Matiw 6
6
Muloul wasigeis tasiyas tasimavs
1“Kukin bukumulouls wasigeis tasiyas tasimavs, awoum gamag babaw bikakins, mo bilansa, ‘Singay tasiwa̱youbs tasiyas’; awoum! Magat amisinap ma̱wan, ta-kweitan maysamiy bukuba̱nes waseg Tamads, walba̱lab nises.
2“E, bukumulouls wasigeis tasiyas tasimavs, awoum tayikin bwa̱gig bimgwayeimiy, mamagina tayyaweids tasiyas wavtakon ven o buntuman tapwa̱loul waseg ikaypamwes butus, va̱gan kid gamag babaw bikavasis. Mounid adibakeimiy tut towen mayses iba̱nes, tage wanakougwaw bo nag.
3“Kavel yak bukumuloul wasigeis tasiyas tasimavs, kadiloka kukwawum mumuloul; awoum teitan gamag bikakin.
4“Mamagina kusowm mumuloul, Tamads anmwa̱net bikin, igaw maysam mo bisekeim.”
Nitoug liva̱nen
(Luk 11:2-4)
5Yeisuw ilivan, “Gamag mwasanin bo initougs Yowbad waseg, itamanaws itowas wabunatum yagan sinagog, o itowas wavtakon ven mo initougs; tayyaweids gog. Peinan sivines gamag babaw bikakins, bo kid bilansa, ‘O singay tantougins Yowbad tasiyas.’ Ivavags mav, gamag tasiyas. Mounid adibakeimiy tut towen mayses iba̱nes; tage igaw gog wanakougwaw bo nag.
6“O yakamiy awoum kuva̱ges ma̱wan. Kal yakamiy binitoug, kadiloka beisiw wanbunatum wanuwan, bikatibog koukwed, anmwa̱net bikulul wamatan Yowbad, mo binitoug. O Tamads bikin anmwa̱net ininitoug, igaw maysan mo bisek.
7-8“Kukin bukunitougs, awoum kulivans ma̱wana tamgamegs igaw dadub. Idokes kid biba̱nes youd babaw, peinan asilivan babaw, aveiyov. Awoum kunitougs ma̱wan. E, bukunitougs Tamads waseg, bo ikakin nanawan aveiyag sivinamiy.
9-13“Kadiloka kunitougs mamagina:
‘Timem walba̱lab,
Yagam bakagoul,
Mukwaleiwag beim.
Aveiyag aw-nanoum sivinam ven watinow bakavag, ma̱wan ivva̱ges walba̱lab.
Kaem bukusekem nagein.
Kunumlev makalbaleb ma̱wan kanumlev gamag sikalbaleb wasigeis yakamey.
Awoum bukusenam abiyokon waseg.
Igaw kalbaleb waseg kwatinabwem.’
14“Bukunumlaves o bukuwidis youd babaw wasigeis gamag tasiyas niyagageimiy, igaw gog Tamads mo biwid amisinap kalbaleb yakamiy.
15“Tage nag bukunumlaves o bukuwidis asisinap tasiyas niyagageimiy, Tamads gog nag biwid amisinap kalbaleb yakamiy.
Pos liva̱nen
16“Igaw tutan bukupos, tapwa̱loul silma̱nin, awoum bimma̱yag mitamiy, awoum beivag amisinap ma̱wan tasiyas tayyaweids, ivag mamagina siwsawoul wous, va̱gan gamag bikines, bilansa, ‘O singay tapsapos tasiyas.’ Mounid adibakeimiy, tut towen mayses iba̱nes, tage tut wanakougwaw bo nag.
17-18“Kal yak bukupos tapwa̱loul silma̱nin, kuwid magim, kusinat, kuput; mata geg gamag bikakins, anmwa̱net Tamads bikakin imupos wanuwam, mtowen maysam mo bisekeim.
Liba̱lab wuliyougwan
(Luk 12:33-34)
19“Awoum kwatinakus miwliyoug babaw ven watinow waseg. Ven watinow wuliyougwan ipwapoup o man kekel ikamkoums, o gamag mwasanin ikaliyowes bunatum ivveinaws.
20“Tage liba̱lab wuliyougwan bukwatinakus, nag beipoup, man nag beikoums, ta-kal biven; bwein-wan.
21“Ampalawen muwliyoug kwatinok, mo biseiw nuwam ven towen.
Woun kamnat-nen
(Luk 11:34-36)
22“Woun kamnat-nen matad. Kukin matam inakaleiwag bwein, woum mo bikamnat.
23“Tage kukin matam inakaleiwag kalbaleb, woum bo bidadub. O peinan mukwamnat bo idadub, woum singaya dadub.
Takaleiwag katanok
(Luk 16:13)
24“Ta-ma̱wan gamag anmwa̱net bikanow ages natuwa̱veks asteiy; adok bikamliw natovek teitan, tayuwein gog bisiwyoub; adok bikanaway aygan teitan, tayuwein gog bipiyev. E, ta-ma̱wan gamag bikanow ages takaleiwags asteiy, teitan Yowbad, tayuwein money. Misinaka anmwa̱net aygan bikanow.
Kubukub nuwn
(Luk 12:22-34)
25“Mapun adibakeimiy, awoum bikubukub nuwamiy silma̱nin kaemiy va̱gan biyamoveimiy, o silma̱nin amikweim va̱gan bukusikams. Peinan kan na-ikadilok bigimwel mwamovads, o kweim na-ikadilok bigimwel kaleivids, nag.
26“Kukines mansiyas man iyoyows wanakaew, ta-isapwes kan, ta-ita̱yoys, ta-isenas waseigous; nag. Tamads wanakaew ituyay mansiyas man, mounid mo bitutuyeimiy yakamiy.
27-29“Nag kavel ya̱koum bukuninuway mutawtoun waseg va̱gan ambweilim bibabaw; nag. Aveiyag wawun kuninuwes amikweim? Kukines la̱lan moloubaw nitatos, na-iwotets, na-iba̱lals, nag; tage askakin singaya bwanabwein. Mounid adibakeimiy kay kasiyas la̱lan ikalisow Solomon antubub.
30“Kay kasiyas nagein nitatos, nubweig beiyakous, bigob kov. Yowbad kay kasiyas isek astubub, mounid mo bisekeimiy amikweim. Adok nag kunmises bwein va̱gan Yowbad bimtakavateimiy.
31-32“Awoum ninoumiy bibabaw; awoum kulansa. ‘Aveiyag bitakams? Aveiyag bitamoums? Aveiyag bitasikams?’ Tasiyas igaw dadub asisinap ma̱wan; yakamiy awoum. Tamads gog wanakaew ikakin sivinamiy youd tasiyas.
33“Towen nakaleiwag bimug waninoumiy, o ansinap didumwal bimug waninoumiy, igaw aveiyag sivinamiy mo bisekeimiy.
34“Nagein kuninuways aveiyag sivinamiy nagein; nubweig mo kuninuways aveiyag sivinamiy nubweig. Yamtan yam mouvitan kweitan; kwayuwein yam mouvitan kweitan.
Trenutno odabrano:
Matiw 6: myw
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 1993, Wycliffe Bible Translators, Inc. All rights reserved.