युहान्ना 2
2
काना साहारबेॽना थाङ्छेङ्
1न्नागा हिच लेन हेक्साङ् गालिलगा काना बाङ्ना मिना साहारबे एको थाङ्छेङ् वाया॥ येसुगा उमा चा न्नाबे ख्यामासा॥ 2येसु नुङ् उका चेलाचि चा न्ना थाङ्छेङ्बे निम्तो म्बिक्साचि॥
3सिम्लेॽमाङ्गा माध मेन्दाहोङ् येसुगा उमाङा येसु लु, “हाकु ङ्खाचिनुङ् सिम्लेॽमाङ्गा माध मेन्दामाहा॥”
4येसुङा पोलोवा पि, “आमा, का इ चोक्माङान ङ्खा न्लुयाङान, इजाङ्बाङ्निङ् आका बेला हाकुचा न्दायामान्ना॥”
5न्हाङा येसुगा उमाङा न्नाबेॽहा काम चोक्खुबाचि लुचि, “उङा लुइवाघा लोॽवा न्निङ्दा चोगानुम॥”
6न्नाबे याहुदि चालान आन्सार चोक्खे चोक्मानिङ् चालाचोक्माहा ए होम्बोक लिटार हिङ् माङ्च्वा होङ्खुबा लुङ्खाक्का ङ्खोन्दाहा या घाइलाचि ङ्वाया॥ 7येसुङा नोकोरचि लुचि, “खा घाक घाइलाचि माङ्च्वाङा इप्तानुम्चिम॥” न्हाङा ङ्खाचिङा घाक घाइलाचि सोयेक-सोयेक माङ्च्वाङा ङ्ङिप्तुचि॥
8न्हाङा येसुङा ङ्खाचि लुचि, “खा मिॽयाङ् वागानुम्घोङ् होक्तागा मुख्या याॽमि खुतानुम॥” न्हाङा ङ्खाचिङा ङ्खेतुहोङ् मुख्या याॽमि म्बि॥ 9होक्तागा मुख्या याॽमिङा ङ्खा माङ्च्वा चाखा चोगु, ङ्खिङ्बेला ङ्खा माङ्च्वा सिम्लेॽमाङ्गा माध लेक्साब्यामासा॥ ङ्खा हेॽनाहाङ् तायाहा ओम उङा था म्मायान, (ङ्खाॽनिङ्गो माङ्च्वा इप्खुबा नोकोरचिङा च्हेन था वाया) न्हाङा होक्तागा मुख्या याॽमिङा थाङ्स्योङ्बा काहोङ् लु, 10“हेकोहा याॽमिचिङा गो ओन्दाङ् खुम्दुहा सिम्लेॽमाङ्गा माध म्बिवाचि, न्हाङा याॽमिचिङा प्याक ङ्ङुङिॽवाहोङ् से ङ्खुम्दिन्हा म्बिवाचि, ङ्खाॽनिङ्गो न्दा गो खुम्दुहा सिम्लेॽमाङ्गा माध खिङ् सोम्मा युक्सुक्सुघा!”
11खाॽला येसुङा गालिलगा कानाबे आच्चाम्माना काम चोगुहोङ् उका माहिमा सोॽमेतुचि॥ ना काम च्हेन उङा चोगुहा आच्चाम्माहा काम नुङ् आच्चाम्माहा चिङ्गो माध्येबे इम्ना साया॥ न्हाङा उका चेलाचिङा उङ्बे बिस्वास न्जोगु॥
12न्हाङा येसु उका उमा, उनुन्छाचि न्हाङ् चेलाचिनुङ् काफार्नाहुम बाङ्ना मिना साहारबे उक्साहोङ् एहिलेन न्नाबे वाया॥#मात्ति ४:१३
येसुङा बेपारिचि निङ्वाफुमापाङ्भाङ् इक्ताहाक्सुचिहा
(मात्ति २१:१२-१३; मार्कुस ११:१५-१७; लुका १९:४५-४६)
13याहुदिचिगा फोङ्होक्नाम ताहेक्सासा, न्हाङ् येसु यारुसालेमबे ख्या॥#पारास्थान १२:१-२७ 14ङ्खिङ्बेला याॽमिचिङा निङ्वाफुमाबे बोलि तिमागा पारेवाचि, सामुङ्चि, पोसुचि निङ्वाफुमापाङ्गा चारामबे ङ्ङिन्चामान्स्याहा नुङ् याङ् न्लेन्मान्स्याहा#२:१४ ङ्खिङ्बेला निङ्वाफुमापाङ्बे बिसेस याङ्ङा तिरो हुङ्माहा साया, ङ्खोङ्माङ् न्नाबे याङ् लेन्खुबाचिनुङ् याॽमिचिङा याङ् न्लेन्दु॥ तुप्सुचि॥ 15खा घाक निसुहोङ् येसुङा खिबाक्का एको कोर्रा चोगु न्हाङ् न्नाबे ङ्वायाहा घाक उङ्चि सामुङ्चि, गोरुपिक्चि चा पाखा इक्ताहाक्सुचि न्हाङा याङ् लेन्खुबाचिगा घाक याङ् हिसाहाक्तुबिचि न्हाङ् ङ्खाचिगा टेबुलचि लेक्साहाक्तुबिचि॥ 16उङा पारेवा इन्चाखुबाचि लुचि, “खा घाक थोक नाभाङ् खेतिॽयानुम॥ आप्पागा पाङ् न्निङ्दा बेपार चोक्माना पाङ् चोक्मा न्दोक्त्वाम्गान्ना!”
17ङ्खिङ्बेला उका चेलाचिङा धार्मासाप्लाबे छेप्ताहा खा चेॽया म्मितु, “ङ्गा पाङ्गा लागि आका जोस आनिङ्वाबे मि लोॽवा हान्द्वाना॥”#छेम ६९:९
18ङ्खाॽनिङ्गो याहुदि हाङ्गुम्बाचिङा खाॽला लुसाङ् ओम्मागा न्जोगु, “न्दा खाॽला इचोक्मा सिम्मेकाना? निङ्वाफुमाभाङ् खाॽला चोक्माना चोक्तोक तोक्तुक्सुगाना ओमभोङ्, कानिङ् एको चिङ्गो सोॽमेता॥”
19येसुङा पोलोवा पिचि, “ना निङ्वाफुमापाङ् होराहाक्सानुम, न्हाङ् का सुम लेनबे ना फेरि चोग्वाङ्ना॥”#मात्ति २६:६१; २७:४०; मार्कुस १४:५८; १५:२९
20ङ्खाचिङा न्लु, “ना निङ्वाफुमापाङ् चोक्निमा गो नाया#२:२० नाया छायालिस फिम्बिलिङ्॥ फिम्बिलिङ् लाचोगामासा, इना न्दा ना सुम लेनबे चोक्निमा यास्वागानायि?”
21ङ्खाॽनिङ्गो येसुङा कायाना निङ्वाफुमापाङ् च्हेन उका सालुङ् साया॥ 22येसु स्यानाभाङ् हिङ्गिलिक लेक्साहोङ् उका चेलाचिङा येसुङा लुचिहा चेॽया म्मितु, न्हाङ् ङ्खाचिङा धार्मासाप्ला नुङ् येसुङा चेक्तुहा चेॽयाबे बिस्वास न्जोगु॥
23फोङ्होक्नामगा बेला येसु यारुसालेमबे वायानिङ् उङा प्याक आच्चाम्माहा काम चोगु॥ खा न्निसुहोङ् प्याक याॽमिचिङा उङ्बे बिस्वास न्जोगु॥ 24ङ्खाॽनिङ्गो येसु ङ्खाचिबे भोर पोरान्जोगान, इजाङ्बाङ्निङ् घाक याॽमिचि इमिन्हा न्सामेहा बाङ्ना चेॽया उङा उचुन था वाया॥ 25याॽमिगा निङ्वागा उतुम्बे इसाङा चा उङ् चिन्नुङ्मा पोरान्जोगान, इजाङ्बाङ्निङ् याॽमिगा निङ्वा इमिन्ना सामेॽना बाङ्ना चेॽया उङा था वाया॥
वर्तमान में चयनित:
युहान्ना 2: YAKH
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
