Marka 1
1
Baptisma Petu Johan ih Thusipnak
(Matthai 3.1–12; Luka 3.1–18; Johan 1.19–28)
1Pathian Fapa,#1.1 A hrekkhat kutngan cabu pawl sungah Pathian Fapa, tihmi a um lo. Jesuh Khrih ih Thuthang Ṭha ih hramthawhnak cu hitih in a si. 2Profet Isaiah ih nganmi mangin:
“ ‘Zohhnik, na hmai ah ka palai ka thlah thok,
Ani nih na zalam a timtuah thok.’
3Ramṭhing ih mi pakhat hehnak aw nih,
‘Bawipa ih zalam timtuah uh;
A zalam cu dingter uh,’ a ti.”
4Baptisma petu Johan cu ramṭhing la in a ban ih, sual ngaihthiamnak hrangah sirfaknak baptisma thu a sim.#1.4 Baptisma petu Johan cu ramṭhing la in a ban ih, sual ngaihthiamnak hrangah sirfaknak baptisma thu a sim; a hrekkhat kutngan cabu pawl sungah Johan cu ramṭhing in a ban ih thu a sim, tiah a um. Ani nih mipi pawl sinah, “Nan sual sir uh la baptisma la uh. Cun Pathian nih nan sual pawl nan ta ngaihthiam thok,” tiah a ti. 5Cun Judea peng pumpi le Jerusalem mi zate pawl cu a sinah an feh. An sualnak pawl an phuang ih Johan hmangin Jordan tikua ah baptisma an co.
6Johan cu kalauk hmul ih tuahmi hnipuan a hru ih a tai ah saphaw taikap a kap. Cun khabawk le hramlak khuailawti cu caw ah a ei. 7Cun, a thusipmi cu, “Ka dungih a tiang dingmi pa hi kei nakin a picang sawn, a hmai ah kun pit in a kedap hri phoihsaktu ding hmanah kei cu ka tlak lo. 8Kei cu ti in baptisma nan ta pe; asinain ani cu Thlarau Thianghlim thawn baptisma nan ta pe thok,” tiah a i.
Jesuh ih Baptisma le Tukforhnak
(Matthai 3.13—4.11; Luka 3.21–22; 4.1–13)
9Cuvai ni ah Jesuh cu Galilee peng Nazareth khua in a ban ih Johan hmangin Jordan tikua ah baptisma a la. 10Cun Jesuh cu ti sungih a hang suah cangka in van a hong fa ih Thlarau cu thute mangin a tlunih a rong ṭum cu a hmu. 11#Mat 3.17; 12.18; Mar 9.7; Luk 3.22Cun van in aw pakhat nih, “Nang cu ka duhdawt ngaimi ka Fapa na si, na cungah ka lung a kim setak,” tiah a ti.
12Hmakhatte ah Thlarau nih Jesuh cu ramṭhing ah a ṭhita. 13Cun cuvai hmun ah ni sawmli a um ih Seihtan nih a tukforh. Ramsa pawl thawn an um ih vancungmi pawl nih an tuamhlawm.
Jesuh nih Nga Tlaitu Pali A Ko
(Matthai 4.12–22; Luka 4.14,15; 5.1–11)
14Johan thawng an thlak hnukah Jesuh cu Galilee peng ah a feh ih Pathian ih Thuthang Ṭha a sim. 15#Mat 3.2Jesuh nih, “Tikcu a kim i ih Pathian uknak a nai i! Nan sual sir u la Thuthang Ṭha cu zum uh!” tiah a sim.
16Jesuh cu Galilee Tili kap ih a feh laiah, Simon le a unaupa Andru cu nga tlaitu an ih ruangah, tili sungah sur an vorh berbo lai a hmu hnei. 17Cun Jesuh nih an sinah, “Ka thlun uh, cule minung tlaitu ah nan ta tuah thok,” tiah a ti hnei. 18Hmakhatte ah an ni nih an sur pawl an ramta ih a dung an thlun.
19Cun Jesuh cu a hlat deuhnak ah a feh ih, Zebedi ih fapa James le a unaupa Johan lawng sungih an sur pawl an rep berbo lai a hmu hnei. 20Hmakhatte ah Jesuh nih a ko hnei ih, an pa Zebedi cu an tlakfa pawl thawn lawng sungah an ramta ih a dung an thlun.
Thlarau Sia ih Molhmi Pa
(Luka 4.31–37)
21Jesuh le a dungthluntu pawl cu Kapernaum khua ah an feh, a zingla Sabbath ni ah Jesuh cu Sinakok ah a lut ih thuzirh a thok. 22#Mat 7.28,29A thuzirhmi ah an mang a bang, zangahtihle Daanthiam pawl mang i lo in, ani cu thuneitu pakhat mangin a zirh.
23Cuvai can ah thlarau sia ih molhmi pa pakhat cu Sinakok sung ah a tiang ih, 24“Nazareth mi Jesuh, zangtu ah kan na ṭul? Kan na siatsuah dingah maw na tiang? Hu na si tih ta fiah — nang cu Pathian ih mi Thianghlim Pakhat na si,” tiah a hek.
25Cun Jesuh nih cupa cu, “Daite in um, cupa ih sung in suak!” tiah a tai.
26Thlarau sia nih cupa cu thangai in a caihter ih thangngai a heh hnuk ah, cupa ih sung in a suak. 27Cun an zatein an mangbang colh ih, “Aimang thil cu zangtih in a i? Zirhnak thar maw a i? Thlarau sia pawl hman thuneihnak thawn thu a pe hnei ih a thu an thlun!” tiah pakhat le pakhat an sutfa.
28Cutin Jesuh ih thuhla cu hmakhatte ah Galilee peng zate ah a thang colh.
Jesuh nih Mi Tamngai A Damter
(Matthai 8.14–17; Luka 4.38–41)
29Jesuh cu Sinakok ih a suah cang in Simon le Andru teiʼ inn ah James le Johan thawn an lut. 30Simon nupi ih nu cu khurhfah in a fak ih a it; Jesuh a tian cang in cuvai thu cu an sim lohli. 31Jesuh cu a sin a va feh ih a kut in a han tho. A khurhfahnak cu a dam ih a tuamhlawm hnei.
32Ni a pil ih simla a tian tikah, mi fak pawl le thlarau sia ih molhmi pawl hmahhmah cu Jesuh sinah an tianpit. 33Cun an khawpawh in cuvai inn suahka hmai ah an hmuakkhawmfa. 34Jesuh nih fahnak phunphun ih a fakmi pawl a damter, cule khawsia tamngai khaw a dawisuak hnei. Khawsia pawl cu ṭon a sian hnei lo; zangahtihle hutu a si tih an fiah.
Galilee ah Jesuh Thu A Sim
(Luka 4.42–44)
35Zingmaw khawvang hlan ah Jesuh cu a tho ih inn leng ah a suak. Thawngṭhingnak hmun ah a feh ih thla a cam. 36Simon le a rualpi pawl nih Jesuh cu an hrawl, 37an hmuh tikah, “Mi hmahhmah nih ta hrawl eng,” tiah an sim.
38Jesuh nih, “Khua kiangkap dang ah feh uh sing. Thu ka sim hnei thok. Zangahtihle cucu ka tiannaksan a i,” tiah a sawn hnei.
39 #
Mat 4.23; 9.35 Cun Galilee peng hmahhmah ah a feh ih an sinakok pawl ah thu a sim ih khawsia pawl khaw a dawisuak.
Jesuh nih Miphar Pakhat A Damter
(Matthai 8.1–4; Luka 5.12–16)
40Miphar pa pakhat cu Jesuh sin a feh ih, khuk bil in bopnak a hler ih, “na duh ah cu, ka na thiangter thei,”#1.40 ka na thiangter thei: Himang fahnak cu biaknak la ih hmuhdan ah mi thianglo ah ruah a i. tiah a ti.
41Jesuh nih a thinfak#1.41 thinfak; a hrekkhat kutngan cabu pawl sungah thinsia, tiah a um. ih a kut dawh pit in a tham. Cule a sinah, “Ta ka thianter ka duh, thiang i,” tiah a ti. 42Hmakhatte ah a pharfah a dam ih a thiang. 43Jesuh nih fak ngai in ralrinnak a pe ih a hlatnak ah a fehter lohli, 44Cun a sinah, “Ngai hnik! Hutu sinah zangkhaw sim hlah. Cunakin puithiam sinah va feh cih la tak zohfel seh; mi hmahhmah nih na dam tihmi an fiahnak dingah Moses ih thupekmi mangin mithiang na sihnak dingah thawinak pe,” tiah thu a pe.
45Sikhawsehla cupa cu a feh ih a damnak thu cu duhsah ngaiin a sim ih khawhra a thang. Curuangah Jesuh cu mi ih hmuhhngan in khaw sungah a lut thei i lo. Khaw lengah a um ih a sinah hmunzakip in mi nih an pha.
वर्तमान में चयनित:
Marka 1: NTLTB25
हाइलाइट
शेयर
कॉपी
Want to have your highlights saved across all your devices? Sign up or sign in
© 2025 The World for the World International