Tio 3
3
Uvaʼs ipaxsat Xhun viyolbʼal quBʼaal Tiuxh, Xhun, uvaʼ nikich aqʼon kuʼ inqʼa xaol xeʼ aʼ
Kuxh 1.1-8; Luk 3.1-9, 15-17; Xhun 1.19-28
1Tuulbʼaletz uvaʼ maʼtich ipal vet inqʼa qʼij inqʼae, tul xeʼt Xhun tiʼ ipaxsal viyolbʼal quBʼaal Tiuxh tu txʼavaʼ uvaʼ yeʼl xaol jeqlel s-tuul uvaʼ at tuulbʼal Judeea, Xhun, uvaʼ ok ibʼij s-aqʼol kuʼ xaol xeʼ aʼ. 2Tul ech nikich tal Xhun s-eche: —Itzʼavaq etibʼ t-inqʼa epaʼv, tan xeʼtiy vet vibʼant quBʼaal Tiuxh uvaʼ tu amlikaʼ viqʼesalil xoʼl inqʼa xaol, —chichich Xhun.#Danieel 2.44-45
3Aʼetz Xhune uvaʼ ech val u yol tzʼibʼamal ka s-tiʼ taʼn Isaiias, u qʼexsanich tetz viyol quBʼaal Tiuxh, s-eche:
—Een laʼ bʼen sichʼink
val u qul tu txʼavaʼ
uvaʼ yeʼl xaol jeqlel s-tuul
uvaʼ ech laʼ tal s-eche:
«Bʼanvaq etutxh
tiʼ ikʼulux tul
u quBʼaal Tiuxh,
eche ibʼanax tutxh
invaʼq bʼey.
Atz jikbʼavaq vetxumbʼal,
eche ijikbʼal
invaʼq palebʼal ok,»
—chich u yol.#Isaiias 40.3-5; Jueeses 13.5-7
4Aʼichetz toksaʼm Xhun u chemich xiʼl tiʼ kameeyo. Tul tzʼuʼmich uvaʼ nikich jekʼon ok u toksaʼm Xhun s-tiʼ. Tul taʼn kuxh sakʼ tuchʼ taʼl kabʼ inqʼa t-vitz nikich tetxhbʼu Xhun s-vatzil itxʼix.#2 Reeyes 1.8 5Tul mam xaol nikich itzaj tuulbʼal u tenam Jerusaleen tiʼ tabʼil inqʼa yol uvaʼ nikich tal Xhun. Atetz xaol nikich itzaj tuulbʼal jankʼal Judeea. Atz at xaol inqʼa een jeqlich tziʼ u xaomla aʼ Jordaan, tul nikich tul tal uvaʼ atich Xhun. 6Tul nikich motx tal vet inqʼa xaol inqʼa ipaʼv te quBʼaal Tiuxh, ech ivatz jolt inqʼa xaol. Yaʼne nikich motx taqʼ vet kuʼ Xhun inqʼa xaol xeʼ u xaomla aʼ Jordaan.
Uvaʼs talt Xhun te inqʼa fariseeo, atz te inqʼa saduseeo, uvaʼ bʼaxa laʼich motx titzʼa tibʼ t-inqʼa ipaʼv, yaʼne laʼich taqʼ kuʼ Xhun xeʼ aʼ
7Tiletz vet Xhun uvaʼ mamala inqʼa fariseeo tuchʼ inqʼa saduseeo nikich motx tul tal uvaʼ atich Xhun, tan aʼaqich isaʼ uvaʼ laʼich motx aqʼaxaq kuʼ xeʼ aʼ taʼn Xhun. Tul ech tal vet Xhun s-te s-eche: —¡Ex inqʼa ech vetxumbʼal, eche tiyiilaq kan! Aʼ nik etitzʼa uvaʼ tuchʼ kuxh vekuʼ xeʼ aʼ, tul ey vet el ex tzij vatz vikʼaʼnal quBʼaal Tiuxh, uvaʼ toq uloq setiibʼa tiʼ vetxumbʼal. Yeʼletza.{*}#3.7 ¿Kam s-tiʼil nik tal Xhun uvaʼ ech vitxumbʼal inqʼa fariseeo eche kan? Tiʼ uvaʼ nikich kuxh motx itxhok txumbʼal tiʼ itzʼeqtaq el tibʼ vatz u xamal tal uvaʼ laʼ motx bʼenk inqʼa bʼanolaq tetz yeʼbʼaʼn taʼn quBʼaal Tiuxh. Ech nik motx ibʼan tiʼ itzʼeqteʼl tibʼ, eche nik ibʼan kan vatz u xamal. Tan at inqʼa iqʼesal uqʼeʼybʼal uvaʼ vatz kuxh inqʼa xaol nikich motx ibʼanvat. Tul nikich motx tabʼi txha vet inqʼa yol uvaʼ nikich tal Xhun. Tul nimanichxh txhan vet tetz nikich ibʼan vatz inqʼa xaol. Pet, tiʼ uvaʼ, aʼich kuxh isaʼ toksal iqʼij taʼn inqʼa xaol, tul ech uvaʼe nikich motx ibʼane. Tan nikich iqej inqʼa xaol uvaʼ qʼexsanich tetz iyol quBʼaal Tiuxh Xhun. Pet atetz jolt inqʼa iqʼesal uqʼeʼybʼal uvaʼ nuqxh nikich motx taleʼ. Tul nikich motx inima inqʼa yol uvaʼ nikich tal Xhun, atz nikich motx iqejeʼ uvaʼ qʼexsanich tetz iyol quBʼaal Tiuxh Xhun. Tul nikich motx titzʼa tibʼ t-inqʼa ipaʼv, tul nikich taqʼax kuʼ xeʼ aʼ taʼn Xhun. ¿Kamich tiqleʼm inqʼa fariseeo tuchʼ inqʼa saduseeo uvaʼs ipal quBʼaal Jesuus vatz u txʼavaʼ? Nimalenich kuxh uqʼeʼybʼal atich xoʼl inqʼa tij imam Israeel tuulbʼal uvaʼs atich Jesuus vatz txʼavaʼ. Tul antichxh u tuqʼeʼybʼal inqʼa fariseeo tuchʼ u tuqʼeʼybʼal inqʼa saduseeo yakʼinaʼqich xoʼl inqʼa tij imam Israeel. Tul aʼichaq inqʼa iqʼesal saduseeo nikich bʼanon iqʼesalil tu tenam Jerusaleen, atz tuulbʼal u tostiuxh inpaqte. Tul saduseeoich ibʼij u tuqʼeʼybʼal u mam iqʼesal inqʼa oksan yol vatz Tiuxh tuulbʼal uvaʼs ipal quBʼaal Jesuus vatz u txʼavaʼ. Tul aʼichaq inqʼa iqʼesal fariseeo nikich bʼanon iqʼesalil xoʼl inqʼa tij imam Israeel tuulbʼalaq joltaq tenam uvaʼ eenich vet tiʼeʼl Jerusaleen, atz tuulbʼalaq inqʼa kʼulbʼal tibʼ inqʼa tij imam Israeel. Tul ataqichxh ibʼen tuqʼeʼybʼal junun. Eche inqʼa saduseeo, tan nikich motx inimal quBʼaal Tiuxh taʼn, atz nikich motx inima inqʼa bʼekʼbʼal uvaʼ taqʼ quBʼaal Tiuxh te Moisees. Pet yeʼ nikich motx inima uvaʼ at taanxelal inqʼa xaol. Tan taʼn kuxhte qat kam vaʼl xaol, tul qat sotzy vet s-eche. Aʼ nikich motx inima uvaʼ yeʼl amlikaʼ, atz yeʼl itzʼeʼvchil inpaqte s-vatz. Pet koq inqʼa fariseeo, tan nikich motx inimal quBʼaal Tiuxh taʼn, atz nikich motx inima inqʼa bʼekʼbʼal uvaʼ tal quBʼaal Tiuxh te Moisees. Tul nikich motx inima uvaʼ at taanxelal inqʼa xaol. Tan oq laʼ kam vaʼq xaol, tul yekl tu tatibʼal kamnaʼq uvaʼ ‹Seeol› ibʼij tu yolbʼal evreeo. Pet aloq kaʼvaʼlen nik elkaʼp u tatibʼal kamnaʼq s-vatz. Tan vaʼl, u ‹Bʼaʼnla Atibʼal,› ibʼij tal uvaʼ yekl inqʼa xaol uvaʼ bʼaʼn tatin vatz quBʼaal Tiuxh. Atz vaʼt, uvaʼ ‹Kʼaxkʼola Atibʼal› ibʼij tal uvaʼ yekl inqʼa xaol, inqʼa kantxhaq tatin vatz quBʼaal Tiuxh. 8Pet jalpuvaq vetxumbʼal. Tul kʼutxhvaq uvaʼ qat etitzʼal vet etibʼ tiʼ ikʼutxhux bʼaʼnla txumbʼal. Tul ech ebʼan tiʼ ikʼutxhuxeʼ, eche viʼoq tzeʼ uvaʼ laʼ taqʼ bʼaʼnla ivatz.{*}#3.8 ¿Kam talax u yol tal Xhun, tiʼ uvaʼ ech laʼ ikʼutxht inqʼa xaol vibʼanoʼm, eche viʼoq tzeʼ uvaʼ laʼ taqʼ bʼaʼnla ivatz? Taletz Xhun u yol uvaʼe, tan tira yeʼ nikich motx titzʼa inqʼa tij imam Israeel, oq bʼaʼn inqʼa nikich motx ibʼaneʼ, atz maq kantxhaq. Tan taʼn kuxh nikich motx titzʼa uvaʼ tijaq imam Israeel, tul bʼaʼnetz kuxh vatz quBʼaal Tiuxh s-vatz. Atz taʼn kuxh nikich motx titzʼa uvaʼ tiʼ kuxh uvaʼ maʼt tuulbʼal u tostiuxh, atz nik inima itzʼeʼsal ok inqʼa txoo vatz quBʼaal Tiuxh s-vatz, tul aʼetz uvaʼe nikich aqʼon bʼen s-jit aj paʼvom vatz quBʼaal Tiuxh nikichaq taleʼ. Pet aʼich titzʼabʼal quBʼaal Tiuxh tiʼ u taqʼt tzaan quBʼaal Jesuus vatz txʼavaʼ, uvaʼ tuchʼ viqejt inqʼa xaol quBʼaal Jesuus, tul laʼ kuypik inqʼa ipaʼv, kʼuxh tij imam Israeel, atz kʼuxh jit tij imam Israeel. Atz jankaletz eche inqʼa yol uvaʼ ul tal Xhun, tan aʼ ul toksa s-jik inqʼa tij imam Israeel. Tul aʼ inqʼa taanxelal laʼich ok s-jik vatz quBʼaal Tiuxh. Tul tiʼetz vibʼen inqʼa taanxelal s-bʼaʼn vatz quBʼaal Tiuxh, tul aʼetz laʼ motx ikʼutxh vet s-tuchʼ inqʼa bʼaʼnla bʼanoʼm. Aʼetz vet vibʼaʼnla bʼanoʼm inqʼa xaol nik ikʼul quBʼaal Tiuxh, eche laʼ ikʼult vaʼq xaol ivatz viʼoq bʼaʼnla tzeʼ. Aʼetz nik ibʼan vet Xhun eela vibʼanoʼm inqʼa xaol tuchʼ viʼoq tzeʼ uvaʼ nik taqʼ bʼaʼnla ivatz. 9Tul yeʼ laʼ utxhi ech laʼ etal tetaanima s-eche: «Tan aʼ Avraʼaam kʼuy qumam, echetz yeʼxhkam invaʼq laʼ ul s-qiibʼa,» chitunich ex. Tan oq laʼ isaʼ te quBʼaal Tiuxh, tul laʼ taqʼ bʼen inqʼa sivan inqʼae s-tijaq imam Avraʼaam.#Xhun 8.33{*}#3.9 Aʼichetz kuxh vatz inqʼa tij imam Israeel uvaʼ bʼaʼnich kuxh tatin vatz quBʼaal Tiuxh, tan tijaq imam Avraʼaam. Tan aʼ Avraʼaam tuchʼ Saara chʼexex taʼn quBʼaal Tiuxh tiʼ ibʼen s-xeʼtisan tetz vitenam quBʼaal Tiuxh. Echetz s-tiʼile aʼ kuxh nimamich vet taʼn inqʼa tij imam Avraʼaam uvaʼ itenam quBʼaal Tiuxh s-vatz. Tul kʼuxh laʼ kami, tan yek kʼatz quBʼaal Tiuxh s-vatz. Pet ech koq uvaʼe tal Xhun, tan jit, tiʼ uvaʼ tij imam Avraʼaam, tul yek koq vet kʼatz quBʼaal Tiuxh. Yeʼle. Tan tal Xhun uvaʼ ant inqʼae nikich motx ipaʼvin vatz quBʼaal Tiuxh. Pet aʼetz tal Xhun uvaʼ laʼich toksa inqʼa tij imam Avraʼaam s-tuul kame uvaʼ nikich motx ibʼaneʼ. Maq at ipaʼv vatz quBʼaal Tiuxh, atz maq yeʼl ipaʼv vatz quBʼaal Tiuxh. ¿Kam s-tiʼil tal Xhun, tiʼ uvaʼ laʼ taqʼ bʼen quBʼaal Tiuxh inqʼa sivan s-tij imam Avraʼaam? Aʼetz talaxe, uvaʼ jit, tiʼ uvaʼ jankʼal inqʼa tij imam Avraʼaam laʼ naʼ vatz txʼavaʼ nik isaʼax quBʼaal Tiuxh taʼn. Tan oq eche, tul taletz kuxh laʼ txhejkeʼe inqʼa tij imam Avraʼaam taʼn quBʼaal Tiuxh. Pet aʼ nik itxhok quBʼaal Tiuxh inqʼa nik bʼanon u bʼaʼnla bʼanoʼm s-vatz, kʼuxh tij imam Avraʼaam, atz kʼuxh jit tij imam Avraʼaam. 10Tan ech laʼ ulbʼel ex, eche laʼ ulbʼel inviʼoq u tzeʼ uvaʼ yeʼ nik taqʼ ivatz, uvaʼ bʼanel vet tutxh kʼoxbʼal tiʼ itzokʼox el inqʼa taqʼil tiʼ ivuʼl bʼen. Tan jatvaʼlxh u tzeʼ uvaʼ yeʼ nik taqʼ bʼaʼnla ivatz, tan laʼ juyili, atz laʼ ok t-xamal.{*}#3.10 Eche u yol uvaʼ nik tal Xhun tiʼ u tzeʼ uvaʼ laʼ tzokʼox el s-kʼoxbʼal oq yeʼ nik taqʼ ivatz. Tan aʼ nik tal Xhun tiʼ junun xaol, atz tiʼ inqʼa fariseeo tuchʼ inqʼa saduseeo. Tan laʼ taqʼ bʼen quBʼaal Tiuxh tu kʼaxkʼo tiʼ vikantxhaqla bʼanoʼm. Eche laʼ ibʼan vaʼq u bʼaal txʼavaʼ uvaʼ laʼ ikʼoneʼl viʼoq u tzeʼ uvaʼ yeʼ nik taqʼ ivatz. Tan aʼ nik itxʼebʼ uvaʼ laʼ taqʼ u tzeʼ ivatz. Tio 7.19; 21.18-19; Luk 13.8.
Uvaʼs talt Xhun uvaʼ laʼich ul vaʼt qʼexsan tetz viyol quBʼaal Tiuxh
11Pet toq val sete, ex inqʼa xaol, tan bʼantan eche u vatineʼ, tan xeʼ aʼ kuxh nik vaqʼvat kuʼ ex s-tetxhlal vetitzʼat etibʼ t-inqʼa epaʼv. Pet koq naq uvaʼ yaʼn tul s-viʼ, tan aʼetz vet viTiuxhil Tiuxh laʼ taqʼ naq sete.#Vibʼanoʼm inqʼa Apoostol 2.2-4 Tan sibʼxh palnaʼq tiqleʼm naq sinviʼ. Tul jitoq inkʼulel laʼ viqʼo vichichʼ xaʼp naq.
12Atz ech laʼ ul ibʼan naq, eche invaʼq u xaol uvaʼ atoʼk invaʼq tichubʼal triigo tiqʼabʼ. Tan bʼaxa tzij nik itichu u xaol vivatz u triigo tuchʼ u tichubʼal. Yaʼne nik ikol vet vibʼaʼnla triigo t-vikʼoay. Petetz vet u tiʼ triigo uvaʼ chʼis veteʼ, tan laʼ toksa vet xamal s-tiʼ. Echetz uvaʼe toq ul ibʼan naq u Vinaq. Tan laʼ ikol naq inqʼa niman tetz. Pet inqʼa yeʼ laʼ qeon naq, bʼantan yeʼl iyaʼebʼal imotxebʼal u kʼaxbʼichil laʼ motx tila, —xeʼt Xhun.
Uvaʼs taqʼax kuʼ quBʼaal Jesuus xeʼ aʼ
Kuxh 1.9-11; Luk 3.21-22
13Yaʼne el vet bʼen Jesuus tuulbʼal Galileea, tul yekich vet Jesuus kʼatz Xhun tziʼ u xaomla aʼ Jordaan tiʼ ikuʼ xeʼ aʼ taʼn Xhun. 14Poro yeʼ nikich isaʼ Xhun taqʼax kuʼ Jesuus xeʼ aʼ. Pet aʼl ech tal Xhun s-eche: —Jit inkʼulel uvaʼ, aʼ in laʼ aqʼon kuʼ axh xeʼ aʼ. Pet aʼ, axh aqʼon kuʼ in, —xeʼt Xhun.
15Tul ech tal Jesuus s-eche: —Antxhte uvaʼ nik aaleʼ. Pet tetxhal toq qunima jankʼal inqʼa jikla txhaq itzʼabʼal uvaʼ itzʼamal s-qiʼ taʼn quBʼaal Tiuxh, —xeʼt Jesuus.
Yaʼne ikuy vet Xhun taqʼax kuʼ Jesuus xeʼ aʼ. 16Iletz kuxh Jesuus nikich ijaʼul xeʼ u aʼ, tul til Jesuus ijaqp u amlikaʼ.{*}#3.16 ¿Kam nik elkaʼp u yol, tiʼ uvaʼ: ‹jaqp u amlikaʼ,› nik tal tzitza? Aʼ nik tal uvaʼ quBʼaal Tiuxh laʼ yolon te inqʼa xaol tzitza vatz txʼavaʼ. Eche uvaʼs iyolon tzaan tu amlikaʼ tiʼ quBʼaal Jesuus uvaʼs taqʼax kuʼ quBʼaal Jesuus xeʼ aʼ taʼn Xhun. Echat kuxh nik tale t-Jeenesis 28.12-13; Kuxh 3.11; Luk 3.21 tuchʼ Apokaliipsis 4.1. Tul ajtxh til Jesuus ikuʼl viTiuxhil Tiuxh s-tiibʼa, echxhte ixichʼan kuʼl invaʼq paraamuxh.
17Yaʼne abʼil iyolon kuʼl val u qul t-amlikaʼ uvaʼ, ech tal s-eche: —Aʼetz vinKʼaole uvaʼe, uvaʼ kamxh in s-tiʼ. Tan aʼ uvaʼe, nik chiibʼisan vaanima, —xeʼt u qul.#Isaiias 42.1; 1 Xhun 5.6-8
Trenutno odabrano:
Tio 3: ixlC
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2016, Wycliffe Bible Translators, Inc. All rights reserved.