Matiyew 27
27
A dadama Yezu 'ay bay Pilat
(Mk 15.1-2; Lk 22.66; 23.1; Zŋ 18.28)
1Ma zlemedew ana na, baba ɗuhwa na me key kuley ana hay, ta ndaw ma səka na hay ma səkway ma ŋgəlam mawa ka Yezu, ma da dzuwa a memətsey. 2Arka taya ma dzuwama, ma dadama, ma vəladəmara a har ma guverner Pilat.
Me mətsey ma Zudas
3Arka Zudas, ndaw ma haɗəkada na, ma nəkada ka dzuwama Yezu tsoy, me hwehuney. Ŋga ma madatara sulay kokurow makar ana a baba ɗuhwa na me key kuley ana hay, ta ndaw ma səka na hay, 4ta me ləvey aha: «I ka ŋgəsey ba zləna, i da haɗəkada na, mambaz ma ndaw ma ŋgəsa kakay ana.» Ama taya ma ləvam: «Ana mey la mey tey, mey ɗek ana, kah ma sərada!» 5Arka ŋga me lətsey ba ka slam ata, ta ma kuyada sulay ana a tsakay ma slam me key kuley, arka ma daw ma da hartey vaw ŋga. 6Baba ɗuhwa na me key kuley ana hay ma həlama sulay ana, arka ma ləvam: «Sulay a neney na, ndaw a dzəmada a dey ma sumkwo ma 'Ay me key Kuley kakay, zləna tsekeley ma mambaz ma ndaw.» 7A dəba ma me ŋgəley mawa ta ba na, taya ma haɗəkadama ley ma ndaw me ndərey masəɗak ta sumkwo na, slam me zləley vagay ma mbəlak hay. 8Nəkafama hərway ma mey na, ha kasl ekəɗey a zəlama ley ana na ‹ley ma mambaz.› 9Arka na me ndesley andza ma ndaw sek Zeremi me ləvey ana: ‹Arka taya ma həlama sulay ana kokurow makar ana tok, tsekeley ma ndaw a ŋga na ma haɗəkadama na, ndaw aŋga na bəzey ma Israyel hay ma kama tsekeley ana. 10Arka ma haɗəkadama ley ma ndaw me ndərey masəɗak. Bay’ərlam a ləvawa ta huɗa mey ɗaw na andza neney.›
Yezu ka mey dey ma Pilat
(Mk 15.2-15; Lk 23.2-5, 13-25; Zŋ 18.28—19.16)
11Ma dadama Yezu ka slam dey ma guverner. Guverner ma tsəhafa: «Kah na bay ɗuhwa na ma zuif hay ɗaw?» Yezu na ma mbəɗar kava: «Kah ana me ləvey seŋgey.» 12Ka guma ma baba ɗuhwa na me key kuley ana hay, ta ndaw ma səka na hay ma ŋgəlafama na na, a wuɗey ma mbəɗey kava kakay. 13Arka Pilat ma ləvar: «Ka tsənadata guma me seydewe neney hay tabiya ha ma tsafəmaka na tikay ɗaw?» 14Amana, a wuɗey ma mbəɗafara kwa ka bəzay ma guma na asləta kakay, a da key na ha ma rəzla guverner ana kambəlaɓa. 15Ka magurlam ka magurlam na, guverner a bawa ndaw asləta da daŋgay, na ma datar 'ar a ndaw hay ana, hərway da’ay ta na andza ha. 16Azlakwa da daŋgay ana na, ndaw ana daha a zəlamar Yezu Barabas, ndaw hay tabiyaha a səradama. 17Pilat ma tsəhafata ka ndaw hay ma kusa hiya tok: «A sakwar i ka bukurawa na way, Yezu Barabas tsukuɗu, Yezu na ma zəlamar Ndaw ma vahara 'ar ana ɗaw?» 18Hərway a sərada ha a mbəkafama har na ma səleŋ. 19Andza ŋga me ndzey ka slam me key sariya na, ŋgwas aŋga ma kəlawa ndaw ka ləvar: «Ka da tələkey a guma ma ndaw a neney dzerey ana zlay. Hərway tasa ma dəvaɗ na, mesəney ka yadaya vaw haɗa mavəday ŋga.» 20Baba ɗuhwa na me key kuley ana hay, ta ndaw ma səka na hay, ma pafəmata wuiya ka ndaw ma kusa hiya na hay, ma ka tsəham na Barabas, Yezu na ka zəɗadəmara ’ar ba. 21Arka guverner ma madatara bəzay ma guma na sa, ma tsəhafata: «A sakwar i ka bawa da walaŋ ata tsew na ana na way?» Taya ma mbəɗam kava: «Barabas.» 22Pilat ma tsəhafata: «I ka kada ta Yezu a neney, ma zəlamar Ndaw ma vahara 'ar ana na, teŋgey?» Taya ma mbəɗam kava tobiya ta ha: «Sey ŋga na ma darada ka 'ar ma tuwaw ma gazləlaha na!» 23Ŋga ma mada sa: «Ɗagay a ŋgəsey na mey?» Ama taya ma səkadama me wudey adiya: «Sey ŋga na, daradama ka 'ar ma tuwaw ma gazləlaha na!» 24Ma nəkada andza guma ŋga na a nefey sakay na, ama mey ana a deləhwesey aha a da sadərawa me tərey vaw na, Pilat me təɗey yam, ma pəra har aŋga ba ma dey ma ndaw hay tabiyaha, ta me ləvey aha: «Har a ɗaw, da mambaz ma ndaw a neney na daha tikay, a nəkey dey na, ka kuray ana tek a kwar!» 25Səkway tabiyaha ma mbəɗey kava: «Mambaz aŋga na, ka mandar ka 'ar ala na, ta wawa la hay adzay!» 26Arka ŋga ma mbəkadatərawa Barabas. Ama Yezu na, andza ma kəɗama ba ta lagwada na, ma gəradatara ma ka da daradama ka 'ar ma tuwaw ma gazləlaha na tok.
Sidzew hay ma səŋgərafama ka Yezu
(Mk 15.16-20; Lk 23.11; Zŋ 19.2-3)
27Arka sidzew ma guverner hay, ma zəgəmərawa Yezu a slam ma tefəkwey ta. Ma kusam tabiyaha ka tsakay ŋga. 28Arka taya ma tsukwadəmara zana ba ka vaw, ma kəlamar kelmedzey gagaza ha. 29Ma tsamar dzegwe ma ndak a 'ar, ka zəgawa duŋgwar ma zeleŋ ta a har zəmay; ma gardam ka mey dey ŋga, ma saŋgərafama ta me ləvey aha kava: «I ka tsədəmaka guma bay ɗuhwa na ma Zuif hay!» 30Ma təfafama sleslem, arka ma təɓama duŋgwar ma zeleŋ ana na ma kəɗadama ka 'ar. 31Andza ka səŋgərafama tsoy na, ma tsukwadəmara kelmedzey a hana gagaza na ba, ma madəmara zana ŋga ka vaw, arka ma dadama ma da derey tok.
A daradama Yezu ka 'ar ma tuwaw
(Mk 15.21-32; Lk 23.26-43; Zŋ 19.16-24)
32Andza ma bawa ta ba na, taya ma ndzafam ndaw Sireŋ ana daha, a zəlamar Simoŋ, ma təkamar ɗay ma zəgafa tuwaw ma gazləlaha na ma Yezu. 33Taya ma husam ka slam ana daha a zəlamar Golgota, ka ləva na, slam ma bəlam 'ar. 34Taya ma vəlamar zom ma dzəma ha ka vaw ta meɗeget aha ka sey, andza ŋga ma ndzəka na, a wuɗey me sey kakay. 35Andza taya ma daradama ba ka 'ar ma tuwaw ma gazləlaha na, taya ma kəɗafama tsatsa ka zana ŋga na hay. 36Taya ma ndza hiya ka slam ana, a dzaɗama ha. 37Ma tapama guma madzuwa na ka slam 'ar aŋga na, ma winda ha na andza neney: «Neney na Yezu, bay ɗuhwa na ma zuif hay.» 38Katsala hay daha tsew ma dara hiya ka tsakay ŋga tey, asləta ta har zəmay, asləta ta har gula. 39Ndaw ma dawam ta slam ana hay ma tsaɗama ta me ɓəley 'ar aha kava: 40«Kah na ka ləvey i mbəzlada 'Ay me key Kuley ba, i ndərada ka slam aŋga da meney makar sana, buwa vaw ɗek ana tok. Haɗaw kah Bəzey ma Bay ma Bəla sana, harɗawa ba ka 'ar ma tuwaw ma gəzlalaha na!» 41Andza ha satsa na, ndaw me sesəkey mewey hay ta ndaw ma səka na hay na, baba ɗuhwa na me key kuley hay ma səŋgərafama: 42«Ŋga ka buwey ndaw hay ba haɗadzidzay sa na, a slafa ma buwa bay ’ar ma vaw ŋga na sakay tok ɗaw? Ŋga bay ɗuhwa na ma Israyel sana, ekəɗey na, ka harɗawa ba ka 'ar ma tuwaw ma gəzlaha na, aza la da pakwar 'ar tok. 43Ŋga ka pada 'ar aŋga ba ka Bay ma Bəla sa na, ekəɗey na, Bay ma Bəla ana ka ləhadərawa tok, haɗaw a wuɗa na. Hərway a ləvey na waya: ‹Yah na Bəzey ma Bay ma Bəla!›» 44Kwa katsala na ma dara hiya dzaya ka 'ar ma tuwaw ana hay tekeɗe na, a tsaɗama andza ha satsa.
Memətsey ma Yezu
(Mk 15.33-39; Lk 23.44-48; Zŋ 19.28-30)
45Ma wuzla rəpas na, ləvaŋ me key ka dala tabiyaha kasl ka ndzemdey makar. 46Ma ndzemdey makar na, Yezu me wudey ta magala ha: «Eli Eli, lama sabakətani», ka ləva na: «Bay'ərlam a ɗaw, Bay'ərlam a ɗaw, ka mbəkadaya na ka mey?» 47Da walaŋ ma ndaw ka slam ana hay ma tsənadama na ma ləvam: «Nəkafama, a zəley aha Elyi.» 48Arka tsana ndaw asləta da walaŋ ata ma hway, me zəgey petekeɗ, ma dzuhəɓada a zom ma wardzaŋ aha; ma tsəɓada ka 'ar ma tapay ma zeleŋ, ma ɓadara ka sey. 49Sa ma ndaw hay ma ləvam: «Ɗagay! Nəkafakwa aza Elyi ana a sawa a buwa ɗaw?» 50Ama Yezu na me wudey ta magala ha sa, a dəba na na, ŋga me mətsey tok. 51Arka petəle ɗuhwaha na ma luwa ha da 'Ay me key Kuley ana, me ŋgerɗey da vaw tsew, zla da 'ərlam kasl a gwadaw. Dala ma dederey, hwatakwom hay ma ndzaləɗam; 52ɗay tsəvay hay ma wuram, vaw ma ndaw kokwaɗ ana ma mətsam ana hay haɗadzidzay ma mbələmawa. 53Ma bawa ta ba da tsəvay a dəba ma ma mbəlawa ŋga na, taya ma dam a Zeruzalem wuraw kokwoɗ ana, ma ɓəmatar vaw a ndaw hay haɗadzidzay. 54Andza taya ma nəkadama dala ma dederey ta tek a neney hay ma kam ana na, bay me wey sidzew temere ana, ta ndaw taya ma dzaɗam Yezu dzaya na hay, ma wasam ka vaw kambəlaɓa, taya ma ləvam: «Ndaw a neney akwa na, Bəzey ma Bay ma Bəla dərka na.»
Me pey ma Yezu a tsəvay
(Mk 15.40-47; Lk 23.49-56; Zŋ 19.25, 38-42)
55Ka slam ana na, ŋgwas hay daha ma lətsa hiya, a key har daf, a nəkam aha dey. A səpəmərawa bəzay a Yezu zla da ma ndzawa ŋga da Galiley, a kamar meslərey. 56Da walaŋ ata na na, andza Mariya ma Magdala, Mariya may mandza Zak ta Zozef, kaw maya ma bəzey ma Zebedey hay. 57Ma hakwaɗ ana na, ndaw ana daha da Arimatey a zəlamar Zozef, zleley aha, ŋga gawla ma Yezu ana tiyatsa. 58Ndaw ana hana ma daw ka tsakay ma Pilat, ma da tsəhafərawa vagay ma Yezu ana. Arka Pilat ma vəley slam har ma ka vəladəmara. 59Zozef na, ma zəga vagay ana, ma mbəza ta petəle hayna. 60Arka na, ŋga ma pada a tsəvay waya ha, ndaw hay ma zləladəmara da ŋgwa gasah aha, ma bədəgweley beleler ɗuhwa ha ka miya. Arka na, ŋga ma daway təŋga. 61Ka slam ana hana na, Mariya ma Magdala, ta Mariya naŋgar, ma ndza hiya ta tsakay naŋgar soŋ soŋ, ta ɗay tsəvay ana.
A dzaɗama ɗay tsəvay ma Yezu
62Ma medew ana, a dəba ma me ləmey tek ma mesley hay na, baba ɗuhwa na me key kuley ana hay, ta Fariziyeŋ hay, ma dawam ka maslətaha ka tsakay ma Pilat. 63Arka taya ma ləvamar: «Bay, ka mətandar 'ar ba zləna, la da sərafama na ekəɗey na, ndaw me petəney ndaw ana, ŋga na a ləvey zla ŋga ta dey mba na: ‹Da meney ma makar ana na, i da mbəlawa.› 64Vəley slam har tok na, ka dzaɗama ɗay tsəvay ana, kasl ka meney ma makar ana, me wesey na gawla ŋga hay a da səmawa a da hulama vagay ana ba, arka a da ləvəmatar a səkway tok na: ‹Ŋga ka mbəlawa ba da walaŋ ma ndaw ma mətsa na hay.› Arka maləwaɗay ana ŋga na na, a da key na kambəlaɓa, a fəna na tsəfəmey ana sa.» 65Pilat ma ləvatar: «Ndaw me dzeɗey hay na daha, dawam!, ka dzaɗadəmakwar ɗay tsəvay ana andza ma kwar ma wuɗam ana.» 66Arka ndaw a hana na hay ma dawam, ma padəmata sidzew hay ka ɗay tsəvay, ma kam zeheɗ ata ka beleler ana ma ka sərey.
वर्तमान में चयनित:
Matiyew 27: MOF
हाइलाइट
शेयर
कॉपी
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun