Lukas 16
16
Rampeang tau ung mangìsang kaaraangna tuangna
1Yesu musua: ho mao i pasikolaNa teꞌ, “Ara besa tau ung sukiꞌ ung mampupingkamaꞌ besa tau mangìsang nasang kaaraangna. Pang ara pimbesa, tau ung mingkamaꞌna to nitannaꞌ moa teꞌ mampitusa: kaaraangna tuangna. 2Jadiꞌ, na pupihàngo ti tau to pang musua: moa teꞌ, ‘Mangaka ti ung ku sàding ung nipantannaꞌ‑ingko? Àdo:‑ingnaꞌ ti suraꞌ-suraꞌmu, sàbaꞌ ha mading‑i hura: u miluhali pumpingkamaꞌku.’
3Mantangaꞌna‑mi ti tau to teꞌ, ‘Aka ti ung ku pukauꞌa deꞌ? Ku na pupillìhea‑mo tuangku. Mukeke, hang ku hela‑i, kapalau-lau, ku madia:. 4Ya:, ku lampiꞌ‑mo aka ti ung parallu ku pukauꞌ mangking ìna ku nipupillìhe‑mo, ara boso: solaku ung marìngang mantarima‑kaꞌ i rasangna.’
5Jadiꞌ, manghàngo si besa-besa nasang tau ung kiindang mao i tuangna. Tau ung parrara, na ongi‑ing moa teꞌ, ‘Pira ti indangmu mao i tuangku?’ 6Na sùmui teꞌ, ‘Sangatuꞌ pisukaꞌ*#16:6 pisukaꞌ. Sua: Ibrani bat, sua: Yunani batos. Besa bat dea‑mo kira-kira itàlu pulona liter. minnaꞌ saitun.’
Na àdona‑ming pikobu: seeng to ti suraꞌna na pasianu musua: teꞌ, ‘Hedi: ti suraꞌ indangmu e. Mesong‑ko pang ronno: ti ung màle, dea‑mo lima pulona.’
7Musuana‑mi mao i tau besa teꞌ, ‘Pang dio Mantàdi:, pira ti indangmu?’
Na sùmui teꞌ, ‘Sassàbu karung*#16:7 Sassàbu karung. Sua: Yunani Sangatuꞌ kor. Besa kor dea‑mo kira-kira 390 liter. gandum.’
Na àdona‑ming ho ti suraꞌna teꞌ, ‘Hedi: ti suraꞌ indangmu e. Ronno: ti ung màle, dea‑mo karoꞌa: atuꞌna.’ ”
8Musuana‑mi ti Yesu moa teꞌ, “Tuangna pikobu: seeng ung dang mahulo: to, mampirerèngi‑i sàbaꞌ kamanaràngangna.
Sàbaꞌ tau ung si tuho: mantangaꞌ teng tuhona i lino tee làbi manarang i laling kara-kara i lino tee nai none: tau ung si tuho: i kamasilaoang. 9Moi mène: to, Ku pusua: matung moa teꞌ, Pake‑ko se ti kaaraang i lino tee mao i kabeloangna tau sintàna: mangking ara tau siìsangmu, mangking tempona hùling ti anggaꞌna kaaraang to, u nitarima se i tamming ung deaꞌ tùrungna.
10Tau ung hela nipatongang i laling kara-kara ung supi:‑i, hela ho nipatongang i laling kara-kara ung lammuꞌ. Hampoꞌ tau ung dang hela nipatongang i laling kara-kara ung supi:‑i, hang hela‑ida ho nipatongang i laling kara-kara ung lammuꞌ. 11Jadiꞌ, ìna hang hela‑ko dosse: nipatongang i laling mampake kaaraang i lino tee, isai ti ung mampatongànging‑ko se kaaraang ung tongang? 12Pang ìna hang hela‑ko dosse: nipatongang mampatu: kaaraangna tuangmu, isai ti ung manghengiing‑ko se kaaraang miluhali ung nu ampu kalenanna?
13Hari:‑da pangkoring ung hela mallayani idua tuang. Sàbaꞌ na toroꞌia ti besa, pang besa na pakaliung, dea‑raka minumpua mao i besa, pang besa hari:. Mène: ho mao i dio se. Hang hela‑ko dosse: mallayani belo: nai iduanna, Puang pang kasukiꞌang.”
Suana Yesu mampatu: tu Parisi
(Mat. 11:12-13, 5:31-32, Mrk. 10:11-12)
14Tu Parisi one: i anto mampisàdìngi nasang ung na pusua: Yesu, mambùruꞌ‑ing na pantibe‑ing se silanna, sàbaꞌ mampumakàda:‑i se seeng. 15Hampoꞌ musua: ti Yesu mao i dei: se moa teꞌ, “U mangokaꞌ se lupu dalang mangkonai: kalaemu tongang i heleꞌna tulino, hampoꞌ na ìsang Puang ti pinanahammu se. Sàbaꞌ aka ti ung na àna: tulino kamìnang parallu, na pudàku Puang.
16Atorang-atorang Musa pang Suraꞌ Nabi-nabi nipake mampipaturo:‑ing pampuinahanna Puang deaꞌ bùruꞌna Yohanes Pumpudoiꞌ. Pang na rara tempo to, Kareba Belo: mampatu: kadatuangna Puang nipakareba tùrung, pang boso: tau mampukaenàngi mangking mintama kadatuangNa to, miluhali taunna Puang. 17Hampoꞌ atorang-atorang Musa pang Suraꞌ Nabi-nabi hang hùlìngi:‑da, moi sangkìdoꞌ. Làbi madàli‑da hùling ti langiꞌ pang lino nai none: besa sua: i Suraꞌna Puang.
18Mènena, isai ti ung mangholi bahinena mangking silopaka pole bahine sintàna:, tau to malahang. Pang isai ti ung mampubahine bahine ung na holi‑mo muanena, malahang‑da ho.”
Rampeang tau ung sukiꞌ pang Lasarus ung mase-mase
19Musua: kang ho ti Yesu moa teꞌ, “Ara besa tau ung sukiꞌ ung mipake leleng pakeang ung kamìnang masuliꞌ pang malumu. Tumpuꞌ àlo mampaara pampukauꞌ ung milàbi. 20Pang ara besa tau ung mase-mase pupuꞌ ung nikonai: Lasarus. Milàtuꞌ nasang ti kalaena pang mirere. Tau to biasa na baha tau mao i bambangangna tau ung sukiꞌ to. 21Tau to marranung nihengi‑ing ung sikàda: nai mejanna, hampoꞌ hari:. Asu sule: ti ung bùruꞌ mallilai: helanna.
22Na dampiꞌ‑mo tempona mate ti tau ung mase-mase to, kalihayona na baha malaikaꞌ-malaikaꞌ mao i suruga, mui osokòna Abraham. Hang masai‑i nai anto, tau ung sukiꞌ to mate‑da ho, pang hatang puntinna nilamung. 23I linona tau ung mate, maparriꞌ tungka ti tau ung sukiꞌ to. Pang tempona mihele nai karaona, na ita ti Abraham pang dea ti Lasarus mui osokòna.
24Mikakoangna‑mi moa teꞌ, ‘O amangku Abraham, pulemu‑kaꞌko! Suo:‑ingnaꞌko ti Lasarus mampintontong‑ing hùngang kangkangna i uhai, na pasàlei:‑ing lilaku. Sàbaꞌ ku maparriꞌ tungka i laling api tee.’
25Hampoꞌ na sùmui Abraham teꞌ, ‘O anàku, kalehai moa teꞌ tempona u tuho: maang i lino, u mangkorai:‑modo angka-angkanna ung belo:. Dea ti Lasarus mangkorai: kamaparriꞌang. Hampoꞌ i latenna, nipumasannang‑moda inne:, pang dio maparriꞌ. 26Pang sintàna: nai anto, ta na àlaꞌ‑mo se ung makàtu ung lammuꞌ, mangking tau àla: ung matung hang hela‑i, pang mène: ho tau nai anti, hang hela‑i mai.’
27Musuana‑mi ti tau ung sukiꞌ to teꞌ, ‘Baꞌ, ìna mène: to Ama:, ku mingkalemu matung pantuyu‑ingnaꞌko ti Lasarus mao i rasangna amangku. 28Sàbaꞌ ara maang lima mantàdiku one:. Ku palau na pakainaꞌ‑i, hau na mangulaꞌ‑i se katuhoangku, mangking ìna mate‑i se, ha mai‑i i kaoneang ung dang makàdaꞌ maparriꞌna tee.’
29Hampoꞌ na sùmui Abraham moa teꞌ, ‘Mangampu‑mi se Suraꞌ Musa pang Suraꞌ Nabi-nabi. Parallu na pisàdìngi‑i se pang mantoroꞌi isinna.’
30Hampoꞌ tau ung sukiꞌ to misùmu teꞌ, ‘O amangku Abraham, hang na pukauꞌi: se ti to. Hampoꞌ ìna ara tau nai linona tau ung mate ung lumao mampakainaꞌ‑i se, baꞌ mingkatobaꞌi: se nai dosa-dosanna.’
31Hampoꞌ musua: ti Abraham teꞌ, ‘I dang na pisàdìngi‑i se ti Musa pang nabi-nabi, matantu hang na patongang‑i dasse: ho, na moi ara tau ung tuho: pole nai kamateang.’ ”
वर्तमान में चयनित:
Lukas 16: skx
हाइलाइट
शेयर
कॉपी
Want to have your highlights saved across all your devices? Sign up or sign in
