ማርቆሳ 16
16
ዬሱሲ ሃይቁዋፔ ዴንዴዳ
(ማት 28፡1-8፤ ሉቅ 24፡1-12፤ ዮህ 20፡1-10)
1ሳምባታይ ኣዳዋፔ ጉዪያን፥ ማግዳላ ካታማፔ ዬዳ ማይራማ፥ ያዪቆባ ዳያ ማይራማኔ ሳሎማ ቢዴ፥ ዬሱሳ ኣኃ ኦካናው ሺቱዋ ሻሜዲኖ። 2ዎጋ ጋላሲ ዎንቱማ ዳሮ ጉራን ፃልቂ ኬሲሺን፥ ሄ ጎንጎሉዋ ቤዲኖ። 3ኡንቱንቱ ባሬንቱ ጊዶን ኢቱ ኢቱዋና፥ «ጎንጎሉዋ ዶናፔ ኑሲ ሹቻ ኦኔ ጎንዶርሲዴ ዲጋናዌሻ?» ያጊዴ ሃሳዪኖ።
4ኡንቱንቱ ፄሊያ ዎዴ፥ ሄ ዳሮ ዎልቃማ ሹቻ ጎንዶርሲዲጌዳዋ ቤዔዲኖ። 5ዬሱሲ ሞጌቴዳ ጎንጎሉዋ ጊዶ ጌሊያ ዎዴ፥ ኢቲ ዎዳላ ቢታኒ ቦ ማዩዋ ማዪዴ፥ ኡሼቻ ባጋና ኡቴዳዋ ቤዒዴ ዳጋሜዲኖ።
6ሺን ኢ ኡንቱንታ፥ «ዳጋሞፒቴ። ማስቃሊያ ቦላ ካቄቴዳ ናዚሬቲያ ዬሱሳ ሂንቴንቱ ኮዪያዋ ኤራይ። ኢ ሃዋን ባዋ፤ ዴንዲዲጌዳ። ኡንቱንቱ ኣ ዎዳሳ ሃዋ ቤዒቴ። 7ሺን ቢዴ ዬሱሲ ባሬና ካሊያዋንቶኔ ጴፂሮሳው፥ ‹ዬሱሲ ሂንቴንቱፔ ካሴቲዴ ጋሊላ ቤ፤ ኢ ሂንቴንቶ ኦዴዳዋዳንካ ሂንቴንቱ ኣ ያኒ ቤዓና› ያጊዴ ሃዋ ኦዲቴ» ያጌዳ።
8ማጫ ኣሳቱ ያሻን ኮኮሪዴ፥ ዬሱሲ ሞጌቴዳ ጎንጎሉዋፔ ኬሲዴ ባቃቲ ኣጌዲኖ፤ ቃሲ ኡንቱንቱ ያዬዳ ዲራው፥ ኣሳው ሄዋ ኦሲኔ ኣይኔ ኦዲቤይኪኖ።
ማጫ ኣሳቱ ቢዴ፥ ባሬንቶ ኦዴቴዳባ ኡባ ጴፂሮሳዉኔ ኣናና ዴዒያዋንቶ ቃንን ኦዴዲኖ፤ ሄዋፔ ጉዪያን፥ ዬሱሲ ባሬ ሁጴው ባሬና ካሊያዋንቱ ቦላ፥ ሜናው ኣሺያ ላሜቴና ጌሻ ሚሺራቹዋ ቃላ፥ ኣዋይ ሞኪያሳፔ ዉሊያሳ ጋካናው ኪቴዳ።
ዬሱሲ ማግዳላ ማይራሚው ቤቴዳ
(ማት 28፡9-10፤ ዮህ 20፡11-18)
9ዬሱሲ ሃይቁዋፔ ዴንዴዳዋፔ ጉዪያን፥ ዎጋ ጋላሲ ጉራ፥ ላፑ ኢታ ኣያናቱዋ ኬሴዳ ማግዳላ ካታማፔ ዬዳ ማይራሚው ካሴቲዴ ቤቴዳ። 10ኢዛ ባዴ ካሴ ኣናና ዴዒያዋንቶ፥ ቃሬቲዲኔ ዬኪዴ ኡቴዳዋንቶ ኦዳዱ፤ 11ሺን ዬሱሲ ፓፃ ዴዒያዋኔ ኢዚው ቤቴዳዋ ኡንቱንቱ ሲሴዳ ዎዴ፥ ኢዚ ኦዱዋ ቱማ ጊቤይኪኖ።
ዬሱሲ ላዑ ባሬና ካሊያዋንቱሲ ቤቴዳ
(ሉቅ 24፡13-35)
12ሄዋፔ ጉዪያን፥ ኡንቱንቱፔ ላዓቱ ካታማፔ ኬሲዴ ቢሺን፥ ኦጊያን ዬሱሲ ኮይሮዋፔ ዱማቲዴ፥ ኡንቱንቶ ቤቴዳ። 13ኡንቱንቱ ጉዬ ሲሚዴ፥ ሃራቱዋሲ ኦዴዲኖ፤ ሺን ሄዋንቱ ኡንቱንቱ ኦዱዋ ቱማ ጊቤይኪኖ።
ዬሱሲ ታማኔ ኢቲ ባሬና ካሊያዋንቱሲ ቤቴዳ
(ማት 28፡16-20፤ ሉቅ 24፡36-49፤ ዮህ 20፡19-23፤ ኪት 1፡6-8)
14ጉዬፔ ታማኔ ኢቲ ዬሱሳ ካሊያዋንቱ ቁማ ሚሺን፥ ዬሱሲ ኡንቱንቶ ቤቴዳ። ኡንቱንቶ ኣማኑ ባይና ዲራው፥ ኢ ኡንቱንታ ሴሬዳ፤ ቃሲ ሃይቁዋፔ ኢ ዴንዴዳዋ ቤዔዳዋንቱ ኡንቱንቶ ኦዲና፥ ኡንቱንቱ ኣማኔናን ኢፄዳ ዲራዉኔ ኦዲና ሲሴናዋንታ ጊዲያ ዲራው፥ ኢ ኡንቱንታ ሴሬዳ።
15ኢ ኡንቱንታ ሃዋዳን ያጌዳ፤ «ኣላሚያ ኡባ ቢዴ፥ ኣሳ ኡባው ዎንጋላ ሚሺራቹዋ ቃላ ኦዲቴ። 16ኣማኖዌኔ ፃማቄቶዌ ኣታና፤ ሺን ኣማኔናዋ ቦላ ፆሳይ ፒርዳና። 17ታናን ኣማኒያዋንቱ ሃ ማላታቱዋ ኦናዋንታ፡ ኡንቱንቱ ታ ሱንን ኢታ ኣያናቱዋ ኬሳናዋንታ፤ ቃሲ ኡንቱንቱ ዱማ ዱማ ኦራ ቃላን ሃሳያናዋንታ። 18ኡንቱንቱ ሾሻ ኦይቆፔካ፥ ዎይ ኣያኔ ዎያ ማርዚያ ኡሺንቶካ ኡንቱንታ ቆሄና። ቃሲ ኡንቱንቱ ባሬንቱ ኩሺያ ሃርጋንቻቱዋ ቦላ ዎና፤ ሄ ሃርጋንቻቱ ፓፃና» ያጌዳ።
ዬሱሲ ሳሉዋ ፑዴ ኬሴዳ
(ሉቅ 24፡50-53፤ ኪት 1፡9-11)
19ጎዳ ዬሱሲ ባሬና ካሊያዋንቱና ሃሳዬዳዋፔ ጉዪያን፥ ፆሳይ ኣ ፑዴ ሳሉዋ ኣፊና፥ ፆሳፔ ኡሼቻ ባጋና ኡቴዳ። 20ኣ ካሊያዋንቱ ቢዴ፥ ኡባሳን ዎንጋላ ሚሺራቹዋ ኦዴዲኖ። ጎዳይካ ኡንቱንቱና ኢቲፔ ኦ፤ ኡንቱንቱ ኦዲያ ቃላይካ ቱማ ጊዴዳዋ ኡንቱንቱ ኦያ ማላታቱዋን ኤሪሴዳ። #16፡9-20 ኢቲ ኢቲ ቤኒ ጌሻ ማፃፋቱዋን ሃ ፓይዳቱ ባዋ።
Chwazi Kounye ya:
ማርቆሳ 16: dwrENT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2011, Wycliffe Bible Translators, Inc. All rights reserved.
Aprann plis bagay sou Ooratha Caaquwaa