ማርቆሳ 13
13
ዬሱሲ ጌሻ ጎሊ ኮሌታናዋ ካሴቲዴ ኦዴዳ
(ማት 24፡1-2፤ ሉቅ 21፡5-6)
1ዬሱሲ ጌሻ ጎሊያፔ ኬሲሺን፥ ኣ ካሊያዋንቱፔ ኢቱ ኣ፥ «ታማሪሲያዎ፥ ሃዌ ኣይቤ ሎዖ ሹቻቴንቶኔ ቃሲ ኣይቤ ሎዖ ሹቻ ጎላቱዋ ቤዓይ!» ያጌዳ።
2ዬሱሲ ዛሪዴ፥ «ሃ ዎልቃማ ሹቻ ጎላቱዋ ቤዓይ? ሃ ጎላቱዋን ዴዒያ ኢቲ ሹቻይኔ ኣቴናን ኡባይ ኮሌታና» ያጌዳ።
ጎዳይ ያናፔ ካሴቲዴ ጋካና ዬዴርሱዋኔ ዋዪያ
(ማት 24፡3-14፤ ሉቅ 21፡7-19)
3ዬሱሲ ጌሻ ጎሊያፔ ሂኒ ባጋና ዴብሬ ዛይቴ ዴሪያ ቦላን ኡቴዳ ዎዴ፥ ጴፂሮሲ፥ ያዪቆቢ፥ ዮሃኒሲኔ ኢንዲራሲ ባሬንቱ ፃላላ ኣኮ ዪዴ ኣ፥ 4«ሄዌ ኣዉዴ ሃናኔንቶ፥ ኑሲ ኦዳሪኪ፤ ቃሲ ሄዌ ኡባይ ፖሌታና ዎዲያ ኤሪሲያ ማላቱ ኣያ ጊዳኔ?» ያጊዴ ኦቼዲኖ።
5ዬሱሲ ቃሲ ኡንቱንቶ ሃዋዳን ያጊዴ፥ ኦዱዋ ዶሜዳ፤ «ሂንቴንታ ኦኒኔ ባሌና ማላ ናጌቲቴ። 6ጮራ ኣሳቱ ታ ሱንን፥ ‹ታኒ ኪሪስቶሳ› ያጊዴ ያናዋ፤ ጮራ ኣሳ ባሌና። 7ማታን ዴዒያ ኦላ ኮሻኔ ሃኩዋን ዴዒያ ኦላ ኦዱዋ ሂንቴ ሲሲያ ዎዴ፥ ሂርጎፒቴ፤ ሄዋ ማላባይ ሃናናው ቤሴ፤ ሺን ዉርሴይ ቢራ። 8ኣዪሲ ጎፔ፥ ኢቲ ጋዴ ኣሳይ ሃራ ጋዴ ኣሳና ኦሌታና፤ ቃሲ ኢቲ ካዉቴይ ሃራ ካዉቴና ኦሌታና፤ ቢታ ቃይ ኡባሳን ዴዓና፤ ኮሻይካ ዴዓና፤ ሺን ሄዌ ኮይሮ ዬሉዋ ኦይ ማላ።
9«ሺን ሂንቴ ሂንቴንቱ ሁጴው ናጌቲቴ፤ ኣዪሲ ጎፔ፥ ኣሳይ ሂንቴንታ ኦይቂዴ፥ ፒርዳ ጎሌው ኣዴ ኢማና፤ ቃሲ ባሬ ኣዪሁዳ ዎሳ ጎሌቱዋኒካ ሂንቴንታ ሊሱዋን ሾጫና፤ ጋዲያ ሞዲያዋንቱ ሲንኒኔ ካታቱዋ ሲንን ታ ዲራው ሂንቴ ማርካታናው ኤቃና። 10ሚሺራቹዋ ቃላይ ኮይሮና ኣሳው ኡባው ኦዴቲዲጋናው ቤሴ። 11ኡንቱንቱ ሂንቴንታ ፒርዳ ጎሌ ኣሂያ ዎዴኔ ኣዴ ኢሚያ ዎዴ፥ ዎቲ ሃሳያኒቴንቶ ኮይሮና ሂርጎፒቴ፤ ሄ ሳቲያን ፆሳይ ሂንቴንቶ ኢሚያባ ሃሳዪቴ። ኣዪሲ ጎፔ፥ ጌሻ ኣያናይ ሃሳያናፔ ኣቲን፥ ሃሳዪያዋንቱ ሂንቴንታ ጊዲኪታ።
12«ኢሻይ ባሬ ኢሻ፥ ኣዉ ባሬ ናዓ ዎሳና፤ ቃሲ ናናይ ባሬንቱ ኣዋቱዋ ቦላኒኔ ባሬንቱ ኣዬቱዋ ቦላ ዴንዲዴ፥ ኡንቱንታ ዎሳና። 13ኣሳይ ኡባይ ሂንቴንታ ታ ሱን ዲራው ኢፃና፤ ሺን ዉርሴይ ጋካናው ጌንጪያዌ ኣታና።
ዬሩሳላሜ ጋካና ዎልቃማ ኢታ ሜቱዋ
(ማት 24፡15-28፤ ሉቅ 21፡20-24)
14«ሺን ናቢያ ዳኔል ኦዴዳ ባሻ ቱናቴይ ኤቃናው ቤሴናሳን ኤቂሺን ሂንቴ ቤዒያ ዎዴ፥ ሄዌ ዋጊያዌንቶ፥ ናባቢያዌ ኣኬኮ፤ ዪሁዳ ጋዲያን ሄ ዎዴ ዴዒያዋንቱ ዴሪያኮ ቤቲኖ። #ዳን 9፡27፤ 11፡31፤ 12፡11 15ጎሊያ ሁጲያን ዴዒያ ኡራይካ ኢቲባ ኣካናው ዱጌ ዎዴ፥ ባሬ ሶይ ጌሎፖ። 16ጋዴን ዴዒያዌካ ባሬ ማዩዋ ኣካናው ጉዬ ሲሞፖ። 17ሄ ዎዴ ሻሃራ ማጫዋንቶኔ ንያ ማጫዋንቶ ኣዬሮ። 18ሺን ሃዌ ኡባይ ሃኒያ ዎዲ ባልጉዋ ጊዴና ማላ፥ ፆሳ ዎሲቴ፤ 19ኣዪሲ ጎፔ፥ ፆሳይ ሳዓ ኮይሮ ሜዳዋፔ ዶሚዴ፥ ሃዒ ጋካናው፥ ኡባካ ዴዒቤና ሜቱ፥ ቃሲ ሃዋፔ ሲንዉካ ኡባ ዴዔና ሜቱ ኣሳ ቦላ ሄ ዎዴ ዴዓና። #ዳን 12፡1፤ ሳፅ 7፡14 20ጎዳይ ሄ ጋላሳቱዋ ፓይዱዋ ጉያዌ ባዌንቶ፥ ኣሳ ጊዴዳ ኦኒኔ ኣቴና፤ ሺን ኢ ባሬ ዶሬዳ ኣሳቱዋ ዲራው፥ ሄ ጋላሳቱዋ ፓይዱዋ ጉዳ።
21«ሄ ዎዴ ኦኒኔ ሂንቴንታ፥ ‹ቤዒቴ፤ ኪሪስቶሲ ሃዋን ዴዔ› ዎይ፥ ‹ቤዒቴ፤ ኪሪስቶሲ ሄዋን ዴዔ› ያጎፔ፥ ሄዋ ኣማኖፒቴ። 22ኣዪሲ ጎፔ፥ ዎርዳንቻ ኪሪስቶሳቱኔ ዎርዶ ናባቱ ዴንዲዴ ባሬንቶ ዳንዳዬቶፔ፥ ሃራይ ኣቶ ፆሳይ ዶሬዳዋንታካ ባሌናው ማላታኔ ማላሊሲያባ ቤሳና። 23ሺን ሂንቴ ናጌቲቴ፤ ታኒ ሂንቴንቶ ኡባባ ካሴታዴ ኦዳዲ።
ኪሪስቶሳ ላዔን ዩሳ
(ማት 24፡29-31፤ ሉቅ 21፡25-28)
24«ሺን ሄ ዎዴ ሄ ዋዪያፔ ጉዪያን፥
ኣዋይ ማና፤
ኣጌናይ ፖዒያዋ ኣጋና፤ #ኢሳ 13፡10፤ ሂዝ 32፡7፤ ኢዩ 2፡10፣ 31፤ 3፡15፤ ሳፅ 6፡12
25ፆሊንታቱ ሳሉዋፔ ኩንዳና፤
ቃሲ ሳሉዋን ዴዒያ ዎልቃቱካ ቃፄታና። #ኢሳ 34፡4፤ ኢዩ 2፡10፤ ሳፅ 6፡13
26ሄ ዎዴ ታኒ፥ ኣሳ ናዓይ፥ ዎልቃማ ዎልቃናኔ ቦንቹዋና ሻሪያ ጊዶና ዪሺን፥ ኡንቱንቱ ቤዓና። #ዳን 7፡13፤ ሳፅ 1፡7 27ሄ ዎዴ ታኒ ኪታንቻቱዋ ሳዓ ኦይዱ ባጋ ኪታና፤ ሳዓ ጋፃፔ ሳሉዋ ጋፃ ጋካናው፥ ፆሳይ ዶሬዳ ኣሳ ሺሻና።
ዎዲያ ዉርሴይ ጋኬዳዋ ማላታ ቤሲያ ባላሲያ ሚቶ
(ማት 24፡32-35፤ ሉቅ 21፡29-33)
28«ሌሚሱዋ ባላሳቶ ጊያ ሚቲፔ ታማሪቴ፤ ባላሳታ ኣጪያ ዎዴኔ ኢዚ ሃይይ ሃይቲያ ዎዴ፥ ቦኒ ማቴዳዋ ሂንቴ ኤሪታ። 29ሃዋዳንካ ሂንቴ ሄ ኡባባይ ሃኒያዋ ቤዒያ ዎዴ፥ ኢ #13፡29 ኢ፡ ዬሱሳ ጉሳ። ማታቲዴ ፔንጊያ ሺቄዳዋ #13፡29 ማቲዴ ፔንጊያ ሺቄዳዋ፡ ጉሳይ፥ ዬሱሳ ዩሳይ ማቴዳ ጉሳ። ኤሪቴ። 30ታኒ ሂንቴንቶ ቱሙዋ ኦዳይ፤ ሃ ኡባባይ ሃናና ጋካናው፥ ሃ ዎዲያ ዬሌታይ ሃይቂዲጌና። 31ሳሉኔ ሳዓይ ኣና፤ ሺን ታ ቃላይ ኡባካ ኣና።
ዉርሴ ጋላሳኔ ሳቲያ ኦኒኔ ኤሬና
(ማት 24፡36-44)
32«ሺን ሄ ጋላሳኔ ሄ ሳቲያ ኣዉዋ ፃላላፔ ኣቲን፥ ሃራይ ኣቶ ሳሉዋን ዴዒያ ኪታንቻቱዋ ጊዲና፥ ዎይ ታና ናዓ ጊዲናካ ኦኒኔ ኤሪያባይ ባዋ። 33ሄ ዎዲ ኣዉዴ ጊዳኔንቶ፥ ሂንቴ ኤሬና ዲራው፥ ናጌቲቴ፤ ሚኒቴ፤ ፆሳ ዎሲቴ። 34ታ ዩሳይ ባሬ ጎሊያ ኣጊዴ፥ ኦጊያ ቢያ ቢታኒያ ማላ፤ ቢታኒ ባሬ ቆማቱዋሲ ሁጲያን ሁጲያን ኦሱዋ ኢሚዴ፥ ኡንቱንታ ባሬ ኦሱዋሲ ካፖ ኦዳ፤ ቃሲ ካሪያ ናጊያዌካ ሚኒሲዴ ናጋና ማላ ኣዛዜዳ።
35«ሄዋ ዲራው፥ ሚኒቴ፤ ኣዪሲ ጎፔ፥ ጎሊያዉ ኦማርሳ ጊዲና፥ ዎይ ቃማ ቢላሄ ጊዲና፥ ዎይ ኩቱ ዋሲያ ዎዴ ጊዲና፥ ዎይ ጉራ ዎንቱማና ጊዲና ኣዉዴ ያኔንቶ፥ ሂንቴ ኤሪኪታ። 36ሂንቴንቱ ኣኬኬናን ኢ ዮፔ፥ ሂንቴንታ ጌሚዒሼዳዋንታ ዴሜና ማላ ሚኒቴ። 37ታኒ ሂንቴንቶ ኦዲያዋ ኣሳ ኡባው ኦዳይ፤ ሚኒቴ።»
Chwazi Kounye ya:
ማርቆሳ 13: dwrENT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2011, Wycliffe Bible Translators, Inc. All rights reserved.
Aprann plis bagay sou Ooratha Caaquwaa