Lukah 6
6
Napatuturunya nalaran na laɗɗu hangahu ana habayang natou Yahudi
(Mat. 12:1-8; Mrk. 2:23-28)
1Ta mahangina na laɗɗu hangahu ana habayang natou Yahudi,#6.1 Ta Hurat Ɓakulu nahilu ʄawa Sabatwiɗanya. Akerikayaka napata yapu laɗɗu tou Yahudi, ɗayapuya na Sabat walingu ana tama na matalaɗɗu ta laɗɗu lima, lapakung ana tama na matalaɗɗu ta laɗɗu nam. Ta laɗɗu nou, ɗa tou Yahudi ɗapahigiluya alaɗɗu hangahuya, ʄiaya hiɗa hangahu waling ngaladukaɗa ta pakeraɗa aɗa kaɓuangu kama habayang awiɗa. Jiaɗiyaka ta laɗɗu Sabat tou Yahudi, dana hamearamangu napata yapudanya iata na laɗɗu Miggu. atanga linouna hi Yehu ta kahiibu, ɗama keriya maruhi gandumɗanya.#6.1 Gandum nama hamearang ta pari. Hiɗa koahi waija limmaɗ manga hiɗa aaja. 2Ɗama tou mapirraha ɗa tou waling ta kaɓuangu Parihi, wiɗa, “Gahim hapalaliya napaheirungu na laɗɗu hangahu ana habayang natou Yahudi?”
3Hi Yehu napagapija, “Daɗi mibahhamayaha napalanga woluna hi raja Daut, ɗunna ʄaka ɗama keriya aɗa karobang? 4Hi raja Daut natama ta ɓei Umma Pingi Pahabayangu tou Yahudi, naɗekiya na kababa napalanga manuatungu lahi Alla, manga hina aanya. Hina woa ʄellaja kababa ɗa tou ɗama keriya. A kerikayaka napata agamada, ɗa tou hawanguk da ɗa aamaja, ʄiapaha ɗa imam ɗama aaja.
5Manga hi Yehu napanewi, “Nyouwa, ʄiaɗiwaka na Ana Tourara, nama reihi walingu ta laɗɗu hangahu ana habayang natou Yahudi. Nama ɓotahuya gananya nama piaku akeranya, ʄaka dama piaku akeranya ta laɗɗu nou.”
Hi Yehu napateggahuya natou nama maet hakapapa limmana
(Mat. 12:9-14; Mrk. 3:1-6)
6Ta mahangilina na laɗɗu hangahu ana habayang natou Yahudi, hi Yehu natama ta umma pingi pakaɓuangu tou Yahudi#6.6 Umma pingi pakaɓuangu tou Yahudi ʄiayak na umma nahawaiɗa ɗa tou Yahudi aɗa bahhaya na Hurat Ɓakul ta Lii Dei, pingi pakaɓua-kawoting, pingi papanunga-papeakang ʄaka pingi paɓotahu palakara. manga hina panunga-papaeakang. Noulau, einya natou nama maeti na limma lawanan. 7Ɗama tou mapirraha ɗa gurr agama tou Yahudi ʄaka ɗa tou waling ta kaɓuangu Parihi ɗapateti pangalanya hi Yehu, kakollinya jalana ana pateggahuya natou ta laɗɗu hangahu ana habayang natou Yahudi awiɗa. 8Jiaɗinguka napeaɗaja napangaɗanguɗa. Jiaya hi winanya natou nam maet limmana, “Mai dedi yangu ta paɗua!” Natou nou nakiɗi ana dedi ta paɗua. 9Manga hi Yehu napatuturu ta tou ɗama ei houja, “Akerikayaka na pata agamada tou Yahudi, beinya nama piaku awoluya ta laɗɗu hangahu ana habayang natou Yahudi, nama kalung? Dama kalung? Gatanya a da hamatiya?” 10Hi Yehu napateti bolluja, manga hi winanya natou nou, “Paʄoalanya na limmamu!” Natou nou na paʄoalanya na limmana, ailolu pijalunanyaka.
11Jiaɗinguka ɗa gur agama tou Yahudi ʄaka ɗa tou waling ta kaɓuangu Parihi bani tetekaɗanya. Jiayaka hiɗa ɗeki pangaɗang gikineiɗanyaka awoluya hi Yehu kana heling, awiɗa.
Hi Yehu napediha ɗama touma habulu maɗuaha ɗa ana papaleawana
(Mat. 10:1-4; Mrk. 3:13-19)
12Mengaka nou, hi Yehu kadekalnanyaka ta ana letina ana lipa habayang. Nouyaka pijangu riɗung ana habayang lahi Alla. 13Wehanguk babaaru, kamaikanajaka ngaladukaɗa ɗama keri-Ya. Manga hina pediha touma habulu maɗuah waling lahi ɗuɗa, nahawinang ana papaleawa-Na.#6.13 Nahawiɗang ‘ana papaleawa-Na’ ta Hurat Bakul ta hilu ʄawa ʄiahaka ‘Rasul’. Ɗa ngaraɗa haʄiaɗihaka: 14Hi Himon napapangarana hi Yehu, Petruh, hi Andreah na angwuana hi Himon. Hi Yakobuh ʄaka hi Yohanih, hi Pilipuh ʄaka hi Bartolomeuh, 15hi Matiuh ʄaka hi Tomah, hi Yakobuh anana hi Alpeuh, ʄaka hi Himon (napatiki “Zelot”#6.15 Zelothilu Yunani, Patriot na hilu ʄawa, apa hilu Wanukaka kanyaka ‘namatoaɗa tebi nibbu tara’. Hi Himon toaɗa tebi nibbu tarananya na kaɓuangu ‘partai Nasionalis’ tou Yahudi ka talu taʄi ʄaga weawu waling ta tou Roma nama pa atangu.), 16hi Yudah anana hi Yakobuh ʄaka hi Yudah Ihkariot baaru nama ɗaganya hi Yehu.
Hi Yehu napapeaka-panungang ʄaka napateggahuha ɗa tou ɗangu
(Mat. 4:23-25)
17Manga hi Yehu nakaburu maraija ɗa ana papaleawa-Na waling ta ana letin, ʄaka hiɗa hangahu ta malijak. Ta padoungu nou, ɗa tou ɗangu ɗama langa keriya hi Yehu, baɗi eijaka aɗa makeaha ʄaka reihi ɗanguhaha ɗa tou ɗama waling ta haguꞌul loaɗa Yudea, koata Yeruhalem ʄaka waling ta koata ɗama eingu ta wiwi tahik, ta lihi koata Tiruh ʄaka koata Hidon. 18Na amija lipa tengiɗanya hi Yehu, ʄaka kapateggahuma walingu ta hiɗum awiɗ. Ɗama regga waddi tana ami ʄellaja ana pateggahuha. 19Ngaladukaɗa ɗa tou ɗaparuhung kamahamanuya hi Yehu awiɗa, kaɗang einya nakuaha nama louhung waling ta ihi-Na nama pateggahuha ngaladuka ɗa tou.
Hi Yehu napanewi witin natou nama egi ati ʄaka nama haduka
(Mat. 5:1-12)
20Hi Yehu napatetija ɗama keri-Ya, hi winaja,
“Maringu-malalaɗingu nyiami tou milla,
kaɗang nyiamiɗika touna hi Alla ʄaka ʄiayaka na Rajam!
21Maringu-malalaɗingu nyiami ya nama karobang;
kaɗang nyiami enga pabihumi!
Maringu-malalaɗingu nyiami ya nama hou;
kaɗang nyiami enga malikumi!
22Maringu-malalaɗingu nyiami napahukang aeti, dapa kaa, napakatukung ʄaka napapajala witina ami keriya na Ana Tourara! 23Hanaɗuga ɗa apu-ɓokumi ɗawolu touhou ʄellaɗaja ɗa nabi. Ya atonou ʄellakanak namaʄaʄi lahi nyiami, mi egi atih ʄaka mi neaguh, kaɗang na ɓakul napatagumi napahadianagimi hi Alla ta hurga.
24Jiaɗinguka mi mawillaɗing nyiami ya nama poati;
kaɗang nyiami langa paɗaminyaka ngaladukana nama kalung!
25Mi mawillaɗing nyiami ya nama bihu;
kaɗang nyiami enga karobangumi!
Mi mawillaɗing nyiami ya nama malik;
kaɗang nyiami enga nouɗim ta haduka aeti ʄaka mi hou!
26Mi mawillaɗing nyiami, ngaladukana natou aɗa haila pamanopagimi; kaɗang touhou ʄellaɗaka ɗa apu-ɓokuɗa aɗa haila pamanopaja ɗa nabi dama paɗeningu hanaɗug.”
Panamung ta geꞌamu
(Mat. 5:38-48, 7:12a)
27“Ya nyiami nama rangu-Wa, Kupanoumi: munamuha ɗa geꞌamu, ʄaka muwoluya nama kalung ta tou nama hukagu ati. 28Kareiya hi Alla kana pamariinya natou nama yurawu ʄaka muhabayanya natou nama irrak lahi ou. 29Agearakayaka nama kababagunya napapu laleimu, paʄima ʄellananya napapu lawanamu. Agearakayaka nama parimagunya na koapi ɓakulumu, woa ʄellananya na koapimu. 30Agearakayaka nama kareigunya gananya nama eingum, woakaɗinya; ʄaka agearakayaka nama pariimaguja, abi karei ɓalimaha. 31Woluya nama kalung ta tou hawanguk gananya nahakabu atim kana wolu ʄellaya lahi ou.
32Atidi ʄiakahaka ɗa tou ɗama patekanya napanamunguɗ lahi nyiami napanamumi, abi mipangaɗakang hi Alla ana pamarii-malalagunya nahawolumu. Ɗa tou ɗama jala ʄella aya ɗapanamung ta tou ɗama namuha! 33Jaka atidi ʄiakayaka ami woluya nama kalung ta tou nama woluya nama kalung lahi nyiami, abi mipangaɗakang hi Alla ana pamarii-malalagunya nahawolumu. Ɗa tou ɗama jala ʄella aya, ɗawolu ʄellaya! 34Atidi ʄiakahak ɗa tou nama piaku aɗa haɓalija ɗa riti napawoaletum, abi mipangaɗakang hi Alla ana pamarii-malalagunya nahawolumu. Ɗa tou jala ʄella aya ɗawoalettuja riti ɗa oali tou jalaɗa, manga hiɗa karei ɓaliha! 35Nama paɗening touyanah! Nyiami panamunguha ta geꞌami ʄaka miwoluya nama kalung lahi ɗuɗa. Nyiami miwoalettunguh ʄaka abi pangaɗaɗija ami kolli ɓalija. Atonoukanaka, napatagumi enga ɓakuluna, ʄaka enga ʄaʄimi anana hi Alla Nama Reihi ʄaga. Hi Alla na kalung ati-Na ta tou waikiwuka dama winanya ʄaka ta tou nama irrak. 36Nounam, nyiami pa awi-panamunguya toungu na Amami ana pa awi-panamungu!”
Abi pahakiɗing
(Mat. 7:1-5)
37Abi mipahakiɗing ta tou hawanguk,#6.37 Daɓada waimanya na hilu ‘ʄenang a da tenam’ ta ɗalu panewida wehang-malung ta dalar ya, ʄiaɗinguka na ihina ta hilu ʄawa agar atau supaya.” ka abi nahaki ʄellagimi hi Alla. Jaka abi mihukuɗingu ta tou hawanguk, ka abi nahuku ʄellagimi hi Alla. Midengaja ɗa doku-jalana natou hawanguk, kana denga ʄellagimija ɗa doku-jalami hi Alla. 38Woanya na oalimi patou, kana woa ʄellagim hi Alla. Nyiami enga kaaminya napawoanagimi nama binu boangu, napalanga kiira nama katani na tagumu. Kaɗang na kiira nahawaimi ta oalimi patou, ʄia ʄellaya nahawainagimi hi Alla.”
39Mengaka hi Yehu nalolukuya lahi ɗuɗa na lii-pangearang, nama wina, “Da eimangu tou kaboala ɗama patiding wikiɗ oali tou kaboalaɗ. Atonoukaɗaka enga ɗameara kanaꞌu ta kagoꞌak. 40Da eimang lakeaɗa pahakoala nama reihi waling ta gurruna. Jiaɗinguka ana pahupukayaka nahakoalan, enga mearana toungu ta gurruna.
41Ga nyiami himi ita ikaya na kamopar ta matan na oalimu, ʄiaɗinguka na kadipik ai nama einya ta mata wikim damu itamay? 42Gikineikam himitikiya ta oaliʄaʄim, ‘Mai kaku heligunya na kamopar waling ta matamu,’ ʄiaɗinguka ta mata wikim na kadipik ai damu itamay? Nattu tou dehaɗeata! Muheli moulupanya na kadipik ai nama eingu ta matamu. Himu ita tekkaya, ʄaka himu piaku amu helinya na kamopar waling ta matana na oaliʄaʄimu.”
Na pingina ʄaka na wuana
(Mat. 7:16-20, 12:33-35)
43Na pingi ai nama kabokahu dana wuamangu dama kalung. Touʄellana na pingi ai dama kabokahu dana wuamangu nama kalung. 44Hi peaja ɗa pingi ai walina ta wuana. Libu rii dana wuamangu wua kapillit,#6.44 Ta Hurat Ɓakulu na hilu ʄawa wua arawiɗanya, mearana na wua kapillit. ʄaka kaɓoꞌuk rii dana wuamangu wua anggur. 45Natou kalung napalouhunya nama kalung waling ta atina, na atin alanga binunanya ma kalung. Natou irrak napalouhunya nama irrak waling ta atina, na atin alanga binunanya ma irrak. Gananya napatikina na aꞌana ʄiaɗiyaka nama walingu ta atina.”
Natou nama keriya napareha-Na hi Yehu natarung ana haganya namawilla ʄaka nahaduka
(Mat. 7:24-27)
46“Ga nyiami himi kamaika-Ga Nyouwa, ‘Moiri, Moiri,’ ʄiaɗinguka dami pahalakumaya gananya nahatiki-Gu? 47Lahi gearakaka ak hamearanya natou nama aminya lahi Nyouwa, ʄaka nama ranguganya nahatiki-Gu, manga nama pahalakuya? Touyana Ku-hameara wainyaː 48Ɗunna toungu natou nama pakiɗi umma hina haka pamaʄalunya, manga hina woluya na illi umma ta pinu watu. A amikanyaka na wiwa ana ledaya na umma nou, na umma nou dana giɗukmangu, kaɗang langa pakiɗinanyak ta illi nama kullih ʄaka nama kalung. 49Jiaɗinguka, natou nama ranguganya napatiki-Gu ʄaka dama pahalakuya, nahamearanya natou nama pakiɗi umma dama hakanya na illi umman. A amikanyaka nawiwa naledaya, na umma nou nabopah; ʄaka tawehar hingnanyaka!”
Trenutno odabrano:
Lukah 6: wnk
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2024 (Active), Wycliffe Bible Translators, Inc. All rights reserved.