HAGONEGAHANI 4
4
O Kaini mo Abele
1O Atama ki hagaobaraga ka Eva. Ngaia ki apara na kare mane, ma ki vi: “Suria God ki tamaniê, tahema inê kê apara na kere mane. Ngaia ki hêtana vi o Kaini. 2I muri me ngaia ki apara ta na kere mane nikâ, o Abele na atana. O Abele ki bâbâsurira na sipi. O Kaini ki tagarahigi na mu. 3I murini tani na mateni o Kaini ki tora tani na ngêra tenia na mu iana ma ki vogasia na Araha renigi. 4O Abele nikâ ki vogasia na Araha. Ngaia ki nahuira na kareta hagenago na sipi ma ki vogasia na Araha renigi na agua koro ngavê na hasigota. Na Araha ki obakoro renia o Abele henia na vogasiha iana. 5Ma ngaia ki usitenia o Kaini henia na vogasiha iana. O Kaini ki mangariaga ma ki obaera ngavê. 6Na Araha ki hagatea o Kaini, ki vi: “Renia ta ko mangariaga? Renia ta ko obaera? 7Manga gu katoa na tarana ge oto, igo ku obakoro. Ma ki suria igo ko katoa na tarana i era, na tasi ki gamorahigo, hanana vi ranguigo. Na eraha ki tenia vi angarigo ma ki tuguhigo vigo rêrapusia.” 8Hemuri o Kaini ki vi tanga o Abele o vesina, ki vi: “Nika, garu râ i bemu.” Matena garu tariha i ngekana, o Kaini ki tarobusia o vesina ma ki nahuia ki me.
9Na Araha ki hagatea o Kaini, ki vi: “I he o vesimu o Abele?” Ngaia ki arami, ki vi: “Inê kê pe hagarea. I tuguhiê vari vigê bâbâsuria o vesiku iê?”
10Ma na Araha ki vi: “Tanu hega go katoa na tarana i era ngavê vikana? Gu rongo! Na gapuna o vesimu i ano ki avarasiê, vigê naka na siva tangago. 11Tahema igo ko oga igê na hagaitangiha. Igo ko hato tenia na mako go tagara igê, suria i nugua na gapuna o vesimu. Na mako ki manganga ki unumia na gapuna, matena go nahuia ki me. 12Naka ma go tagarahigi igê na mu, i asa vigu tarahugi igê na ngêra. Igo ki hato, vigu page nahunia nikâ na agua hanana vigu gâga tonge igê. Igo ko page hutungia na maveta.”
13Mo Kaini ki vi tanga na Araha, ki vi: “Na hagaitangiha ngekê ki bara ngavê tangê. 14Igo ko tarigeniê pania na mako ma ko usiteniê, vi ve oga i maamu. I mareha na agua tangê hanana ve gâga igê. Inê kê hutungia ma na maveta. Na anima na enoni i tarahuê ki page nahuiê kê meme.”
15Ma na Araha ki arami, ki vi: “Mareha! Manga ta na enoni ma ki nahuigo ko meme, na rahirumu ka meme na vere pi.” Tahema God ki naka na segesegeha i parina o Kaini, hanana vi siana na anima na enoni ki nahuia o Kaini ki meme, matena i tarahua. 16Mo Kaini ki hura tenia na Araha ma ki oga igê na agua ga hêtana vi “Hotonga”, i na apanena akê i Etene.
Na apaparaha iana o Kaini
17O Kaini ki hagaobaraga kaniana, ma ngaia ki apara na kare mane, o Henoki na atana. O Kaini ki tagarahia na hinua raha ma ki hêtana vi Henoki renia na atana o karena. 18O Henoki ki apara o Irati. O Irati ki apara o Megiaele. O Megiaele ki apara o Metusaele. O Metusaele ki apara o Lameki. 19O Lameki ki herogarerua ka Ata ma ka Sila. 20Ka Ata ki apara o Jabale. O Jabale ki na êvarita na enoni ga bâsurira na togoha ma ka ogasigi na ruma na gahu. 21O Jubale o vesina ki na êvarita na enoni ga êhihi ma ka tarugigi na gita. 22Ka Sila ki apara o Tubale-Kaini. O Tubale-Kaini ki na êvarita na enoni ga tagarahigi na marâ renigi na kapa ma na aiani. Kesina o Tubale-Kaini kani ka Naama. 23O Lameki ki vi tangarerua kaniana, ki vi:
“Ka Ata ma ka Sila muru rongo.
Inê kê nahuia na mane na gapu haoru ki me,
suria i haganega bême tangê.
24Na rahiruna o Kaini ka meme na vere pi.
Na rahiruku inê ka meme na tangahuru gi pi matara gi pi.”
O Seti mo Enosi
25O Atama ki hagaobaraga ka Eva kaniana. Ma ka Eva ki apara nikâ ta na kare mane. Ngaia ki vi: “God ki vateê na kere mane urusina o Abele, o Kaini ki nahuia ki me. Tahema ngaia ki hêtana vi o Seti. 26O Seti ki apara na kere mane ma ki hêtana vi o Enosi. Haganega tenia na matena ngekana na enoni ka rahesia na atana apuna na Araha.
वर्तमान में चयनित:
HAGONEGAHANI 4: KCB
हाइलाइट
शेयर
कॉपी
Want to have your highlights saved across all your devices? Sign up or sign in
© 2011 Bible Society of the South Pacific