Yohanes 3
3
Yesus nopuga-pugau bhe Nikodemus
3:1-21
1Nandoo seemie Farisi neangkando agama Yahudi, neano Nikodemus. 2Nohondo oleo, nokalamo nopoꞌawaꞌao Yesus. Ambano, “Guru, tapandeꞌaane Hintu guru katuduno Lahataꞌala. Kapaꞌamo bhe naseemie pae bhe mandeno mehabuno tanda-tanda timenteꞌaono nehabumu itu, ane pae napobhaiane Lahataꞌala.” 3Notobhoosimo Yesus ambano, “Amohatoko, kotu-kotuꞌu ane seemie pae sumuli nalumente, paise naoha Kafopahintaꞌano Lahataꞌala.” 4Ambano Nikodemus, “Nada amai bhahaa seemie kamungkula sumuli nalumente? Naembali bhahaa namesua toha weo tieno inano maka sumuli nalumente?” 5Ambano Yesus, “Amohatoko, kotu-kotuꞌu ane seemie pae nalumente maiꞌao ne oe bhe Rohino Lahataꞌala, pae namesua weo Kafopahintaꞌano Lahataꞌala. 6Mbadhano manusia nolente maiꞌao ne mbadhano manusia; tamaka rohi ⸤ buꞌouno manusia⸥ nolente maiꞌao ne Rohino Lahataꞌala. 7Koise mentea mbaꞌinomo afohatoko tabeano sumuli lumenteomu. 8O kawea nofiu ampa kapoindaloꞌano, dofetingkee soonoa tamaka miina damandeꞌaane nomaiꞌao ne amai tawa nohope ne amai. Peda dua anaꞌa sasuka mie lumenteꞌano ne Rohino Lahataꞌala.”
9Notobhoosimo Nikodemus ambano, “Nada ae nakumadhadhia bhahaa?” 10Ambano Yesus, “Hintu ini o gurundo miendo Israel, gahaꞌa miina lumosangiea medando aini? 11Amohatoko, kotu-kotuꞌu insaodi tapugauꞌao kaowu nepandeꞌao mani, bhe tasakusiiꞌao kaowu newoha mani, tamaka hintimiu miina tumahimaeꞌomua. 12Sangiꞌanomo apuga-pugauꞌao kanandoono dhunia miinamo marasaea kanauꞌomua, bhemo dua apuga-pugauꞌao kanandoono surugaa! Ingka tetewei pae marasaeaꞌomua.
13Bhe naseemie miinaꞌo bhe monino te surugaa, ampamo kaowu Anano Manusia - Idimo ini - sumampuno maiꞌao te surugaa. 14Tapedamo anabii Musa nefopika ule tambaga ne sau maka nosangkee nofekalangkee we pandaso bhalano, #Bil 21:4-9 nadamo dua anaꞌa Anano Manusia tetewei dasumangkee damekalangkee, 15neanomo sasuka marasaeano ne Anoa dadumadi suhue dhamani. 16Hampano kabhalano kanini kaasino Lahataꞌala ne dhunia ini, sampe nofowaꞌaomo Anano Kaenseemie, neanomo sasuka marasaeano ne Anoa pae nabinasaa, tamaka naeꞌawa dadi suhue dhamani. 17Kapaꞌamo Lahataꞌala notudu Anano we dhunia ini pae so nahumukumuꞌao dhunia, tamaka namangkamo ne Anoa, Lahataꞌala namosalamati dhunia. 18Sasuka marasaeano ne Anoa paise naeꞌawa kahukumu, sasuka tapa marasaeano neꞌawamo kahukumu, mbaꞌinomo miina namarasaea ne Anano Kaenseemieno Lahataꞌala. 19Kahukumu anaꞌa peda ini: o tilanga nohatomo we dhunia, tamaka manusia dopoindalo kahohondo bhe tilangaa, kapaꞌamo nodai podiundo. 20Sasuka humabu modaino nebansi tilanga maka miina nakumala ne kotilangaꞌano, keana notiwoha podiu modaino. 21Tamaka sasuka mie mangkafino kabanara namai ne kotilangaꞌano, neanomo natiwoha podiuno maitu nohabue noangkafi kapoindalono Lahataꞌala.”
Yohanes Fokadiuno nefebhihitaiꞌao Yesus
3:22-36
22Pada anaꞌa Yesus nokalamo we witeno Yudea nopoowa-owa bhe anaguhuꞌino. Ne itu neate nopobhai bhe andoa bhe nofokadiu. 23Gahaꞌa Yohanes Fokadiuno nofokadiu dua, we Ainon we owano Salim, hampano ne itu nobhahi oeno. Mie bhahi domai ne naꞌa maka nokadiuda. 24Wakutuu anaꞌa Yohanes miinaꞌo natitohongkua.
25Gahaꞌa anaguhuꞌino Yohanes dopotagalimo bhe seemie Yahudi; dopotagaliꞌao atorano defewaniu weo tubhono agamando. 26Dadiꞌanomo dokalamo ne Yohanes maka dopugau ambado, “Guru, ingka nandoo meꞌulaiꞌe mie poowaꞌamu we sewetano umeleno Yordan nesakusiiꞌaomu endefiꞌini. Gahaꞌa ampa aitu nofokadiu dua; o mie dopuli dokala ne Anoa.”
27Ambano Yohanes, “O ae maka dua neꞌawano seemie manusia, o kadawu maiꞌao ne Lahataꞌala. 28Ingka fetingkeꞌao wutomiu apugau, ‘Idi ini suano Mesias Omputo Fosalamatino, tamaka notudu kanau Lahataꞌala amaꞌinduluane.’ 29Kohakuꞌaono loꞌia buꞌou hobhine ingka loꞌia buꞌou moꞌane; tamaka sabhangkano loꞌia buꞌou moꞌane neehe-ehe ne sohihino nofeti-fetingkeda. Nowula mpuu lalono ane nofetingke suahano loꞌia buꞌou moꞌane maitu. ⸤ Peda sabhangkano loꞌia buꞌou naꞌa,⸥ idi ini nowulamo mpuu laloku, nosungkumo kaꞌiaku. 30Anoa tetewei sadhulu-dhulu kabhala, tamaka idi sadhulu-dhulu kahobu.”
31Anoa maiꞌaono te wawo, nofewawo bhahi-bhahiꞌae. Anoa maiꞌaono we dhunia mieno dhunia, pugauno wambano dhunia. Anoa maiꞌaono te surugaa nofewawo bhahi-bhahiꞌae. 32Anoa nosakusiiꞌao newohano bhe nefetingkeno tamaka bhe naseemie miina bhe tumahimano bhihitano nefosampeno. 33Tamaka tumahimano bhihitano nefosampeno maitu noꞌakuiꞌemo kabanarano Lahataꞌala. 34Kapaꞌamo katuduno Lahataꞌala maitu nofosampe bhoasaono Lahataꞌala, hampano Lahataꞌala nowaꞌane Rohino miina naegana-ganaa. 35Amano noasiꞌao Anano sampe kosasawiꞌae kuasa nofopuliemo ne Anano. 36Sasuka marasaeano ne Anano Lahataꞌala neꞌawamo dadi suhue dhamani; sasuka kumiidono marasaeano ne Anano Lahataꞌala paise nanumamisi dadi amaitu, tamaka amahano Lahataꞌala naeate te ntanabubuno.
Trenutno odabrano:
Yohanes 3: mnbSD
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2022, Wycliffe Bible Translators, Inc. All rights reserved.