MWANDUSO 4
4
Kaini na Abeli
1Adamu kawasa na mtwanzi wake Hawa, na Hawa kapata inda. Kamulela mwana mbigalo, kalonga, “MNDEWA kanitaza, nilela mwana mbigalo.” Avo kamgwelela twaga dikemigwa Kaini.#4:1 Mkieblania Kaini nhegulo yake nipata. 2Abaho kamulela mwana iyagwe mbigalo kamkema Abeli. Abeli kakala mchunga ng'hondolo, na Kaini kakala mulimi. 3Kipigiti cha kuhuna vikivikile, Kaini kagala fungu da vakuja vake na kudilava nhosa ha MNDEWA. 4Abeli nayo kagala wana ng'hondolo wa udele kulawa mdidale jake, kawachinja, na kulava fungu da nyama zinonile ha MNDEWA. MNDEWA kanogelwa na Abeli na nhosa yake, 5ila kamulema Kaini hamoja na nhosa yake. Kaini kona lusango ng'hani, na kihanga chake kikala kisifukila. 6Abaho MNDEWA kamulongela Kaini, “Habali wona lusango? Habali kihanga chako kisifukila? 7Kamba uhatenda ganogile, hutogoligwa? Ila kamba uhatenda gehile, vilozo vokubeta hana ulwivi lwako, vokusulukila gweye, ila kolondigwa uvihume.”
8Abaho Kaini kamulongela mdodo wake Abeli, “Tuchole kumgunda.” Kipigiti viwakalile kumgunda, Kaini kamvamhila mdodo wake na kumkoma.
9Abaho MNDEWA kamuuza Kaini, “Kakwahi mdodo wako Abeli?”
Na heyo kamwidika, “Sivimanya. Nie iyo mwimilizi wa mdodo wangu?”
10MNDEWA kamulongela, “Kutenda choni? Tegeleza! Mulopa wa mdodo wako wonililila kulawa muna iisi. 11Gweye kudukumizwa na kuwingigwa kulawa muisi, isi ayo igubule mulomo wake na kubokela mulopa wa mdodo wako yuumkomile na makono gako. 12Kipigiti uhailima, isi haikulelela vakuja. Kowa munhu yalibule kae na kwanga muisi.”
13Kaini kamulongela MNDEWA, “Nhaguso ino iwa ng'hulu ng'hani kumwangu kubanza vinidaha kuyazaganya. 14Gweye kuniwinga nie kulawa muisi, na kunika kutali kulawa haulongozi wako. Nowa munhu nilibule kae na kwanga muisi, na munhu yoyose yondayanyone nie kong'homa.”
15Ila Mulungu kamulongela, “Bule. Kamba munhu yoyose yokukoma gweye, kobwelezeligwa mianza saba.” Avo MNDEWA kamwika utango Kaini giladi kumzuma kila munhu sambiyamkome. 16Avo Kaini kasegela haulongozi wa MNDEWA na kukala muisi ya Nodi,#4:16 Mkieblania Nodi nhegulo yake kwanga. ili ng'ambu ya ulawilo wa zua wa Edeni.
Lukolo lwa Kaini
17Kaini kawasa na mtwanzi wake, na ija imtwanzi kapata inda na kamulela Henoko. Kaini kadizenga wambo na kudikema twaga da mwanage Henoko. 18Henoko kakala na mwana twaga jake Iladi, ayo yakalile tata wa Mehuyaeli, na Mehuyaeli kakala na mwana twaga jake Metushaeli, ayo yakalile tata wa Lameki. 19Lameki kasola watwanzi wabili, imwe twaga jake Ada na iyagwe Zila. 20Ada kamulela Yabali, ayo yakalile muhenga wa awo wakalile wofuga wang'onyo na kukala mmahema. 21Mdodo wake kakala Yubali, ayo yakalile muhenga wa awo wose wakalile wotoa bango#4:21 Bangokicho kia cha kutoela nyila. na filimbi. 22Zila kamulela Tubali-Kaini, ayo yatendile via va namna zose kulawa muna ishaba na chuma. Lumbu ja Tubali-Kaini kakala yokemigwa Naama.
23Lameki kawalongela watwanzi zake,
“Tegelezeni mweye Ada na Zila, tegelezeni mbuli zangu mweye watwanzi wa Lameki. Nimkoma munhu kwavija heyo kanigela milonda, mmhale sama ya kunitoa.
24Kamba munhu yondayamkome Kaini kotagusigwa mianza saba,
na munhu yondayanikome nie kotagusigwa mianza malongo saba na saba.”
Seti na Enoshi
25Adamu kawasa na mtwanzi wake kabili na wapata mwana iyagwe mbigalo. Hawa kamgwelela twaga dikemigwa Seti.#4:25 Mkieblania Seti nhegulo yake Mulungu kalava. Kwavija Hawa kalonga, “Mulungu kanigwelela nie mwana mbigalo kusola hanhu ha Abeli, ayo Kaini yamkomile.” 26Seti kapata mwana kamgwelela twaga Enoshi. Mkipigiti hicho wanhu baho wasongile kumtambikila MNDEWA.
Trenutno odabrano:
MWANDUSO 4: Kizalamo
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators