Lahu Bible Edited © Thailand Bible Society and Bible Society of Myanmar, 2010, 2020.

Awˬ hkuiˉ puiˍ htaˇ, Gʼuiˬsha miˬguiˬ leh mvuhˇ naw ma hta‸ te hpanˍ ve yoˬ. Miˬguiˬ chi lehˬ, te‸ chiˉ awˬ ho‸ awˬ han maˇ cawˬ leh gawˬ cu gawˬ pehˆ hpeh‸ ve yoˬ. Hkʼa peu-eˬ naˆ ho‸ lehˍ hpeh‸ leh, Gʼuiˬsha ve kanˇ paˆ lehˬ iˉ kaˆ teˇ hpaˍ awˬ hkʼoˆ cawˬ taˍ ve yoˬ. Oˇ htaˇ Gʼuiˬsha lehˬ, Awˬ gʼeuˆ tawˆ la piˇ-oˆ, teh‸ kʼoˆ hkʼa leh awˬ gʼeuˆ tawˆ la ve yoˬ. Gʼuiˬsha lehˬ, awˬ gʼeuˆ teˇ ceuˬ da‸ ve hta‸ gʼa mawˬ leh, awˬ gʼeuˆ leh naˆ ho‸ ve hta‸ pehˬ da‸ piˇ ve yoˬ. Awˬ gʼeuˆ hta‸ Yawˇ Mvuhˇ law‸ kʼaw, teh‸ meh piˇ leh, naˆ ho‸ ve hta‸ Mvuhˇ hpeu‸, teh‸ meh piˇ ve yoˬ. Mvuhˇ hpeu‸ la leh mvuhˇ teˇ pawˆ kʼaw‸ ba la ve yoˬ. Chi lehˬ, awˉ lawˉ peuˇ ve teˇ nyi hpeh‸ ve yoˬ.
Oˇ ve peuˬ hkʼaw‸ nawˉ Gʼuiˬsha lehˬ, Iˉ kaˆ teˇ hpaˍ awˬ hkʼoˆ lo mvuhˇ naw ma awˬ tcuhˉ kaˍ cawˬ la piˇ leh, iˉ kaˆ teˇ hpaˍ pehˬ da‸ chehˇ-oˆ, teh‸ kʼoˆ ve yoˬ. Yawˇ kʼoˆ ve hkʼe teˇ cawˬ haˉ iˉ kaˆ teˇ hpaˍ pehˬ da‸ sheˬ leh, iˉ kaˆ awˬ hkʼoˆ lo mvuhˇ naw ma awˬ tcuhˉ kaˍ cawˬ la ve yoˬ. Gʼuiˬsha lehˬ, awˬ tcuhˉ kaˍ tawˍ taˍ ve chehˇ kuiˬ oˇ ve hta‸ Mvuhˇ naw ma, teh‸ meh piˇ ve yoˬ. Mvuhˇ hpeu‸ la leh mvuhˇ teˇ pawˆ kʼaw‸ ba la ve yoˬ. Chi ve lehˬ, nyiˇ nyi teˇ nyi hpeh‸ ve yoˬ.
Gʼuiˬsha lehˬ, Miˬguiˬ tawˆ la tuˬ mvuhˇ naw ma awˬ hawˉ lo hkʼa cawˬ taˍ ve iˉ kaˆ teˇ hpaˍ teˇ kaˬ lo ceh tiˉ hpoˆ chehˇ-oˆ, teh‸ kʼaw‸ kʼoˆ hkʼa leh yawˇ kʼoˆ ve hkʼe hpeh‸ la ve yoˬ. Goˇ lehˍ cawˬ ve chehˇ kuiˬ chi hta‸ Gʼuiˬsha lehˬ, Miˬguiˬ, teh‸ meh piˇ leh, teˇ geh hpoˆ chehˇ taˍ ve iˉ kaˆ hta‸ Laˇ tsuhˇ gʼuiˬ, teh‸ meh piˇ ve yoˬ. Awˬ ceuˬ chi hkʼa peu-eˬ da‸ jaˇ ve hta‸ Gʼuiˬsha gʼa mawˬ ve yoˬ. Oˇ ve hkʼaw‸ nawˉ Gʼuiˬsha lehˬ, Miˬguiˬ chi ve awˬ hkʼoˆ lo awˬ shiˍ awˬ nu cawˬ ve awˬ ceuˬ leh iˉ shiˍ cehˬ laiˉ ceuˬ cawˬ la piˇ-oˆ, teh‸ kʼoˆ ve yoˬ. Yawˇ kʼoˆ ve hkʼe hpeh‸ la ve yoˬ. Chi hta‸ pa taw, miˬguiˬ hkʼoˆ lo suhˆ cehˬ hawˆ cehˬ laiˉ ceuˬ cawˬ la leh, awˬ ceuˬ chi hkʼa peu-eˬ da‸ jaˇ ve hta‸ Gʼuiˬsha gʼa mawˬ ve yoˬ. Mvuhˇ hpeu‸ la leh mvuhˇ teˇ pawˆ kʼaw‸ ba la ve yoˬ. Chi ve lehˬ, shehˆ nyi teˇ nyi hpeh‸ ve yoˬ.
Oˇ ve hkʼaw‸ nawˉ Gʼuiˬsha lehˬ, Mvuhˇ law‸ kʼaw leh mvuhˇ hpeu‸ hta‸ pehˬ da‸ piˇ tuˬ, mvuhˇ naw ma hkʼoˆ lo awˬ gʼeuˆ teˇ hpaˍ cawˬ la piˇ-oˆ. Awˬ gʼeuˆ oˇ ve teˇ hpaˍ lehˬ, awˬ tcuhˉ awˬ yanˇ teˇ hpaˍ, awˬ nyi awˬ haˉ teˇ hpaˍ leh awˬ hkʼaw‸ awˬ yanˇ teˇ hpaˍ hta‸ te tawˆ la piˇ-oˆ. Chi hkʼoˆ ka‸, awˬ gʼeuˆ oˇ ve teˇ hpaˍ lehˬ, miˬguiˬ hkʼoˆ lo htawˇ ba la piˇ-oˆ, teh‸ kʼoˆ ve yoˬ. Gʼuiˬsha kʼoˆ ve hkʼe hpeh‸ la ve yoˬ. Gʼuiˬsha lehˬ, uiˍ jaˇ ve awˬ gʼeuˆ nyiˇ maˬ hta‸ te hpanˍ ve yoˬ. Mvuhˇ nyi hta‸ mvuhˇ law‸ kʼaw htaˇ uˉ peunˍ tcuh leh, ha pa hta‸ mvuhˇ hpeu‸ htaˇ uˉ peunˍ tcuh ve yoˬ. Chi awˬ hkʼoˆ meu‸ keu shiˍ teˇ hpaˍ hta‸ htawˇ Yawˇ te hpanˍ taˍ ve yoˬ. Miˬguiˬ hta‸ awˬ gʼeuˆ ba piˇ tuˬ awˬ pon maˇ kʼoˆ, mvuhˇ law‸ kʼaw leh mvuhˇ hpeu‸ ve awˬ yanˇ hta‸ uˉ peunˍ tuˬ awˬ pon maˇ kʼoˆ, awˬ gʼeuˆ leh naˆ ho‸ ve hta‸ fuiˍ da‸ pehˬ da‸ piˇ tuˬ awˬ pon maˇ kʼoˆ, Gʼuiˬsha lehˬ awˬ gʼeuˆ chi teˇ hpaˍ hta‸ mvuhˇ naw ma hkʼoˆ lo teh taˍ ve yoˬ. Awˬ gʼeuˆ hkʼa peu-eˬ da‸ jaˇ ve hta‸ Gʼuiˬsha gʼa mawˬ ve yoˬ. Mvuhˇ hpeu‸ la leh mvuhˇ teˇ pawˆ kʼaw‸ ba la ve yoˬ. Chi ve lehˬ, awˇ nyi teˇ nyi hpeh‸ ve yoˬ.
Oˇ ve hkʼaw‸ nawˉ Gʼuiˬsha lehˬ, Iˉ kaˆ hkʼaw a sha‸ te‸ chehˇ ve to nuˇ to shaˆ laiˉ ceuˬ cawˬ la piˇ-oˆ. Mvuhˇ naw ma hkʼoˆ lo htawˇ, ngaˆ teˇ hpaˍ hkʼa biˇ cawˬ la piˇ-oˆ, teh‸ kʼoˆ ve yoˬ. Gʼuiˬsha lehˬ, uiˍ jaˇ ve ngaˇ lonˉ teˇ hpaˍ, iˉ kaˆ hkʼaw lo chehˇ ve to nuˇ to shaˆ laiˉ ceuˬ leh poˬ puiˉ ve ngaˆ laiˉ ceuˬ ve hta‸ te hpanˍ taˍ ve yoˬ. Awˬ ceuˬ hkʼa peu-eˬ da‸ jaˇ ve hta‸ Gʼuiˬsha gʼa mawˬ ve yoˬ. Hkʼe te leh, Gʼuiˬsha yawˇ hui hkʼa peu-eˬ hta‸ bon na‸ piˇ leh, iˉ kaˆ hkʼaw chehˇ ve to nuˇ to shaˆ teˇ hpaˍ hta‸ maˇ kʼoˆ, ngaˆ teˇ hpaˍ hta‸ maˇ kʼoˆ, uiˍ la maˇ la tuˬ tawˇ piˇ ve yoˬ. Mvuhˇ hpeu‸ la leh mvuhˇ teˇ pawˆ kʼaw‸ ba la ve yoˬ. Chi ve lehˬ, ngaˇ nyi teˇ nyi hpeh‸ ve yoˬ.
Oˇ ve hkʼaw‸ nawˉ Gʼuiˬsha lehˬ, Miˬguiˬ hkʼoˆ lo meuˇ ve leh haiˬ ve to nuˇ to shaˆ maˇ kʼoˆ, uiˍ ve leh i ve to nuˇ to shaˆ maˇ kʼoˆ, laiˉ ceuˬ ve hkʼa biˇ cawˬ la piˇ-oˆ, teh‸ kʼoˆ ve yoˬ. Gʼuiˬsha kʼoˆ ve hkʼe hpeh‸ la ve yoˬ. Hkʼe te leh Gʼuiˬsha lehˬ, awˬ ceuˬ chi hkʼa peu-eˬ hta‸ te hpanˍ taˍ ve yoˬ. Awˬ ceuˬ chi hkʼa peu-eˬ da‸ jaˇ ve hta‸ Gʼuiˬsha gʼa mawˬ ve yoˬ.
Oˇ ve hkʼaw‸ nawˉ Gʼuiˬsha lehˬ, Ngaˇ teˇ hpaˍ, ngaˆ teˇ hpaˍ, meuˇ ve leh haiˬ ve to nuˇ to shaˆ, uiˍ ve leh i ve to nuˇ to shaˆ, chi hkʼa peu-eˬ hta‸ uˉ peunˍ tuˬ ngaˬ hui ve awˬ ho‸ awˬ han hta‸ shuˍ da‸ ve chaw yaˇ hta‸ te hpanˍ-a veuˬ, teh‸ kʼoˆ ve yoˬ. Hkʼe te leh, Gʼuiˬsha lehˬ Yawˇ ve awˬ ho‸ awˬ han hta‸ shuˍ da‸ ve chaw yaˇ hawˉ hkʼaˆ leh yaˇ miˇ hta‸ te hpanˍ ve yoˬ. Gʼuiˬsha yawˇ huiˉ maˬ hta‸ bon na‸ piˇ leh kʼoˆ ve, Yaˇ maˇ maˇ cawˬ la piˇ-oˆ. Chaw yaˇ teˇ hpaˍ miˬguiˬ hkʼoˆ biˇ la piˇ-oˆ. Ngaˇ teˇ hpaˍ, ngaˆ teˇ hpaˍ leh haiˬ ve to nuˇ to shaˆ hkʼa peu-eˬ ve awˬ hkʼoˆ hta‸ uˉ peunˍ chehˇ-oˆ. Nawˬ huiˉ maˬ caˇ tuˬ awˬ pon awˬ shiˍ awˬ nu laiˉ ceuˬ leh, iˉ shiˍ cehˬ laiˉ ceuˬ teh taˍ laˇ ve yoˬ. Awˬ hpa‸ nawˉ lehˍ cawˬ ve zuhˇ mvuh‸ teˇ hpaˍ lehˬ, haiˬ ve to nuˇ to shaˆ leh ngaˆ teˇ hpaˍ awˬ pon ngaˬ teh taˍ piˇ ve yoˬ, teh‸ kʼoˆ ve yoˬ. Gʼuiˬsha kʼoˆ ve hkʼe hpeh‸ la ve yoˬ. Gʼuiˬsha lehˬ, Yawˇ te hpanˍ taˍ ve awˬ ceuˬ teˇ hpaˍ hta‸ nyi leh da‸ jaˇ ve hta‸ gʼa mawˬ ve yoˬ. Mvuhˇ hpeu‸ la leh mvuhˇ teˇ pawˆ kʼaw‸ ba la ve yoˬ. Chi ve lehˬ, hkaw‸ nyi teˇ nyi hpeh‸ ve yoˬ.

Koute Awˬ hkuiˉ puiˍ ve li‸ 1