Lukas 20
20
Dofeenaꞌao kuasano Yesus
20:1-8
Mat 21:23-27; Mrk 11:27-33
1Seꞌoleo Yesus nefoinaꞌu mie bhahi weo Lambuno Lahataꞌala bhe nofohatoanda Bhihita Metaa. Gahaꞌa dohatomo dua neangkaꞌindo imamu, pande-pande Kitabi bhe kamu-kamungkulaꞌindo Yahudi. 2Andoa ini dopugaumo ne Yesus ambado, “Fohato kainsami: o ae gahaꞌa kaengkohaꞌano kuasa mehabu sabhaha giu itu. Nofopooliko laꞌae bhahaa?” 3Yesus tanotobhoosi ambano, “O Idi ameena dua. Soba fohato kanauꞌomu. 4Nomaiꞌao ne amai bhahaa kuasano Yohanes nofokadiu? Nomaiꞌao ne Lahataꞌala kaa nomaiꞌao ne manusia?” 5Pada aitu dopuga-pugaumo sapada-pada andoa ambado, “Ane dapugauꞌomu nomaiꞌao ne Lahataꞌala, tetewei namugau, ‘Noafa gahaꞌa miina marasaeaꞌaneomua?’ 6Tamaka ane dapugau nomaiꞌao ne manusia, kosasawindo raꞌeati dafobhatumbuliꞌao kontu, kapaꞌamo doparasaeaꞌe mpuu Yohanes maitu seemie anabii.” 7Pada aitu dotobhoosimo, “Miina tamandeꞌaanea.” 8Ambano toha Yesus, “Ane peda itu, paise dua amohatokoomua kaengkohaꞌano kuasaku aehabu sabhaha giu amaitu.”
Kapalendano kumahadhaano te kaampono angguru
20:9-19
Mat 21:33-46; Mrk 12:1-12
9Pada peda naꞌa Yesus netula-tulaꞌaomo kapalenda aini ne mie bhahi. “Nandoo seemie nelengka kaampo maka nekantisaane angguru. Pada aitu neponambomo mie so kumahadhaaꞌe maka nokala we koliwuno miina nakotempoa. 10Nohato wulano defoꞌonu pehapi, netudumo seemie bhatuano nakumala ne kumahadhaano te kaampono angguruno naꞌa, so namalaꞌao dawuno. Tamaka mie kumahadhaano tadohambisi bhatua anaꞌa maka dotudue nasumuli haambali limano. 11Pada aitu kafeompuꞌa naꞌa netudumo dua bhatua sigaoꞌano, tamaka katuduno maitu dohambisiemo dua bhe dofekonsana-nsanaiꞌe maka dotudue nasumuli haambali limano. 12Pada aitu ne katolu pakumo netudu toha seemie bhatua, tamaka tadobhelai maka doꞌohoe we kundo ala. 13Nokodukumo lalono kafeompuꞌa kokaampono naꞌa, ‘Kaowu aeafamo bhahaa? Ingka atumudumo anaku kamoasiꞌaoku ini, tetewei daengatie.’ 14Tamaka sadowoha anano kafeompuꞌando, kumahadhaano dopugau-gaumo ambado, ‘Anoamo ini so kohakuꞌaono kahunsaꞌaono, dopongkoeꞌanaomu, neanomo kahunsaꞌaono somo intaodiomu.’ 15Pada anaꞌa dobulue we kundo ala maka dopongkoe.” ⸤ Pada aitu Yesus nofeenadamo ambano⸥ , “Nasumuli kokaampono, namafaꞌiandamo bhahaa kumahadhaano naꞌa? 16Ingka tetewei namai namongkolida, maka kaampono naꞌa namaꞌandae mie sigaoꞌano so kumahadhaaꞌe.” Dofetingke peda maitu mie bhahi dopugaumo ambado, “Tetewei paise!” 17Tamaka Yesus noꞌondoda bhe nopugau ambano, “Ane peda naꞌa, o ae bhahaa maꞌanano aeatino Kitabi aini? ‘Kontu neꞌohondo mefelambuno, gahaꞌa nembalimo sandi bhalano!’ #Mzm 118:22 18Sasuka mondawuno te wawono kontu anaꞌa naowita, nendawutino kontu aitu naopuho.” 19Pande-pande Kitabi bhe neangkaꞌindo imamu deꞌondofi akala dahumakoe, kapaꞌamo dopandeꞌaane kapalenda amaitu nokantibha andoa, tamaka doteꞌi mie bhahi.
Tanduaꞌano sewa ne Omputo Kaisar
20:20-26
Mat 22:15-22; Mrk 12:13-17
20Pande-pande Kitabi bhe neangkaꞌindo imamu dokaꞌo-kaꞌondo Yesus. Detuduanemo mata-mata woha-wohaꞌano mie melaano lalo, so dametandoꞌao alano wambano. Patudhundo neanomo naembali dahumakoe maka daowae ne limano gubernur, mintahano kuasa bhe kabhotusi weo liwu. 21Mie andoa maitu dofeenaemo ambado, “Guru, tapandeꞌaane sabhaha pugau bhe kafoinaꞌumu nokotuꞌu, miina poꞌala-alaanda manusia, tamaka weo kalaano lalomu fofoinaꞌuꞌao sala metaano Lahataꞌala so manusia. 22Weo tubhono agamantoomu, naembali bhahaa datumanduao sewa ne Omputo Kaisar kaa paise?” 23Tamaka Yesus nopandeꞌaane patudhundo daꞌumakalaiꞌe, dadi nopugaumo ambano, 24“Fotiwoha kanauꞌomu nasewoka dhoi pera itu. Gambarano ula bhe nea laꞌae gahaꞌa ini?” Ambado, “Ulano bhe neano Omputo Kaisar.” 25Nopugaumo toha Yesus ambano, “Bahangka peda naꞌa, fehebuaꞌano Omputo Kaisar waꞌaneomu Omputo Kaisar; fehebuaꞌano Lahataꞌala waꞌaneomu Lahataꞌala!” 26Andoa miina damooliea dofetando alano wambano ne wisendo mie bhahi; tadomente dofetingke katobhoosino, sampe miina dakowobhaa.
Miendo Saduki dofeenaꞌao kawanuꞌando mie mate
20:27-40
Mat 22:23-33; Mrk 12:18-27
27Nandoo seemie hodua miendo Saduki domai ne Yesus. Andoa ini miina damarasaea kawanuꞌando mie mate. 28Dofeenamo ne Yesus ambado, “Guru, anabii Musa nebuhi pahinta so intaodiomu peda ini: Ane seemie moꞌane nomate tamaka hobhineno miinaꞌo nakoanaa, maka kakutaꞌano moꞌane tetewei nagumaa bhe bhihinandano naꞌa, neanomo kakutaꞌano mateno maitu nakosampuꞌa dua. #Ul 25:5 29Gahaꞌa nandoo dopipitu dosekakutaꞌa sanea moꞌane. Titiisa nogaa tamaka nomate miinaꞌo nakoanaa. 30Dadiꞌanomo katuluno nogaamo bhe bhihinandano naꞌa tamaka miinaꞌo nakoanaa nomatemo dua. 31Pada aitu hobhine anaꞌa nogaaꞌanemo dua katuluno, tapedamo aitu kopipitundo dopotulu-tulu dogaaꞌane tamaka sanea domate miina dakoanaa. 32Panda-pandano hobhine naꞌa nomatemo dua. 33Kaowu nada amai ne oleo kawanuꞌando mie mate? Somo mieno lambu laꞌae bhahaa hobhine amaitu? Ingka kopipitundo sanea gumaaꞌane?” 34Notobhoosimo Yesus ambano, “Mie te dhunia ini dogaa bhe dofogaada, 35tamaka nahumato oleo kawanuꞌando mie mate, mie mantasino so mesuano we dhunia buꞌou naꞌa pae dagumaa, pae dua damogaada. 36Andoa naꞌa paemo bhe kapoolia damatea, dapototomo bhe malaꞌekati. Kapaꞌamo andoa maitu anaꞌinomo Lahataꞌala, mie toka nefowanuno maiꞌao ne mate. 37Ingka wutono anabii Musa padamo nofohato kaita mentalea-mentalea so kawanuꞌando mie mate. Aini notibuhi weo Kitabino metula-tulaꞌaono sau kokihi humendeno. Ne itu Ompu nokonae Lahataꞌalano Abraham, Lahataꞌalano Ishak bhe Lahataꞌalano Yakub. #Kel 3:6 38Ompu suano Lahataꞌalando mie mate, tamaka Lahataꞌalando mie dumadi. Kapaꞌamo ne wiseno Lahataꞌala kosasawindo mie dodadi.” 39Dofetingke peda naꞌa pande-pande Kitabi seemie hodua dopugaumo ambado, “Guru, ingka netaa mpuu katobhoosimu naꞌa.” 40Dadiꞌanomo miinamo daokadoa dakonifeenaꞌao ne Yesus.
Pokaiꞌano Yesus bhe Daud
20:41-44
Mat 22:41-46; Mrk 12:35-37
41Nopugaumo toha Yesus ambano, “Noafa bhahaa Mesias Omputo Fosalamatino maitu dokonaane sampuꞌano Daud? 42Kapaꞌamo wutono Daud weo Kitabino Laguno nopugau peda ini,
‘Ompu Lahataꞌala nokowambamo ne Ompuku,
Mengkohamo ne suanaku ini,
43ampa kosasawindo kaewamu ahumabuda so kafindaꞌamu.’ #Mzm 110:1
44Dadiꞌanomo ane Daud nokonae Ompuno, noafaꞌao dua nembali sampuꞌano?”
Yesus nofofodhaga daposiꞌondo ne pande-pande Kitabi
20:45-47
Mat 23:5-7; Mrk 12:38-40
45Tangasano mie bhahi dofetingke kafoinaꞌuno, nopugaumo Yesus ne anaguhuꞌino ambano, 46“Posiꞌondoomu ne pande-pande Kitabi! Andoa maitu doasiane dolili depake dhuba kawanta bhe dopoindalo sepaliꞌa dofosibhalada we wuntano daoa. Weo lambu kasambaheaꞌa doasiane dengkoha te wise-wise, weo kahame dengkoha ne kaengkohaꞌando kabhala. 47Andoa debhohe-bhoheꞌi bhihinanda maka dorampasi lambudo. Pakade keana notipandeꞌao kadaino isikadhindo, tadofekawanta-wantamo sambaheando. Dadiꞌanomo nasedhuluꞌa dua kabhie kahukumu so neꞌawando.”
Trenutno odabrano:
Lukas 20: mnbSD
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2022, Wycliffe Bible Translators, Inc. All rights reserved.