Mateo 9
9
1(Yesu) batwelele mu bwato, bābukile, bafikile mu kibalo ki’e na mwinyi. 2Biabia, tala! abafikile kwadi muntu badi na busungu bwa kususa, badi mulale ha lusala; Yesu hakumona lukuluhilo lwabo, bākwile kwi sha busungu bwa kususa, eshi: Mwan’ande, Sangash’eshimba diobe, milwisho yobe yibakulekyelwa. 3Biabia bangi ba bafundji-ba-mikanda bākwile munda mwabo’shi. Uno (muntu) kwete ku kaa Efile Mukulu. 4Anka Yesu hakwiuka binangu biabo, bākwile’shi: A! kianutentekyesha myanda yibi mu mashimba enu, nkinyi? 5Kibakidi kubofula nkinyi, kwakula’shi: Milwisho yobe yibakulekyelwa, su kwamba ’shi: Buka otambukye? 6Anka, bianudia kwiuka’shi: Mwan’a muntu E na matalwa ha nsenga kulekyela milwisho, (biabia bakwile kwi slia busungu bwa kususa’shi): Ebwe, eboshe lusala lwobe, nda mu nshibo yobe. 7Biabia, bēbwele, bayile ku nshibo kwe. 8Bibumbu bia bantu habeumwene, abakanyine, tabatumbisha Efile Mukulu, ubahene matalwa biabia kwi bantu.
9Yesu, habakatukile kwanka, bamwene muntu atemunwa bu Mateo, badi mushale ku nshibo ya kilambwilo bamulungwile’shi: Ndonde, n’e bēbwele, tamulondo.
10Kumongo, habadi Yesu mushale mu nshibo kwete kudia, talai! kubalikite be bungi basangishi-ba-milambu na basodi ba myanda, babashalele na Yesu, na bana be ba bukishi. 11Habamwene Bafadiseo (uno mwanda) abalungwile bana-be-ba-bukishi’shi: Mulambukishi enu kiadila na basangishi-ba-milambu na basodi ba myanda nkinyi? 12Anka hauhushishe Yesu bālulwile’shi: Abo be musangyelo ta be na lukalo lwa ñanga, anka’bo be na busungu. 13Anka nuendei, nwambulei kishingulwilo kia uno. Nankyebe lusa, tankyebe kitahilo, mwanda nki mufikye kwitanyina balulame ba mashimba, ooo, anka, balwishi belangye mwishimba.
14Henyihaha bana-ba-bukishi ba Yoano babafikile kwadi’shi, atwe na Bafadiseo atushila biakudia misusa na misusa, anka bana-ba-bukishi bobe tabashilā, a nkinyi? 15Yesu bebālulwile’shi, A bana ba mu nshibo ya mubambi mukashi abeuku kudila ha ki ntubambi e n’abo su? Anka mafuku akafiki hakakwatwa mubambi inulume kwabadi, biabia abakashīdi biakudia. 16Takwi muntu akalamika kilaka kia mbwisha yihia ha kilamba kikulu, mwanda kiakia akishiki kianka akikalamunuka, n’ehunda adibotoka. 17Takwi muntu namu akēle malofu ahia mu milangi ya misekya ya kalā, mwanda misekya ayikatubuka, na malofu akasumbuka hashi, na milangi ya misekya ayikalwilwa; anka abēlā malofu ahia mu milangi ya misekya yihia, na bioso bibidi abibombeleshwa.
18Henyihaha bibākula yino myanda kwabadi talai, mutontshi bafikile, bamulangwidile’shi: Mwan’ande mukashi bāfu binobino, banda kufika, omutentekye eyasa diobe, biabia akekala na muwa. 19Yesu bēbwele, tamulondo, na bana be-ba-bukishi.
20Talanga, Mwana mukashi badi na busungu bwa kushila lwendenda, bihwa ekumi, na bihwa bibidi, bafikile kumongo kwe, bakumine mutelo wa kifwalwa kie.
21Mwanda bakwile munda mwe’shi: Su nankamukumu sunga ku mutelo wa kifwalwa kie, nankekala musangyela. 22Anka Yesu bealulwile, habamumwene bakwile’shi; Mwan’ande nyish’eshimba diobe, lukuluhilo lwobe lubakuhasha, na winyi mwana mukashi bekele musangyela ku yawa nguba. 23Hafikile Yesu mu nshibo ya mutontshi (a mu kitumbwilo) na habamwene bañomba na bibumbu bia bantu abel’eunga, 24E bebalungwile’shi: Ehengei, mwanda nsongwakashi tamufwe ooo, ntulo tadi mulale. Tabamuseha na kumukyengula. 25Anka kibumbu hakibatushishwa, e batwela mwanka, bamwatshile ku mboko, na winyi nsongwakashi babukile. 26Na nkumo yao yibahalakene mu yaya nsenga yoso.
27Hakukatuka Yesu kwanka, bampofu balume babidi abamulondele, tabamwele musase’shi: Etufwile lusa, obe Mwan’a Dafidi. 28Hakutwela mu nshibo, bampofu abafikile kwadi; Yesu bakwile kwabadi’shi: Anukumina’shi, neuku kwinukitshina kino su? Babamwalulwile’shi: E Mwanana. 29Biabia bebakumine meso abo’shi: Bu lukuluhilo lw’enu bikale binukitshinwe. 30Biabia meso abo ababulukile, na Yesu bebalungwile bikata’shi: Talai! tanwiukishanga muntu sunga ngumune. 31Anka’bo habakatukile, babahalakeshe nkumo ye mu yaya nsenga yoso.
32Habadi tabatuku, talai! abamufwishishe kamama kukwatshibwe na kikudi kibi. 33Habadi kikudi kibi kibabingibwa, kamama bākwile, na bibumbu bia bantu bibakanyine’shi: Biabia tambimwekwe kwibedi sunga mu Isalele, ooo. 34Anka Bafadiseo abakwile’shi: Abingā bikudi bibi na matalwa a mukishi wa luhando. 35Yesu batambukile mu bibalo na mu misumba yoso, kwete kulambukisha mu bitumbwilo biabo, na kulungula mukāndu-wibuwa wa bufumu, na kuhwisha bantu na busungu boso na kunemenwa koso kwa mbidi ya bantu.
36Anka habamwene bibumbu bia bantu, bebasambile, mwanda badi bahungile, badi abahalakenwe bu mikoko yishī na katshunga. 37Henyihaha balungwile bana-be-ba bukishi’shi: Bidimwanga bi bungi binyibinyi, anka baumbudi mbahela. 38Binyibiabia, nutekye kwi nfumu a bidimwanga’shi, atakule bafubi ba kuumbula’bio bie.
Jelenleg kiválasztva:
Mateo 9: NTLK52
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 1952 Alliance Biblique de la République Démocratique du Congo