ማርቆሳ 6
6
ዬሱሳ ናዚሬቴን ኣኬናን ኢፄዲኖ
(ማት 13፡53-58፤ ሉቅ 4፡16-30)
1ዬሱሲ ሄዋፔ ኬሲዴ፥ ባሬ ጋዲያ ናዚሬቴ ካታማ ቤዳ፤ ኣ ካሊያዋንቱካ ኣ ካሊዴ ቤዲኖ። 2ሳምባታ ጋላሲ ኣዪሁዳ ዎሳ ጎሊያን ታማሪሱዋ ዶሜዳ፤ ኢ ታማርሲያዋ ሲሴዳ ጮራ ኣሳይ ማላሌቲዴ፥ «ሃዌ ሃ ኡባባ ሃቃፔ ዴሜዴ? ሃ ኣው ኢሜቴዳ ኣ ኤራቴይ ኣዬ? ፆሳይ ኦያ ማላታ ኢ ዎቲ ኦ? 3ሃዌ ኣናፂያ #6፡3 ኣናፂያ፡ ግሪኬ ቢሌን ሹቻ ዎይ ኡርቃ ሜሊሲዴ ሜያ ኣሳ ጊዴ ጎዔቴ። ጊዴኔ? ማይራሚ ናዓ፥ ያዪቆባ ኢሻ፥ ዮሳ ኢሻ፥ ዪሁዳ ኢሻ፥ ሲሞና ኢሻ ጊዴኔ? ኣ ሚቻቱ ኑናና ሃዋን ዴዒያዋንታ ጊዲኪኖ?» ያጊዴ፥ ኢ ጊያዋ ኣኬናን ኢፄዲኖ።
4ዬሱሲ ሄ ኣሳሲ፥ «ናቢ ባሬ ጋዲያን፥ ባሬ ዳባቱዋኒኔ ባሬንቱ ሶይ ኣሳን ቦንቼቴናዋፔ ኣቲን፥ ኡባሳን ቦንቼቴ» ያጌዳ። 5ኢ ሄዋን ባሬ ኩሺያ ኣማሬዳ ኣሳቱዋ ቦላ ዎዴ፥ ኡንቱንታ ፓዳዋፔ ኣቲን፥ ጮራ ማላታ ኦናው ኣይኔ ዳንዳይቤና። 6ኣሳይ ኣማኒቤና ዲራው ማላሌቴዳ።
ዬሱሲ ታማኔ ላዑ ባሬና ካሊያዋንቱ ታማሪሳናዳን ኪቴዳ
(ማት 10፡5-15፤ ሉቅ 9፡1-6)
ሄዋፔ ጉዪያን፥ ዬሱሲ ሄዋ ሄራን ዴዒያ ቄሪ ካታማቱዋን ዩዪ ዩዪዴ፥ ኣሳ ታማርሴዳ። 7ዬሱሲ ታማኔ ላዑ ባሬና ካሊያዋንታ ባሬኮ ፄሲዴ፥ ላዑዋ ላዑዋ ኪቴዳ፤ ቃሲ ኡንቱንቶ ኢታ ኣያናቱዋ ኬሲያ ማታ ኢሜዳ። 8ኡንቱንታ፥ «ኦጊያ ፃምዓፔ ኣቲን፥ ቁማ፥ ቃርጪቲያ፥ ሂንቴው ሚሻ ኣያኔካ ኦይቆፒቴ። 9ሂንቴንቱ ጌዲያን ጫማካ ዎቴ፤ ሺን ላዑ ማዩዋ ማዮፒቴ» ያጌዳ። 10ቃሲካ ኡንቱንታ፥ «ሂንቴንታ ኣሳይ ሃቃን ሞኮፔኔ፥ ሄዋፔ ኬሳና ጋካናው፥ ሄ ጎሊያን ኡቲ ኣጊቴ። 11ሂንቴንታ ኣሳይ ሞኬናሳ ዎይ ሂንቴ ኦዲያባ ሲሴናሳ ሃቃ ጊዶፔካ፥ ሄ ጋዲያን ዴዒያ ኣሳው ሄዌ ማርካ ጊዳና ማላ፥ ሄዋፔ ኬሲዴ፥ ሂንቴ ጌዲያፔ ባና ሾጪቴ» #6፡11 ሂንቴ ጌዲያፔ ባና ሾጪቴ፡ ሃዌ ኣሳይ ኢፄዳዋ ቤሲያዋ። ያጌዳ።
12ታማኔ ላዑ ኣ ካሊያዋንቱ ቢዴ፥ ኣሳይ ባሬንቱ ናጋራፔ ሲማናዳን፥ ቃላ ኦዴዲኖ። 13ኡንቱንቱ ኣሳፔ ዳሮ ኢታ ኣያናቱዋ ኬሲዴ፥ ሃርጊያ ኣሳ ጮራ ዛይቲያ ኦኪዴ ፓዲኖ። #ያይ 5፡14
ፃማቂያ ዮሃኒሳ ሃይቁዋ
(ማት 14፡1-12፤ ሉቅ 9፡7-9)
14ኣሳይ ዬሱሳ ሱን ዴንያ ዲራው፥ ካቲያ ሄሮዲሴ ሄዋ ኡባ ሲሴዳ፤ ኢቲ ኢቲ ኣሳይ፥ «ፃማቂያ ዮሃኒሲ ሃይቁዋፔ ዴንዴዳ፤ ሄዋሲ ኣው ዎልቃማ ማላታ ኦያ ዎልቃይ ዴዔ» ያጌዳ።
15ሺን ሃራንቱ ኣ፥ «ሃዌ ኤላሳ» ያጌዲኖ።
ሃራንቱ ቃሲ፥ «ሃዌ ቤኒ ዎዴ ናባቱዋ ማላቲያ ናቢያ» ያጌዲኖ።
16ሺን ሄሮዲሴ ሄዋ ሲሴዳ ዎዴ፥ «ሄዌ ታኒ ቆያ ሙጪሴዳ ፃማቂያ ዮሃኒሳ። ኢ ሃይቁዋፔ ፓፄዳ» ያጌዳ።
17ኣዪሲ ጎፔ፥ ሄሮዲሴ ባሬ ኢሻ ፒሊጶሳ ማቻቶ ሄሮዲያዶ ኣኪ ዎዳ፤ ሄሮዲሴ ኢዚ ዲራው፥ ባሬ ሁጴው ኣሳ ኪቲዴ፥ ዮሃኒሳ ኦይዴ፥ ቃሺሲ ዎዳ። 18ኣዪሲ ጎፔ፥ ዮሃኒሲ ሄሮዲሳ፥ «ኔኒ ኔ ኢሻ ማቻቶ ኣካናው ቤሴና» ያጊ ዎዳ።
19ሄሮዲያዳ ዮሃኒሳው ኡሉዋን ሞርኪያ ኦይቃዴ ኣ ዎሳናው ኮያዱ፤ ሺን ዳንዳያቤይኩ። 20ዮሃኒሲ ፂሎ ኣሳኔ ጌሻ ኣሳ ጊዴዳዋ ሄሮዲሴ ኤሬዳ ዲራው፥ ኣው ያዪዴ፥ ሎይ ናጊ ዎዳ፤ ዮሃኒሲ ጊያዋ ሲሲዴ፥ ባሬ ዎዛናን ዳሪሲ ሜቶቲዴካ ኣባ ናሼቻን ሲሴዳ።
21ሄሮዲሴ ባሬ ዬሌቴዳ ጋላሲ፥ ጋዲያ ኣዪሲያዋንቶ፥ ሻላቃቱዋሲኔ ጋሊላን ዴዒያ ዎልቃማ ኣሳው ሾቢያ ጊጊሴዳ ዎዴ፥ ዉርሴን ሄሮዲያዳ ኢንጄ ጋላሳ ዴማዱ። 22ሄሮዲያዲ ናታ ኢማ ሞኪያሳ ጌላ ዱራዴ፥ ሄሮዲሳኔ ኣ ኢማቱዋ ናሼቻዱ፤ ሄዋፔ ጉዬ ካቲ ናቲው፥ «ኔና ሎዔዳዋ ኣያ ጊዶፔኔ ታና ኦቻ፤ ታኒ ኔው ኢማና» ያጌዳ። 23ቃሲ ኢዚው ዳሪ ጫቂዴ፥ «ኔኒ ኦቼዳዋ ኣያ ጊዶፔካ፥ ታኒ ኔው ኢማና፤ ሃራይ ኣቶ፥ ታ ካዉቴፔ ባጋ ጊዶፔካ፥ ታኒ ኔው ኢማና» ያጌዳ።
24ናታ ካሬ ኬሳዴ ባሬ ዳዮ፥ «ኣያ ኢማ ጎ?» ያጋዴ ኦቻዱ።
ኢ ዳያ፥ «ፃማቂያ ዮሃኒሳ ሁጲያ ኢማ ጋ» ያጋዱ።
25ናታ ኤሌካ ካቲያኮ ባዴ ኣ፥ «ፃማቂያ ዮሃኒሳ ሁጲያ ዎጪቲያን ዎዴ፥ ኔኒ ሃዒ ታው ኢማናዳን ኮያይ» ያጋዱ።
26ሄዋፔ ጉዬ ካቲ ዳሪ ቃሬቴዳ፤ ሺን ባሬ ጫቁዋ ዲራዉኔ ባሬ ኢማቱዋ ዲራው ኢዚው ጫቄዳ ጫቁዋ ኮላናው ኮዪቤና። 27ሄዋ ዲራው፥ ኤሌካ ናጊያዋ ኪቲዴ፥ ዮሃኒሳ ሁጲያ ኣሃና ማላ ኣዛዜዳ፤ ናጊያዌ ቃሾ ጎሌ ቢዴ፥ ዮሃኒሳ ቆያ ሙጬዳ። 28ሄ ሙጬዳዋ ዎጪቲያን ዎ ኣሂዴ፥ ናቲው ኢሜዳ፤ ናታ ቃሲ ባሬ ኣቲው ኢማዱ። 29ዮሃኒሳ ካሊያዋንቱ ሄዋ ሲሴዳ ዎዴ ዪዴ፥ ኣ ኣኃ ኣፊዴ ሞጌዲኖ።
ዬሱሲ ኢቼሹ ሻዓ ኣሳ ሚዚዴ ካልሴዳ ታሪኪያ
(ማት 14፡13-21፤ ሉቅ 9፡10-17፤ ዮህ 6፡1-14)
30ዬሱሲ ኪቴዳዋንቱ ሲሚዴ፥ ዬሱሳና ጋኬቲዴ፥ ባሬንቱ ኦዳባኔ ባሬንቱ ታማርሴዳባ ኡባ ዬሱሳሲ ኦዴዲኖ። 31ቢያ ኣሳይኔ ዪያ ኣሳይ ዳሪና፥ ሃራይ ኣቶ ቁማ ማናዉካ ኡንቱንታ ጋናን ኢፄዳ ዲራው፥ ዬሱሲ ኡንቱንታ፥ «ኑሬካ ጉ ሼምፒ ኣካናው ኣሳይ ባይናሳ ቦይቴ» #6፡31 ኣሳይ ባይናሳ፡ ሃዌ ጋሊላ ጌቴቲያ ዎምባፔ ፑዴሃ ዶላ ባጋና ዴዔ። 6፡45 ፄሊቴ። ያጌዳ። 32ዬሱሲኔ ኡንቱንቱ ባሬንቱ ፃላላ ዎንጊሪያን ኡቲዴ፥ ኣሳይ ባይናሳ ቤዲኖ።
33ኡንቱንቱ ቢሺን፥ ጮራ ኣሳይ ኡንቱንታ ቤዒዴ ኤሬዳ፤ ካታማ ኡባፔ ጌዲያን ዎፂዴ፥ ኡንቱንቱ ቢያሳ ኡንቱንቱፔ ካሴቲዴ ጋኬዲኖ። 34ዬሱሲ ዎንጊሪያፔ ኬሲዴ፥ ጮራ ኣሳ ቤዔዳ፤ ኣሳይ ሄሚያ ኣሳይ ባይና ዶርሳ ማላ ጊዴዳ ዲራው፥ ቃሬቲዴ ኣሳ ዳሮባ ታማሪሱዋ ዶሜዳ። #ፓይ 27፡17፤ 1ካት 22፡17፤ 2ኦድ 18፡16፤ ሂዝ 34፡5፤ ማት 9፡36
35ሳዓይ ኦማርሲያ ዎዴ፥ ዬሱሳ ካሊያዋንቱ ኣኮ ዪዴ፥ «ሃዌ ሳዓይ ኣሳይ ባይና ሳዓ፤ ሃዒ ሳዓይካ ቃሚዲጌዳ፤ 36ኣሳይ ሄራኔ ቄሪ ካታማቱዋ ጊዶ ቢዴ፥ ባሬንቶ ሚያባ ሻማና ማላ፥ ኣሳ ሞዪዛ» ያጌዲኖ።
37ሺን ዬሱሲ ዛሪዴ ኡንቱንታ፥ «ኣሳው ሚያባ ሂንቴ ኢሚቴ» ያጌዳ።
ሄዋፔ ጉዬ ኡንቱንቱ፥ «ኑኒ ቢዴ፥ ላዑ ፄቱ ቢራ ሳንቲሚያ #6፡37 ቢራ ሳንቲሚያ፡ ቤኒ ዎዲያን ኣሳ ጋዲያን ኢቲ ጋላሳ ኡኒያ ኦ ፔሼዳ ኣሳው ኢቲ ቢራ ሳንቲሚ ኢሜቴ። ማት 20፡2 ፄሊቴ። ቁማ ሻሚዴ፥ ኣሳይ ማናው ኢማኔ?» ያጊዴ ኣ ኦቼዲኖ።
38ዬሱሲ ኡንቱንታ፥ «ሂንቴንቶ ኣፑን ዳቡ ዴዒ? ቢዴ ቤዒቴ» ያጌዳ።
ኡንቱንቱ ቤዒዴ፥ «ኢቼሹ ዳቡዋኔ ላዑ ሞሊያ» ያጌዲኖ።
39ዬሱሲ ባሬና ካሊያዋንታ ኣሳ ኡባ ጪታን ጪታን ሻኪ ሻኪዴ፥ ማታን ኡቲሳና ማላ ኣዛዜዳ። 40ኣሳይ ፄቱ ፄቱኔ ኢሻታሙ ኢሻታሙ ጪታን ጪታን ኡቴዲኖ። 41ዬሱሲ ኢቼሹ ዳቡዋኔ ላዑ ሞሊያ ኦይቂዴ፥ ፑዴ ሳሉዋ ፄሊዴ፥ ፆሳ ጋላቴዳ፤ ዳቦቱዋ ሜንዴ ኣሳው ጊሻና ማላ፥ ባሬና ካሊያዋንቱሲ ኢሜዳ፤ ቃሲ ላዑ ሞሊያካ ኡንቱንቱ ኡባው ሻኬዳ። 42ኣሳይ ኡባይ ሚዴ ካሌዲኖ። 43ሄዋፔ ጉዬ ኣቴዳ ዳቦቱዋ ዶካይኔ ሞሊያ ዶካይ ታማኔ ላዑ ዛምቤሊያ ኩሜዳዋ ዬሱሳ ካሊያዋንቱ ዴንዲኖ። 44ዳቡዋ ሜዳ ኣቱማ ኣሳይ ኢቼሹ ሻዓ።
ዬሱሲ ኣባ ቦላን ሃሜቲዴ ቤዳ
(ማት 14፡22-33፤ ዮህ 6፡15-21)
45ኤሌካ ዬሱሲ ሄ ጮራ ኣሳ ሞዪዚዴ፥ ባሬና ካሊያዋንቱ ዎንጊሪያን ጌሊዴ፥ ኣባፔ ሄፊንን ዴዒያ ቤቴሳይዳ ጊያ ካታማ ባሬፔ ሲንቲዴ ባናዳን ኣዛዜዳ። 46ኡንቱንታ ሞዪዜዳዋፔ ጉዪያን፥ ፆሳ ዎሳናው ዞዚያ ኬሴዳ።
47ሳዓይ ቃሚያ ዎዴ ዎንጊሪ ዎምባ ጊዱዋን ዴዒሺን፥ ዬሱሲ ዎምባፔ ጋፃን ባሬካ ዴዔ። 48ጫርኩ ኣ ካሊያዋንቱኮ ጫርኪያ ዲራው፥ ባሬና ካሊያዋንታ ዎምባ ቤታይ ሜቶያዋ ዬሱሲ ቤዒዴ፥ ኩቱ ዋሳና ሃኒያ ዎዴ ዎምባ ቦላን ሃሜቲዴ፥ ኡንቱንቱኮ ዬዳ፤ ኡንቱንታ ዬጊ ኣናው ኮዬዳ። 49ሺን ዎምባ ቦላን ኢ ሃሜቲሺን፥ ኡንቱንቱ ኣ ቤዒዴ፥ ባሬንቶ ሞይቲሊያ ማላቲና ዋሴዲኖ። 50ኣዪሲ ጎፔ፥ ኡንቱንቱ ኡባይ ኣ ቤዒዴ፥ ያሻ ኮኮሬዲኖ፤ ሺን ኤሌካ ዬሱሲ ኡንቱንታ፥ «ኣይኔ ባዋ፤ ታናቴኔ ያዮፒቴ» ያጌዳ። 51ዬሱሲ ኡንቱንቱና ኢቲፔ ዎንጊሪያን ጌሊና፥ ጫርኩ ዎፑ ጌዳ፤ ኡንቱንቱ ዳሮ ማላሌቴዲኖ። 52ኣዪሲ ጎፔ፥ ኡንቱንቱ ዎዛናይ ጆሌዳ ዲራው፥ ኡንቱንቱ ኡኪባ ኣኬኪቤይኪኖ።
ዬሱሲ ጌንሳሬፄን ሃርጋንቻቱዋ ፓዳ
(ማት 14፡34-36)
53ኡንቱንቱ ኣባ ፒኒዴ፥ ጌንሳሬፃ ጊያ ቢታ ጋኬዲኖ፤ ያኒ ዎንጊሪያ ጋፃ ሺሺ ቃቼዲኖ። 54ኡንቱንቱ ዎንጊሪያፔ ዎያዋን፥ ኣሳይ ኤሌካ ዬሱሳ ኤሪኔ 55ሄዋ ሄራን ዴዒያ ጋዲያ ኡባን ዎፄሬቲዴ፥ ሃርጋንቻቱዋ ሻንቻማን ቶኪዴ፥ «ዬሱሲ ዴዔ» ጊና ሲሴዳሳ ኣሁዋ ዶሜዳ። 56ዬሱሲ ቤዳሳ ኡባን ቄሪ ካታማን ጊዲና፥ ዎልቃማ ካታማን ጊዲና፥ ሄራ ጊዶን ጊዲናካ፥ ጌያ ዴንባን ኣሳይ ሃርጋንቻቱዋ ኣኮ ኣፌ። ዬሱሲ ባሬ ማዩዋ ማጫራ ጊዶፔኔ ሃርጋንቻቱዋ ቦሺሳና ማላ፥ ኣሳይ ኣ ዎሴዳ፤ ቦቼዳ ኡባይ ፓፄዳ።
Chwazi Kounye ya:
ማርቆሳ 6: dwrENT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2011, Wycliffe Bible Translators, Inc. All rights reserved.
Aprann plis bagay sou Ooratha Caaquwaa