Revelasyon 1:1-6

Men revelasyon Bondye te bay Jezikri pou l te fè sèvitè l yo konnen sa ki gen pou rive anvan lontan. Se Kris la menm ki voye zanj li bò kote Jan, sèvitè l la, pou fè l konnen tout bagay sa yo. Se menm Jan sa a k'ap rakonte tou sa li te wè. Li rapòte mesay ki sòti nan Bondye a ansanm ak verite Jezikri te fè l konnen an. Benediksyon pou moun k'ap li liv sa a. Benediksyon pou tout moun k'ap koute pawòl mesay sa a ki sòti nan Bondye, pou tout moun k'ap obeyi tou sa ki ekri nan Liv sa a, paske pa rete lontan ankò pou bagay sa yo rive. Se mwen menm Jan, k'ap ekri sèt legliz ki nan pwovens Lazi yo. M'ap lapriyè pou nou ka resevwa benediksyon ak kè poze ki sòti nan Bondye, li menm ki la, ki te toujou la epi ki gen pou vini an, benediksyon ak kè poze ki sòti nan sèt lespri yo ki kanpe devan fòtèy li a, benediksyon ak kè poze ki sòti nan Jezikri tou, li menm ki te bay verite a jan l ye a, li menm premye pitit ki leve sòti vivan nan lanmò a, li menm ki chèf tout wa ki sou latè. Kris la renmen nou, li bay san li lè li mouri pou l te ka delivre nou anba peche nou yo. Li fè nou tounen wa ak prèt pou n sèvi Bondye Papa li. Se pou li tout lwanj ak tout otorite pou tout tan. Amèn.