Mixtec, Northern Tlaxiaco: Tutu ii - Kaꞌan ia Dios nuu ndiꞌi ñayiu New Testament+

Tutu ii - Kaꞌan ia Dios nuu ndiꞌi ñayiu

Te nuu ni yaꞌa ndiꞌi yun, te ni yaꞌa Jesús inka jioo ndute mar Galilea ja suni nani Tiberias. Te ka ndikin ña kuakuaꞌa ñayiu jin ya, chi ni ka jini tniuu naꞌnu ni saꞌa ya jin ñayiu ka kuꞌu. Yun te ni kakuei Jesús in nuu yuku, te yun ni ka junkoo ya jin tee ka skuaꞌa jin ya. Te saa chi ja ni kuyatni viko pascua ñayiu judio. Te nuu ni ndanenuu Jesús, te ni jini ya ja kuaꞌankuei kuakuaꞌa ñayiu nuu oo ya, te jiñaꞌa ya nuu Felipe:
―¿Ndenu vi niꞌo xtaa vi kiꞌon ja vi kaa ndiꞌi ñayiu yaꞌa? ―jiñaꞌa ya.
Su yaꞌa ni kaꞌan Jesús ja koto tnuni ña ya, chi ja jini guaꞌa maa ya nagua kuu ja saꞌa ya. Yun te jiñaꞌa Felipe:
―Ni yaꞌu uu ciento kiuu ja satniuo ma kenta vi kiꞌon ja vi kuñaꞌo in taꞌu in taꞌu ja vi kaa ñayiu yaꞌa ―jiñaꞌa de.
Te jiñaꞌa Andrés, inka tee ka skuaꞌa jin ya, ñani Simón Pedro:
―Yaꞌa oo in suchi lule ja nei uꞌun xtaa cebada vi uu chiaka kueli, ¿su nagua naꞌa kuu yaꞌa, te kuakuaꞌa ñayiu ka kuu? ―jiñaꞌa de.
Yun te jiñaꞌa Jesús:
―Vi kuñaꞌa ni ñayiu jian na vi junkoi.
Te oo kuakuaꞌa yuku nuu ka oi yun, te ni ka junkoo vaa ndee uꞌun mil teyii. Te ni tnii Jesús xtaa yun, te ni ndakuantaꞌu ya nuu ia Dios, te ni jaꞌnde ya ni jiñaꞌa ya nuu tee ka skuaꞌa jin ya, te tee yun ni ka skaka nuu ñayiu ka nukoo yun. Te suni saa ni ni saꞌa ya jin chiaka, te ni ka jai ndee nagua kuaꞌa ka kuini in in mai. Te nuu ni ka ndutu chii ñayiu yun, te jiñaꞌa ya nuu tee ka skuaꞌa jin ya:
―Vi ndaxtutu ni yuꞌu xtaa ja ni ndoo yaꞌa nagua ja ma junaa ni joo luluu ―jiñaꞌa ya.
Te nuu ni ka ndaxtutu de, te ni ka chitu de uxi uu chika yuꞌu xtaa ja ni ndoo nuu uꞌun xtaa cebada ja ni ka jaa ñayiu yun. Te nuu ni ka jini ñayiu yun tniuu kaꞌnu ni saꞌa Jesús, te ka kachi:
―Tee yaꞌa kuu ndija ndaa kuiti tee ndakani tnoꞌo ia Dios ja kii nuu ñuyiu ―ka kachi.
Su ni jini Jesús ja vi tenini ña ñayiu vi tnaa ñai ja kokuu ya rey, te ni kee maintnoꞌo ni ya kuaꞌan ya in yuku.

Te nuu ni kunee, te ni jaꞌankuei tee ka skuaꞌa jin ya yuꞌu ndute mar. Te ni kekuei de nuu in barco, te kuaꞌankuei de nuu ndute mar ichi ñuu Capernaúm. Te ja makunee, te tu na Jesús ndenta ja vi ndanitnaꞌa ya jin de. Te ni jinkondee jiondiso ndiso ni ka nuu ndute mar yun ja siun ni junkiꞌi in tachi niꞌi ndevaꞌa. Te nuu ja ni kuu vaa ndee uꞌun kilómetro ka skaka de barco nuu ndute yun, te ni ka jini de Jesús jika ya siki ndute mar, te majuntnaꞌa ya barco yun, te ni ka yuꞌu de. Su jiñaꞌa ya:
―Ma vi koyuꞌu ni, chi maa san kuu.
Yun te sii ini ndevaꞌa ni ka jantaꞌu ña de, te ni ndaa ya nuu barco yun. Te vini ni ndejioo nuu ñuꞌu yuꞌu ndute nuu ka kuini ya kiꞌinkuei ya.

Yun te inka kiuu tnee suaꞌa, te ni ka jini ñayiu ka oo inka jioo yuꞌu ndute mar ja tu na inka barco oo, chi invaa ni oo, te tu ni kiuu Jesús nuu barco yun, chi maa ni tee ka skuaꞌa jin ya kuaꞌankuei. Su sava ka barco ni jinokuei ndee Tiberias, yatni nuu ni ka jaa ñayiu xtaa na ni ndakuantaꞌu Jitoꞌo Jesús nuu ia Dios, te ni jaꞌnde ya. Su nuu ni ka jini ñayiu yun ja tu na Jesús oo yun, ni tee ka skuaꞌa jin ya, te ni ndakuei nuu barcoi, te kuaꞌankuei ñuu Capernaúm ka ndandukui Jesús.

Te nuu ni ka nukuꞌun ñai inka jioo yuꞌu ndute mar, te ka jiñaꞌi:
―Mastru, ¿na ore ni kenta ni yaꞌa?
Te jiñaꞌa Jesús:
―Kaꞌan ndandaa ndija san ja ka ndanduku ña ni, su masu ja ni ka jini ni tniuu kaꞌnu ni saꞌa san, chi chia ni ka jaa ni xtaa guaa ndee ni ka ndutu chii ni. Ma vi satniuu ni nuu kee ja vi kaa ni ndee in uu ni kiuu te ndiꞌi, chi vi satniuu ni nuu kee ja siun ni vi kokaa ni ja vi koteku ni nikuii nikani. Chi yaꞌa kuu ja taa Seꞌe Teyii ja vi kokaa ni, chi yun kuu ja ni chitniuu ña maa Tata Dios jin san ―jiñaꞌa ya.
Yun te ka jiñaꞌa de:
―¿Naxa vi saꞌa san ja kuu vi skunkuu san tniuu kuini ia Dios ja vi saꞌa san? ―ka jiñaꞌa de.
Yun te jiñaꞌa Jesús:
―Tniuu ia Dios kuu yaꞌa, ja vi kandija ña ni jin san ja kuu san ia ni tetniuu maa ya.
Yun te ka jiñaꞌa de:
―¿Nagua kuu jakaꞌnu saꞌa ni ja vi kuni san, te vi kandija ña san? ¿Te na tniuu kuu ja saꞌa ni? Ndi tata veluo, chi ni ka ojaa de maná nuu ñuꞌu teꞌa, nagua yoso nuu tutu ii: “Ni jiñaꞌa de xtaa oo ndee andivi ni ka jaa ñayiu” ―ka jiñaꞌa de.
Te jiñaꞌa Jesús:
―Kaꞌan ndandaa ndija san, ja masu Moisés kuu tee ni jiñaꞌa xtaa oo ndee andivi ja ni ka jaa ñayiu, chi maa Tata san kuu ia taa xtaa ndaa ndija ja vaji ndee andivi. Chi xtaa maa Dios kuu ia ni kuun ndee andivi, te jiñaꞌa ya ja ka teku ñayiu ñuyiu ―jiñaꞌa ya.
Yun te ka jiñaꞌa de:
―Siun ni kotaa ni xtaa yun ja na vi kokaa san.
Te jiñaꞌa Jesús:
―Maa san kuu xtaa ja taa ja teku. Te na in kikuei ja vi koo jin san, te ma vi kokokin saꞌun kai, te na in kandija ña jin san, te ma koyichi saꞌun kai. Su nagua ja ni kaꞌan san ja visi ni ka jini ña ni, su tu ka kandija ña ni. Ndiꞌi ñayiu ni taa maa Tata Dios kikuei ja vi koo jin san, te na in vaji nuu san, te ma skunu san jin ja kiꞌin. Chi ndee andivi makuun san, su masu ja saꞌa san nagua kuini maa san, chi ja saꞌa san nagua kuini maa ia ni tetniuu ña jin san. Te yaꞌa kuu ja kuini Tata Dios, ia ni tetniuu ña jin san, ja ndiꞌi ñayiu ni taa ya, ma skunaa san ni in, chi ndaxteku san jin kiuu sandiꞌi. Te yaꞌa kuu ja kuini ia ni tetniuu ña jin san, ja ndiꞌi ñayiu ka jini ña jin san ja kuu san Seꞌe ya, te ka kandija ñai, vi niꞌi ja vi kotekui nikuii nikani, chi ndaxteku san jin kiuu sandiꞌi ―jiñaꞌa ya.
Yun te ni ka jinkondee tee ka kuu nijaꞌnu nuu ñayiu judio, ka kaꞌan kueꞌe de siki Jesús, chi ni kachi ya: “Maa san kuu xtaa ja makuun ndee andivi”. Te ka kachi de:
―¿A masu tee yaꞌa kuu Jesús, seyii José? Te ja ka jinio tata de vi nana de, ¿te nau ja kaꞌan tee yaꞌa: “Ndee andivi makuun san vaji san”? ―ka kachi de.
Yun te jiñaꞌa Jesús:
―Ma vi kokaꞌan kueꞌe ni siki san. Chi ni in ñayiu ma kuu kikuei ja vi koi jin san nuu ja ma kana ña maa Tata san, ia ni tetniuu ña jin san, te ndaxteku san jin kiuu sandiꞌi. Chi yoso nuu tutu ii ja ni ka tee tee ni ka ndakani tnoꞌo ia Dios ndee janaꞌa nuu kaꞌan suaꞌa: “Ia Dios kaxtnoꞌo nuu ndiꞌi ñayiu”. Saa te ndiꞌi ñayiu ja ni ka onini tnoꞌo Tata Dios, te ni ka kutuꞌai tnoꞌo kaxtnoꞌo ya, te vajikuei ja vi koi jin san. Su ni in ñayiu tu na in jini nui Tata Dios, chi maintnoꞌo ia vaji nuu maa Dios, ia yaꞌa kuu ia jini ña jin maa Tata Dios. Te kaꞌan ndandaa ndija san ja na in kandija ña jin san, te kotekui nikuii nikani ―jiñaꞌa ya.
’Maa san kuu xtaa ja taa ja teku. Te ndi tata velu ni, ni ka jaa maná ja kuu xtaa ni kuun ndee andivi nuu ñuꞌu teꞌa, su ni ka jiꞌi. Te xtaa ja taa ja teku ja kaꞌan san yaꞌa kuu ia ja makuun ndee andivi, nagua ja na ñayiu na kaa xtaa yaꞌa, te ma kui. Maa san kuu xtaa taa ja teku ja makuun ndee andivi, te na ñayiu kaa xtaa yaꞌa, te kotekui nikuii nikani. Te xtaa ja kuñaꞌa san kuu yiki kuñu san, te kuñaꞌa san nagua ja vi koteku ñayiu ñuyiu ―jiñaꞌa ya.
Yun te ni ka jinkondee tee judio ka tee tnaꞌa maa de, te ka kachi de:
―¿Naxa kuu taa tee yaꞌa yiki kuñu de ja vi kao? ―ka kachi de.
Te jiñaꞌa Jesús:
―Kaꞌan ndandaa ndija san, nuu ja ma vi kaa ni yiki kuñu Seꞌe Teyii, vi ma vi koꞌo ni niñi ya, te ma vi koteku ni. Chi na in jaa yiki kuñu san vi jiꞌi niñi san, te kotekui nikuii nikani, te ndaxteku san jin kiuu sandiꞌi. Chi yiki kuñu san kuu jaguaꞌa ndija ja vi kaa ñayiu, te niñi san kuu jaguaꞌa ndija ja vi koꞌi. Te na in jaa yiki kuñu san vi jiꞌi niñi san, te oo ñayiu yun jin san vi oo san jin. Nagua ni tetniuu ña Tata Dios, ia teku, te teku maa san jin maꞌñu sagua Tata Dios, te suni saa ni na in na kaa ña jin san, te suni kotekui jin maꞌñu sagua san. Te maa san kuu xtaa ja ni kuun ndee andivi, su masu nagua ni ka jaa ndi tata velu ni maná, te ni ka jiꞌi de, chi na in kaa xtaa yaꞌa, te kotekui nikuii nikani ―jiñaꞌa ya.
Tnoꞌo yaꞌa ni kaꞌan Jesús nuu ni kaxtnoꞌo ya nuu ñayiu veꞌe ii sinagoga ja oo ñuu Capernaúm.

Yun te nuu ni ka onini ndiꞌi ñayiu ka skuaꞌa jin Jesús tnoꞌo ni kaxtnoꞌo ya, te ka kachi:
―Ndakui ndevaꞌa tnoꞌo yaꞌa, ¿na in kundee ini konini? ―ka kachi.
Te ni jini maa Jesús ja vi ndee maa ñayiu ka skuaꞌa jin ya ka kaꞌan kueꞌe siki tnoꞌo ni kaꞌan ya, te jiñaꞌa ya:
―¿A ka tunini ni tnoꞌo ni kaꞌan san yaꞌa? Te ¿naxa vi saꞌa ni nuu saa, nuu ja na vi kuni ni Seꞌe Teyii ja mandaa ya nuu ni oo ya ndee jaxtnañuꞌu? Te Espíritu kuu ia taa ja tekuo, te yiki kuñuo, chi tu saꞌun nagua niꞌo jin. Te tnoꞌo ja ni kaꞌan san yaꞌa kuu tnoꞌo ja vaji nuu maa Espíritu ia Dios ja taa ja vi kotekuo nikuii nikani. Su ka oo sava maa ni ja tu ka kandija ni ―jiñaꞌa ya. Chi ja jini Jesús ndee jaxtnañuꞌu ndee ñayiu ka kuu ja tu ka kandija, te ndee tee kuu ja xtuu ña nuu tee ka netniuu. Te jiñaꞌa ka ya:
―Yun guaa ja ni kaꞌan san ja ni in ñayiu ma kuu kikuei ja vi koo jin san nuu ja ma chindee chituu ña maa Tata Dios ―jiñaꞌa ya.
Te ndee kiuu yun ni ka kujioo kuakuaꞌa ñayiu ni ka oskuaꞌa jin Jesús, te tu ni ka ondikin ka ñai jin ya. Yun te jiñaꞌa Jesús nuu ndi uxi uu tee ka skuaꞌa jin ya:
―¿A suni ka kuini ni ja vi kujioo ni? ―jiñaꞌa ya.
Yun te jiñaꞌa Simón Pedro:
―Jitoꞌo, ¿na xiin nuu kiꞌinkuei san? Te maa ni guaa nevaꞌa tnoꞌo ja taa ja vi koteku san nikuii nikani. Te sein, chi ka kandija ña san vi ka jini san ja maa ni kuu ia ni tetniuu Dios vi Seꞌe maa ia Dios teku ―jiñaꞌa de.
Te jiñaꞌa Jesús:
―Maa san ni kaji ndi uxi uu ni, su in maa ni kuu ni na kuinio in tachi ―jiñaꞌa ya. Ni kaꞌan ya siki Judas Iscariote, seyii Simón, chi tee yaꞌa kuu tee oo neꞌu ndi uxi uu de ja xtuu ña de jin Jesús nuu tee ka netniuu.

Slušajte San Juan 6