Matìù 13
13
Èngà̧teme ane wòt màsa èsaãaãme kǒ
(Mk 4:1-9; Lk 8:4-8)
1Ane àlia mbɔŋ, Yesò dzə a lob ngà ntsèke a ngèt *èdzî #13:1 Èdzî nè kěnto̧ a mbì wu sɔ̀lèwàta.. 2TaꞋà ènɔ̧̂ bòt e kɨꞋɨ̀ mbù̧ù̧tè a ngèt tò, kwat tè tà tsiꞋi sà àwɔb aguŋ ngà tseke a èbem ànkànuꞋ. 3Tà shu awɔb mènəè nyaŋ ane mèngà̧teme, nê, “Wòt kǒ li ndɔ̀Ꞌ ngà esà èsaãaãme. 4Mbɨ̀Ꞌɨ̀ tàa sà la, è weko e kwentè a èbuꞋ èlu̧, banɨ̧̀ e kɨꞋɨ̀ ngwȩ̀ȩ̀te, 5è weko e kwentè a ègwet èwu, kà ye ètsaꞋ nyaŋ. AdzìꞋ bê me wù̧ù̧ne e tuutè ndɨ̀ wu ètsaꞋ wu abot àa ndzàŋà la. 6Nyèm chu mbê ntò̧ èsaãaãme wu e tuute la, e yu̧ ndɨ̀ wu tèghaŋ tɔb tè bakà nyi a si ntsɔ̧̀ la. 7È weko e kwente a èbèm àdzɔ̧, a kɔꞋ nɨŋ. 8Ka è weko nè èsaãaãme e kwente adù̧ ètsaꞋ ntsɔ̧̀, nkɔꞋ nkɔ̀ɔ̀le, è weko tètaã ènkɨ̀, è weko èghem yentùa, è weko èghem yetat. 9Yesò me lìà nê, wòt bɔ̌ ètû̧, tà yute èngà̧ waa.”
Lə mèngà̧teme mu
(Mk 4:10-12; Lk 8:9-10)
10ÀfɨꞋa mbɔŋ, bɔkatè Yesò e kɨꞋɨ mbììte atò nê, “À ghɨ̀ na ka me làꞋa abua bòt bu ane mèngà̧teme à?”
11Yesò bɨ̀ɨ̀lè nê “Bɔ ŋa wɨ̧ èyì a mànkoa ènəê ndô̧ kèfɔ̧̀ Mbɔ̧ɔ̧mà, ka bɔ̀ ka ŋa abua bòt ngɔ̀ŋ yaa, 12nkàà nê bɔɔ kwèꞋne àghɨ wòt bɔ la, aa yaãaã te me bəèꞋte, ka wòt kà bɔ àghɨ bɔɔ paa ka wuê adzìꞋ wu tà bɔ la enɨ. 13Lə màa ndàꞋà abua yɔb ane mèngà̧teme la wu nê,
‘Bɔ̀ɔ ndɨ̀ŋkà bɔ̀ ka ye,
njùtâ bɔ̀ ka zə,
bɔ̀ ka meè ngua nkòa mènəè.’
14Ale, ànəa ndàꞋàtɔŋ Mbɔ̧ɔ̧mà Àsayà li shu la a wu nkûŋ ane yɔb:
‘Bɨa lâ zə ka à ka nyi àtsəa yɨ̧,
mè ndâ ndɨ̀ŋkè ka bɨ̀ ka ye.
15Nkàà nê bòt baa e bakà ghaꞋa mèntɨ̧ɨ̧ mɔb,
mbɔ̂ nchùkte ètû̧ bɔb
mè nkàte àghɨ ayɔb.
Mbɨ̀Ꞌɨ̀ ka bɔ gha ghɨ̌ nɨ̀ àghɨ ayɔb ndze,
mè nɨ ètû̧ bɔb ndzə,
ndɔ̀Ꞌ nko ane mèntɨ̧ɨ̧ mɔb,
ngèble awɔb nkɨ̀Ꞌɨ̂ maa bə awɔb.’
16È me wu awɨ̧ ko bɨ wu ane ntsɔ̧̀ nkàà nê, àghɨ ayɨ̧ aa ndzea, ètû̧ bɨ̧ e zəa. 17Ane nkûŋ, tsiꞋ è shu awɨ̧ nê, bèndàꞋàtɔŋ Mbɔ̧ɔ̧mà nyaŋ, nè bòt mènəè ntsɔ̧̀ e li ngua ntsènà è nkɨ eye àghɨa bɨ̀a ndzèa la ka bɔ̀ ka ye, mè nkɨ ezə àghɨa bɨ̀a ndzəèa la, ka bɔ̀ ka zə.
Yesò shu lə èngà̧teme wòt màsa èsaãaãme wu
(Mk 4:13-20; Lk 8:11-15)
18“Bɨ̀ zə lə èngà̧teme wu ane wòt wu tà li nga esà èsaãaãme vi la. 19Wòt nàa ngɨ̀ tà zə èngǎ̧ kèfɔ̧̀ Mbɔ̧ɔ̧mà, è bakà nyi èntɨ̧ɨ̧ tò ntsɔ̧̀, Satàn wòt kàbɔ̀ŋ kɨ̀Ꞌɨ̂ ntsì wùà. Eyaa wu mbɨ̀Ꞌɨ̀ èsaãaãme wu e kwente èbuꞋ èlu̧ la. 20Èsaãaãme wu e kwente a ègwet èwu la e wua nyɨ̀Ꞌta bòt bu bɔ zə èngà̧ wu, mbê mbɨ̧̀ɨ̧̀ne nè mèngùꞋte, 21ka bɔ̀ ka zi èntɨ̧ɨ̧ wɔb adù̧, è ka tseke ane àfɨ̀Ꞌ à seè la. ÀfɨꞋa ngoꞋ kɨꞋɨ̀, kò bòt e me kɨ àtsəa yɔb enɨ ambo èngǎ̧ mbɔŋ la leꞋ, bɔ bê ntû̧ wùà. 22Èsaãaãme wu e kwente a èbèm àdzɔ̧ la, e wu mbɨ̀Ꞌɨ̀ bòt bu bɔ zə èngà̧ waa ka ndɨ̀ wu bɔ̀ɔ ndèbà ènyit yɔb ane èghɨ sitsǎꞋ nè èkɔŋ èghɨ èkab nyaŋ la, èngǎ̧ mbɔŋ è ka tsi mbɔ̌ àdziꞋ a èntɨ̧ɨ̧ wɔb, e tsiꞋi tsè àku. 23È me wu èsaãaãme wu e kwente a si ntsɔ̧̀ la, e wu mbɨ̀Ꞌɨ̀ bòt bu bɔ zə èngà̧ wu e nyi àtsəa yɔb bɔ me ghɨ̀ àghɨa e shua la tè ntsìꞋi mbɨ̀Ꞌɨ̀ èsaãaãme wu e kɔɔle tètaã ènkɨ̀, è weko èghem yentùa nè weko èghem yetat la.
Èngà̧teme ane èfəèꞋ kàbɔ̀ŋ
24“Yesò ghɨ̀ ale, mè nê betsiꞋa bɔ fɨ̀Ꞌne a Kèfɔ̧̀ Mbɔ̧ɔ̧mà ane èngà̧teme wàà. Wòt kǒ lè lɔꞋ sà èsaãaãme ntsɔ̧̀ a mbȩ zi, 25ka àfɨꞋa bɔ̀ɔ ndìa la, wɔ̀mbù̧ tò kɨ̀Ꞌɨ̂ sà èsaãaãme afəèꞋ kàbɔ̀ŋ a kètsìà èsaãaãme tò wu. 26Èsaãaãme wu e tseke tè ntsə mbùꞋ me kweele, èwe kàbɔ̀ŋ wu e kɔꞋɔ azi mɨ̧̂.
27“BɔfàꞋ ŋut wu e kɨꞋɨ̀ mbììte atò nê, ‘Tê, ka èsaãaãme wu à li sa a mbȩ yê la li ngu è we ntsɔ̧̀ à? Ale, afəèꞋ kàbɔ̀ŋ dzəa nè ŋǎ a kètsìà à?’
28“Tà bɨ̀ɨ̀lè nê, ‘wɔ̀mbù̧ ko ka tà ghɨ̀ ale la’. BɔfàꞋ tò bu e mè mbììte atò nê, ‘Tè bà gha ntsɔ̀Ꞌɔ afəèꞋ kàbɔ̀ŋ wu ntsì?’
29“Tà nê, ‘ChaꞋ, bɨ̀ tsiꞋ è wu ale, mbɨ̀Ꞌɨ̀ ka bɨ gha mbèla ntsɔꞋta fà̧ ntsɔ̀Ꞌta nè èwe ntsɔ̧̀ wu. 30TsiꞋ è me fɔte ntsəèa tè àfɨꞋa màfuꞋa à kuꞋa. ÀfɨꞋa mbɔŋ ko maa shu abua bòt bu nga efuꞋu la nê, Bɨa ghǎ bɨ̀ tsɔꞋ, bɨ bɨ̀ fete afəèꞋ kàbɔ̀ŋ wu, nkùùle ane tebuꞋtsə ntò̧, mbɔ̂ fetê èbe ntsɔ̧̀ bu nɔ̀ŋe ngǒ yaã.’ ”
Èngà̧teme ane èsaãaãme èwuu maŋkaŋa kǒ
(Mk 4:30-32; Lk 13:18-19)
31Yesò li mè ntème èngà̧ ko abua yɔb nê, “Kèfɔ̧̀ Mbɔ̧ɔ̧mà wu mbɨ̀Ꞌɨ̀ èsaãaãme èwuu maŋkaŋa kǒ wòt kǒ sǎ a mbȩ zi la. 32Èsaãaãme mbɔŋ e koo te ntsè èsaãaãme ègème, ka àa ngɨ̀ è tsə, e faŋ ntsè èghɨjɨ ègème bɔ liꞋi a mbȩ la, tè ntsiꞋi mbɨ̀Ꞌɨ̀ àyɨt, tè banɨ̧̀ bu bèa ndèa la e me kɨꞋa nkùùla tèjî tɔb adù̧ mèntaãaã tò.”
Èngà̧teme ane yis
(Lk 13:20-21)
33Yesò mè shu awɔb èngà̧teme ko nê, “Kèfɔ̧̀ Mbɔ̧ɔ̧mà wu mbɨ̀Ꞌɨ̀ yis wu naa ngɨ̀à ka bled è kɔ̀Ꞌa la. Àvi nàa ngɨ̀ tà nɨ̀ adzìꞋ ntɔ̀bte ane bapfəèꞋ fàlawà batat è tsekè tè ngȩȩne a èbem fàlawà wu ègème ngɨ̀ è kɔꞋ.”
Yesò làꞋ ane mèngà̧teme
(Mk 4:33-34)
34Yesò li ngua nɨa mèngà̧teme ka shua wɔb mènəè maa ègème. Tà le kaꞋa wua mbê ndàꞋà ànəê abua yɔb kà zi ane èngà̧teme. 35Tà li ngɨ̀ anè, mbɨ̀Ꞌɨ̀ e ghɨ̌ àghɨa ndàꞋàtɔŋ Mbɔ̧ɔ̧mà li shu la aa wu nkûŋ nê,
“Maa me laꞋa abua yɔb ane mèngà̧teme.
Maa shu awɔb èghɨ kà bɔ li te mè ko,
ebuꞋu tee àfɨꞋa Mbɔ̧ɔ̧mà li ngɨ̀ ngɔ̀ŋ la.”
Lə èngà̧teme wu ane àfəèꞋ kàbɔ̀ŋ la
36AfɨꞋa mbɔŋ Yesò sà ènɔ̧̂ bòt bu nga a lob, me ghǎ bɔkatè tò e kuŋe atò, shu abua tò nê, “Shu awa lə èngà̧teme wu ane afəèꞋ kàbɔ̀ŋ wu a mbȩ la.”
37Yesò bɨ̀ɨ̀lè nê, “Wòt wu tà sà èsaãaãme ntsɔ̧̀ la, wu mbɨ̀Ꞌɨ̀ Waã Wòt, 38mbȩ yu wu mbɨ̀Ꞌɨ̀ ngɔ̀ŋ yaa, èsaãaãme ntsɔ̧̀ wu wu bòt bu bɔ̀ɔ ndzəa mènəè kèfɔ̧̀ Mbɔ̧ɔ̧mà la. AfəèꞋ kàbɔ̀ŋ wu, wu mbɨ̀Ꞌɨ̀ bòt Satàn wòt kàbɔ̀ŋ. 39Tà wu wòt wu tà sà afəèꞋ kàbɔ̀ŋ wu la, nkàà nè tà wu wɔ̀mbù̧ tǎt mbȩ yu. Àlia màfuꞋa yu wu àlia ngɔ̀ŋ nàa li lìà la, bòt màfuꞋa bu wu bɔntu̧ Mbɔ̧ɔ̧mà.
40“Èlɨ bɔ̀ɔ fèta afəèꞋ kàbɔ̀ŋ wu ntò̧à a èbem èwet la, wu èlɨ bɔ̀ɔ li ghɨ̀ ane bòt kàbɔ̀ŋ àfɨꞋa ngɔ̀ŋ nàa li lìà la. 41Waã Wòt naa li tsà bɔntu̧ bi, bea kɨꞋɨ etsǐ èghɨ ègème àa ngɨ̀a kàbɔ̀ŋ la, nè bòt bàgème bɔ̀ɔ ngɨa kàbɔ̀ŋ la a èbem kèfɔ̧̀ vi. 42E tsǐ emàꞋà wɔb a èbem èwet kekweelè àdziꞋa bòt àa me dɨ̀a nkwèla àsɔŋ yɔb ane ntso la. 43Ka bòt bɔ tɨ̧ɨ̧ ndɨŋndɨ̀ŋ e mbì Mbɔ̧ɔ̧mà la e wu li me kàꞋà mbɨꞋɨ̀ àtaãnyèm àdziꞋa ngɔ̀ŋ fi tǎt wɔb Mbɔ̧ɔ̧mà. Wòt bɔ ètû̧, tà yute èngà̧ waa.
Èngà̧teme ane ngule àghɨa èkab àko
44“Kèfɔ̧̀ Mbɔ̧ɔ̧mà wu mbɨ̀Ꞌɨ̀ àghɨa èkab àko bɔ̀ lè lɔ̂Ꞌ ndò̧ a èbemebàꞋ wòt kǒ ghà ntùꞋ mbɔ̂ mè nkàbtê la. Tà ghɨ̀ ale, a taꞋa bɔ̌ tò tè tà ghà fɨ̧̀ɨ̧̀tè èghɨ bi ègème nɨŋ njù̧ èbaꞋa mbɔŋ.
Èngà̧teme ane èwuu àtia ntsɔ̧̀ àko
45“Kèfɔ̧̀ Mbɔ̧ɔ̧mà mè ngu mbɨ̀Ꞌɨ̀ ànəa wòt èwen kǒ tà lè wua ngà̧aã nkɨà èwuu àtia ntsɔ̧̀ àko a taꞋa wua nyia èkab la. 46È tseke tè ngu ane àli ako tà ye e le ntsɔ̧̀ ko e ghe àa mbɔ̀ la, ngà fɨ̧̀ɨ̧̀te èghɨ bi ègème nɨŋ njù̧ èti lu.
Èngà̧teme ane tasat
47“Kèfɔ̧̀ Mbɔ̧ɔ̧mà mè ngu mbɨ̀Ꞌɨ̀ ànəa bòt bɔ maꞋa tasat a èbem *èdzî nɨa mbà̧ tèwuute basə tègème la. 48ÀfɨꞋa è lu̧ la bɔ səèŋ nɨŋ nkɔ̀Ꞌɔ aguŋ ntsèke a si ndàà èbe ntsɔ̧̀ ndzi a èbem èghɨ mbɔ̂ ngwàꞋ èbe kàbɔ̀ŋ. 49Aa li wu èlɨ waa àlia ngɔ̀ŋ nàa li lìà la. Bɔntu̧ Mbɔ̧ɔ̧mà aa li nkɨ̀Ꞌɨ̂ ndàà bòt kàbɔ̀ŋ ntsì ane bòt Mbɔ̧ɔ̧mà, 50màꞋà wɔb a èbem èwet kekweelè àdziꞋa bɔ̀ɔ li me dɨ̀a nkwèla àsɔŋ yɔb ane ntso la.”
Mènəè fi nè mènəè nyaꞋ
51Yesò ghɨ̀ ale, mbììte bɔkatè bi nê, “Bɨ zə ènəê baa ègème kè naa?” Bɔ bɨ̧ɨ̧nè nê “Oò Tè.”
52Tà mè shu abua yɔb nê è wu ale, nyɨꞋtà mbɨ̧tsə tà tsiꞋi wakatè a kèfɔ̧̀ Mbɔ̧ɔ̧mà la, wu mbɨ̀Ꞌɨ̀ tǎt lob wu tàa ngɨ̀ tà tsɔꞋɔ àtsəa lob zi ntsì èghɨ ntsɔ̧̀ fi bi nè èbe nyaꞋ àfɨꞋa tà kɔ̀ŋkè la.
Bɔ tû̧ èngǎ̧ Yesò a Nazàlet
(Mk 6:1-6; Lk 4:16-30)
53Mbɨ̀Ꞌɨ̀ Yesò è paa a màndaꞋa mèngà̧teme màa la, tà lɔ̀Ꞌ abot 54ngwènè àlaꞋ azi. Tà ghà ale, me nyɨꞋte awɔb a èbem lob Mbɔ̧ɔ̧mà yɔb. A taꞋa tsě bòt bu njùtâ la, tè bɔ tsiꞋa mbììta nê “Mbê waa li nchɨɨme nɨ̀ èwuu èyì waà, nè èwuu mènəè kà ye fɨ̀Ꞌ màà nèŋàà? 55Tè eyaa ntsě waã kapentà wuù? Ka Màlià wu nyɨ̌ tò à? Ka Jimsì bɔ̂ Jòsêb nè Simùn bɔ̂ Judàs wu bɔnyɨ tò à? 56Ka bɔnyɨ tò bɔɔ̀zi aà ntsèka ba tò ba à? Tà nɨ̀ èwuu èyì wàa nè mètàŋ maà nèŋàà?” 57Ale, bɔ ntû̧ èngǎ̧ tò.
Yesò shu abua yɔb nê, “Bɔɔ nkùkta ndàꞋàtɔŋ adzìꞋ àgème, tè tsìꞋi wuê bòt àlaꞋ atò nè bòt àndǎ̧ tò.”
58Tà li tà kà ghɨ ènəê kà ye fɨ̀Ꞌ abot nyaŋ ndɨ̀ wu bɔ li bɔ̀ ka zi èntɨ̧ɨ̧ wɔb ane tò la.
Chwazi Kounye ya:
Matìù 13: mnf
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2006, Cameroon Association for Bible Translation and Literacy