Utumbulilu 7
7
Machi ghamaheli ghauyeka ndema
1Bambo Chapanga akumpwaghi Nuhu, “Ujingala mkati ja safina wehapa papamu na bhana bhaku bhokapi, maghambu pachilanda ja bhandu bhokapi bhabhatama mu chibheleku chenjenu, nukuweni wehapa kanjika jaku nde undongwana palongi jangu. 2Utolaje hinyama yokapi yeibhi inyahi, chikambaku na chimbomba, saba saba, nambu hinyama ihakau, utola chikambaku na chimbomba, ibheli ibheli. 3Bhelabhela utola hijuni ya kunani chikambaku na chimbomba, saba saba, nahuli kuilenda ibya yomi imbeju yabhu panani ja ndema wokapi. 4Kwa ndandi paghipeta machobha saba, ananijitenda iyula kutonya pundema kwa machobha alobaini muhi na ikilu, na kila chiumbi chechibhi chomi chenichibhombiki panani ja ndema ananichiyonangaje.” 5Nuhu akahengiki ghokapi ngati Bambo moakundaghalakile.
6Nuhu akabhi na hyaka mia sita chikahi ghalika pajapitalili panani ja ndema. 7Nuhu na nhwanu waki, bhana bhaki na akabhahanu bhabhu bhakajingili mkati ja safina nahuli kujijepa ghalika. 8Hinyama yeibhi inyahi, hinyama ihakau, hijuni na ihumbi yokapi yeikwabha panani ja ndema, 9ibheli ibheli, chimbomba na chikambaku, yakajingili mu safina papamu na Nuhu, ngati Chapanga moakundaghalaki Nuhu. 10Paghapetiki machobha saba ghala, machi gha ghalika ghakatweli pundema.
11Mu chaka cha mia sita cha matamu ghaka Nuhu, mwehi wa kabheli, lichobha la kumi na saba la mwehi ghonihoghu, lichobha leniheli chemichemi yokapi hata yeibhi pahi nakanopi ja luhombi yakapitiki kwa makili, na madilisha gha kunani kumahunde ghakahowike. 12Iyula jakatonyiki panani ja ndema, machobha alobaini muhi na ikilu. 13Lichobha lelalela iyula pajitumbula kutonya, Nuhu na nhwanu waki, Shemu, Hamu na Yafeti, papamu na akabhahanu bhabhu, bhakajingili mkati ja safina. 14Bhakajingi bhombi papamu na kila ntundu wa chinyama cha muchitengu, hinyama yeidimakika, hinyama yokapi yeikwabha na kila ntundu wa ijuni. 15Na ihumbi yokapi yeibhi yomi yakahiki kwaka Nuhu ibheli ibheli, na kujingila mu safina. 16Kila ntundu wa hinyama yakajingili chikambaku na chimbomba, ngati Chapanga moakundaghalaki Nuhu. Na panihapa Bambo akunjighali mkati.
17Ghalika jakajendali kubha panani ja ndema kwa machobha alobaini. Machi ghakajonjukiki na kujijinula safina, na kujebhela panani ja ndema. 18Machi ghakatwelili na kujonjukeka nakanopi panani ja ndema, na safina jakajebhili panani ja machi. 19Machi ghakajonjukiki namaa kutwelela panani ja ndema, na kuiyeka itombi yokapi ilachu yeibhi pundema. 20Machi ghakajendali kutwelela hata kuiyeka itombi kwa mikwamba kumi na nhwanu kujenda pahi. 21Kila chiumbi chomi chekijenda panani ja ndema chakapotile: Hijuni, hinyama ya kudimakika, hinyama ya muchitengu, kila chiumbi chechikwabha panani ja ndema na bhandu bhokapi. 22Kila chiumbi chechibhi na mbomu ja womi muimbuulu jaki chakapotile, na kila chechabhili panani ja ndema chakapotile. 23Chapanga akayoningi kila chindu chechabhi chomi pundema: Bhandu, hinyama, ihumbi yeikwabha na hijuni ya kunani. Yokapi yakayonangike pundema. Nuhu pela nde joakahighalile papamu na bhala bhabhakabhi papamu naku mu safina. 24Machi ghanihagha ghakajendali kutamakila panani ja ndema kwa machobha mia moja na hamsini.
Chwazi Kounye ya:
Utumbulilu 7: MpBV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The New Testament in Mpoto Language ©The Word for the World International and Mpoto Language Translation, 2020 All rights reserved.