ሉቃሳ 7

7
ዬሱሲ ፄቱዋ ካፑዋ ቆማ ፓዳ
(ማት 8፡5-13፤ ዮህ 4፡43-54)
1ዬሱሲካ ሃዋ ኡባ ኣሳ ሲንን ሃሳይ ዉርሶዋፔ ጉዪያን ሂኒ ቂፊሪናሆማ ቤዳ። 2ሄዋንካ ኢቲ ፄቱዋ ካፑ ዴዔ። ኢ ዳሮፔ ዶሲያ ኣ ቆማይ ሃርጊዴ ሃያናው ማቴዳ። 3ኢካ ዬሱሳባ ሲሴዳ ዎዴ፥ ባሬ ቆማ ዎሲዴ ፓና ማላ ዪሁዳ ጪማቱዋ ሂኒ ኣኮ ኪቴዳ።
4ኡንቱንቱካ ዬሱሳኮ ዪዴ፥ «ሃ ቢታኒ፥ ኔኒ ኣ ማዳናዳን ዳሮፔ ኮዬዳ፤ 5ጋሱካ ኑ ኣሳ ኢ ዳሮፔ ዶሲዴ ኣዪሁዳቱዋ ዎሲያ ጎሊያ ኬፂሶዌካ ኣ» ያጊዴ ዳሮፔ ዎሴዲኖ።
6ዬሱሲካ ኡንቱንቱና ኢቲፔ ቤዳ። ኢካ ሂኒ ጎሊያ ሄራ ጋኬዳ ዎዴ ፄቱዋ ካፑ ባሬ ላጌቱዋ ባሬኮ ፄሲዴ፥ «ታ ጎዳው፥ ዳቡሮፓ፤ ኣዪሲ ጎፔ፥ ኔና ታ ጎሊያ ካራፔ ጋርሳ ባጋና ጌልሳናው ታው ቤሴና። 7ሃዋ ዲራው ኔ ሲንን ኤቃናዉካ ሃራይ ኣቶ ቤሲያዋ ጊዲኬ። ሺን ኔኒ ቃላ ፃላላ ኦዳ፤ ታ ቆማይካ ፓፃናዋ። 8ታኒ ታፔ ቦላና ማታይ ዴዒያዋንቱሲ ኤኖ ጋዴ ዴዒያ ኣሳ። ታፔ ጋርሳናካ ታኒ ኪቲሲያ ዎታዳራቱ ዴዒኖ። ኢቱዋ፥ ‹ባ› ያጊያ ዎዴ፥ ቤ፤ ሃራካ ቃይ፥ ‹ሃያ› ጎፔ ዬ። ታ ቆማይካ፥ ሃዋ ‹ኦ› ጊያ ዎዴ ኣዛዜቴ፤ ኦ» ያጌዳ።
9ዬሱሲካ ሃዋ ሲሲዴ ኣ ዬዉዋን ማላሌቴዳ፤ ጉዬ ሲሚዴ ኣ ካሊያ ዳሮ ኣሳ፥ «ታኒ ሂንቴንቶ ቱሙዋ ጋይ፤ ታኒ ሃዋ ማላ ኣማኑዋ ሃራይ ኣቶ፥ ኢስራዔሊያ ጋርሳንካ ቤዓቤይኬ» ያጌዳ። 10ካሴ ኪቴቴዳ ኣሳቱካ ፄቱዋ ካፑዋ ጎሌ ጉዬ ሲሚያ ዎዴ፥ ኣ ቆማይ ፓፆዋ ቤዔዲኖ።
ዬሱሲ ኣምዓቲ ናዓ ሃይቁዋፔ ዴንዳ
11ዎንቲሳ ጋላሲ ዬሱሲ ባሬና ካሊያዋንቱናኔ ጮራ ኣሳና ኢቲፔ ናይኖ ጌቴቲያ ካታማቶ ቤዲኖ። 12ዬሱሲ ካታማ ጋካና ማቶ ዎዴ፥ ኣሳይ ሃይቄዳ ኣኃ ቶኪዴ ኬሴዲኖ። ሃይቆዌካ ባሬ ዳዪው ሜፂ ኢቲ ናዓ፤ ኣታካ ኣሲናይ ባይና ኣምዓቶ። ዳሮ ካታማ ኣሳይካ ኢዞ ካሌዲኖ።
13ዬሱሲካ ኢዞ ቤዔዳ ዎዴ ቃሬቲዴ፥ «ዬኮፓ!» ያጌዳ። 14ሺቂዴ ሻንቻማ ቦቼዳ፤ ቶኮዋንቱካ ኤቄዲኖ። ዬሱሲ፥ «ኔኖ ያላጋው፥ ዴንዳ ጋይ!» ያጊና፥ 15ቢታኒ ሱሪ ኡቴዳ። ሃሳያካ ዶሜዳ። ዬሱሲካ ኣ፥ ኣ ዳዪው ኢሜዳ።
16ኡባይካ ያሻን ኩሚዴ፥ «ዎልቃማ ናቢ ኑ ጋርሳን ዴንዴዳ፤ ፆሳይካ ባሬ ኣሳ ኣሻናው ዬዳ!» ያጊዴ ፆሳ ጋላቴዲኖ። 17ሄዌኔካ ዬሱሳ ዋሪ ዪሁዳ ዩሹዋን ዴዒያ ጋዲያ ኡባን ሲሴቴዳ።
ፃማቂያ ዮሃኒሳ
(ማት 11፡1-19)
18ዮሃኒሳ ካሊያዋንቱ ሃኖዋ ኡባ ኣው ኦዴዲኖ። ዮሃኒሲካ ባሬና ካሊያዋንቱፔ ላዓቱዋ ፄሲዴ፥ 19«ያናዌ ኔኔዬ? ዎይ ኑኒ ሃራ ናጋኔ?» ያጊ፥ ኡንቱንቱ ኦቻና ማላ ሂኒ ዬሱሳኮ ኪቴዳ።
20ኣሳቱካ ዬሱሳኮ ዪዴ፥ «ፃማቂያ ዮሃኒሲ፥ ያና ጌቴቴዳዌ ኔኔዬ? ዎይ ሃራ ናጋኔ? ያጊዴ ኦቻና ማላ ኔኮ ኪቴዳ» ያጌዲኖ።
21ሄ ዎዲያን ዬሱሲ ጮራ ኣሳ ዱማ ዱማ ሃርጊያፔ ፓዳ፤ ቱና ኣያናቱዋካ ኣሳፔ ኬሴዳ፤ ጮራ ቆቃቱዋ ኣይፊያ ዶዬዳ። 22ዬሱሲካ ዮሃኒሲ ኪቶዋንቶ፥ «ቢዴ ሂንቴንቱ ቤዔዳዋኔ ሲሴዳዋ ዮሃኒሳው ኦዲቴ፤ ቆቃቱ ፄላናዋንታ፤ ጉንዳቱ ሃሜታናዋንታ፤ ኦሉ ኦይቆዋንቱ ጌያናዋንታ፤ ቱሌዳዋንቱ ሲሳናዋንታ፤ ሃይቄዳዋንቱ ዴንዳናዋንታ፤ ሂዬሳቱዋሲካ ሚሺራቹዋ ቃላይ ኦዴታናዋ። 23ታናን ቤቴና ኣሳይ ኡባይ ኣንጄቴዳዋንታ» ያጌዳ።
24ዮሃኒሲ ኪቴዳዋንቱ ቢዲጎዋፔ ጉዪያን ዬሱሲ ኣሳው ዮሃኒሳባ ኦዱዋ ዶሜዳ፡ «ኣያ ቤዓናው ቢታ ባዙዋ ኬሴዲቴ? ጫርኩ ቃያ ኡሱን? 25ዎይ ኣያ ቤዓናው ኬሴዲቴ? ሎዖ ማዩዋ ማዬዳ ኣሳ ዴዑዋ? ሎዖ ማዩዋ ማዬዳዋንቱኔ ባሬና ጊጊሲያዋንቱ ካቲያ ጎሌን ዴዒኖ። 26ዎይ ኣያ ቤዓናው ኬሴዲቴ? ናቢያ ቤዓናው ኬሴዲቴ? ኤ፤ ታኒ ሂንቴንቶ ያጋይ፤ ሂንቴንቱ ቤዓናው ኬሶዌ ናቢያፔካ ኣዋ። 27ፆሳ ማፃፋን፥ ‹ኔ ኦጊያ ኔፔ ሲንና ጊጊሲያ ኪታንቻ ኔፔ ሲንያዴ ኪታና› ጌቴቲ ዮሃኒሳባይ ፃፌቴዳዌ ሃዋ። 28ማጫዋንቱፔ ዬሌቴዳዋንቱ ጋርሳን ፃማቂያ ዮሃኒሳፔ ኣያ ኦኒኔ ባዋ። ፆሳ ካዉቴን ቃሲ ኡባፔ ላፋ ጌቴቲያዌካ ኣፔ ኣናዋ» ያጌዳ።
29ሃራይ ኣቶሺን ቃራፃ ኬሲያዋንቱ ኣቴናን ሃዋ ዬሱሲ ሃሳዮዋ ሲሴዳ ኡባይ ዮሃኒሳ ኩሺያን ፃማቄቶዋንቱ ፆሳው ቤሲያ ቦንቹዋ ኢሜዲኖ። #ማት 21፡32፤ ሉቅ 3፡12 30ሺን ሂጊያ ታማሪሲያዋንቱኔ ፓሪሳዋቱ ዮሃኒሳን ፃማቄቲቤና ዲራው፥ ፆሳይ ኡንቱንቶ ቆፔዳዋ ኢፄዲኖ።
31ዬሱሲ፥ «ሲሚ ታኒ ሃ ዎዲያ ኣሳ ኣያና ሌሚሶ? ኡንቱንቱ ኣያ ማላቲኖ? 32ኡንቱንቱ ጌያሳን ኡቲዴ ኢቱ ኢቱዋ ፄሲዴ፥ ‹ሱሱሊያ ሂንቴንቶ ፑኒናካ
ካዒቤይኪታ፤
ዬኩዋ ዬ ኬሴዶሺንካ
ዬኪቤይኪታ
ያጌቲያ ናና ማላቲኖ› ጌዳ።
33ፃማቂያ ዮሃኒሲ ቁማ ሜናን ዎዪኒያ ኤሳካ ኡሼናን ዪና፥ ‹ኣ ቦላን ጋሌናይ ዴዔ› ያጌዲታ። 34ታኒ ኣሳ ናዓይ ማዴኔ ኡሻዴ ዪና፥ ‹ሃዌ ናፊሳማ፤ ዎዪኒያ ኤሳካ ኡሺያዋ፤ ቃራፂያዋንቶኔ ናጋራንቻቶ ዳቡዋ› ያጊታ። 35ጊዶፔ ኣቲን ፆሳ ኣ ኤራቴይ ባሬ ኦሱዋን ቱማ ጊዲዴ ቤቴዳ» ያጌዳ።
ፓሪሳዊያ ሲሞና
36ፓሪሳዋቱዋፔ ኢቱ ባሬናና ቁማ ማና ማላ ሾቢና፥ ዬሱሲ ኣ ሶይ ቢዴ ማናው ኡቴዳ። 37ሄ ካታማን ናጋራንቻ ጌቴቴዳ ኢቲ ሚሺራታ ዴዔዉና፥ ዬሱሲ ኣ ሶዪን ኡቴዳዋ ሲሳዴ፥ ኣልባስፂሮሳ ጌቴቲያ ሹቻፔ ኦሴቴዳ ቢልቃሲያ ኩሜዳ ሺቱዋ ኣካ ያዱ። 38ጉዬና ኣ ጌዲያ ማታን ኤቃዴ፥ ዬካዴ ኣ ጌዲያካ ባሬ ኣፎን ኦካ ዶማዱ፤ ኢዚ ኣፎይ ባዪዜዳ ኣ ጌዲያካ ባሬ ሁጲያ ቢናናን ቁጫዴኔ ኣ ጌዲያ ዬራዴ ጌዲያን ሺቱዋካ ጫጫፋዱ። #ማት 26፡7፤ ማር 14፡3፤ ዮህ 12፡3 39ዬሱሳ ባሬ ሶይ ፄሴዳ ፓሪሳዊካ ሃዋ ቤዒዴ፥ «ሃዌ ናቢያ ጊዴዴንቶ፥ ሃና ኣ ቦቺያ ሚሺራታ ኦኔንቶኔ ቃይካ ኢዛ ናጋራንቻ ጊዲያዋ ኢ ኤራናሺን» ያጌዳ።
40ዬሱሲካ ዛሪዴ፥ «ሲሞና፥ ታኒ ኔው ኦዲያ ዬዉ ዴዔ» ያጊና፥
ሲሞኒካ፥ «ታማሪሲያዎ፥ ኦዳ» ያጌዳ።
41ዬሱሲ፥ «ኢቲ ቢታኒያፔ ሚሻ ታልዔዳ ላዑ ኣሳቱ ዴዒኖ። ኢቱዋ ማታን ኢቼሹ ፄቱ ዲናሪ፥ ቃይ ዮኩዋ ማታን ኢሻታሙ ዴዔ። 42ላዓቶካ ጪጊያዌ ዪና፥ ላዓቱዋ ኣጩዋካ ማሪ ኣጌዳ። ሃዋንቱፔ ሃቃዌ ሎይ ዶሲያዋ ማላቲ?» ያጌዳ።
43ሲሞኒካ ዛሪዴ፥ «ዳሩዋ ኣጎዋ ማላቴ» ያጌዳ። ዬሱሲካ፥ «ቱሙዋ ዛራዳ» ያጌዳ።
44ዬሱሲ ሚሺራቲኮ ፄሊዴ፥ ሲሞና ሃዋዳን ያጌዳ፤ «ሃኖ ሚሺራቶ ቤዓዲ? ታኒ ኔ ጎሌ ዪና ሃራይ ኣቶሺን ሃካ ታ ጌዴው ኢማቤይካ፤ ሺን ኢዛ ባሬ ኣፎን ታጌዲያ ኢርፂሳዱ፤ ባሬ ሁጲያ ቢናናኒካ ቁጫዱ። 45ኔኒ ታና ዬራ ቤይካ፤ ሺን ኢዛ ታኒ ጌሎዴፔ ዶማዴ ታጌዲያ ዬሪያዋ ኣጋ ቤይኩ። 46ኔኒ ታ ሁጲያን ዛይቲያ ኦካ ቤይካ፤ ሺን ኢዛ ታ ጌዲያን ሺቱዋ ጫጫፋዱ። 47ሃዋ ዲራው ታ ሂንቴንቶ ኦዳይ፡ ዳሮፔ ኢዛ ዶሴዳዋ ዲራው፥ ዳሮ ናጋራይ ኢዚው ዴዒያዌ ማሬቴዳ፤ ጉይ ማሬቲያዌ ጉ ዶሴ» ያጌዳ።
48ዬሱሲ ሚሺራቶ፥ «ኔ ናጋራይ ቁጬቴዳ» ያጌዳ።
49ዬሱሳና ኢቲፔ ቁማ ማናው ኡቴዳዋንቱ ባሬንቱ ዎዛናን፥ «ናጋራ ማራናው ዳንዳዪያዌ ሃዌ ኦኔ?» ያጌዲኖ።
50ዬሱሲ ሚሺራቶ፥ «ኔ ኣማኑ ኔና ኣሼዳ፥ ሳሮቴን ኔ ጎሌ ባ» ያጌዳ።

Chwazi Kounye ya:

ሉቃሳ 7: dwrENT

Pati Souliye

Pataje

Kopye

None

Ou vle gen souliye ou yo sere sou tout aparèy ou yo? Enskri oswa konekte