Chorote, Iyojwa’ja: Nuevo Testamento Chorote Iyojwa'ja 1997

Texto Nuevo Testamento: Chorote, Iyojwa’ja © Sociedad Bíblicas Unidas 1997 www.sba.org.ar/web/ Grabación de Chorote, Iyojwa’ja ℗ 2021 Hosanna

Sinia' Jlamtis 1997

Nuevo Testamento en Chorote © Sociedades Biblicas Unidas, 1997.

Jesús ti paja'ni wat ape'e yamaja, iniuyits'i siojowa isi'il yiji jlaja Galilea. 'Yina je iyo'ni ka ijno 'niji yi'i jlaja Judea, lapakawo siojopo Judíojos iyotaja ka inlanis. Jlampa je tojwa'a siojokia jiliakijnieye japo Judíojos, ti kiajatak'i'ni niwa najkapis ti iyoyetajas jlopalikisie' ojwe, ji'yijnis iyonisi'ne 'ate:
—'Nak ká a'yi'nina'a, majna'a 'niji yi'i jana Judea, ja'nakayeyijna'a ti ja'we'en pet siunapo ya'm ajak'i siunie jiwo. I'niojie'e ni ti iyojonk'iye ka ti'wena, je inijweki siunie iyo kanwo. Jlam 'esiji ka wikie'eyeyi ka a'wenkijna'm siunapo yi' ape'e 'ni ajnat, entipa jiwoyeyi.
Ji'yijnis iyone ja Jesús ti, lapakawo ti kia'iyo 'yakakiuyis. Jesús isiujlie'ne pet ti iyo'ate:
—Je yijliyi'ijyi siojona ika jlomaye, jlam'ne ti asa'am jijwelaye ka 'esieyiji ka ne'yi japa ka jlomaye. Siunapo tajle ni ajnat je ne'wa'ase'm, kajeyepa ti lajk'ipa ka intajlat'ase'm, yo'otie ti ya'am akajanit'i ape'e siunie je 'es iyoyisi, it'imina ti ne'wajask'i'm. Maye'ni jiwekie'e asa'am, ja ke iyik 'yaka je yijliyi'ijyi siojona 'yaka jloma.
Yiyi siukia iyo ja Jesús, sek 'wanjle'e'ne yi'i jlaja Galilea. Jlampa yama'ni japo ji'yijnis ti ijioyisi jakia inlakijnieye. Jiwekie'eja pet ti ya'am ja Jesús, 'wenajliyi ki iyo ti jwamjla'a ti inijwekia'm japo i'nio'. Siojopo jika anechiyasas japo Judíojos iyoyisijyin'ni. Iyoyis'ni 'ate ti ti'yasanisi'ni:
—¿Tepa t'e yi'i?
Jle' po' wat ja Jesús, ti intaj totieje. Po' japo iyo'ate ti ijwilis, “I'nioyi jaka.” Po' japo iyo'ate, “Je 'es, 'yakajmank'iji'n napo i'nio'.”
Lapakawo ti je ijwiyisie japo jika anechiyasas, it'imina'ne ti inijwekisi ti jitiej ijiutisie.

Jikiowe'eyi jakia inlakijnieye ti Jesús ijioye kiajwe japa 'najla'wet, ti taka'neyasa'n. Jlam jnots'iniji japo Judíojos ti ipi'yayis siukia iyo ti tamti. Iyoyis'ne 'ate:
—¿Yot'iyi'ni ti 'yijen jwajla'aja, jejie'e ti'wena ka ini'neyasa'n?
Jesús isiujlie'ne japo ti iyo'ate:
—Je ya'am ka intalk'i siunie aka'neyasane, tajle jla'am siunie sijliu'. Siuti ja poye siunie janwo ni Inia' yi poliyi iyotaja ka inwo, sek jantaj'le ni i'nio' ti ja 'najane pa janwone, siuti ja ijiatayi ti jantalk'i, ni'ne ka intal Siniayi. Siunie i'nio' iyojonk'iye ka tonitie je k'iejliyi paka inwo, najata jla'am iyo siunie tajle. Jlam'ne pet siunie ti iyojonk'iye ka tonitie siunie i'nio' sijliu', nak ijiatk'i siunie iyo jlamtikie'; ka ne ts'ijiye ka jla'am iwo siunie taka'neyasane.
“¿Je pak Moisés ti iwi'nase'm ni jika'neyasajnaye? 'Yina tiwet'ianaja ka injwanjli wata'a paka ink'iuye. ¿Yot'iyi'ni ti jiwoye'ijyi ka siliana?”
Iyo'ne 'ate japo i'nio' ti isiujlie:
—¡Ataj je 'es! ¿Tempa iyotaja ka inla'an?
Jesús iyo'ne 'ate:
—Ijwienjliyiji jiwekie'e siukia awoyi ti eniji siojona jloma ti i'nio 'wanjlijyi'n ti kawoyejliyit'ipi pa ti ji'wena'.'Yejne'n siu'nie jayoyi, siupa Moisés t'ipi ijiate ti 'yijie'na'm ka woyeyi siunie ti jiwa tejwak'i pa, (jlam'ne ki iyo ti je jla'am ka intajle, 'wenajlit'iyijpe jla'am ti papok tajle siupapo aska kijilas t'ipi jike' iyont'iyisijpe). 'Wanjliyi ka janakaye siojona jloma ti i'nio 'wanjlijyi'n, je woyejliyi ti jlenayiji ti kiak jiwonayi napo kia'lis ti t'isie'n jiwa jlewajak'i. Jlam'ne pet ti asa'am, ti je woyeyi ka akama'yi ape'e, naka iyo ni Moisés jika'neyasajnaye, sekyi'i ti je woyeyi ka akamaye'yi ilia'm napo kia'lis ti kiak jiwonayi ti t'isienis jijwa'al jlewaja'yi ti ijniujliejam'ni janak jloma ti i'nio 'wanjlijyi'n. 'Yina jak je iyoyiji ka je iyoyi 'ate: ¿yot'iyi'ni jiat'eje ti jitiajlatak'i'm ti ajwajiet jaka i'nio' wikie'eyi jawa t'ajwes iyo, jakiak jloma ti i'nio 'wanjlijyi'n? Ijiatjliyi, je 'es ka 'yenayi napo as'lejwas siupa jloniye iyo ti ji'wena' siuniwa yi kisie'e, 'yina siuti jawo naka 'otatiji, 'wena ja ke 'asajiap'e siunie ti ijiate ti tijnajyi.

Sekyi'i siojopo sek ji'wet'e, siujlieja ajnat Jerusalén, po' japo iyo'ate ti ini'yasis:
—¿Je 'naka 'ni tiwoktajyin'ni ka tiliana? Siusie, 'nak p'an yi'i takamtijniene napo i'nio', entip'an ti lajk'ipa ka in'yikisane. ¿Ent'a 'yijenayi pi iyone napo anechiyasas ti jlam ti Injwajieti ti Sinia' jijliujwanik? Kasts'ajane pi awonaja siunie taj'le. Jlajmiliet pet siunie Sinia' jijliujwanik ka 'nesta, ja lajak'i pi i'nioye ka 'najane pa janwone siupi jantaj'le.
Jesús taka'neyasa'n kiajwe jlaja 'najla'wet. 'Yakets'ijiap ti tamti ti ipi'yayeyi japo i'nio' ti kia'iyo:
—¿Intant'iejap'ank'i, jla'yi ti 'najanap'ane siunie ataj'le? 'Yejne'n, siuti ana'am je ya'am ka intalk'i, 'wenajliyi jla'am siunie sijliu', ijiate jla'am ti 'yu'we napo i'nio' ka je inkakiuyis, naka ni je intant'iejayi. Sitiant'ieje ya'am kajeyepa ti atajle, jla'yi ti jla'am ti sijliu'.
Siojopo i'nio' ti ipi'yayisie, iyoyetajasi ka inkimits'i, 'yina 'yaka je yijliyi'ijyi siupa jlaj yi'i, it'imina'ne ti lajk'ipa ka jikiowe int'onitie ka poye pa ka k'iejliyeyi paka inwone. Je pini'ne japo ti je 'yakakiuyis, iyoyis'ne 'ate:
—Siuka 'nest'inie'e pi Injwajieti ti Sinia' jijliujwanik, ¿jot'e ka kia'iwo, ni'ne ka inkamna'a ape'e siunie iyo niwa i'winki'n?

Siojopo Fariséojos ti 'yijenayisi pi iyone siukia tiwonaja ti intaj totieje, japoka 'ne'eje jla'am ti ijliu' papo tokis siojopo i'yena jlaja 'najla'wet, siu'neje japo pa'yijis jika anechiyasas, ka inkimits'i ja Jesús.
Sekyi'i ja Jesús iyone'ne 'ate japoka:
— Ja ke sipaj asap, jayik'iji ti jayapili siunie i'nio' sijliu'. Ja siwoyejyin'ni, 'yina ja ke si'wena', kajeyepa ti ja ke 'najanayi pi janiwonayi ka joyeyi siunie jayi'i.
Sekyi'i'ne japo jika anechiyasas japo Judíojos iyoyis'ne 'ate ti ini'yasis:
—¿Tepat'e jajnojwi, ti ijwi'il ja ke i'wina? ¿Ent'a napok jajnoyi si'lijwas 'neje yajme'n ape'e 'ni ajnat ti je 'wet, ni'ne ka napokaye siunapo je 'esijiyi, je iliyi ni jike', ti ja'neyasajne'n? ¿Tepat'e iyo ti kia'iyo, “Ja siwoyejyin'ni, 'yina ja ke si'wena', kajeyepa ti ja ke 'najanayi pi janiwonayi ka joyeyi siunie jayi'i”?

Siukia jloma ti jlajayi jakiak inlakijnieye, jakiak siojokia jloma ti wuj, Jesús takasit'ne ti kiak iyoyeyi ti 'yakets'ijiap ti tamti:
—Siunie i'nio' ti janki'im, ijnoyek'inie'e, in'yayena'a i'niati. Siunie iyo niwa inamtis ti tip'esina t'ipi ti iyo'ate, “Siunie i'nio' ti ja ke sakakiu, siuniwa tewukis ti tajle ni i'niat ti iyo in'wasankiyeja' intajlajamna'a ni jitiowe.”
Jlam'ne papok ijwi'il ja Jesús siupapo ja ke inkakiu, ti ja tekiajlaja siojopa Sinia' jikimet ti 'es. 'Yina ti je 'nesjli'ijyi siojopa Sinia' jikimet ti 'es lapakawo ti je yijliyi'ijyi siojopa jloma ti ja tiwunitie ja Jesús.

Po' japo iyo'ate ti ipi'yayisie ja Jesús siukia iyo ti tamti:
—Yaka ijiatat'ijyi ti 'naka 'ni injwejlanik jiwo ti tijwela'ni ja'nes.
Ijia japo iyo'ate:
—Siunie Injwajieti ti Sinia' jijliujwanik, 'naka.
'Yina ijia japo iyo'ate:
—Yaka je jat'inie'e, ¿yot'iyi'ni ka intajla'm jana Galilea siupa Injwajieti ti Sinia' jijliujwanik? Ijwiljie'e niwa inamtis pak Sinia' jiliujwanik jantajla'm papo David, jla'yi ti ja ji'weta'a jana Belén, isi' siojona ji'wet t'ipi pi David.
'Yina Jesús jla'am ti it'imina japo i'nio' ti tejets'i wita'am. Po' japo iyotaja ka inkimits'i ja Jesús ka i'notists'e a'laja'm, 'yina lajk'i'ne japo ti paja ka inkimits'i.

Siojopo tokis i'yena jlaja 'najla'wet yapilisi siojo yi'i japo pa'yijis jika anechiyasas siu'neje japo Fariséojos. I'yasayisi'n japo tokis ti iyo'ate:
—¿Yot'iyi'ni ti je niamayi?
Iyo'ne 'ate japo tokis ti isiujlie:
—¡Lajk'ipa ka kia'iwo puwa ka jlamtisie', siunie iyo ti tamti!
Iyo'ne 'ate japo Fariséojos, ti ipi'yayeyis ti kia'iyo:
—¿Yot'iyi'ni, kiak p'an jiwoyeyi pet jikinieyi siunie iyo? Lapakawo ti inkajlajyi. ¿Pot'e jiat'eje napo saka anechiyasas ti je 'yakakiu, ni'ne ka napokaye napo Fariséojos? Siunapo i'nio' ti je itiant'iejesi siuniwa inamtis t'ipi tajle pi Moisés, jiwet'ia japoye.
Sekyi'i ja Nicodemo, Fariseo 'neje, siojo ijioyi ja Jesús ti ajnaj, iyone'ne 'ate papo ijia:
—Iyo'ate siuniwa inamtis tajle pi Moisés t'ipi, “Siuti je pe'yajli'ijyi siupi jitis iyo ni i'nio', ke inesi'lie'yi ka asa'a.”
Iyo'ne 'ate ti isiujlisie:
—¿Galilea jlelep'a'na'm 'neje? 'Ye'en niwa inamtis, ni'neyasane. Ja'we'en ti lajk'ipa injwejlanik jiwoye ka intajla'm jana Galilea.

[Sekyi'i japo i'nio' ijwienjlik'i'ni ti yapilie'ni.

Slušajte Juan 7