ማርቆሳ 11
11
ዬሱሲ ዎልቃማ ቦንቹዋን ዬሩሳላሜ ጌሌዳ
(ማት 21፡1-11፤ ሉቅ 19፡28-40፤ ዮህ 12፡12-19)
1ኡንቱንቱ ዬሩሳላሜ ማቲዴ፥ ዴብሬ ዛይቴ ዴሪያ ማታን ዴዒያ ቤቴፋጌኔ ቢታኒያ ጋኬዲኖ፤ ዬሱሲ ባሬና ካሊያዋንቱፔ ላዑዋ ሲንው ኪቲዴ፥ 2«ሂንቴንቱፔ ሲንን ዴዒያ ሄራ ቢቴ፤ ያ ጌሎሳና ኦኒኔ ኡባ ቶጊቤና ቃሹዋን ዴዒያ ሃሬ ማራ ሂንቴ ዴማና፤ ኣ ቢሊ ሃ ኣኪዴ ዪቴ። 3ኦኒኔ ሂንቴንታ፥ ‹ሄዋ ኣዪሲ ኦቴ?› ያጊዴ ኦቾፔ፥ ‹ጎዳው #11፡3 ጎዳ፡ ሃዋ ጉሳይ ሃሪያ ጎዳ። ሃዌ ኮሼ፤ ኤሌካ ዛሪ ሃ ዬዳናዋ› ያጊቴ» ያጌዳ።
4ኡንቱንቱ ቢዴ፥ ሃሬ ማራ ፔንጊያ ማታን ኦጊያን ቃቺ ዎዳዋ ዴሚዴ ቢሌዲኖ። 5ሄዋን ኤቄዳ ኢቲ ኢቲ ኣሳቱ ኡንቱንታ፥ «ሃሬ ማራ ዎታናው ቢሊቴ?» ያጌዲኖ። 6ዬሱሳ ካሊያዋንቱ ዬሱሲ ባሬንታ ኣዛዜዳዋ ኦዲና፥ ኣሳቱ ዬዲ ኣጌዲኖ። 7ኡንቱንቱ ሃሬ ማራ ዬሱሳኮ ኣሂዴ፥ ባሬንቱ ማዩዋ ኣ ዞኪያን ዎዲኖ፤ ዬሱሲ ሄ ሃሬ ማራ ቶጌዳ። 8ጮራ ኣሳይ ባሬንቱ ማዩዋ ኦጊያን ሂፄዳ፤ ቃሲ ሃራንቱ ሚ ሃይ ካር ካሪዴ፥ ኦጊያን ሂፄዲኖ። 9ዬሱሳፔ ሲንና ሃሜቲያ ኣሳይኔ ኣ ጌዱዋ ካሊያ ኣሳይ ባሬንቱ ኮሻ ቁ ኦዴ፥
«ፆሳይ ጋላቴቶ!
ጎዳ ሱንን ዪያዌ ኣንጄቴዳዋ። #ማዝ 118፡25-26
10ጎዳ ሱንን ዪያ ኑ ኣዉዋ
ዳዊቴ ካዉቴይ ኣንጄቴዳዋ።
ሳሉዋ ኡባፔ ቦላ ሳሉዋን
ዴዒያ ፆሳይ ጋላቴቶ»
ያጌዲኖ።
11ዬሱሲ ዬሩሳላሜ ቢዴ፥ ጌሻ ጎሊያ ጌሌዳ፤ ቃሲ ኡባባ ዩዪ ዩዪ ፄሌዳዋፔ ጉዪያን፥ ሳዓይ ቃሚያ ዲራው፥ ታማኔ ላዑ ዬሱሳ ካሊያዋንቱና ቢታኒያ ቤዳ።
ዬሱሲ ሼቄዳ ባላሲያ ሚቶ
(ማት 21፡18-19)
12ዎንቴ ጋላሲ ኡንቱንቱ ቢታኒያፔ ኬሲዴ ቢሺን፥ ዬሱሲ ኮሻቴዳ። 13ሃኩዋን ኢቲ ባላሲያ ጊያ ሚቶ ሃይ ማያ ኡቴዳዉኖ ቤዒዴ፥ ኦኒ ኤሪ ኢ ቦላ ኣይፊ ቤቶፔኔ ጊዴ፥ ቤዓናው ኢዚኮ ቤዳ፤ ሺን ኢዚኮ ኢ ቢያ ዎዴ፥ ሃይ ፃላላፔ ኣቲን፥ ኣይኔ ኣይፊያ ዴሚቤና፤ ኣዪሲ ጎፔ፥ ባላሲ ኣይፊያ ዎዲ ጋኪቤና። 14ዬሱሲ ሄ ባላሳቶ፥ «ኔፔ ሺሬቲዴ ሜናው ኦኒኔ ኣይፊያ ሞፖ» ያጌዳ። ዬሱሳ ካሊያዋንቱ ኢ ጊያዋ ሲሴዲኖ።
ዬሱሲ ጌሻ ጎሊያን ዛሊዒያዋንታ ኬሴዳ
(ማት 21፡12-17፤ ሉቅ 19፡45-48፤ ዮህ 2፡13-22)
15ኡንቱንቱ ዬሩሳላሜ ቤዲኖ፤ ዬሱሲ ጌሻ ጎሊያ ጌሊዴ፥ ሄዋን ዛሊዒያዋንታኔ ሻሚያዋንታ ካሬ ዬዴርሱዋ ዶሜዳ፤ ቃሲ ሚሻ ላሚያዋንቱ ፃራጴዛኔ ዶጎሙዋ ዛሊዒያዋንቱ ኦይዲያ ኣ ዬጊዴ፥ 16ኦኒኔ ኣዬንቶ ቶኪዴ፥ ጌሻ ጎሊያ ጊቢያ ጊዶና ኣናዋ ዲጌዳ። 17ዬሱሲ ኣሳ ሃዋዳን ያጊዴ ታማሪሴዳ፡ «ፆሳ ማፃፋን፥ ‹ታ ጎሊ ኣዪሁዳ ጊዴና ኣሳይ ኡባይ ፆሳ ዎሲያ ጎሌ ጌቴታና› ያጌቲዴ ፃፌቲ ኡቴዳ፤ ሺን ሂንቴ ኣ ቦንቃንቻቱ ቆሴቲያ ጎንጎሉዋ ኬሴዲታ።» #ኢሳ 56፡7፤ ኤርም 7፡11
18ቄሳቱዋ ካፓቱኔ ሙሴ ሂጊያ ታማርሲያዋንቱ ሄዋ ሲሲዴ፥ ኣ ዎና ኦጊያ ኮሻ ዶሜዲኖ፤ ሺን ጮራ ኣሳይ ኢ ታማሪሲያዋን ማላሌቲያ ዲራው፥ ኣው ያዬዲኖ።
19ሳዓይ ኦማርሴዳ ዎዴ፥ ዬሱሲኔ ኣ ካሊያዋንቱ ካታማፔ ጋፃ ኬሴዲኖ።
ባላሲያ ጊያ ሚታ ሜላዱ
(ማት 21፡20-22)
20ኡንቱንቱ ዎንቴ ጋላሲ ጉራ ኦጊያና ኣዴ፥ ሄ ባላሳታ ፃጱዋና ሜላዲጌዳዉኖ ቤዔዲኖ። 21ጴፂሮሲ ሃሳዪዴ፥ «ታማሪሲያዎ፥ ቤዓ፤ ኔን ሼቄዳ ባላሳታ ሜላዲጋዱ» ያጌዳ።
22ዬሱሲ ዛሪዴ፥ ኡንቱንታ ሃዋዳን ያጌዳ፤ «ፆሳ ኣማኒቴ። 23ታኒ ሂንቴንቶ ቱሙዋ ጋይ፤ ኦኒኔ ባሬ ዎዛናን ሲናን ባሬ ጌዳባይ ሃናናዋ ኣማኒዴ፥ ሃ ዴሪያ፥ ‹ዴንዳዴ ኣባን ኩንዳ› ጎፔ ሃናና። 24ሄዋ ዲራው፥ ፆሳ ሂንቴ ዎሲያባኔ ኦቺያባ ኡባ ኣኪዲጎዋዳን ኣማኒቴ፤ ሂንቴ ኣካና። 25ፆሳ ዎሳናው ሂንቴ ኤቂያ ዎዴ፥ ሳሉዋን ዴዒያ ሂንቴ ኣዉ ሂንቴ ናጋራ ኣቶ ጋና ማላ፥ ኦኒኔ ሂንቴንታ ናቄዳባይ ዴዖፔ፥ ኣው ኣቶ ጊቴ። 26ሺን ኣሳ ናጋራ ሂንቴ ኣቶ ጋና ዮፔ፥ ሳሉዋን ዴዒያ ሂንቴ ኣዉካ ሂንቴ ናጋራ ሂንቴንቶ ኣቶ ጌና።»
ዬሱሲ ኣያ ማታኒ ኦ ጊያ ኦሻ
(ማት 21፡23-27፤ ሉቅ 20፡1-8)
27ኡንቱንቱ ቃሲካ ዬሩሳላሜ ቤዲኖ፤ ዬሱሲ ጌሻ ጎሊያን ሃሜቲሺን፥ ቄሳቱዋ ካፓቱ፥ ሙሴ ሂጊያ ታማሪሲያዋንቱኔ ጪማቱ ዬሱሳኮ ዬዲኖ። 28ኣ፥ «ኔኒ ሃዋ ኦናው ኔው ኣይ ማታይ ዴዒ? ዎይ ኔው ሃ ማታ ኢሜዳዌ ኦኔ?» ያጌዲኖ።
29ዬሱሲ ዛሪዴ ኡንቱንታ፥ «ታኒካ ሂንቴንታ ኢቲባ ኦቻና፤ ታው ኦዲቴ፤ ታኒ ቃሲ ሃዋ ኣይ ማታን ኦይታንቶ፥ ሂንቴንቶ ኦዳና። 30ዮሃኒሲ ፃማቂያ ማታ ኣኬዳዌ ፆሳፔዬ ዎይ ኣሳፔ? ታው ኦዲቴ» ያጌዳ።
31ኡንቱንቱ ባሬንቱ ጊዶን ፓሉማ ዶሚዴ፥ «ኑኒ፥ ‹ፆሳፔ ዬዳ› ያጎፔ፥ ኢ ኑና፥ ‹ያቲና፥ ዮሃኒሲ ኦዴዳዋ ኣዪሲ ኣማኒቤይኪቴ?› ያጋና። 32ሺን፥ ‹ኣሳፔ ዬዳ ጋኔ?› » ያጌዲኖ፤ ቃሲ ኣሳይ ኡባይ ዮሃኒሲ ናቢያ ጊዴዳዋ ኤሪያ ዲራው፥ ኣሳው ያዬዲኖ። 33ሄዋ ዲራው፥ ኡንቱንቱ ዬሱሳው፥ «ኑኒ ኤሮኮ» ያጊዴ ዛሬዲኖ፤
ዬሱሲ፥ «ታኒካ ሃዋ ኣይ ማታን ኦይታንቶ፥ ሂንቴንቶ ኦዲኬ» ያጌዳ።
Chwazi Kounye ya:
ማርቆሳ 11: dwrENT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2011, Wycliffe Bible Translators, Inc. All rights reserved.
Aprann plis bagay sou Ooratha Caaquwaa