HAGONEGAHANI 16
16
Ka Hagara mo Isimaele
1Ka Sarai kaniana o Abaramo ki pe apara kare rârâ. Ngaia ki gomara. Ma ngaia ki nahunia na kere gete tagara tanga. Ngaia ki na kare vurivuri ni Esipito, ka Hagara na atana. 2Vikê ka Sarai ki vi tanga o Abaramo, ki vi: “Na Araha ki pe nakê be apara kare. Gu memêru na kere gete, na kare vurivuri iaku. Vari ngaia ki girara i apara kare tangê.” O Abaramo ki aganaria na tamasinga iana ka Sarai. 3Vikê ka Sarai ki vatea renia ka Hagara manga vi na gete iana. I na matena ngekana o Abaramo ki bani oga me surigi na tangahuri harisi i Kanani. 4O Abaramo ki memêru ka Hagara ma ngaia ki obara. Matena ka Hagara ki girara, vi ngaia ki obara, ngaia ki paro renia ma ki kitakita ka Sarai.
5Tahema ka Sarai ki vi tanga o Abaramo, ki vi: “Igo kanigo katoa ka Hagara ki kitakitê. Inê kanigê vatego renia, ma ki haganega tenia na matena i girara, vi ngaia ki obara igê, ngaia ki kitakitê. Na Araha ke surigerua, vi o ti na hitangikerua kani oto na apanena iana, igo se inê.”
6O Abaramo ki arami, ki vi: “I koro ma. Na kare vurivuri iamu ngekana. Igo ko raha tanga. Gu katoa tanga na anima na tarana go obania.” Vikê ka Sarai ki merongasia ngavê ka Hagara. Tahema ka Hagara ki gava.
7Na angero iana na Araha ki tarahua ka Hagara i tara tanga i Suru igê na ve karu i na masusu. 8Ngaia ki vi tanga ka Hagara, ki vi: “Igo na kare vurivuri iana ka Sarai i he ko râ me igê? I he go arâ igê?”
Ka Hagara ki arami, ki vi: “Inê kê gava pania ka Sarai, i raha tangê.
9Na angero ki vi: “Go aporo i pasina ma ko têtê viteana.” 10Ma ngaia ki vi nikâ: “Inê be katora na raraha iamu ke rako ngavê ma ke bara tanga ta na enoni, vige tomanira.
11Igo ko obara ma ko page apara na kare mane.
Go hêtana renia vi o Isimaele,
suria na Araha ki rongoa na mamasiganiha iamu.
12O karemu ki page maratorana na tonki i vasiga.
Ngaia ki page merongasira na enoni hato
ma na enoni hato ka page merongasia nogana.
Ngaia ki page sikasika tenira na me iana.”
13Ka Hagara ki kato ki vi: “I monari, gê bâsia God, ma kê tahitahi mênga hanana vigê hagarongora na enoni renia.” Vikê ngaia ki hêtana na Araha i tamasi tanga, vi ‘God i bâsiê.’ 14Tahema na enoni ka hêtana na ve karu i berarogaterua i Katesi me Berete, vi ‘Na ve karu iana na ani i bâsiê.’
15Ka Hagara ki apara na kare mane tanga o Abaramo. Mo Abaramo ki hêtana vi o Isimaele. 16Igê na matena ngekana o Abaramo ki tonga na harisi 82 iana.
वर्तमान में चयनित:
HAGONEGAHANI 16: KCB
हाइलाइट
शेयर
कॉपी
Want to have your highlights saved across all your devices? Sign up or sign in
© 2011 Bible Society of the South Pacific