路加 6
6
安息日个問題
(馬太 12:1-8；馬可 2:23-28)
1有一個安息日，耶穌經過麥田；厥學生捋兜麥串，用手挼來食。 2有兜法利賽人講：「你等樣般做安息日禁止做个事？」
3耶穌應講：「大衛㧯跈佢个人肚飢个時做麼介，你等無讀過係麼？ 4佢入去上帝个聖殿，拿獻給上帝个餅來食，又分給跈佢个人食；食這個餅仔係違法个，因為只有祭司正做得食。」
5耶穌結論講：「人子就係安息日个主。」
醫好手瘸掉个人
(馬太 12:9-14；馬可 3:1-6)
6又有一個安息日，耶穌去會堂教示人；在該位有一個人，佢个右手瘸掉。 7有兜經學教師㧯法利賽人想愛尋耶穌个把柄來告佢，就在塍口掌等，愛看佢在安息日會為人醫病麼。 8耶穌知佢等个心思，就對該手瘸掉个人講：「䟘起來，企到頭前來！」該人就䟘起來企等。 9然後，耶穌對佢等講：「𠊎問你等，關係安息日，𠊎等个法律係樣般規定？愛做好事，抑係做壞事？愛救人，抑係㓾人？」 10佢用目珠䁯周圍所有个人，然後對該人，講：「手伸出來！」該人將手一伸出來，佢个手就好了。
11佢等非常譴，彼此參詳愛樣般來對付耶穌。
耶穌揀選十二個使徒
(馬太 10:1-4；馬可 3:13-19)
12有一日，耶穌上山去祈禱，在該位歸夜祈禱上帝。 13天光个時，佢召集學生到佢个面前來，對佢等當中選出十二個人，喊佢等做使徒。 14佢等係：西門 (耶穌又同佢安名彼得) 還有厥老弟安德烈，又有雅各，約翰，腓力，巴多羅買， 15馬太，多馬，亞勒腓个孻仔雅各，被人喊做激進黨个西門， 16雅各个孻仔猶大，㧯後來出賣耶穌个加略人猶大。
耶穌个教訓㧯醫病
(馬太 4:23-25)
17耶穌㧯使徒下山後，同盡多學生共下企在一個平个所在。有一大群个人對猶太全地、耶路撒冷㧯海滣个城市泰爾、西頓等地方來到該位， 18愛聽佢講道，也希望佢醫好佢等當中个病人；連該兜被邪靈㩢耍个也來，並得到醫好。 19大家攏總想愛摸佢，因為有能力對佢身上出來，醫好佢等。
福氣㧯災禍
(馬太 5:1-12)
20耶穌看等學生，對佢等講：
「你這兜窮苦人實在有福氣，
因為你等係上帝國个子民！
21「這下肚飢个人實在有福氣，
因為你等會有好食飽！
「這下哀傷流目汁个人實在有福氣，
因為你等會有大歡喜！
22「為到人子个緣故，有人怨恨你等，拒絕你等，侮辱你等，看你等做壞人，你等實在有福氣！ 23頭擺，佢等个祖先也係恁樣對待先知。該日，你等愛歡喜快樂，因為在天頂有為你等準備豐富个獎賞。
24「總係，有錢个人慘了！
因為你等已經享受安樂！
25「這下飽足个人慘了！
因為你等將來會餓肚笥！
「這下大歡喜个人慘了！
因為你等將來會哀傷流目汁！
26「大家攏總稱讚你等个時，你等就慘了！因為佢等个祖先對假先知也識講共樣个話。
論惜仇敵
(馬太 5:38-48；7:12)
27「總係，你這兜聽个人啊，𠊎㧯你等講：愛惜你等个仇敵，好款待怨恨你等个人； 28愛為咒詛你等个人祝福，為侮辱你等个祈禱。 29有人打你這片个嘴角，連該片也俾佢打！有人拿你个外衫，連內衫也給佢！ 30凡求你个，就愛給佢；拿你東西个，莫去拿轉來。 31你等愛別人樣般對待你等，就愛樣般對待佢等。
32「若係你等只有惜該兜惜你等个人，有麼介功德呢？連壞人乜惜該兜惜佢等个人！ 33若係你等只有好款待該兜好款待你等个人，有麼介功德呢？連壞人乜恁樣行！ 34若係你等只有借錢給有可能還錢个人，有麼介功德呢？連壞人乜借錢給壞人，後來正喊佢等還清所借个債！ 35總講，你等愛惜仇敵，好款待佢等；借錢給人，毋好希望收轉來。恁樣，你等會得到豐富个獎賞，同時，你等就正經係至高上帝个子女，因為佢也用慈悲款待該兜忘恩背義㧯邪惡个人。 36你等愛慈悲，就像你等个天父係慈悲个。
毋好論斷別人
(馬太 7:1-5)
37「毋好論斷別人，上帝就毋會審判你等；毋好定人个罪，上帝就毋會定你等个罪；愛赦免人，上帝就會赦免你等。 38你等給別人，上帝就會給你等，並用大个斗，連搖帶撳，湓流八線來倒給你等。你等用麼介東西量給別人，上帝也愛用共樣个東西量給你等。」
39耶穌又用比喻對佢等講：「瞙目个敢做得為瞙目个帶路嗎？若係恁樣，兩儕攏總會跌落窟肚去。 40學生無比先生較大，總係出師以後，就會像厥先生。
41「你做麼介單淨看到若兄弟目珠底背个草屑仔，總係無想到自家目珠底背个大樑呢？ 42你無看到自家目珠底背有大樑，樣般做得對若兄弟講：『兄弟，你目珠底背个草屑仔，𠊎代你挑出來』哪？假好个人啊，先將你自家目珠底背个大樑徙走，正看得清楚來挑若兄弟目珠底背个草屑仔。
樹仔㧯果子
(馬太 7:16-20；12:33-35)
43「好樹毋會結壞果子，壞樹也毋會結好果子。 44逐種个樹仔，對它个果子就做得認識它。你等毋會在竻叢中摘無花果，也毋會在蒺藜底背摘葡萄。 45好人心肝積善就發出善；壞人積惡就發出惡。因為心肝所裝滿个，嘴就講出來。
兩種起屋个人
(馬太 7:24-27)
46「你等做麼介喊𠊎『主啊，主啊』，總係毋照𠊎个話去行呢？ 47𠊎㧯你等講，逐個就近𠊎，聽𠊎个話去行个，係像㖠種个人呢？ 48佢像一個起屋个人，將地泥挖深，將根基放在磐石頂。發大水个時，屋被水沖到，總係毋會挺動，因為屋起到盡扎。 49總係，聽𠊎个話毋去行个人，係像一個人起屋在地上，無打地基，被水一沖，就橫掉，又橫到貼貼！」
Chwazi Kounye ya:
路加 6: THV12Hdb
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© The Bible Society in Taiwan, 2012
All rights reserved
© 台灣聖經公會版權所有 2012