् लाम्टियाक् कालोबा याप्मि साइना?”
13हिट्ना याप्मिङा उन् नुमानिङ् काचोक्बा याप्मि साइना नुङ् मिसेन् निसुन्गेट्टुन्ना डाना, पोङ्भोने याप्मिचिगा खिमेयाङ्मेलाम्मा येसु खाप्माहिडैसाना॥
14हिट्नुङ्ना येसुङा हिट्ना माङ्ठानाङि टुबुङ् लोडुए, “खेम्सु, खान् नुमानिङ् आलिसाइसे॥ फेरि पाप चोगुन्, हिट्डे आचोगे भोने खान्ङि आझै जोम् ओचाफेन्ना रिङ् ठामाहियुक्॥”
15हिट्नुङ् हिट्ना याप्मि याहुदि ओठेडोङ्चि सोरि खाडाउङ् उन् नुमानिङ् काचोक्बाउम्टे येसु गोलो रैछो पिक्सा खेम्मेट्टुचे॥ 16येसुङा ना टोॽवा युङ्माना लेम्बा चोगुनाँ याहुदिचिङा उन् मिछो चोक्मा ठालाँ ओचोगुए॥ 17टरो येसुङा हिट्नागा लोडुचे, “आङाना माङ्हाङ् पाबाङा सोरोक् टोॽवा चोगुएट्टु, हिट्नुङ् आङा चा टोॽवा चोगुएट्टुङ्॥”
18ना रिङ् ओखेम्सुङ् याहुदिचिङा येसु सेप्माउङ्सा आझा निङ्ग्वा ओचोगुए, पोङ्भोने उन्ङा युङ्माना लेम्बा टोॽवा चोक्मा लिनिना नुङ् धारमाबिधिङा माट्टुना रिङ् एरोक् टेन्नेएट्निना माखाक्, टरो उन्ङा आप्पेलाउङ्सा माङ्हाङ् बोराबोरि चोगुङ् माङ्हाङ्लोङ्सा आङाना आप्पे पाबा पिक्सा माट्टुना डाना॥
माङ्हाङ् छाङाना आधिकार
19येसुङा हिट्नागा नाड्डे लोडुचे, “छेम्बा डोक्, आङा खानि लोनाँनि, छाङा आप्पेम्बाक् पाक्चा चोक्मा हिडुन्ना, टरो माङ्हाङ् पाबाङा जे चोगुना निसुटु, हिट्ना एरोक् चोगुटु, पोङ्भोने पाबाङा जे चोगुटु, छाङा चा हिट्डेडोक् चोगुटु॥ 20पोङ्भोने पाबाङा आप्पे उइछा माया चोगुटु, हिट्नुङ् उन्ङा आप्पे चोगुएट्टुगा सोब्बे टोॽवा उइछा निमेट्टुटु॥ छेम्बा डोक्, पाबाङा छालोङ्सा ना नुङ्ना आझा ठे-ठेगा टोॽवाचि निमेट्टुटु, हिट्नुङ् खानि सोब्बे डोङ् आठोङ्डिटि॥ 21पोङ्भोने पाबाङा उसियागा याप्मिचि उहिङ्ग्वाट् चोगुचिउङ् चोला पिडुचिचि, हिट्डेडोक् छाङा चा उन्ङा निङ्ग्वा चोगुचिगालाउङ्सा चोला पिडुचिचि॥ 22पोङ्भोने माङ्हाङ् पाबा आप्पेङा खोना चा न्याए चोगुन्चिन्गा, टरो सोब्बे न्याए चोक्माना टोॽवा छालाउङ्सा पिडुएसुए, 23हिट्डेउङ् याप्मिचिङा पाबा मान् ओचोगु गाड्डे डोक् छालोङ्सा ख्वाप्पाङा मान् ओचोगुवाक्॥ छा मान् ओचोगुन्गाँ उन् कापाङ्बा पाबा चा मान् ओचोगुन्ना॥
24“छेम्बा डोक्, आङा खानि लोनाँनि, जुन्ङा आरिङ् खेम्सुटु हिट्नुङ् आङा कापाङ्बा माङ्हाङ्ङि बिस्वास चोगुटु, हिट्नालोक् खोना बेला चा लाट्निना चोला लियुक्॥ हिट्नुङ् हिट्नाँ साजाए टोगुन्ना, टरो हिट्ना सिमालाम्मा चोलाङि पाइले डोक् लिग्युएट्युक्॥ 25छेम्बा डोक् आङा खानि लोनाँनि, हिट्ना बेला टायुगेट्, हिट्नुङ् हिट्ना बेला हाट्ले डोक् ए, जब उसियागा याप्मिचिङा माङ्हाङ् छाङाना ओसोरा ओखेम्सुटु, हिट्नुङ् काखेम्बाचि टेप्माम्बाक् उहिङ्युक्॥ 26पोङ्भोने पाबा डोक् चोलाङाना उपुन् ए, हिट्डेडोक् उन्ङा उइछा चा चोलाङाना उपुन् चोगुएसुए॥ 27हिट्नुङ् उन्लोङ्सा न्याए चोक्माना आधिकार पिडुएसुए, पोङ्भोने याप्मि छा उन् डोक् ए॥ 28खानि ना रिङ्ङि डोङ् ठोङ्नेनिन्, पोङ्भोने हिट्ना बेला टायुगेट्, ओहुम्पाङि उलिसागा सोब्बेङा ओसोरा ओखेम्सुटु, 29हिट्नुङ् उहिङ्ग्वाट् उलियुङ् ओकोब्युक्॥ नुना टोॽवा काचोक्बा याप्मिचिम्बाक् खोना बेला चा लाट्निना चोला टोग्मा उहिङ्ग्वाट् उलियुक्, हिट्नुङ् ओभेन्गा टोॽवा काचोक्बाचिम्बाक् साजाए टोक्माउङ्सा उहिङ्ग्वाट् उलियुक्॥#दानिएल १२:२
30“आङा आप्पेम्बाक् पाक्चा चोक्मा हिनिङ्ना॥ जे आङा खेम्सुङ्टुङ् हिट्ना पारा डोक् न्याए चोगुङ्टुङ्, हिट्नुङ् आङा चोगुङ्ना न्याएम्बाक् छेम्बाना, पोङ्भोने आङा आप्पे आनिङ्ग्वा गाड्डे पाक्चा चोक्निङ्ना, टरो आङा कापाङ्बाङाना उनिङ्ग्वा गाड्डे एरोक् चोगुङ्टुङ्॥
31“आङाना बारेङि आप्पेङा साँचि पिडुङे भोने आङाना साँचि छेम्बाना लिनिना॥ 32टरो आङाना बारेङि साँचि कापिबाम्बाक् आरको डोक् वाहेट्, हिट्नुङ् उन्ङा आङाना बारेङि जे माट्टुटु हिट्ना रिङ् छेम्बाना ए नुङ् आङा ठाहा टोगुङ्टुङ्॥
33“खानिङा बाप्टिस्मा कापि युहान्नाङि रिङ् सिलाप्मा खानिगा याप्मिचि उन्ङि आपाङ्सुम्चिम्मे, हिट्नुङ् उन्ङा छेम्बाना रिङ् मालोडिए॥#युहान्ना १:१९-२७; ३:२७-३० 34आङालोङ्सा याप्मिचिगा साँचि चाहाबा लिनिना, टरो खानिङा मुक्टि आटोगुम् नुङ् आङा नागा रिङ् माट्टुङ्ना॥ 35युहान्नाम्टे हाट्युयाक्ना हिट्नुङ् ओम्साना कुपि गाड्डेना डाना, हिट्नुङ् खानि होप्मो बेला सोम्मा उन्ङाना व्हाङ्ङि हारका लिमा निङ्ग्वा आचोगुम्मे॥
36“टरो आङालोक् युहान्नाङाना नुङ्ना चा ठेना साँचि युङ्ग्वा॥ पोङ्भोने जुन् टोॽवाचि युमा लोङ्सा पाबाङा आङा जिम्मा याप्मिपिडे, हिट्ना टोॽवा डोक् आङा चोगुएट्टुङ्, हिट्नुङ् आङा पाबाङा याङ्पाङ्साना नुङ् हिट्नागा टोॽवाङा डोक् आङाना बारेङि साँचि पिडुटु॥ 37आङा कापाङ्बा पाबा आप्पेङा आङाना बारेङि साँचि पिडुएसुए॥ खानिङा उन्ङाना ओसोरा खोना बेला चा आखेम्निम्गेट्निम्ना, हिट्नुङ् उन् खोना बेला चा आनिनिम्गेट्निम्ना॥#मात्ति ३:१७; मारकुस १:११; लुका ३:२२ 38हिट्नुङ् खानिङा उरिङ् खानि निङ्ग्वाङि आयुङ्निम्ना, पोङ्भोने खानिङा उन्ङा पाङ्सुना याप्मि डोक् बिस्वास आचोक्निम्ना॥ 39खानिङा धारमाछाप्ला पोढाँ आचोगुम्गा, पोङ्भोने हिट्नि खोना बेला चा लाट्निना चोला टोगुम्टुम् नुङ् खानि आमिट्टिगा॥ हिट्ना धारमाछाप्लाङा डोक् आङाना बारेङि माट्टुटु॥ 40टरो लाट्निना चोला टोक्माउङ्सा खानि आङा सोरि टामा निङ्ग्वा आचोक्निम्गा॥
41“आङा याप्मिचिलाम्मा मान् कोलुङ्ना माखाक्॥ 42टरो आङा खानि मिसेन् निनैनाने, खानि निङ्ग्वाङा माङ्हाङ् माया आचोक्निम्ना नुङ् आङा ठाहा टोगुङ्टुङ्॥ 43आङा आप्पाङाना उनिङ्ङि टाइसाङे, टरो खानिङा आङा आलाडिन्नागा॥ टरो आरको कोइ आप्पे उनिङ्ङि टाए भोने खानिङा हिट्ना आलाडुम्टुम्॥ 44खानिङा ठिबाङ्ङा आरकोलाम्मा मान् आकोलुम्गा, टरो ठिबाङ् एरोक् माङ्हाङ्लाम्मा टोगुम्ना मान्म्बाक् आकोन्निम्ना भोने खानिङा खोड्डेउङ् बिस्वास चोक्मा आहिडुम्टुम्ना टे?
45“आङा खानि पाबा ओटोकानाङि फाट्टुर लाब्नानि नुङ् मिट्नेनिन्॥ खानिङा खानि आसा मोसाङि आयुङ्सुएसुम्मे, उन्ङा डोक् खानि फाट्टुर मालाबिटिटि॥ 46खानिङा मोसा बिस्वास आचोगुम्नाम् बे आङा चा बिस्वास आचोगिङे बे, पोङ्भोने उन्ङा आङाना बारेङि छेप्टुएसुना डाना॥ 47टरो खानिङा उन्ङा छेप्टुना रिङ्चि डोक् बिस्वास आचोग्निम्ना भोने, आङा माट्टुङ्ना रिङ् खोड्डेउङ् बिस्वास आचोगुम्टुम्ना टे?”
वर्तमान में चयनित:
युहान्ना 5: APH
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
