Matiyew 21
21
Yezu a fuləkwey a Zeruzalem andza bay aha
(Mk 11.1-11; Lk 19.28-40; Zŋ 12.12-16)
1Andza a husam aha a Zeruzalem, bəse ta Betəfazey na, da mamba ma Tetəɗez na, Yezu me slərey gawla ŋga hay tsew. 2ta ma ləvatar aha: «Dawam a wuraw a taɗay ka mey kwar ana, ha husam ba tsana, ka da ndzafam zuŋgow ma raha, ta bəzey ŋga ha. Pasəkadəmiyawa, sadəmatiyawa. 3Kendzey ndaw ka tsakwar guma ba na, ləvamar: ‹Bay’ərlam a wuɗey.› Arka na aza a mbəkadəməkurawa ha sadəmərawa bəse bəse.» 4A da key andza ha na, ma ka ndesley andza ma ndaw sek ma ləvawa na:
5‹Ləvamar a dem ma Siyoŋ:
nəkafa Bay ɗek ɗuhwa na a sawa ha 'ay ɗek,
ŋga ləfeɗeɗe ha, ma tsəla ha ka 'ar ma zuŋgow ŋgwas aha,
ka ’ar ma bəzey ma zuŋgow, bəzey ma gənaw ma zəgey tek ana.›
6Gawla ŋga hay ma dawam, andza ma Yezu ma tsatar ana na, 7taya na, ma zəgəmərawa zuŋgow ana, ta bəzey ŋga na; arka ma ɓaɓətam zana ta hay ka 'arra. Arka Yezu na me ndzey ka 'arra. 8Səkway ma kusa hiya haɗadzidzay, ma ɓaɓətam zana ta hay tabiyaha ka tsəveɗ, sa na hay ma tsuwam hawal ma vəɗe ma tek hay, ma ɓeɓətey ka tsəveɗ ana tsa. 9Ndaw ma kusa hiya na hay na ma dawam ka mey ana hay, sa na ma səpama da dəba na hay, ma wudam: «Ozana Bəzey ma David! Bay’ərlam ka pəsafa mey ba da mezəley ŋga ka ndaw ma sawa na na! Ozana da mekekəle ma 'ərlam!» 10Andza Yezu a fuləkwey aha a Zeruzalem na, mendzey ma wuraw ana tabiyaha ma gagətsata, taya ma ləvam: «Ɗagay neney na ndaw mey?» 11Ndaw ma kusa hiya na hay ma mbəɗəmatar kava: «Neney na, ndaw sek Yezu, ma Nazaret da Galiley.»
Yezu a ɓəlata ndaw me key filaw hay ba da 'Ay me key Kuley
(Mk 11.15-19; Lk 19.45-48; Zŋ 2.13-16)
12Arka Yezu me fuləkwey a 'Ay me key Kuley, ma haratərawa ndaw ma həɗəkadama tek hay, ta ndaw ma həɗəkam ana hay ba da 'Ay me key Kuley. Ma patar teker a tabal ma ndaw ma mbəɗam sumkwo na hay, ta tek mendzey ma ndaw ma həɗəkadama hwoɗəgwam ana hay. 13Arka ŋga ma ləvatar: «Ma winda ha na, 'Ay ɗaw na, a da zəlamar na, 'ay me ɗuley mey aha tok na, ekəɗey ka təradama tek a kwar zlazlam ma mahal hay na teŋgey?» 14Arka ndaw wulaf hay, ta ndaw vədal ana hay ma guram ka tsakay ŋga da 'Ay me key Kuley, ŋga ma ndaladata. 15Andza ma nəkadama tek ana me rəzley ndaw ana ŋga me key ana hay ta wawa na hay ma wudam da ’Ay me key kuley ana: «Ozana Bəzey ma David!» A ndalatar a baba ɗuhwa na me key kuley ana hay ta ndaw me sesəkey Mewey hay. 16Arka ma ləvamar: «Ka tsənada guma neney ana, ma tsam ana kakay ɗaw?» Ama Yezu ma ləvatar: «Ayaw, ɗaɗa kuray ka dzaŋgama bəzay ma guma neney tikay ɗaw? Ta huɗa mey ma bəzey bəza na hay, ta na gwendez ana hay na, kah ka ləmada me Səmbərey ɗek ba.» 17Ŋga na ŋguɗek mbəkadata ka slam ana, ma bawa ba da wuraw, ŋga ma daway təŋga a Betani, ma da ney da huɗa.
Yezu ma kəlafa 'ar ka vəɗe tek ana daha ma yaha kakay
(Mk 11.12-14, 20-25)
18Ma pərek a mey aha a Zeruzalem na, may ma tsafa ka Yezu. 19Andza ŋga ma nəkada vəɗe tek ana daha andza gudav ka tsakay tsəveɗ na, ŋga ma gurey a bəziya. Ama a da ndzefey na, ɓaslah ana dada. Arka ŋga ma ləvar: «Ɗaɗa ka da yey aha bəzey sakay!» Ɗeŋe ka slam ana hana tsana, vəɗe tek ana hana me ŋgweley ŋga. 20Andza taya ma nəkadama tek a neney me key ana na, ka rəzlata gawla ŋga hay ba, ha ma ləvam: «Ɗaɗa vəɗe tek ana a ŋgweley da mey asləta na, teŋgey?» 21Yezu ma mbəɗatar kava: «I ɓadakwar dərka na, haɗaw pas asləta ka pam aha 'ar mandzara waway na, ka da kam tek a ɗaw eɗey ma kar a vəɗe guday ana dada tsa kakay, ama kwa andza tekeɗe ka ləvamar a mamba ɗey: lətsey ba kasləna, daw da kəley a bəlay na, a key andza ha. 22Tek a kwar me tsəhey tabiya ha ta me ɗuley mey ta me pey 'ar aha kava na, ka da ndzafama.»
Zuif hay ma tsəhafama ka Yezu: gədaŋ aŋga ma ŋga a sawa na da may?
(Mk 11.27-33; Lk 20.1-8)
23Andza Yezu me fuləkwey ba a 'Ay me key Kuley, a tatəkadata ha ndaw hay na, baba ɗuhwa na me key kuley ana hay, ta ndaw ma səka na hay ma səkway, ma guram ka tsakay ŋga, taya ma ləvamar: «Ɗagay ma vəlaka tsəveɗ me key tek a neney hay na way? Ɗagay ka kata na ta gədaŋ aŋgway?» 24Yezu ma mbəɗafatara kava: «Yah tey i da tsəhafakwar tek asləta, haɗaw kuray ka mbəɗafəmiyawa ba kava na, aza i ɓadakwar gədaŋ a ɗaw a sawa na da may tey tok. 25Me dzuhəɓey ma Zaŋ a sawa na da may? Da 'ərlam tsukuɗu, da ndaw hay ɗaw?» Taya ma ŋgəlam mawa ka 'ar vaw ta na: «La ka ləvakwa: ‹da 'ərlam na›, a da ləvandakwar: ‹Azlakwa ka pamar 'ar kakay ka mey?› 26Haɗaw la ka ləvakwa: ‹Da ndaw hay na›, i wasakwa ta ndaw ma kusa na hay, hərway ndaw hay a zəgadama Zaŋ na, andza ndaw sek aha.» 27Arka ma mbəɗamar kava a Yezu: «La səradama kakay.» Arka ŋga ma ləvatar: «Yah ana tiyatsa na, i ɓadakwar tek ana hay, i kata na ta gədaŋ aŋgway kakay tiyatsa.»
Wawa hayna da walaŋ ana na na waray?
28«Ka ləvam ka guma ɗey na teŋgey? Ndaw ana daha bəzey ŋga hay tsew. Ma gurafa ma ləvar a na tsəfəmey ana: ‹Dem a ɗaw, teseɗey na, daway 'ay dzerne da key mber.› 29Ŋga ma mbəɗar kava: ‹I wuɗey kakay›. Arka me ndzey nekəɗey na, ma mbəɗada 'ar, ŋga ma daway. 30Ma gurafa ma ləvar a na metsetsew ana andza ha satsa. Wawa na ma mbəɗar kava: ‹Ayakaw, i daway Bay ɗaw›. Ama tok na, ŋga ka daway sakay. 31Da walaŋ ata ɗey tsew ana na, ma kadara tek ma baba me wuɗey ana na way?» Taya ma mbəɗamar kava: «Na tsəfəmey ana.» Yezu ma ləvatar: «I ɓadakwar dərka na, ndaw me tsekeley dzaŋgal hay, ta ŋgwas na ma nam ta ndaw hay so na hay, a da ləhafəmakwar ba ka mey, a Slala ma Bay'ərlam. 32Akwa Zaŋ a sawa ka tsakay kwar na, da tsəveɗ ma dzerey, amana, kuray ka pamar 'ar kakay. Ama ndaw me tsekeley dzaŋgal hay, ta ŋgwas ma nam ta ndaw hay so ha na hay na, ka pamar 'ar ba, kuray ka nəkadama ba ta dey kwar, amana kuray ka wuɗam ma mbəɗadama mendzey kwar, ma kuray ka pamar 'ar kakay.
Bəzay ma guma ma ndaw ma kam mber da ley ma viŋe seweɗ ana hay
(Mk 12.1-12; Lk 20.9-19)
33Pafama sləmay ka bəzay ma guma ma mala ha ta meley ana mekelehe sa: bay ma ley ana daha, me rəvey viŋe a ley ŋga, zley zley ara zleɗ ana, me ləmey slam ma ɗətsey ŋga na, me zley slam tsaŋ, me nəkey dey ka ley ana; ŋga me həley ndaw hay, ma ka nəkafəmara dey kava; arka ŋga na ma daw təŋga dəreŋ a dzaŋgal. 34Andza a wurawa kassla ka har me ŋgəley bəzey ma vəɗe ma tek ana hay na, ŋga me slərey gawla ŋga hay, ka tsakay ma ndaw ma kam mber ana hay, ma ka həladəmara bəzey ma vəɗe ma tek ana hay ma kəla ma ŋga na. 35Ama ndaw ma kam mber ana hay na, ma hələmata gawla ma 'ay ana hay; ma kəɗama ndaw naŋgar, naŋgar na ma kəɗama ba vagay aha; ndaw naŋgar sa tey na, ma kuwytsama ta ŋgwa. 36Bay ma ley ana me slərey gawla hay haɗadzidzay, a fəna na tsəfəmey ana hay sa; taya ma kadəmata, andza ha satsa. 37Andza tsoy madakwaydok ana na, ŋga ma sləratar bəzey ŋga, a dzeley da 'ar aŋga na na, waya: ‹Wawa ɗaw ana na, a da tsənamar sləmay.› 38Ama ndaw ma kam mber ana hay, ma nəkadama bəzey ŋga na na, ma ləvam ka 'ar vaw ta na: ‹Neney na ndaw ma da zəmey 'ay ana. Səmawa, kəɗakwa ba vagay aha na, zəmakwa zleley ana a lakwa na.› 39Taya ma zəgama, ma kəladəmərawa a bəla ma ley ma viŋe ana, ma kəɗama ba vagay aha. 40Kəɗey na, kendzey, bay ma ley ma viŋe ana ka da sawa ba na, a da kadata ndaw ma kam mber ana hay na, teŋgey?» 41Taya ma mbəɗamar kava: «A da bazlata ndaw ana hana seweɗ ana hay na kalas ba, mandzara ka kamar da vaw, a da vəladəmatara ley ma viŋe ana a har ma ndaw mekele hiya, aza a da həladəmara bəzey ma vəɗe ma tek ana, kassla ka har ana ma wuɗey.» 42Yezu ma ləvatar: «Ɗaɗa kuray ka dzaŋgama da Mewindey Kokwoɗ ana hay tikay ɗaw?
Ŋgwa aŋga na ndaw me zley 'ay hay ma kəladama, ba haya kakay ana na,
a da tərey na ŋgwa me telkwemere hayna:
na ŋga na na me slərey ma Bay’ərlam.
Ka slam dey lakwa na, hayaha bəza kakay!»
43I ləvakwar ekəɗey satsa na, a da zəgafəmakwar Slala ma Bay'ərlam ba, a da vəladara a səkway mekelehe, a da yey bəzey. 44Ndaw ma da təɗey ka ŋgwa ɗey na, a da teley. Kendzey ŋgwa na a kəlafa ka ndaw ana tey na, a da kəra.» 45Baba ɗuhwa na me key kuley ana hay, ta Fariziyeŋ hay, andza ma tsənadama bəzay ma guma neney ma mala ha ta meley ana hay na, ma səradama a tsey na, ka taya. 46Ma səpama ma da zəga, amana, a wasam ta ndaw ma kusa na hay, hərway a zəgadama na ndaw sek aha.
वर्तमान में चयनित:
Matiyew 21: MOF
हाइलाइट
शेयर
कॉपी
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun