Zãa 17
17
Yesu wabikɛa a Maewa
1Yesu yãpi oa gbɛa à wɛsɛ̀ musu à mɛ̀: Baa, a gɔɔ kà. Ǹ n Nɛ tɔbɔ, n Nɛ i n tɔbɔ. 2Ń tò má iko vĩ gbɛ̃piiwa, kɛ́ mà wɛ̃ni laasai kpá gbɛ̃́ pɔ ń kpàaɔwa pii. 3N Lua mɛndona sĩande ń mapi Yesu Kilisi pɔ ń zĩ̀o dɔ̃a mɛ́ wɛ̃ni laasai ũ. 4Ma n tɔbɔ̀ tɔɔlɛ, zĩ pɔ ń dàmɛɛ mà kɛ má làa. 5Baa, gawi kpaa n kĩi sa, lá ń kpàa n kĩi zadɔ̃ dũnia kuo.
6Gbɛ̃́ pɔ n ń sɛ́ dũniau n ń kpáaɔ, má tò aa n dɔ̃. N pɔɔnɛ, ɔ̃ n ń kpáa. Aa n yã kũa, 7aa dɔ̃̀ sa kɛ́ yã pɔ ń dàmɛɛ bɔ̀ n kĩi piiɛ. 8Ma yã pɔ ń dàmɛɛ dànɛ́. Aa sì, ɔ̃ aa dɔ̃̀ kɛ́ ma bɔ n kĩiɛ sĩana. Aa sì kɛ́ mmɛ n ma zĩ. 9Malɛ wabikɛnɛ́, i kɛ dũnia malɛ kɛɛ̀o, sema gbɛ̃́ pɔ n ń kpáapiɔ, asa n pɔɔnɛ. 10Ma pɔɔá n pɔɔnɛ pii, n pɔɔá ma pɔɔnɛ pii. Malɛ tɔbɔ gbɛ̃́piɔ yãmusu. 11Malɛ su n kĩi, máɔ ku dũniau lɔo, ãma ampiɔ aaɔ ku dũniau. Baa Kuaadoade, ǹ ń dɔ̃́a ń n tɔ́ pɔ ń kpàmɛɛ gbãao, kɛ́ aa gɔ̃ mɛdoũ láwáwa. 12Gɔɔ pɔ má kuńnɔ, ma ń dɔ̃́a ń tɔ́ pɔ ń kpàmɛɛpi gbãao. Má ń kũa, ɔ̃ an gbɛ̃e i vũaao, mɛ́ i kɛ gbɛ̃́ pɔ mipɛ̀ kaalɛwa kɛ́ n yã e papa yãi baasio.#Soũ 41.10; Zãa 13.18
13Tiasa malɛ su n kĩi. Ma yãpiɔ ò dũniau, kɛ́ an pɔ àɔ na lá ma pɔ nawa, i pɛɛmáɛ. 14Ma n yã dànɛ́, ɔ̃ dũnia zàńgu, kɛ́ dũnia gbɛ̃́ɔn ń ũo lámawa. 15Malɛ wabikɛma, i kɛ kɛ́ ǹ ń bɔ dũniau no, kɛ́ ǹ kaedańzi Setãu yãmusuɛ. 16Dũnia gbɛ̃́ɔn ń ũo lan mawa. 17To an kua àɔ adoa ń sĩana gbãao, n yã mɛ́ sĩanapi ũ. 18Lá n ma zĩ dũniau, màa ma ń zĩ́ dũniau sɔ̃. 19Malɛ azĩa kpama an yãi, kɛ́ aa gɔ̃ n gbɛ̃́ɔ ũ sĩana.
20I kɛ malɛ wabikɛnɛ́ ńdo no, ń gbɛ̃́ pɔ aa ma naaikɛ an yãiɔɛ lɔ, 21kɛ́ ampii aa gɔ̃ mɛdoũ. Baa, lá ń ku ma guu mɛ́ má ku n guu, ampiɔ sɔ̃ aaɔ ku wá guu, kɛ́ dũnia e si mmɛ n ma zĩ. 22Gawi pɔ ń kpàa ɔ̃ má kpàmá, kɛ́ aa gɔ̃ mɛdoũ láwáwa. 23Má ku ń guu mɛ́ ń ku ma guu, kɛ́ aa gɔ̃ mɛdoũ miɔmiɔ, dũnia i dɔ̃ mmɛ n ma zĩ, mɛ́ ń yeńzi lá ń yemaziwa.
24Baa, gbɛ̃́ pɔ ń kpàaɔ, má ye aaɔ ku gu pɔ má kuu, kɛ́ aa wɛsi ma gawilɛ, gawi pɔ ń kpàa kɛ́ ń yemazi zadɔ̃ dũnia kuopi. 25Mae Maa, dũnia n dɔ̃o, ãma má n dɔ̃, mɛ́ gbɛ̃́ɛ beeɔ dɔ̃ kɛ́ mmɛ n ma zĩ. 26Má tò aa n dɔ̃, mɛ́ má ɛa mà to aaɔ n dɔ̃ lɔ, kɛ́ aaɔ yenzi lá ń yemaziwa, míɔ ku ń guu.
Trenutno odabrano:
Zãa 17: Boo2024
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Boko Bible © SIM International, 2024.