LUK 24
24
Arhang Kamlokhi
(Mt 28.1-10; Mk 16.1-8; Jhn 20.1-10)
1Kheakü amu-khip akhuhbe nimung, yapsu mükikde, arü le püpürü liberübo arünü athsakhamkhi thüneathürabebo lubah kiuyuk ching ju yü. 2Lungto ju kiuyuk kheaknü lah-a bahkhi arünü ngü, 3tüshe küyimki arü yüzahkhea, Atungpuh Jisu pang müngü. 4Tüsho arü khide lümshangmangde alachoki, azhingzhing khimmih yihbah mihtsürü mahne arü miki zhip. 5Judüki arünü trede arü miro alo lim mükhümchoki, anenü arü ki tha, “Tümüde nüsanü asherü bolung arhang larü yimcho? 6#Mt 16.21; 17.22,23; 20.18,19; Mk 8.31; 9.31; 10.33,34; Lk 9.22; 18.31-33Api ha ching müla, tüshe arhang kamlodo! Api Galilee ching lachoki künangde apinü nüsa ki thakheanü lümkhitang, 7‘Mihtsürü Tsührü ju aneakrü mihtsürü khah ching jihbah ayümkihbah, tüsho asam nipü arhang kamlobah.’ ” 8Tüsho arünü api yubo lümkhit. 9Judüki arünü kiuyuk chingnü alode arübah harü alala thürükheak khülang le aningkhibo ki tha. 10Amüsüh-thsangyurübo ki harü tharübo ju Mari Magdalen, Joanna, Jakob abe Mari tüsho arü lung püpürü liberübo lakheah. 11Tüshe thiyubo ju arü ki makhakhi yu nangde alakheah, tüsho arünü ju akin müla. 12Tüshe Peternü wusubah kiuyuk lim alihde yü; tüsho ahingbe khimthünak lang yapde apinü mükhümbah ngü; tüsho ju dünjikhi müyinsahde apinü tsoabah.
Emmaus Limro Tsahkhi
(Mk 16.12-13)
13Kheakü ju nimung Jirusalem chingnü mail 7 bankhi kiulong khülang Emmaus lim mihtsürü mahne yüde alakheah. 14Tüsho anenü adünjikhi harü alala asukachih. 15Anenü harü dünkheak thaachihde tüsho asukachihde alachoki, Jisunü arübah ane lung tsah; 16tüshe ane müknü api mükheahkhitpü thsüde alakheah. 17Tüsho apinü ane ki tha, “Nüke thaachihde atsahkhi ju tümü a tüsho tümüde mulong tukthsüla?” 18Judüki ane bolung khülang amung Kleopanü api ki alo, “Nü lang Jirusalem ching hanrü a de, tüsho khihnishido dünjikhibo nünü mümükheahkhea de?” 19Tüsho apinü ane ki tha, “Tümü pürü?” Tüsho anenü api ki alo, “Nazarethrü Jisu dünkheak, shepü Thrünpuh tüsho mihtsürü alala miki rhimo le thiyu ching wuto lakhea, 20tüsho amükeam putungrübo le isa yakzanshuhrübonü api bahyukde asheshihpü tüsho ayümkihshihpü jih. 21Tüshe Israel rhokhitpü lakhi ju api ah de isanü mulonglamde alakheah. Tüsho kheaküshe ha alala dünjibah khihni mahsam nipü thsüchoh. 22Am, aliberübo khürünü mükikde kiuyuk ki arübah isa müyinsahshih. 23Küyimki arünü api pang müngükhea, yunirübonü api arhang lah de athakhi michih isa ki thade arü. 24Tüsho isa lung lakhi khürünü kiuyuk ching yü tüsho aliberübonü athakhi nangde ju ngü; tüshe arünü api müngü.”
25Judüki apinü ane ki tha, “O makharübo, tüsho wukihrü alalanü athakhi kinpü müniokheamkhi mulong! 26Khristanü harü thsünübah api müretahkhi ching müyüzahbea de?” 27Tüsho Mosa le wukihrübo kheaknü tankihbah amüsühyu alala ching anihbuh dünkheak ane ki thanaka huh.
28Arübo arü yüde alakhi kiulong khiungchoki limshude ayüpü nangde Jisunü thsüa huh. 29Tüshe anenü api ki müküpde thsungkih, “Ike lung binang, tümüde azhingpü thsüchoh; nimung hodo.” Jumonü apinü ane lung binpü yü. 30Küyimki api ju ane lung dükhüm ki binde alakhea, apinü yikhap lubah makshe jih tüsho yihnakbah ane kilim jih. 31Judüki ane mük khimshuh tüsho anenü api mükheahde kam; tüsho ane mük kinü api dükheakabah. 32Tüsho ane khülangnü khülang ki thaachih, “Apinü limro ching ike ki thiyu thachoki tüsho ike ki apinü amüsühyubo khimshuhchoki ike mulong alunglim maniukhea de?” 33Jumonü anenü ju kim chingnü tsahmusubah Jirusalem lim alode yü, tüsho thürükheak khülang lung püpürü mukhunga ngü, 34tüsho tha, “Atsütsü Atungpuh arhang kamloa lah, tüsho Simon ki akhiuka huhdo!” 35Tüsho limro ching dünjikhi le yikhap yihnakchoki anenü api mükheahkhi alala arü ki thaa huh.
Jisu Api Jingyanrübo ki Akhiukkhi
(Mt 28.16-20; Mk 16.14-18; Jhn 20.19-23; Yunir 1.6-8)
36Kheakü arübo harü thade alachoki, Jisunü arü bolung zhipbah tha, “Nüsa lung mungtsü laang.” 37Tüshe arübo müyinnim tüsho trede kam, tüsho arünü me khülang ngükhi nangde alakheah. 38Tüsho apinü arü ki tha, “Tümüde nüsa küpkhukcho? Tüsho tümüde nüsa mulong ching dukiuhlocho? 39I khahbo le I jingbo kheahang, ha I ah. I qiuang tüsho kheahang, tümütüsho nüsanü I ngükhi nangde me khülang a shihtsü tüsho robo mülachoh.” 40Küyimki apinü ha thakhamkheanü arü ki akhahbo tüsho ajing huh. 41Tüshe küyimki arünü asühachihde tüsho amüyinsahkhinü kheaküshe ju mükinkhea, apinü arü ki tha, “Ha ching nüsa tsühyungbe khürü la shi?” 42Jumonü arünü api kilim thüngüh ayimünkhi khülang jih, 43tüsho apinü ju lubah arü mikinü tsüh.
44Judüki apinü arü ki tha, “Harü ha I nüsa lung lachoki inü nüsa ki, Mosa yakzan tüsho Wukihrübo le Mungshikhünbo ching I dünkheak thaa lakhi alala dünjibah de athakhibo lah.” 45Tüsho arünü amüsühyubo anikhitpü thsüde apinü arü lümkhi khimshuhjih. 46Judüki apinü arü ki tha, “Ha thrüta lah, tüsho junangde Khrista ju thsünübah nimung asampü ching arhang kamlopü lakheah, 47junangde mulong müthripü tüsho neak bahpü api mung chingnü Jirusalem chingnü tankihbah trükshih alala ki thsangyuthsangrabah. 48Tüsho harü dünkheak nüsa thiyumütsanbo lah. 49#Yunir 1.4Kheahang, inü I Buhnü alokhikhi nüsa kheak yüshihchoh; tüshe akulimnü nüsa kheak wu marüyi khiungde nüsanü Jirusalem kiuto ching aleangang.”
Jisu Yükihkhi
(Mk 16.19-20; Yunir 1.9-11)
50 #
Yunir 1.9-11
Apinü Bethani khiungde arü bede wukhiuk, tüsho api khahbo shuhkihbah arü müngühjih. 51Küyimki apinü arü müngühjihkhea, arü kinü api chamachih tüsho yinmi lim bede yükih. 52Arünü api kingaün tüsho asühachihde Jirusalem lim alodarü; 53tüsho mutuklode arüngyam ching Thrünpuh shijihde alakheah.
Jelenleg kiválasztva:
LUK 24: YIMCBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.